اسلام آباد (مانيٽرنگ ڊيسڪ) سڌ سماءَ واري وفاقي وزير فواد چوڌري چيو آهي ته احتساب عدالت جو فيصلو تاريخي آهي، نواز شريف دنيا جي وڏن ڪرپٽ ماڻهن ۾ شامل آهي. اسلام آباد ۾ پريس ڪانفرنس ڪندي فواد چوڌري چيو ته حڪومت تي انتقامي ڪارروائي جو الزام مڙهيو پيو وڃي، پر اصل انتقام عمران خان کان ورتو ويو هو، کانئس 40 سالن جي ملڪيت ۽ ڪاروبار جا ثبوت ۽ دستاويز گهريا ويا هئا. فواد چوڌري چيو ته نواز شريف کي ٻار بچائڻ لاءِ نه آيا، حسين ۽ حسن ڏيهه ورندا ته کين سزا ملندي.
سامارو (ن پ ا )ساماري ۾ عورت گھريلو اڻبڻت سبب زھريلي جيت مار دوا پي ڇڏي، اسپتال داخل، ان ڏس ۾ سامارو شھر جي رھواسڻ 35 ورهيه عورت شمع زال مصري کوسو گھريلو اڻبڻت سبب گھر ۾ زھريلي جيت مار دوا پي خودڪشي جي ڪوشش ڪئي،جنهن کي وارث سول اسپتال سامارو کڻائي آيا،جتي ڊيوٽي ڊاڪٽر موجب عورت جي حالت سڌرندڙ ٻڌائي پئي وڃي.
ڪراچي (اسپورٽس ڊيسڪ) هونئن ته سموريون رانديون سڄي دنيا ۾ کيڏيون وڃن ٿيون، پر فٽبال کي عالمي سطح تي خاص مقبوليت حاصل آهي، ان راند سان ڪروڙين شوقينن جا دلي جذبا لاڳاپيل آهن.
سال 2018 ۾ به فٽبال سڀ کان گهڻي مشهور راند رهي، سڄي دنيا ۾ مداحن فٽبال راند جي وڏي واکاڻ ڪئي مزو ماڻيو.
2018 ۾ روس ۾ کيڏيل عالمي ڪپ جي فائنل ۾ فرانس ڪروشيا کي شڪست ڏئي عالمي چيمپئن بڻيو.
فيفا عالمي ڪپ 2018 جو فائنل ماسڪو ۾ کيڏيو ويو، جتي 1998 بعد فرانس پنهنجو ٻيون عالمي ڪپ ڪروشيا کي هارائي کٽيو.
ڪروشيا جي ٽيم ان عالمي ڪپ ۾ غيرمعمولي ڪارڪردگي ڏيکاريندي پهريون ڀيرو فائنل ۾ پهتي هئي، فرانس ۾ ٽيم جي ڪاميابي تي ڀرپور جشن ملهايو ويو.
ٽيم جي آجيان لاءِ روڊن تي ديوانن جا ميڙ هئا، ايونٽ ۾ 22 ڏينهن دوران عالمي ڪپ جون 64 ميچون روس جي 11 شهرن ۾ کيڏيون ويون.
ايونٽ جي شروعات هڪ وڏي اپ سيٽ سان ٿي، جنهن ۾ ميڪسيڪو دفاعي چيمپئن جرمني کي هارائي فٽبال شوقينن کي ڏندين آڱريون ڏياري ڇڏيون. ايونٽ سڀني جي فيوريٽ برازيل ڪوارٽر فائنل ۾ پويان پير ڪيا.
ڪروشيا جو لوڪا موڊرچ ٽورنامينٽ جو بهترين رانديگر قرار ڏنو ويو، انگلش ڪپتان هيرين ڪين سڀ کان وڌيڪ 6 گول ڪندڙ رانديگر رهيو، فرانس هاڻي 2022 ۾ قطر ۾ ٽائٽل جو دفاع ڪندو.
ڏھرڪي(ن پ ا)ڏھرڪي ۾ ٻن وحشي نوجوانن جي ڇهين ڪلاس جي معصوم شاگرد سان بدفعلي،وڊيو وائرل ٿيڻ بعد پوليس ٻنهي جوابدارن کي گرفتار ڪري ورتو،ان ڏس ۾ڏهرڪي القطب ٽائون جي رهواسي عبدلجبار ملڪ جي ڇهين ڪلاس جي معصوم پٽ نويد ملڪ سان بدفعلي جي وڊيو وائرل ٿيڻ بعد ڏھرڪي پوليس ٻنهي جوابدارن فضل سومرو ،علي پنجابي کي گرفتار ڪري ورتو آھي پوليس ٻنهي جوابدارن کي ميڊيا کان لڪائي ڇڏيو، معصوم نينگر جو والد عبدلجبار ٿاڻي نينگر کي ساڻ ڪري ٿاڻي پهتو ،جتي پوليس ڪيس داخل ڪرڻ کان لنوائيندي رهي.
