خيرپور (رپورٽر) پي پي ايڇ آءِ سکر ڊويزن پاران خيرپور جي سچل آڊيٽوريم هال ۾ کاتي جي آفيسرن، ملازمن ۽ ورڪرن کي بهتر ڪارڪردگي پيش ڪرڻ تي ايوارڊ ڏيڻ جي سلسلي ۾ تقريب منعقد ڪئي وئي. تقريب کي خطاب ڪندي تقريب جي مهمان خاص پيپلزپارٽي جي مرڪزي اطلاعات سيڪريٽري ۽ ايم اين اي ڊاڪٽر نفيسه شاهه چيو ته اڄ جي معاشري ۾ عورتن بهتر مقام ماڻيو آهي جيستائين اسان جي معاشري ۾ عورتون ڊاڪٽر، ليڪچرار، پوليس آفيسر، سياستدان، جج ۽ ٻين سٺن عهدن تي نه پهچنديون تيستائين معاشري ۾ ترقي مشڪل آهي تقريب ۾ وڏي پيماني تي ليڊي ڊاڪٽر ۽ نرسون ڏسي خوشي ٿي رهي آهي. هن چيو ته پيپلزپارٽي سنڌ اندر صحت جي شعبي ۾ پي پي ايڇ آءِ جهڙي بهترين اداري جو قيام عمل ۾ آندو. تقريب کي پي پي ايڇ آءِ سنڌ جي چيف ايگزيڪيوٽو آفيسر غلام علي سومرو خطاب ڪندي چيو ته پي پي ايڇ آءِ جي ڪم ۾ بي انتها سڪون آهي اسان ماڻهن جي خدمت ڪري دلي سڪون حاصل ڪيون ٿا. تقريب ۾ سکر ڊويزن جي ڊاڪٽرن، ڊاڪٽرياڻين، نرسين، پيرا ميڊيڪل ۽ اسٽاف کي بهتر ڪاڪردگي پيش ڪرڻ تي ايوارڊن سان نوازيو ويو. ان موقعي تي ڊائريڪٽر هيلٿ سروسز عبدالستار چانڊيو، ريجنل ڊائريڪٽر سکر رياض راهوجو، مظهر ويسر، ذيشان منگي، بشير جاگيراڻي، آصف نظير ڪلوڙ خطاب ڪندي چيو ته پي پي ايڇ آءِ جو اسٽاف ڏينهن رات محنت ڪري عوام جي خدمت ڪري رهيو آهي. تقريب ۾ ڊاڪٽر اعجاز جماڻي، ڊاڪٽر صفي الله مهيسر، ڊاڪٽر اعجاز سمون، خير محمد خميساڻي، فياض راهوجو، عارف عباسي، ڊاڪٽر وزير بوزدار اسد شر ۽ ٻين پڻ شرڪت ڪئي.

خيرپور (رپورٽر)خيرپور ميونسپل ڪميٽي خيرپور جو هڪ اهم اجلاس چيئرمين سيد امجد علي شاهه جيلاني جي صدارت هيٺ ٿيو. اجلاس ۾ وائيس چيئرمين يار محمد ڦلپوٽو سميت مختلف وارڊن جي ڪائونسلرن عبدالوهاب سومرو، محمد جمن سهتو، محمدعلي انصاري، وجيهه الدين حيدر، سعيد احمد ابڙو ۽ ٻين شرڪت ڪئي. اجلاس ۾ مختلف وارڊن جي ڪائونسلرن سيد امجد علي شاهه اڳيان شڪايتن جا انبار لڳائي ڇڏيا ۽ چيو ته شهر ۾ گندگيءَ جا ڍير لڳل آهن ۽ گٽرن جو گندو پاڻي روڊن، رستن ۽ گهٽين ۾ بيٺل آهي جنهن ڪري سندن وارڊن جا رهواسي بار بار کين اهڙيون شڪايتون ڪن ٿا پر ميونسپل کاتي جو عملو سندن هڪ به نه پيو ٻڌي. هنن سيد امجد علي شاهه اڳيان گهر ڪئي ته ميونسپل ڪميٽي جي عملي جو قبلو درست ڪيو وڃي ۽ کين مختلف وارڊن جي صفائي سٿرائي واري معاملي ۾ پابند بڻايو وڃي. ان موقعي تي سيد امجد علي شاهه ڪائونسلرن کي مخاطب ٿيندي چيو ته هو مختلف وارڊن ۾ صفائي سٿرائي جي معاملي ۾ عملي کي پابند بڻائيندو ۽ غفلت ڪندڙن خلاف ڪاروائي ڪئي ويندي. بعد ۾ صحافين جي سوالن جا جواب ڏيندي سيد امجد علي شاهه جيلاني چيو ته ميونسپل ڪميٽي خيرپور ۾ وائيٽ ڪالر ملازمن پاران پنهنجي فرضن ۾ ڪوتاهي ڪرڻ تي سندن خلاف ڪاروائيون جاري آهن فرض نه ادا ڪندڙ ملازمن جون پگهارون پڻ بند ڪيون ويون آهن.

