ميروخان (ن پ ا)ميروخان لڳ ڳوٺ خير شاه بخاري جي ميلي ۾ ھٿيار بند ن جي فائرنگ ڪري رتو ديرو واسي نو جوان مريد حسين جلباڻي قتل ڪري ڇڏيو،واقعي بعد جو ابدار فرار ٿي ويا،مقتول جولاش پوليس جي تحويل سول اسپتال آندو ويو ،لاش پوسٽ مارٽم بعد وارثن حوالي ڪيو ويو،مقتول جي ڀاء علي محمد ايو ته اسان مزدوري ڪندا آهيو ن ، خير شاه بخاري جو ميلو گهمڻ وياسين ته ٻه موٽر سائيڪل سوار هٿيار بندن پسٽل جا فائر نگ ڪري ڀاء مريد کي قتل ڪري فرار ٿي ويا،هن چيو ته ظلم ٿيو آهي انصاف ڪيو وڃي .

ڪراچي(اسٽاف رپورٽر) پيپلز پارٽي سنڌ ڪابينا ۾ واڌ توڙي بهتر ڪارڪردگي نه ڏيکاريندڙ وزيرن جي کاتن ۾ ردوبدل وارو معاملو پڻ 5 جنوري تائين ملتوي ڪري ڇڏيو آهي، پ پ جي باخبر ذريعن ٻڌايو ته پ پ قيادت هن وقت شهيد ذوالفقار علي ڀٽو جي جنم ڏينهن، شهيد راڻي جي شهادت واري ڏهاڙي ۽ ڪورٽن ۾ شنواين سبب مصروف هجڻ ڪري ڪابينا ۾ واڌ بابت فائنل فيصلو نه ڪري سگهي آهي، ذريعن ٻڌايو ته نئين سال ۾ 2 نوان وزير ۽ 3 صلاحڪار ڪابينا ۾ شامل ڪيا ويندا، جڏهن ته بهتر ڪارڪردگي نه ڏيکاريندڙ هڪ يا 2 وزيرن جا چهرا تبديل ٿيڻ جا پڻ امڪان آهن.

حيدرآباد(رپورٽ: فقير سليم) سنڌ يونيورسٽي ۾ وائيس چانسلر انسٽيٽيوٽ آف ميٿيميٽڙڪس اينڊ ڪمپيوٽر سائنس جي پروفيسر سليم چانڊيو کي ٻيهر رجسٽرار مقرر ڪيو ويو. مقررٿيل رجسٽرار پنهنجي 23 عزيزن کي يونيورسٽي ۾ نوڪرين سان نوازي ڇڏيو ان حوالي سان معلوم ٿيو آهي ته سنڌ يونيورسٽي جي موجودا وائيس چانسلر پاران يونيورسٽي جي هڪ 21 هين گريڊ جي پروفيسر محمد سليم چانڊيو کي پنهنجي مقرري بعد فوري طور رجسٽرار مقرر ڪيو هو، جنهن بعد سنڌ هاءِ ڪورٽ سرڪٽ بينچ حيدرآباد ۾ هلندڙ هڪ ڪيس دوران ان وقت جسٽس صلاح الدين پنهور پاران يونيورسٽي جي انتظامي عهدن تي استادن جي مقرري بابت رپورٽ طلب ڪئي وئي هئي ته 24 آڪٽوبر 2017 تي سليم چانڊيو جي استعيفي عدالت ۾ پيش ڪئي وئي هئي ۽ ان وقت ساجد قيوم ميمڻ کي رجسٽرار طور مقرر ڪرڻ جو آرڊر عدالت ۾ پيش ڪيو ويو هو، جڏهن ته ڪجهه مهينا ساجد قيوم ميمڻ جي رجسٽرار رهڻ بعد جولائي 2018ع ۾ ٻيهر وائيس چانسلر پروفيسر سليم چانڊيو کي رجسٽرار طور مقرر ڪري ڇڏيو، اينٽي ڪرپشن جي هڪ رپورٽ موجب پروفيسر سليم چانڊيو پنهنجي رجسٽرار هجڻ جو فائدو وٺندي پنهنجي 23 ويجهن مائٽن کي يونيورسٽي ۾ بنا ايڊورٽائيزمينٽ جي نوڪرين سان نوازيو.