نينگر جي والد عبدلجبار بدفعلي واري وڊيو صحافين کي ڏني ۽ چيو ته منهنجي معصوم پٽ نويد ملڪ سان زبردستي بدفعلي ڪري ان جي وڊيو رڪارڊ ڪري جوابدارن فضل سومرو ۽ علي پنجابي وڏو ظلم ڪيو آھي مون کي ان معاملي جي خبر تڏھن پيئي جڏھن وڊيو وائرل ٿي آھي.
زيادتي جو شڪار ٿيل معصوم نينگر نويد ملڪ ٻڌايو ته فضل سومرو ۽ علي پنجابي مون کي زبردستي موٽر سائيڪل تي کڻي وڃي ڏهر واهه ڀرسان ڪمند جي فصل ۾ زبردستي ٻنهي جوابدارن واري واري سان زيادتي ڪئي.
جوابدارن کي بچائڻ لاء بااثر سرگرم ٿي ويا،باثرن جون نينگر جي والد کي ڪيس داخل نه ڪرائڻ لاء فونون,نينگر جو والد ٿاڻي اندر سخت پريشان بيٺل ھيو,ڏهرڪي جي ايس ايڇ او امام الدين چانڊيو چيو ته وڊيو وائرل ٿيڻ بعد اسان فريادي کي گهرائي ورتو آھي فريادي ڪيس داخل ڪرائيندو ته ڪيس داخل ڪندا سين،جڏھن ته آخري اطلاعن تائين ڪيس داخل نه ٿي سگهيو هيو .
خيرپورناٿن شاهه (ن پ ا) ڪڪڙ ۽ ڪي اين شاهه پوليس جو ڳوٺاڻي تي تشدد،ڳوٺاڻن جو متاثر کي کڻي ڪڪڙ ٿاڻي جو گهيراءُ ڪيو،اطلاع تي ڊي ايس پي پهچي متاثر کي تعلقه اسپتال ڪي اين شاهه کڻائي آيو.ان ڏس ۾ ڳوٺ ٻيلي پتڻ جو رهواسي ڳوٺاڻو لياقت علي ٻٻر ڳوٺ وڃي رهيو هيو ته ڪي اين شاهه ۽ ڪڪڙ ٿاڻي جي پوليس اهلڪارن ڪاري موري وٽ مٿس سخت تشدد ڪري فرار ٿي ويا جنهن بعد ڳوٺاڻن ،سندس ڀاءُ راشد ٻٻر ۽ سندس ماءُ نظيران ٻٻر جي اڳواڻي ۾ ڪڪڙ ٿاڻي جو گهيراءُ ڪري پوليس خلاف سخت نعري بازي ڪئي ۽ مڇريل ڳوٺاڻن ڪڪڙ پوليس تي لعنتون وڌيون ۽الزام هنيو ته ڪڪڙ ۽ ڪي اين شاهه پوليس جي اهلڪارن بشير شاهه ۽ ٻين بي گناهه لياقت ٻٻر تي تشدد ڪيو آهي،اهڙي اطلاع تي ڊي ايس پي ڪي اين شاهه ڪڪڙ پهچي متاثر ڳوٺاڻي کي ڪي اين شاهه تعلقه اسپتال کڻائي آيو، جتي سندس علاج هلندڙ هو، ڊي ايس پي ڪي اين شاهه رابطي تي ٻڌايو ته مان پاڻ واقعي جي جاچ ڪريان ٿو ،سڀاڻي ٻنهي ڌرين جو ڳالهيون ٻڌي جيڪو ڏوهي نڪتو ان خلاف ڪيس داخل ڪيو ويندو.