ڪنڌڪوٽ (ن پ ا) ڪنڌڪوٽ جھيڙي جي ڪيس ۾ گرفتار جوابدار جي عدالت ضمانت منظور ڪري ورتي ضمانت ٿيڻ بعد جوابدار ھوندل جکراڻي آزاد ٿي ويو جڏھن ته گرفتار جوابدار مٿان اي سيڪشن ٿاڻي تي گناھہ نمبر 69/2013 جي ڪيس ۾ گرفتار ھو جوابدار جي ضمانت ايڊيشنل سيشن جج جي عدالت منظور ڪري ورتي.

ڪنڌڪوٽ(رپورٽ: احمد علي مغل) ڪنڌڪوٽ بي سيڪشن پوليس پاڻ پيش ٿيل گرفتاري ڏيندڙ ڏوھاري کي لوھي پل واري علائقي ۾ مقابلو ڄاڻائي گرفتاري ظاھر ڪري ڇڏي. انھي حوالي سان ذريعن مان مليل ڄاڻ موجب مختلف ڪيسن ۾ جوابدار غلام حيدر بنگوار پاڻ پوليس وٽ پيش ٿي گرفتاري ڏني جنھن کي پوليس پنھنجي ڪارڪردگي ڏيکارڻ لاءِ لوھي پل واري علائقي ۾ مبينا مقابلو ڏيکاري گرفتاري ظاھر ڪئي انھي سلسلي ۾ ايس ايڇ او ٻڌايو تہ اسين معمول موجب گشت تي وڃي رھيا ھئاسين تہ ڏوھاري پوليس کي ڏسي ڀڄڻ لڳو جنھن جو پوليس پيڇو ڪري مقابلي بعد ٽي ٽي پسٽل سميت گرفتار ڪري ورتو آھي.

ڪنڌڪوٽ ( رپورٽر ) ڪنڌڪوٽ شھر جي اندر گيس جي بحران تي انتظاميہ ڪنٽرول نہ ڪري سگھي آهي. گيس بحال ايڪشن ڪاميٽي پاران جمعي جي ڏينھن گيس آفيس جي آڏو ڌرڻي جو اعلان ڪيو آهي. ان سلسلي ۾ ڪميٽي جي گڏجاڻي ايس يو پي آفيس ۾ ٿي گذري جنھن ۾ ابراھيم خاڪي، دلمراد ڏاھاڻي، عباس باجڪاڻي ، شاھنواز مرھيٽو ء محبوب ميراڻي شرڪت ڪئي جنھن ۾ اڳواڻن چيو تہ گيس انتظاميا پاڻ ۾ بدلي جي معاملي تي ھلندڙ جھيڙي جي ڪري شھر اندر ملازمن ڄاڻي واڻي مختلف علائقن جون گيس پائیپ لائینون بند ڪيون آھن شھر جي اندر ڪيترائي علائقا اھڙا آھن جتي 15 ڏينھن کان ھڪ منٽ بہ گيس جي فراھمي نہ ٿي آھي ۽ اڪثر علائقن ۾ بجلي جي لوڊشيڊنگ جيان ڪيترائي ڪلاڪ بند ڪري چالو ڪرڻ جو سلسلو جاري آھي جنھن جي ڪري اسان جمعي جي ڏينھن تي شھرين سان گيس بند جي زيادتي ڪرڻ واري عمل خلاف ڀرپور احتجاج ڪنداسين جيئن سوئي سدرن گيس جي اعليٰ اختیارن تائین آواز پھچائي سگھون .