شيخ ڀرڪيو (ن پ ا) شيخ ڀرڪيو پوليس ڊسٽرڪٽ سيشن جج ٽنڊو محمد خان جي حڪم تي شيخ ڀرڪيو ۾ قائم اڪرم پٺاڻ جي سرن جي بٺي تي ڇاپو ھڻي، ناحق باندي بڻيل اوڏ برادري جي 17 پورھيتن کي بازياب ڪرائي ورتو. بازياب ٿيلن ۾ لکي اوڏ، گل مير اوڏ، ممتاز اوڏ، ماڪوڙو اوڏ، سوڌواوڏ، 28 ورھين جي حسينا، 25 ورھين جي زرينا، 27 ورھين جي نصيبان، 8 ورھين جو منٺار اوڏ، 6 ورھين جو ڀالو اوڏ، 4 ورھين جو پريم ۽ ٻيا شامل آھي. پوليس جو چوڻ آھي شيخ ڀرڪيو واسي حبيب اوڏ ناحق باند بڻيل پورھيتن کي بازياب ڪرائڻ لاءِ ڊسٽرڪٽ سيشن ڪورٽ ٽنڊو محمد خان ۾ پٽيشن داخل ڪئي ھئي، جنھن تي عدالت ڪارروائي جو حڪم ڏنو. بازياب ٿيل پورھيتن کي عدالت ۾ پيش ڪيو ويندو.

ڪراچي (اسٽاف رپورٽر) پاڪستان تحريڪ انصاف سنڌ جي جنرل سيڪريٽري ۽ پارلياماني اڳواڻ حليم عادل شيخ  ۽ ايم پي اي خرم شير زمان الزام هنيو آهي ته پ پ وارن سنڌ کي تباهه ڪري ڇڏيو آهي عوام کي بنيادي سهولتن ناهن، اهڙو اظهار هنن ڪالهه انصاف هائوس ڪراچي ۾ پريس ڪانفرنس ڪندي ڪيو،  پي ٽي آئي اڳواڻن چيو ته ڏهن سالن تائين خزاني جي ڪنجي مراد علي شاهه وٽ هئي جنهن رڳو اومني گروپ کي خوش ڪيو جنهن جي نتيجي ۾ کيس وزير اعليٰ بڻايو ويو. سنڌ جي عوام جي حقن تي ڌاڙو هنيو ويو آهي حليم عادل شيخ  چيو ته وزير اعليٰ سنڌ جي تڪ جي اسپتالن ۾ ڊاڪٽر ئي نه آهن عوام کي چوڪيدار جي رحم و ڪرم تي ڇڏيو ويو آهي. اسڪول تباهه ۽  منڇر ڍنڍ جي حالت انتهائي خراب آهي، ڪينجهر ۾ زهريلو گٽرن جو پاڻي ڇوڙ ٿي رهيو آهي. جيڪو ماضي ۾ هڪ سياحتي مقام هو اڄ تي تباهي نظر اچي رهي آهي اسڪولن ۾ سهولتون ناهن عوام تمام ڏکئي پراڻي دور واري زندگي گذارڻ تي مجبور آهي.

ڪراچي(مانيٽرنگ ڊيسڪ) ڪراچي ۾ پوليس ڪارروائي دوران 12 مئي سانحي جي اهم جوابدار کي گرفتار ڪرڻ جي دعويٰ ڪئي آهي.ايس ايس پي ايس آءِ يو موجب، ناظم آباد ۾ ڳجهي اطلاع تي ڪارروائي ڪئي وئي،جنهن دوران جوابدار عبدالزاهد کي گرفتار ڪيو ويو. پوليس جو چوڻ آهي ته جوابدار فائر برگيڊ ۾ملازم آهي، 12مئي سانحي سميت ڪيترن ئي ڪيسن ۾ به گهربل آهي. واضح رهي ته سنڌ هاءِ ڪورٽ جي حڪم تي 12 مئي سانحو ڪيس ٻيهر کوليو ويو آهي، جنهن ۾ پوليس کي نئين سر جاچ ڪري رپورٽس پيش ڪرڻ جو حڪم ڏنو ويو آهي.