جيڪب آباد(رپورٽر) جميعت علماء اسلام جي مرڪزي ترجمان ۽ متحده مجلس عمل جي رابطا ڪميٽي جي سربراھ حافظ حسين احمد چيو ته ميان نواز شريف کي العزيزيه ريفرنس ۾ سزا “عزيزن” جي بدولت ملي آهي، لڳي ٿو ته پوري کيپ “اسيمبلي” کان “اڊيالا” منتقل ٿي ويندي. “پنهنجي اخبار” سان ڳالهائيندي حافظ حسين احمد چيو ته العزيزيه ريفرنس ۾ جيڪڏهن نواز شريف جا پٽ پيش ٿين ھا ته اڄ معاملو مختلف ھجي ھا، العزيزيه ريفرنس جو فيصلو عزيزن جي بدولت آيو آهي، ھن چيو ته احتساب عليم کان وٺي عليمه تائين ٿيڻ کپي،اسان ته چئون ٿا احتساب سڀ جو ٿيڻ کپي ۽ احتساب کي انتقام ۾ تبديل نه ڪيو وڃي، ھن چيو ته ملڪ ۾ جيڪا صورتحال موجود آهي اگر اھا صورتحال رھي ته پوءِ پوري کيپ “اسيمبلي” کان “اڊيالا” منتقل ٿي ويندي، ھڪ سوال جي جواب ۾ ھن چيو ته اپوزيشن کي اپوزيشن ئي ڪرڻ کپي مگر اپوزيشن ان پوزيشن ۾ ناهي، اڄ به پنجاب جو ميان ۽ بي بي جي ميان جي حوالي سان جيڪو ڪجھ ٿي رهيو آهي ان باوجود ھي پاڻ ۾ اپوزيشن کي متحد ڪرڻ لاءِ تيار ناهن.
اسلام آباد (رپورٽر) اسلام آباد ۾ پوليس پٿراءَ جو نون ليگ ڪارڪنن تي ڪيس داخل، دهشتگردي جا قلم لاڳو ڪيا ويا، احتساب عدالت ٻاهران ن ليگ ڪارڪنن پاران پوليس اهلڪارن تي پٿراءِ واري معاملي جو رمناني ٿاڻي تي ن ليگ ڪارڪنن خلاف ڪيس داخل ڪيو ويو، جنهن ۾ دهشتگردي جا قلم لاڳو ڪيا ويا آهن، ايف آءِ آر ۾ چيو ويو آهي ته ڏنڊن ۽ پٿرن سان ڪارڪنن اهلڪارن کي حملو ڪري زخمي ڪيو، جوابدارن سرڪاري ڪم ۾ مداخلت ڪري خوف ۽ هراس پکيڙي پکيڙيو، جيڪو دهشتگردي ايڪٽ ۾ اچي ٿو.
سکر(رپورٽ: ممتاز بخاري) هڪ سال گذري وڃڻ بعد به ورهاڱي کان اڳ قائم هندو پنچائت سکر جون چونڊون نه ٿي سگهيون آهن. چونڊن جي تاريخ 17 نومبر 2018ع هئي پر ڪجهه ڏينهن اڳ هڪ ڌر جي ڪمل ڪمار، جئه رام ۽ ٻين سکر هاءِ ڪورٽ ۾ پٽيشن داخل ڪرائي ته هندو پنچائت ستن عهديدارن تي ٻڌل آهي پر غير قانوني طور يارنهن عهدن تي چونڊون ڪرايون پيون وڃن. جنهن تي ڪورٽ سڳوري پاران چونڊون روڪڻ جا حڪم ڏئي ڊي سي سکر کي حقيقت معلوم ڪري رپورٽ جمع ڪرائڻ جون هدايتون ڏنيون. تڏهوڪي ڊي سي الاهي بخش ميتلي جاچ ڪرڻ بعد ڌرين کي گهرائي ميٽنگ ڪئي ،جنهن ۾ اها ڳالهه ظاهر ٿي ته اڳ ڪيل چونڊن ۾ قاعدا اورانگهيا ويا. اهڙي رپورٽ هن ڪورٽ سڳوري ڏانهن به موڪلي ڇڏي. ان کان پوءِ هندو پنچائت جون گڏجاڻيون به ٿيون پر چونڊون پوءِ به نه ٿي سگهيون. مکي ايشور لال جي پينل جو چوڻ آهي ته اهي ڪورٽ جي حڪمن جي انتظار ۾ آهن. هوڏانهن اڳ رٿيل چونڊن ۾ ٻن عهدن تي رڳو هڪ هڪ اميدوار ڍولومل ۽ وڪيل شيوڪ ڪمار فارم ڀريو هو ،انهن به هاءِ ڪورٽ کي رجوع ڪيو ته کين بنا مقابلي عهديدار ڊڪليئر