جهڏو(رپورٽر) جهڏو ڀرسان ڏيئي ٿاڻي جي حد ۾ چورين ۽ ڦرن جو آزار وڌي ويو آهي ڏيئي شهر ۽ ڀرپاسي جي ڳوٺن ڳوٺ ملڪ بهاول، سانگي فراهو، ڳوٺ پير بخش چان ڊيو، ڳوٺ هاشم وگهامل، ديھ ڪپوري، ديھ ڪامارو، سميت ٻين علائقن ۾ چوريون روز جو معمول بڻيل آهن گذريل رات ڳوٺاڻن شاهد علي ۽ ڀيمون ڪولهي جون ٻڪريون چوري ٿي ويون ان کان پهرين شاهد جروار جي ڀلوڙ مينهن، ملڪ اشرف جون ٻه ٻڪريون، غريب پورهيت سومار ڀيل جون ٻه ٻڪريون، جڏهن ته خادم علي شاھ چيڪ پوسٽ وٽ شهري نياز ميمڻ جي موٽرسائيڪل ڦر ڪئي وئي ۽ ساڳي جڳھ تان ڳوٺاڻي دادو ٿيٻو کان موٽر سائيڪل ڦر ڪئي وئي چوري ۽ ڦرن جي ودندڙ واقعن خلاف علائقي جي سياسي سماجي حلقن ملڪ اشرف، مظهر حسين، رميش ڪمار، احمد نواز ۽ ٻين چيو ته پوليس جي نااهلي سبب علائقي ۾ چورين جو آزار ودي ويو آهي چوريون ۽ ڦرون روز جو معمول بڻيل آهن جنهن سبب علائقي واسي سخت پريشان بڻيل آهن متاثر ڳوٺاڻا فرياد کڻي ٿاڻي تي وڃن ٿا ته پوليس انهن جي مدد ڪرڻ بدران پاٿاريدارن جا ڏس ڏئي موٽائي ڇڏي ٿي ۽ پاٿاريدار ڀنگ وٺي چوري واپس ڪرائن ٿا انهي دندي ۾ پوليس ملوث آهي هنن ايس ايس پي بدين کان مطالبو ڪيو ته ڏيئي ۽ ڀرپاسي ودندڙ بدامني جو نوٽيس وٺي علائقي ۾ امن بحال ڪرايو وڃي.

جروار (رپورٽ: ماجد گبول ) جروار ۽ ڀرپاسي ڇتن ڪتن جو آزار وڌي ويو آهي. ان سلسلي ۾ ڳوٺ صاحب خان لنڊ ۾ معصوم 7سالا مسقيم علي شاه ڳوٺ عالم خان لنڊ جي معصوم 6سالا شعيب لنڊ ۽ڳوٺ محمد علي بوزدار جي نوجوان مراد علي بوزدار کي گذريل ڏينهن شھر جي رولو ڪتن حملو ڪري شديد زخمي ڪري وڌو ,زخمي معصوم ٻارن ۽نوجوان جا وارث ٻنهي زخمين کي جروار جي سرڪاري اسپتال پهچايو ,پر سرڪار اسپتال ۾ ڪتي جي چڪ واري ويڪسين موجود نه هئي ته زخمي معصوم جا وارث پرائيوٽ ميڊيڪل اسٽوري تي ويا پر پرائيوٽ ميڊيڪل اسٽورن تي به انجيڪشن نه ملي سگهي ,ڪتي جي چڪ واري ويڪسين نه ملڻ سبب زخمين جا وارث سخت پريشاني ۾ مبتلا ٿي ويا ,معصوم زخمي ٻار جو ڀاء مزمل علي شاه ميڊيا آڏو دانهيندي چيو ته پوري ضلع جي سرڪاري اسپتالن توڙي پرائيوٽ ميڊيڪل اسٽورن ويڪسين اڻلڀ ٿي ويئي آھي, ويڪسين نه ملڻ سبب اسان سخت پريشان آھيون ۽ معصوم ٻار جي به حالت خراب آھي .
ويڪسين مٿان کان روڪي وئي آهي، 7 سئو واري 2 هزار ۾ ڏني وڃي ٿي: ميڊيڪل اسٽور مالڪ
جروار: جروار جي مشهور ميڊيڪل اسٽور جي مالڪ جوائرسنگھ رابطو ڪرڻ تي ٻڌايو ته ويڪسين مٿان کان بند ڪئي ويئي آھي ويڪسين جو ريٽ 7سئو آھي پر ڪمپنين وارا 2هزار ۾ ڏين ٿا ان ڪري پوري ضلع ۾ ويڪسين نه ٿا ملن.
ضلعي ۾ ڪٿي به ويڪسين دستياب ناهي، اسين مجبور آهيون: ڊي ايڇ او
جروار: ڊي ايڇ او گهوٽڪي الطاف سومرو رابطو ڪرڻ تي ٻڌايو ته مٿان کان ويڪسين نه ٿي اچي اسان جي پوري ضلع ۾ ڪٿي به ويڪسين نه آھي اسان پئسه کنيون گهمون ٿا تنهن هوندي به ويڪسين نه ٿي ملي ,ڪيترائي دفعا مٿي ليٽر لکيا آھن پر هن مهل تائين ڪوبه کڙتيل نه نڪتو آھي تنهن ڪري اسان مجبور آھيون .