ڪراچي (اسپورٽس نيوز) گوگل پاران پنهنجي تخيلي خاڪي ڊوڊل ذريعي ليجنڊ پاڪستاني ڪرڪيٽر حنيف محمد کي ڀيٽا پيش ڪئي آهي. حنيف کي ٽيسٽ ڪرڪيٽ ۾ ڊگهي اننگز کيڏڻ جو اعزاز حاصل آهي، هن ويسٽ انڊيز خلاف 1957-1958 سيريز دوران 970 منٽن جي ڊگهي اننگز کيڏي جيڪا اڄ تائين ڪو به ٽوڙي ناهي سگهيو. حنيف محمد 21 ڊسمبر 1934ع ۾ جهونا ڳڙهه رياست ۾ ڄائو، هن 17 سالن جي ٽيسٽ ڪيريئر ۾ 55 ٽيسٽ ميچ کيڏيا، جڏهن ته ٽيسٽ ڪرڪيٽ ۾ پهرين ٽرپل سينچري به سندس نالي آهي. هن سڀ کان وڏي فرسٽ ڪلاس اننگز کيڏڻ جو سر ڊان بريڊ مين جو رڪارڊ پڻ ٽوڙيو، هن بهاولپور ۽ ڪراچي وچ ۾ کيڏيل ميچ ۾ 499 رنسون ٺاهيون هيون. حنيف محمد 11 آگسٽ 2016ع ۾ لاڏاڻو ڪري ويو.

ڪراچي: عورت سياستدانن ۾ وڌ ۾ وڌ بانڊ رکڻ جو اعزاز جي ڊي اي جي اڳواڻ ۽ اڳوڻي ايم پي اي مهتاب اڪبر راشدي ماڻيو، جنهن وٽ 90 لکن جا بانڊ آهن.

ڪراچي: عورتن تي تشدد ۽ حراسمينٽ وارن واقعن کي روڪڻ لاءِ قائم ٿيل اداري کي سرڪاري ملازمن جون ترقيون روڪڻ ۽ جبري رٽائرڊ ڪرڻ جا به اختيار مليل آهن. ان سلسلي ۾ گڏ ڪيل ڄاڻ موجب صوبائي محتسب پاران عورتن سان خراب روِين سان پيش اچڻ، جسماني تشدد جو نشانو بڻائڻ، لکت يا زباني طور عورت کي حراسان ڪرڻ، عزت گھٽائڻ سميت حراسمينٽ تي ڪنهن ٻئي زمري ۾ ايندڙ سرڪاري ملازم جوابدارن جي نوڪرين ۾ ترقي روڪڻ، جبري طور رٽائرڊ ڪرڻ، خانگي ۽ سرڪاري اداري جو عارضي بنيادن تي ڪم روڪرائي ڇڏڻ، ڏنڊ جي رقم وٺي متاثر ڌُر کي ڏيڻ جا اختيار رکي ٿو. عورتن جي تحفظ وارِي صوبائي محتسب کي ڄاڻايل اختيار هئڻ باوجود ڪيتريون ئي سرڪاري ۽ غيرسرڪاري عورتون به ڄاڻايل اداري بابت ڄاڻ نه ٿيون رکن.

ڪراچي: صدر ڊاڪٽر عارف علوي به بانڊن رکڻ جو ڪوڏيو نڪتو، سرڪاري رڪارڊ موجب وٽس بانڊن ۽ روڪ رقم جي صورت ۾ 56 لک ۽ 56 هزار موجود آهن.

ڪراچي: نوابشاھ جي يونيورسٽي ۾ پروفيسر هٿان حراسمينٽ جو نشانو بڻجندڙ شاگردياڻي فرزانا جمالي جو ڪيس به صوبائي محتسب ۾ هلندڙ آهي. شاگردياڻي فرزانا جمالي جي چاچي اقبال جمالي “پنهنجي اخبار” سان ڳالهائيندي چيو آهي ته پروفيسر ارشد سليم پاران فرزانا کي حراسان ڪرڻ واري معاملي تي محتسب پاران کنيل قدمن مان مطمئن ناهيون. ڇاڪاڻ ته ڄاڻايل ادارو سنڌ حڪومت جو قائم ڪيل آهي. هن چيو ته صوبائي محتسب پاران ٻيهر ٻڌڻي تي گھرايو ويو آهي. جنهن لاءِ اسان محتسب کي لکيو آهي ته نوابشاھ کان ڪراچي تائين سيڪيورٽي ڏني وڃي ته پوءِ اچي سگھون ٿا. اقبال جمالي چيو ته صوبائي محتسب سيڪيورٽي ڏيڻ لاءِ به تيار ناهي.