ڪيو وڃي. ان سلسلي ۾ پنهنجي اخبار پاران ڍولو مل سان رابطو ڪيو ويو ته سندس چوڻ هو ته مان جنرل سيڪريٽري تي بنامقابلي ڪاميابي ماڻي، انائونس نه ڪيو ويو ته ڪورٽ ۾ ويو آهيان پر وري نگران پنچائت ڳالهايو ۽ مان چپ ڪري ويس ان باوجود ڪا اڳڀرائي ناهي، حالانڪه ڪورٽ جو به ڪو اسٽي ناهي. هوڏانهن مکي پهرين پٽيشن داخل ڪندڙ جئه رام ۽ ڪمل ڪمار جو چوڻ آهي ته چونڊون دير ٿيڻ جو ڪو جواز ناهي قانون ۽ قاعدن موجب چونڊ ٿئي ته اسان کي ڪو اعتراض ناهي. هندو پنچائت جي چونڊن جي ڪمشنر سريچند رابطو ڪرڻ تي ٻڌايو ته اسان جو ڪو مسئلو ناهي اسان کي جڏهن به ڊاڪٽر دوارڪي جي سربراهي ۾ ٺهيل پنچائت جي نگران باڊي چوندي اليڪشن ڪرائينداسين. اسان کي سندن هدايت جو انتظار آهي. هوڏانهن هندو پنچائٽ جي مکي ايشورلال جو چوڻ آهي ته ڪورٽ سڳوري ڊي سي کي چيو هو ته ڌرين کي ٻڌي قاعدن موجب چونڊون ڪرايو پر ڊي سي ڳالهيون ٻڌيون جنهن ۾ برابر باءِ لاز ۾ فرق هو. پر هن رپورٽ ڪورٽ کي موڪلي ان ڪري هاڻ معامرو ڪورٽ ۾ آهي. هن چيو ته هونئن ته مکي اسان آهيون منهنجو ڏاڏو ڀڳوانداس پهريون مکي هو پر هاڻي جيڪو صدر ٿي. صدر جي اميدوار جواهر لال جو چوڻ هيو ته ڪجهه مهينا اڳ ڳئون شلا نگران پنچائت کي دلچسپي وٺي چونڊون ڪرائڻ گهرجن اسان سان واعدو به ڪيو اٿن، اسان لکي به ڏنو. ڪورٽ جي رڪاوٽ جي ڳالهه آهي ته ترت اوڏانهن وڃن. هن چيو ته جيڪو صدر هوندو اهو ئي مکي به هوندو. اسان چاهيون ٿه هر 18 سالن جي نوجوان کي ووٽ جو حق هجي باقي هو گهراڻي تي ڪرڻ ٿا چاهين، باقي اسان ان ڳالهه ۾ هنن سان متفق آهيون ته عورتن کي پنچائت جي چونڊن ۾ ووٽ جو حق نه هجي. نائب صدر جي اميدوار رنجيت ڪمار چيو ته نگران پنچائت نوجوانن جي رستا روڪ ڪري ٿي. هي نوجوانن جو ووٽ ڪرائڻ کان روڪين ٿا. نگران ۽ مکي گڏجي ڄاڻي واڻي اليڪشن کي اينگهائي رهيا آهن. هاڻ سو سال پراڻا قانون نه هلندا. هن چيو ته اليڪشن نه ٿيڻ جي ڪري ڪميونٽي جي سوين مسئلا حل نه ٿا ٿين. اسان چلهه تي نه پر شناختي ڪارڊ تي ووٽ ڪرائڻ جو مطالبو ڪيون ٿا. هوڏانهن نگران پنچائت جي صدر ڊاڪٽر دوارڪا داس رابطي ڪرڻ تي ٻڌايو ته ڪورٽ ۾ 15 جنوري تي ٻڌڻي آهي اها جيڪو چوندي ڪنداسين. باقي ووٽ چلهه تي ئي ٿيندا. ڪا ايم پي اي جي اليڪشن ناهي جو شناختي ڪارڊ تي ٿئي ۽ نه وري عورتن کي ووٽ ڏيڻ جو اختيار آهي.
اسلام آباد (م ڊ) اڳوڻي وزيراعظم ميان نوازشريف احتساب عدالت جي فيصلي کانپوءِ شاعراڻي انداز ۾ مختصر گفتگو ڪئي، نوازشريف ميڊيا سان ڳالهه ٻولهه ڪندي چيو ته ”هم تو هين پٿر کي لوگ، يه دک به سهه لينگي ، جائين تو جائين ڪهان، ڪوئي سنتا هي ڪهان؟“ سندس چوڻ هو ته ڪرپشن نه ڪرڻ تي ضمير مطمئن آهي.
