ڀٽ شاهه )ن پ ا)ڀٽ شاهه ڀرسان ڳوٺ سليم راهو ۾ بجلي تار مان ڪرنٽ لڳڻ ڪري 16 ورهيه نوجوان فوت ٿي ويو ،ڳوٺ سليم راهو ۾ پاڻي جي موٽر مان ڪرنٽ لڳڻ ڪري 16 ورهين جو رميش ولد پهلاج مينگهواڙ زخمي ٿي پيو، جيڪو اسپتال نيندي رستي ۾ فوت ٿي ويو، وارثن موجب فوتي ٿيل نوجوان پاڻي جي موٽر سان موٽر سائيڪل کي ڌوئي رهيو هو تـه کيس تار مان ڪرنٽ لڳو، جنهن کي بروقت اسپتال پهچائڻ جي ڪوشش ڪئي مگر هو رستي ۾ فوت ٿي ويو ـ واقعي تي گهر ۾ روڄ راڙو مچي ويو ۽ وارث زاروقطار روئيندا رهيا.

دادو(ن پ ا) ميهڙ جي بي سيڪشن ٿاڻي جي حد مان 5 ڏينهن اڳ پوليس اهلڪارن هٿان مبينا کنڀي گم ڪيل واپاري جو معاملو ڳجهارت بڻيل آهي، جڏهن ته مل ملڪ روشن شيخ ميهڙ جي اي سيشڪن ۽ حيدرآباد جي ڀٽائي ننگر ٿاڻي تي 50 لک رپين جي فراڊ جا ڪيس داخل ڪرائي ڇڏيا آهن. مل مالڪ روشن شيخ ڪيس ۾ ڄاڻايو آهي ته ضمير ڏيرو 50 لک رپين جو ڀاڻ ورتو، پر سندس چيڪ پاس ناهن ٿيا. هوڏانهن واپاري جي ڀاءُ مولابخش “پنهنجي اخبار” کي ٻڌايو ته پوليس اسان مٿان ئي ڀاءُ کي گم ڪرڻ جو الزام لڳائي معاملو لئه مٽي ڪرڻ جي ڪوشش ڪري رهي آهي، جيڪو ظلم آهي. ٻئي پاسي پوليس ٻڌايو ته مامرو ڏيتي ليتي جو لڳي رهيو آهي، واپاري اغوا ٿيو آهي يا کيس ڪنهن کنڀيو آهي، ان حوالي سان گهڻ رخي جاچ ڪئي پئي وڃي.

ٽنڊومحمدخان: سنڌ سرڪار 2018 ۾ سي ايم اسڪيم تحت ضلعي ٽنڊو محمد خان جي 82 اسڪولن کي ماڊل اسڪول بنائڻ لاءِ ڪروڙين روپيه جاري ڪيا، جنهن تحت هر اسڪول تي 1 کان 15 لک رُپين تائين خرچ ڪرڻا هئا، پر لاڳاپيل اختيارين عام ماڻهن کي فائدو نه ڏنو ۽ نتيجي ۾ پئسا خرچ نٿ ٿيڻ سبب 2018 ۾ رکيل فنڊز جون رقمون ليپس ٿي ويون. هن اسڪيم تحت 68 پرائمري اسڪول ۽ 14 سيڪنڊري اسڪول ماڊل اسڪول طور تيار ڪيا ويندا، جن ۾ 6 اهم نقطا شامل ڪيا ويا آهن، جن ۾ هر ماڊل اسڪول ۾ 6 ڪمرا، هر ڪلاس الڳ ، هر ڪلاس ۾ الڳ استاد هئڻ لازمي آهن. جڏهن ته ماڊل اسڪول جي بنيادي سهولت ۾ صاف پاڻي ، واش روم ، بائونڊري وال ۽ بجلي جون سهولتون موجود هونديون ، جڏهن ته ميڊيم وائيز هر ٻار کي سرڪاري ڪتاب مهيا ڪيا ويندا ۽ هر ماڊل اسڪول ۾ 17 گريڊ جو هڪ هيڊماسٽر مقرر ڪيو ويندو .