ڪراچي: ٿر مان چونڊيل پ پ جو اقليتي ايم اين اي ڊاڪٽر مهيش ملاڻي بانڊن رکڻ جي ريس ۾ پوئتي رهجي ويو، وٽس رڳو 30 هزارن جا بانڊ پيل آهن.

ڪراچي: سنڌ جي مختلف سرڪاري ۽ خانگي ادارن ۾ عورتن کي حراسان ڪرڻ وارن واقعن بابت ڪيس تڪڙي بنيادن تي نه اڪلائڻ سبب 40 ڪيس رولڙي جو شڪار ٿيل آهن. ان سلسلي ۾ ذريعن جو چوڻ آهي ته 6 سالن ۾ رپورٽ ٿيل 385 ڪيسن مان 345 ڪيسن بابت فيصلا ٻڌائي معاملو حل ڪيو ويو آهي. جڏهن ته 40 مختلف ڪيسن بابت ڄاڻايل اداري جي اختيارين پاران ڪو به فيصلو ناهي ٻڌايو ويو جنهن ڪري ڪيس رولڙي جو شڪار بڻيل آهن. ان سلسلي ۾ صوبائي محستب جي ڪامورن جو چوڻ آهي ته جن سرڪاري ملازم جي اسان جي اداري پاران سزا طور نوڪري ختم ڪرڻ سميت ٻي سزا ڏني وئي آهي. انهن جا نالا ظاهر نه ٿا ڪري سگھون.

ڪراچي: سنڌ ۾ عورتن جي تحفظ لاءِ مختلف وقتن تي قانون آڻڻ باوجود گهريلو تشدد سان گڏ سرڪاري توڙي نجي ادارن ۾ عورتن کي حراسان ڪرڻ جو رجحان گهٽجڻ بدران وڌي ويو، سڀ کان وڌيڪ صحت کاتي ۾ عورتن کي حراسان ڪرڻ جون شڪايتون مليون، تعليم، صحت، مڪاني ادارن واري کاتي، ناڻي کاتي سميت ٻين خانگي ادارن ۾ مجموعي طور تي 385 واقعا رپورٽ، نجي ادارا ته عورتن کي حراسان ڪرڻ واري ورهين کان جاري روايت کي برقرار رکيو ويٺا آهن. عورتن کي حراسان ڪرڻ واري رجحان کي روڪي خانگي توڙي سرڪاري ۽ گھريلو ملازم عورتن کي تحفظ ڏيڻ واري اداري صوبائي محتسب ۾ مئي 2012ع کان ڊسمبر 2018ع تائين صحت کاتي، تعليم کاتي، مڪاني ادارن واري کاتي سميت گھريلو ملازم عورتن کي حراسان ڪرڻ وارا مجموعي طور تي 385 واقعا رپورٽ ٿيا آهن. عورتن جي تحفظ بابت قائم صوبائي محتسب جي ذريعن وٽان مليل دستاويزن موجب سنڌ جي صحت کاتي جي ملازمن پاران ملازم عورتن کي حراسان ڪرڻ جا 85 واقعا، تعليم کاتي جي ملازمن پاران 73، سوشل ويلفيئر کاتي جا 4، روينيو کاتي جا 2، آبپاشي کاتي جو هڪ، مڪاني ادارن واري کاتي جا 7، پرائيوٽ سيڪٽر جي ملازمن جا 110، پي آءِ اي جا 2، ناڻي کاتي جا 2، ميڊيا هائوس جي ملازمن کي آفيسن اندر حراسان ڪرڻ جا 3، اين جي اوز ادارن ۾ 24، گھريلو ملازم عورتن کي حراسان ڪرڻ جا 66، توانائي واري کاتي جو هڪ، لائيو اسٽاڪ کاتي جا 2، بهبود آبادي واري کاتي جو هڪ، سيپڪو (سکر ) جو هڪ ۽ حبيب بئنڪ لمٽيڊ جو به هڪ ڪيس رپورٽ ٿيو آهي. جيتوڻيڪ سنڌ ۾ عورتن کي هر قسم جي جسماني ۽ ذهني تشدد کان بچائڻ لاءِ نوان نوان قانون ٺهندا رهيا آهن. پر عورتن کي ذهني تشدد وارن واقعن ۾ گھٽتائي ناهي اچي سگھي.