ٺل)ن پ ا)واٽر ڪميشن سربراه امير هاني مسلم جي حڪم تي ٺل جي نيو بيڪن اسڪول ڀرسان نالي تي قبضو ڪري گهر اڏيندڙ قبضا گير خلاف ڊپٽي ڪمشنر جيڪب آباد عمران علي جي نگراني ۾ آپريشن ڪري 3 گهر ڊاٺو ويا،جتي ڊپٽي ڪمشنر جيڪب آباد عمران علي ميڊيا سان ڳالهائيندي چيو ته ڪنهن کي قبضو ڪرڻ نه ڏينداسون.
انقره (انٽرنيشنل ڊيسڪ) ترڪي شامي سرحد تي فوج جي انگ ۾ واڌ شروع ڪري ڇڏي آهي، پرڏيهي ميڊيا موجب ڪليس جي سرحد تي ٽينڪن ۽ گرينڊ لانچرن سان ليس فوج جو هڪ ٽولو پهتو.
هوڏانهن سرحد جي ٻي پار ترڪ نواز ٽولي ڪردن جي انتظام هيٺ شهر منبج طرف وڌي رهيا آهن.
ٻي پاسي آمريڪي صدر ڊونالڊ ٽرمپ ٽوئيٽر تي لکيوو هو ته شام ۾ داعش جي رهيل طاقت جو خاتمو ترڪ صدر ڪندو.
اسلام ڪوٽ (ن پ ا)روينيو انتظاميه پاران حد دخلين خلاف آپريشن شروع،انتظاميه اسلام ڪوٽ باءِ پاس تي حددخلين خلاف آپريشن ڪندي بااثرن بجاءِ غريبن جا اجها پٽ ڪري ڇڏيا،انتظاميه روڊ کان سوين فوٽ پري اڏيل جهوپڙا به ڊاهي ڇڏيا،روينيو انتظاميه پاران اسلام ڪوٽ ۾ حددخليون هٽائڻ جي لاءِ آپريشن شروع ڪيو ويو،انهي سلسلي ۾ اسسٽنٽ ڪمشنر شنڪر لال مختيارڪار عبدالغفار لاکير جي اڳواڻي ۾ روينيو ۽ ميونسپل عملي پاران وڏي مشينري ذريعي مٺي اسلام ڪوٽ روڊ کان ڪارروائي شروع ڪرڻ بدران اسلام ڪوٽ ننگرپارڪر روڊ تي اونڌهيو لڪ کان آپريشن شروع ڪري غريبن جا گهر ڊاهڻ شروع ڪيا،صبح سوير کان شروع ڪيل آپريشن سڄو ڏينهن جاري رهيو،روينيو انتظاميه پاران شهر جي باء پاس روڊ جي سينٽر جي ٻنهي پاسن کان هڪ سو ڏھ فوٽ جي ماپ ۾ ايندڙ اڏاتون هٽائڻ بجاءِ ٻه سئو فوٽ پري اڏيل غريبن جي اجهن ۽ جهوپڙين کي به ڊاهي پٽ ڪري ڇڏيو،متاثر دانهون ڪندا رهيا پر انتظاميه ڪنهن جي به نه ٻڌي،متاثر رهواسين پ پ ايم پي اي فقير شير محمد بلالاڻي آڏو به سخت احتجاج ڪندي دانهيندي چيو ته انتظاميه پنهنجي ڪيل فيصلي تان ڦري ويئي آهي،انتظاميه پهرين ٻڌايو ته روڊ جي سينٽر کان 110 فوٽ جي ايريا اندر ايندڙ اڏاوتون هٽايون وينديو.اسان انهي تي عمل ڪرڻ لاء تيار هئاسين،پر انتظاميه طئه ٿيل ماپ کان مٿي 2 کان 3 سئو فوٽ تائين ڪاروائي ڪري اسان جا گهر توڙي جگهيون ڊاهي رهي آهي ،پ پ ايم پي اي فقير شير محمد بلالاڻي چيو ته ڪنهن سان به زيادتي ٿيڻ نه ڏبي،انتظاميا سان ڳالهايون ٿا،جيڪا به ڪاروائي ٿي اهو قانون مطابق ۽ برابري جي بنيادن تي ڪئي وڃي،ٻي پاسي مختلف سياسي سماجي ڌرين پاران اڄ پرامن ڌرڻو هڻڻ جو سڏ ڏنو ويو آهي،انهي سلسلي۾ پ پ پ اڳواڻ سيد ڀورل شاھ رابطي تي ٻڌايو ته اسان هڪ گڏجاڻي ڪئي جنهن ۾ مختلف سياسي سماجي اڳواڻن حاجي عاقيل لنجو،شريف هنگورجو،وڪيل غلام مصطفئ هنگورجو،سهراب