ٽنڊو محمد خان: گذريل 13 سالن جي عرصي ۾ ضلعي جي 300 کان وڌيڪ اسڪولن لاءِ سرپ سرپ 1، سرپ 2 ۽ سرپ 3 جي نالي تي هر اسڪول جي چوديواري، باٿ روم، پانيءَ جي ٽينڪس ۽ ٻين سهولتن لاءِ 2 ارب رُپيا جاري ٿي چڪا آهن، پر حقيقت ۾ انهن اسڪولن ۾ اهڙي قسم جون شاگردن لاءِ ڪي به سهولتون نظر نه اچي رهيون آهن. ان حوالي سان ملندڙ ڄاڻ موجب ٽنڊو محمد خان، بلڙي شاھ ڪريم ۽ ٽنڊو غلام حيدر تعلقن جي مختلف ڳوٺن علي محمد مير بحر ، گاماڻي خاصخيلي ، لاکاٽ ، ملاڪاتيار ، علي محمد اعواڻ ، شيخ ڀرڪيو، گهرام وساڻ ۽ ستر موري سوڌو مختلف علائقن جي ڪيترن ئي اسڪولن ۾ بنيادي سهولتون اڻلڀ آهن. جڏهن ته ٽنڊو محمد خان جي يونين ڪائونسل ٽنڊو سائينداد جي ڳوٺ علي محمد اعواڻ ۾ تعليم جي حوالي سان ايمرجنسي لاڳو ٿيل آهي، پر اڃا تائين هن اسڪول ۾ مستقبل جا معمار فرنيچر کانسواءِ تعليم پرائڻ تي مجبور آهن. حيرت جهڙي ڳالهه آهي ته اسڪول ۾ پڙهائي حاصل ڪرڻ لاءِ ايندڙ شاگردن لاءِ رڳو هڪ استاد مقرر ٿيل آهي. جيڪو پنهنجي وِت ۽ وس آهر شاگردن کي سمورا نصاب مضمون پڙهائڻ جي ڪوشش ڪندو رهي ٿو.

ٽنڊومحمدخان: ڊسٽرڪٽ ايجوڪيشن آفيسر پرائمري آپا رشيده سومرو چيو آهي ته تعليم کاتي ۾ بائيوميٽرڪ سسٽم اچڻ کانپوءِ استادن جي حاضري وڌي آهي، منهنجي ڪوشش هوندي آهي ته مختلف اسڪولن جو پاڻ دورو ڪري سندن مشڪلاتون معلوم ڪريان ۽ ان جي حل لاءِ ڪوششون وٺان، هن چيو ته سنڌ حڪومت جي سي ايم اسڪيم تحت 2018 ۾ ماڊل اسڪول بنائڻ وارو سيڪنڊري جي ڊي او جو ڪم آهي جنهن جي مون کي ڪا به ڄاڻ ناهي. تعليم کاتي ٽنڊو محمد خان جي بائيوميٽرڪ سسٽم جي چيف مانيٽرنگ آفيسر عبدالحليم لغاري ٻڌايو ته بائيوميٽرڪ سسٽم اچڻ کانپوءِ اسڪولن ۾ حاضري 100 سيڪڙو آهي، سڄي ضلعي اندر بائيوميٽرڪ ڪندڙ مانيٽرز جو انگ 9 آهي، جيڪي روزاني بنياد تي اسڪولن جو سرپرائيزڊ وزٽ ڪندا آهن، ضلعي ۾ مقرر ڪيل بائيوميٽرڪ مانيٽرز کي سنڌ سيڪريٽريٽ هيڊآفيس مان سڌي ريت ميسيج اچڻ ۽ ڊائريڪشن ملڻ کانپوءِ مقامي سطح تي مشڪلاتون پيش اچي رهيون آهن، ڇاڪاڻ ته ان کان پهرين ضلعي سطح تي مانيٽرن کي اسڪول وزٽ ڪرڻ جو شيڊول ڏنو ويندو هو جيڪو هيڊآفيس جي مداخلت سبب ان ۾ دشواري پيش اچي رهي آهي.

ٽنڊو محمد خان: سنڌ جي تعليم کاتي سان لاڳاپيل ايجوڪيشن ورڪس کاتي ۾ ڪم ڪندڙ ايگزيڪيوٽو انجنيئر ميان تسنيم آرائين جنهن تي عمرڪوٽ ضلعي جي ڪنري مرچ منڊي جي تعمير ۾ ڪروڙين روپين جي ڪرپشن کانپوءِ نيب ڪورٽ مان ضمانت تي هئڻ باوجود ٽنڊو محمد خان ۾ ڪيترن سالن کان سياسي پشت پناهي سبب مقرر ٿيل آهي، جنهن پنهنجي مخصوص ٺيڪيدار راشد انٽرپرائيز جي نالي تي مختلف اسڪولن جا ٺيڪا کڻي ڪروڙين روپين جي مبينا طور ڪرپشن ڪئي آهي. جڏهن ته ايگزيڪيوٽو انجنيئر سنڌ سنواريو پروگرام تحت آيل 35 لک روپيه پنهنجي ٺيڪيدار کي گورنمينٽ پرائمري اسڪول نبي بخش پتافي جي تعمير لاءِ جاري ڪيا، جيڪو ڳوٺ زاهد پتافي جي نالي سان ماتلي باءِ پاس تي موجود آهي جو هڪ روپئي جو به ڪم نه ڪرايو آهي. 35 لک اسڪول جي تعمير لاءِ جاري ٿيڻ باوجود اسڪول جو بنياد به نه کنيو ويو آهي، ساڳي پروگرام تحت لائق نظاماڻي ۽ سيدپور جا اسڪول مڪمل ڪرايا ويا آهن