ڪوٽڙي (ن پ ا) ڪوٽڙي ۾ ضلعي ڄامشورو جي تعلقه وائيس اسڪيمن جي منظوري لاء ڊسٽرڪٽ ڪائونسل جي حال ۾ ضلعي چيئرمين ملڪ شاهنواز خان جي صدارت ٿي گذريو ، اجلاس ۾ ساليانه اسڪيمن جي منظوري ڏني وئي ، جنهن ۾ تعلقه وائيس تعلقه ڪوٽڙي لاء 4 ڪروڙ 76 لک ٿاڻو بولا خان لاء 4 ڪروڙ 69 لک ، مانجهند لاء 4 ڪروڙ 88 لک ، جڏهن ته تعلقي سيوهڻ لاء 4 ڪروڙ 20 لک روپين جون اسڪيمون منظور ڪرايون ويون ، اجلاس ۾ ميمبرن پاران گذريل سال واري اسڪيمن جا ٽينڊر نه ٿيڻ تي دانهون پڻ ڪيون ، اجلاس ۾ ميمبر نبي بخش بوزدار ضلعي چيئرمين اڳيان داهنيدي چيو ته گذريل وقت ۾ ڪو به ڪم نه ٿيو آهي ، ڪيترائي ڀيرا ٽينڊر پاس ڪرايا آهن ، پر ڪم نه ٿا ڪرايا وڃن ، هن چيو ته سال کان پوء واپس عوام ڏانهن وڃڻون آهي ،اگر هن دفي ٽينڊر نه ٿيا ته استعفا ڏئي ڇڏيندس ، ميمبرن سسئي راجپر ، نريش ڪمار ، سلطانه ، پير بخش ڇڇر ، ٻين پاران ترقياتي اسڪيمون نه ملڻ ۽ ڪم نه ڪرائڻ تي شڪايتون ڪيون ويون ان موقعي تي ضلعي چيئرمين ملڪ شاهنواز خان ميمبرن کي يقين ڏياريون ته جلد کان جلد اسڪيمن جو ڪم شروع ڪرايو ويندو ، ڇاڪاڻ ته اسين عوام جي خدمت ڪرڻ آيا آهيون ، اسان عوامي خدمت تي يقين رکون ٿا ، ، ضلعو ڄامشورو پ پ پ جو قلعو آهي ، سموري ضلعي ۾ ترقياتي ڪمن جو ڄار وڇايو ويندو ، جيڪي اسڪيمون منظور ٿيون آهن انهن سان ڪافي مسئلا حل ٿي ويندا ،هن چيو ته تازو ئي ڄامشورو ڦاٽڪ ۽ ڪوٽڙي ڦاٽڪ تي تعمير ڪرايل اوور هيڊ برج پاڪستان پيپلزپارٽي جي حڪومت جوڙايون، آهن، جنهن سان هتان جي عوام کي سهولت ٿي آهي ، آيندا به هنن ترقياتي ڪم ڪرايا ويندا .