راهمون،حاجي ثناءُالله راهمون،گۡل شير وسائيپوٽو،علي نواز مهراڻپوٽو،محسن لنجو ۽ ٻين شرڪت ڪئي، گڏجاڻي ۾ فيصلو ڪيو ويو ته اڄ ڊي سي ٿرپارڪر خلاف اسلام ڪوٽ جي ٽائون موڙ تي پرامن احتجاجي ڌرڻو هنيو ويندو،اڄ پرامن احتجاج رڪارڊ ڪرايو ويندو،انهيءَ لاءِ اسان واپاري ڀائرن کي به عرض ڪيو آهي ته اهي به اسان جو ساٿ ڏين ۽ ضرورت پئي ته شٽر بند هڙتال به ڪئي ويندي،
پيرجوڳوٺ:( ن پ ا) ٽنڊومستي لڳ تيز رفتار مزدا جو موٽرسائيڪل کي زوردار ٽڪر، 8 سالا معصوم ٻارڙي فوت، سندس پيءُ، ماءُ سخت زخمي ان ڏس ۾ ٽنڊومستي قومي شاهراه ڀرسان ٽنڊومستي پوليس اسٽيشن اسٽاپ وٽ تيز رفتار لوڊر مزده سامهو هلندڙ موٽرسائيڪل کي زوردار ٽڪر هنيون جنهن جي نتيجي ۾ 8 ورهين جي معصوم ٻارڙي شڪيلان ڌيء رانوت شنباڻي موقعي تي فوت ٿي وئي، جڏهن ته سندس پيءُ رانوت شنباڻي ۽ ماءُ امينت شنباڻي سخت زخمي ٿي پيا، اطلاع تي ٽنڊومستي پوليس پهچي لاش ۽ زخمين کي خيرپور اسپتال منتقل ڪرايو جتان ضروري ڪاروائي بعد لاش وارث وارثن حوالي ڪيو، ٽرالر ڊرائيور فرار ٿي ويو.
اسلام آباد (بيورو رپورٽ) سينيٽ جي پيٽروليم ڪاميٽي جي اجلاس ۾ سنڌ مان چونڊيل ميمبرن 70 سيڪڙو گئس پيداوار ڏيندڙ سنڌ صوبي ۾ گيس لوڊشيڊنگ ٿيڻ تي سخت احتجاج ڪندي ان عمل کي آئين جي خلاف ورزي قرار ڏنو آهي. سنڌ جي ميمبرن پاران سئي سدرن گئس ڪمپني جي بريفنگ تي عدم اطمينان جو اظهار تفصيل موجب سينيٽر محسن عزيز جي سربراهي ۾ پيٽروليم ۽ قدرتي وسيلن بابت سينيٽ جي اسٽينڊنگ ڪاميٽي جو اجلاس ٿيو، اجلاس دوران سنڌ ۾ گئس لوڊشيڊنگ واري مامري تي غور ڪيو ويو. ڪاميٽي اجلاس ۾ احتجاج ڪندي سنڌ مان چونڊيل سينيٽر امام الدين شوقين چيو ته سنڌ ۾ ايڪسپورٽ صنعت کي گئس فراهمي بند ڪئي وئي آهي. سنڌ ۾ گيس جي کپت گھٽ ۽ پيداوار گھڻي آهي پر ان هوندي به سنڌ ۾ اڄ به گئس جي فراهمي نه ٿي آهي. پيپلز پارٽي جي سينيٽر شيري رحمان چيو ته سنڌ 70 سيڪڙو گئس جي پئداوار ڏئي ٿي. سنڌ جي گئس ڪاڏي وڃي رهي آهي. ڪراچي سميت سڄي سنڌ جا ماڻهو سراپا احتجاج آهن. گئس جو مامرو گڏيل مفادن واري ڪائونسل جو ڪيس آهي پر حڪومت آئين جي ڀڃڪڙي ڪري رهي آهي. پيپلز پارٽي جي سسئي پليجو چيو ته آئين چوي ٿو ته قدرتي گئس سميت قدرتي وسيلن جي پئداوار تي پهريون حق پئداوار ڏيندڙ صوبي جو آهي پر ائين نه ٿي رهيو آهي. هن چيو ته پهريان تحريڪ انصاف چوندي هئي ته نواز حڪومت ننڍن صوبن کي نظرانداز ڪري رهي آهي، هن وقت نواز حڪومت نه آهي پر جنهن پاليسي جو تحريڪ انصاف ذڪر ڪندي هئي اها تبديل نه ٿي آهي. سنڌ ۾ گئس لوڊشيڊنگ جي مسئلي کي فوري حل ڪيو وڃي. سئي سدرن گئس ڪمپني جي مينيجنگ ڊاريڪٽر امين