ٽنڊو محمد خان: ضلعي جو ايجوڪيشن ورڪس کاتو گذريل 10 سالن دوران 6 سو ڪروڙ روپيا خرچ ڪرڻ باوجود تدريسي عمارتون مڪمل ڪرائڻ ۾ ناڪام ٿي ويو آهي، جنهن ۾ ٽنڊو محمد خان ضلعي جو ميگا پروجيڪٽ پبلڪ اسڪول 13 سال گذرڻ باوجود مڪمل نه ٿي سگهيو، جنهن تي هن وقت تائين 50 ڪروڙ کان وڌيڪ رقم خرچ ٿي چڪي آهي پر لاڳاپيل اختيارين جي مجرماڻي سستي ۽ لاپرواهين جي ڪري تعليم جي حوالي سان انتهائي غيرمعمولي منصوبو رولڙي جو شڪار آهي، جڏهن ته ڀٽ ڌڻي جي تڙ ڏاڏي حضرت شاھ عبدالڪريم بلڙي واري جي شهر ۾ بوائز ڪاليج جو ڪم به 13 سالن گذرڻ باوجود پورو ناهي ٿي سگهيو. ساڳي ريت ٽنڊو غلام حيدر تعلقي ۾ ايجوڪيشن ورڪس کاتي پاران تعمير ڪرايل گورنمينٽ بوائز ڪاليج جي بلڊنگ وارو ڪم تعليم کاتي جي بي ڌياني ۽ ڪرپشن سبب هيل تائين شروع ٿي نه سگهيو آهي.

ٽنڊو محمد خان : ٽنڊو محمد خان ضلعي هيل تائين سرڪار طرفان 840 اسڪول قائم ڪيا ويا آهن، جن مان 208 اسڪول رڳو اِن ڪري بند آهن جو اُتي استادن سوڌو ٻيو عملو مقرر نه ٿي سگهيو آهي، جڏهن ته 142 اسڪول اهڙا آهن، جتي عمارت جي اڏاوت مڪلم ناهي ٿي ۽ ٻارڙا شيلٽر ليس اسڪول ۾ تعليم پرائڻ تي مجبور آهن. اُن کانسواءِ ضلعي ۾ 197 اسڪول زبون حالي جو شڪار آهن. ضلعي جي سمورن تعلقن مان رڳو ٽنڊو محمد خان شهر ۾ هڪ بوائز ۽ هڪ گرلز اسڪول قائم ڪيل آهي، جتي بيچلر ۽ ماسٽرز جي ڊگري جا به ڪلاس ورتا وڃن ٿا. ضلعي ۾ 2 نينشل ووڪيشنل ٽريننگ انسٽيٽيوٽ قائم ٿيل آهن، جتي بينظير ڀٽو شهيد يوٿ ڊولپمينٽ پروگرام تحت مستحق ٻارن کي هُنري سِکيا ڏني ويندي آهي. شهر جي گورنمينٽ بوائز ايليمينٽري اسڪول ۾ اٽڪل 800 شاگرد ۽ شاگردياڻيون تعليم حاصل ڪن ٿييون، پر ڊگهي عرصي کان اسڪول جي عمارت زبون حالي جو شڪار هجڻ باوجود عملي سوڌو شاگردن ۾ هر وقت خوف پکڙيل هوندو آهي. هن اسڪول ۾ شفٽن جي حساب سان شاگردن کي تعليم ڏني وڃي ٿي. سموري ضلعي ۾ رڳو 2 هاير سيڪنڊري اسڪول ۽ 40 سيڪنڊري اسڪول قائم ڪيل آهن، پر ڳوٺ ڪوڙو خان لاشاري ۾ اهڙي جاءِ تي گرلز اسڪول قائم ڪيو ويو آهي، جنهن جي ڀرپاسي ۾ آبادي ناهي ۽ اُن ڪري ئي اسڪول ۾ ڪابه تعليم نٿي ڏني وڃي، اهڙي ريت يوسف خان چانگ جي گورنمينٽ گرلس ايليمينٽري اسڪول کي پڻ آبادي نه هئڻ سبب تالو لڳل آهي. آبادي کان پري ۽ ٻهراڙي وارن علائقن ۾ قائم ڪيل اسڪولن کي بااثر وڏيرن پنهنجي اوطاق بڻائي ڇڏيو آهي. اهو به انڪشاف ٿيو آهي ته ضلعي ۾ اهڙا به اسڪول آهن، جتي بااثر وڏيرن جي زمينون آباد ٿيڻ بعد ڪڻڪ توڙي سارين جا ديرا قائم ڪيا ويندا آهن. ضلعي جي هيڊڪوارٽر ٽنڊي محمد خان شهر ۾ ڇوڪرين جي تعليم لاءِ پرائمري اسڪول قائم نه ٿيل آهي ۽ نه ئي چونڊيل نمائندن توڙي سنڌ سرڪار هن انتهائي اهم پاسي تي هيل تائين ڌيان ڏنو آهي. نتيجي ۾ بوائز پرائمري اسڪولن ۾ ڇوڪرين کي شفٽن جي حساب سان تعليم ڏني ويندي آهي.