راجپوت ڪاميٽيءَ کي ٻڌايو ته 115 ملين مڪعب فٽ روزاني جو شارٽ فال آهي. ڪاميٽي جي ميمبر سينيٽر شيري رحمان چيو ته سنڌ جا چلها وسامي چڪا آهن، اوهان ڪيئن ٿا چئو ته مسئلو حل ٿي ويو آهي. شيري رحمان چيو ته سنڌ حڪومت سئي سدرن جي جواب مان مطمئن نه آهي. سئي سدرن جي ايم ڊي چيو ته 660 ايم ايم سي ايف ڊي گئس گھريلو ۽ ڪمرشل شعبي کي ڏيئي رهيا آهيون. هن چيو ته زيرو ريٽڊ صنعت کي 165 ايم ايم سي ايف ڊي گئس مهيا ڪري رهيا آهيون. سئي سدرن جي مئنيجنگ ڊاريڪٽر چيو ته عام صنعت کي 75 ملين مڪعب فٽ گئس ڏني پئي وڃي. هن چيو ته 65 ايم ايم سي ايف ڊي گئس سي اين جي جي شعبي کي ملي رهي آهي. ايم ڊي چيو ته 100 ايم ايم سي ايف ڊي گئس ڪي اليڪٽرڪ کي مهيا ڪئي پئي وڃي. هن چيو ته اسان کي هڪ هفتي جي مهلت ڏني وڃي. جنهن تي سينيٽر شيري رحمان چيو ته نه، اهڙي طرح ته سيارو ئي گذري ويندو. هن چيو ته ماڻهو چئي رهيا آهن ته وٽن گئس ڪونهي ۽ سئي سدرن تفصيلن پيش ڪرڻ لاءِ هڪ هفتو گھري رهي آهي. تنهن تي ايس ايس جي سي جي سربراھ چيو ته مسئلي کي حل ڪرڻ لاءِ ڪم ڪري رهيا آهيون. هن چيو ته هن سال ڪيپٽوَ بجلي گھرن لاءِ گئس جي رسد بند ڪئي آهي. ايم ڊي چيو ته چئن ڏينهن ۾ لوڊ مئنيجمينٽ پلان تي عملدرآمد سان گھريلو گئس جي رسد وارو مسئلو حل ٿي ويندو. سينيٽر امام الدين شوقين چيو ته سنڌ گئس جي پئداوار ڏئي ٿي پر اسان کان ٻاهريان گھرايل گئس واريون قيمتون ورتيون پيون وڃن. هن چيو ته نئين ڪنيڪشنن ۾ قيمتون ڇو ٿيون وڌايون وڃن. سينيٽر امام الدين شوقين چيو ته اها سنڌ سان زيادتي آهي. ڪاميٽي جي چيئرمين سينيٽر محسن عزيز چيو ته قلات، زيارت، مستونگ ۾ گئس پريشر جو مسئلو هو اهو حل ڪيو ويو جيڪو رڳو پندرنهن ڏينهن ٺيڪ رهيو. سئي سدرن جي ايم ڊي ڇيو ته مستونگ ڏانهن ويندڙ پائيپ لائين ۾ مسئلو آهي ان کي ٺيڪ ڪيو ويندو. سئي ناردرن گئس پائيپ لائين جي مئنيجنگ ڊائريڪٽر امجد لطيف چيو ته اسان جو گئس لاسز 2014-15 ۾ 10.9 سيڪڙو هو. هن چيو ته 2016-17 ۾ اسان جو گئس لاسز 39 هزار 268 ملين مڪعب فٽ هو جيڪو 8.8 سيڪڙو ٿئي ٿو. ايم ڊي ناردرن گئس چيو ته 2016-17 ۾ پنجاب ۾ 7.31 سيڪڙو ۽ خيبرپختونخواھ ۾ 21.7 سيڪڙو لائين لاسز هئا. هن چيو ته ڪرڪ ۾ گئس چوري بابت ڪاميٽيءَ خيبرپختونخواھ جي چيف سيڪريٽري کي خط لکڻ جو فيصلو ڪيو. سئي سدرن جي ايم ڊي چيو ته بلوچستان ۾ زيارت، قلات ۾ مسئلو آهي جتي 25 هزار روپين تائين بل اچي ٿو ۽ ماڻهو اهو بل ادا نه ٿا ڪري سگھن. هن چيو ته انهن علائقن لاءِ 2000 فڪس ٽيرف جي تجويز آهي. هن چيو ته بلوچستان ۾ 49 سيڪڙو لائين لاسز آهي. ڪاميٽي جي چيئرمين چيو ته 2000 هزار جو بل سمجھ کان ٻاهر آهي.