روھڙي (ن پ ا) روھڙي جي ڇوھارا منڊي ۾ بجلي جي چوري خلاف آپريشن دوران سيپڪو عملدارن ۽ شهرين ۾ جهيڙي جو ڪيس داخل ڪيو ويو. سيپڪو جي لائين سپرنٽنڊٽ ذوالفقار جوڻيجو جي فرياد تي روھڙي ٿاڻي تي حاڪم علي لکڻ محمد علي لکڻ ۽ 10 نامعلوم جوابدارن سمت 12 ڄڻن تي ڪيس داخل ڪيو ويو. ايف آءِ آر ۾ بجلي چوري، عملي تي تشدد جا قلم شامل ڪيا ويا.

سيتاروڊ (ن پ ا) سيتا روڊ جي رحمان پرائمري اسڪول ۾ ليپ ٽاپ ورهائڻ واري تقريب ٿي، جنهن ۾ سنڌ يونيورسٽي ڄامشورو جي وائيس چانسلر فتح محمد برفت، ٽائون چيئرمين قمبر لغاري، سماجي تنظيم جي چيئرمين سلطان لغاري ۽ ٻيا شريڪ ٿيا. ان موقعي تي ڄامشورو يونيورسٽي جي وي سي محنتي شاگردن ۾ مفت ليپ ٽاپ ورهايا.

ڪراچي: شهر ۾ ٽرئفڪ جي بدترين نظام سبب هلندڙ سال دوران 182 وڏا حادثا ٿيا. هلندڙ سال دوران ٽرئفڪ جي بدترين نظام سبب وڏا روڊ حادثا ٿيا، جنهن جي نتيجي ۾ ڪيترائي ماڻهو اجل جو شڪار ۽ ڪيترائي معذور ٿيا. ٽرئفڪ پوليس جي رپورٽ موجب ضلعي سائوٿ ۾ 21 وڏا حادثا، سٽي ۾ 6، اوڀر ۾ 34، اولهه ۾ 49، سينٽرل ۾ 26، ڪورنگي ۾ 20، ۽ ملير ضلعي ۾ 26 وڏا روڊ حادثا ٿيا.

ڪراچي: ٽرئفڪ پوليس طرفان قانون بابت آگاهي لاءِ 424 اسڪولن ۾ سيمينار منقعد ڪيا ويا. مختلف اسڪولن ۾ منقعد ڪيل سيمينارن ۾ مجموعي طور 1 لک 47 هزار 196 شاگردن کي ٽرئفڪ قانون بابت آگاهي ڏني وئي ۽ ان کان علاوهه هيلمٽ، وڊيو ڪلپس ۽ ٻيو پمفليٽ تقسيم ڪيا ويا.

ڪراچي: شاهراهه فيصل تي موٽرسائيڪلن لاءِ الڳ لائين جو ڪو به فائدو نه ٿيو، قانون تي عمل ڪرائڻ لاءِ مقرر عملو اوٻاسيون ڏيندو رهيو. شاهراهه فيصل تي حادثن کي نظر ۾ رکندي موٽرسائيڪل وارن لاءِ الڳ لائين رکي وئي، ڪراچي پوليس چيف جي هدايتن تي موٽرسائيڪل وارن لاءِ الڳ لائين ته ٺهي وئي پر موٽرسائيڪلون مجال آهي ان لائين ۾ هلن، قانون تي عمل ڪرائڻ لاءِ 14 ڪرولا ڪارن ۽ 14 موٽرسائيڪلن تي تربيت يافته عملو مقرر ڪيو ويو پر پوءِ به ڪو فائدو نه ٿيو، موٽرسائيڪل وارا شاهراهه فيصل تي پنهنجي مرضي سان ڊرائيونگ ڪندا رهيا.

ڪراچي: ايڊيشنل آءِ جي ڪراچي ڊاڪٽر امير شيخ دعوا ڪئي آهي ته گذريل سال جي ڀيٽ ۾ هلندڙ سال ٽرئفڪ پوليس جي ڪارڪردگي بهتر رهي آهي، هن چيو ته ميئر جي مدد سان شهر ۾ رڪشا ۽ ٽئڪسي اسٽينڊ به قائم ڪيا ويا آهن. هن چيو ته ايندڙ سال لاءِ هڪ بهترين ٽرئفڪ پلان جوڙيو ويندو ته جيئن ٽرئفڪ جي ظام ۾ اڃا به وڌيڪ بهتري اچي.

ڪراچي(رپورٽ: حبيب جمالي) ڪراچي ۾ سال 2018 دوران ٽرئفڪ قانون جي ڀڃڪڙي تي ڳرا ڏنڊ لڳڻ باوجود ٽرئفڪ جو نظام صحيح نه ٿي سگھيو، شهر جي مک روڊن تي ٽرئفڪ جام معمول بڻيل رهيو، هلندڙ سال دوران حادثن ۾ به گھٽتائي نه آئي. پوليس پاران گھڻو زور ڏنڊ وصولي تي رهيو، سڄي سال دوران 62 ڪروڙ، 22 لک ڏنڊ وصول ڪيو ويو. سال 2018 دوران ڪراچي ۾ دعوائن باوجود ٽرئفڪ نظام ۾ سڌارو نه آيو، شهر جي مک روڊن تي صبح کان سانجھي ويل شديد ٽرئفڪ جام رهي، جنهن ۾ ماڻهن منٽن جو سفر ڪلاڪن ۾ طئي ڪيو. عام شاهراهون آءِ آءِ چندريگر روڊ، شاهراهه فيصل، ڪورنگي روڊ، ايم اي جناح ۽ يونيورسٽي روڊ سميت ٻين ننڍن وڏن روڊن تي ٽرئفڪ جو شديد دٻاءُ رهيو. ٽرئفڪ پوليس پاران گھڻو زور ڏنڊ جي وصولي تي رهيو، ڪراچي ٽرئفڪ پوليس پاران جاري ڪيل انگن اکرن موجب 2018 دوران ٽرئفڪ قانون جي ڀڃڪڙي تي 62 ڪروڙ 22 لک، 50 هزار جو چالان عيوض ڏنڊ وصول ڪيو ويو. 2018 ۾ 25 لک، 66 هزار، 516 چالان ٽڪيٽون جاري ڪيون ويون. جيڪي 2017 جي ڀيٽ ۾ وڌيڪ هيون، اهڙي طرح ون وي ٽوڙڻ تي 8 لک، 22 هزار، 126 چالان ڪيا ويا. هيلمٽ بغير ڊرائيونگ ڪرڻ تي 5 لک، 15 هزار، 143 چالان، ڊرائيونگ لائسنس نه هجڻ تي 20 هزار، 569 چالان، سگنلز ٽوڙڻ تي 32 هزار، 893 چالان، ڊرائيونگ دوران موبائيل هلائڻ تي 13 هزا، 32 چالان ۽ لاپراهي سان ڊرائيونگ ڪرڻ تي 19 هزار 24 چالان ڪيا ويا. اهڙي طرح ڇتين تي ماڻهن کي ويهارڻ تي 8 هزار 352 بسن کي چالان ڪيو ويو، دونهون ڏيندڙ 15 سو 25 گاڏيون به چالان ڪيون ويون ۽ کانئن 62 ڪروڙ، 22 لک، 50 هزار ڏنڊ وصول ڪيو ويو آهي. ان کان علاوه فينسي نمبر پليٽ، غيرقانوني چنگچي رڪشا، ون وي ٽوڙڻ ۽ غلط ڊرائيونگ ڪندڙ ماڻهن کي قلم 279 تحت گرفتار ڪيو ويو پر ان باوجود ٽرئفڪ جو نظام جيئن جو تيئن رهيو.