ٺل(رپورٽ: مير ڀٽي)ٺل تعلقي مان ٽن ٻارڙن سميت اغوا ٿي ويل 7 يرغمالين کي انتظاميه بازياب نه ڪرائي سگهي آهي، جڏهن ته مغوين جي گهرن ۾ روڄ راڙو متل آهي. ان سلسلي ۾ ٺل ڀرسان پ پ ايم پي اي ڊاڪٽر سهراب سرڪي جي ڳوٺ ڳڙهي حسن سرڪي مان پوڻا 12 سال اڳ اغوا ٿي ويل معصوم 8 ورهين جي نينگري فضيلا سرڪي،ڳوٺ محمد اسماعيل کوسو مان پنج سال اڳ اغوا ٿي ويل نينگر حافظ الطاف حسين کوسو،ڪريم بخش کوسو مان پنج سال اڳ اغوا ٿي ويل نينگر احسان احمد کوسو، ساڍا ٽي سال اڳ ڪوئٽه ويندي ڊيرا مراد جمالي وٽان هٿياربندن هٿان اغوا ٿي ويل ڳوٺ پيارو کوسو جا رهواسي حافظ محسن کوسو، عبدالغور عرف بصرو جمالي، ڳوٺ حاجي فيض محمد کوسو جو رهواسي اڪبر علي کوسو،اڍائي سال اڳ ٺل اي سيڪشن ٿاڻي جي حد شهيد بينظير ڪانٽي وٽان اغوا ٿيل الهڏنو لاشاري جو ڪوبه ڏس پتو نه آهي،پوليس انتظاميه مغوين جا اغوا ڪيس داخل ڪرڻ جي باوجود ڪاروائي کان نابري واري ڇڏي آهي،جنهن بعد مغوين جي وارث پوليس آفيسرن جي آفيسن جا چڪر ڪاٽي ڪاٽي ٿڪجي پيا آهن،گذريل ڪيتري ئي عرصي کان وٺي مغوين جا وارث سراپا احتجاج بڻيل آهن،پر انهن جي داد فرياد ٻڌڻ وارو ڪوبه نه آهي، ٺل ڀرسان اغوا ٿي ويل نينگري فضيلا سرڪي جي ڪيس کي پوليس انتظاميه بند ڪري ڇڏيو آهي،نينگري جي اغوا ڪيس ۾ گهربل جوابدارن جي گرفتاري نه ٿيڻ جي ڪري وارث پوليس مان مايوس بڻيل آهن، ان سلسلي ۾ ميڊيا سان ڳالهائيندي نينگري فضيلا سرڪي جي والد عبدالرزاق سرڪي ٻڌايو ته پوليس پاران رڳو ڏٽا ۽ آسرا ڏنا پيا وڃن نياڻي جي اغوا ڪيس ۾ جوابدار قادر بخش عرف قادرو،ڪريم بخش عرف ٻوڙو سرڪي،الله ورايو،الله رکيو ۽ بابو سرڪي گهربل آهن جن کي پوليس گرفتار ناهي ڪيو، هن مطالبو ڪيو ته منهنجي نينگري جي ڪيس ۾ گهربل جوابدارن کي گرفتار ڪري منهنجي نينگري فضيلا سرڪي کي بازياب ڪرايو وڃي . پنج سال اڳ اغو اٿيل نينگر احسان کوسو جي پي حبيب الله کوسي ٻڌايو ته منهنجي پٽ کي پنج سال اڳ جوابدارن اغوا ڪيو پر پوليس اڃان تائين بازياب نه ڪرائي سگهي آهي. مغوين جي وارثن پاران انتطاميه کان مطالبو ڪيو ويو آهي ته مغوين کي جلد کان جلد بازياب ڪرايو وڃي، ٻي صورت ۾ اسان سخت احتجاج ڪنداسين.