سنچورين: (اسپورٽس ڊيسڪ) پاڪستان ۽ ڏکڻ آفريقا ۾ پهرين ٽيسٽ جي پهرين ڏينهن پاڪستان جي سڄي ٽيم 181 رنسن تي آئوٽ ٿي وئي، جڏهن ته ڏکڻ آفريقا جي اڌ ٽيم به 127 رنسن تي پويلين موٽي.
سينچورين ۾ پاڪستان ۽ ڏکڻ آفريقا ۾ ٽن ٽيسٽ ميچن تي ٻڌل سيريز جي پهرين ميچ جي پهرين ڏينهن بيٽسمين بالرن آڏو ڄمي کيڏڻ ۾ ناڪام ويا. پاڪستاني ٽيم ٽاس کٽي پهرين بيٽنگ جو فيصلو ڪيو. پاڪستاني بيٽسمين ڏکڻ آفريقا جي بالرن آڏو نه بيهي سگهيا، سموري ٽيم 181 رنسن تي پويلين ڀيڙي ٿي.
ڪپتان سرفراز احمد ۽ اوپننگ بيٽسمين امام الحق بنا ڪنهن رنس ٺاهڻ جي آئوٽ ٿيا، جڏهن ته اظهر علي 36، فخر زمان 12، شان مسعود 19، اسد شفيق 7، ياسر شاهه 4 ۽ محمد عامر هڪ رنس ٺاهي آئوٽ ٿيا.
بابر اعظم ۽ حسن علي نائين وڪيٽ تي 67 رنسن جي ڀائيواري جوڙي، جڏهن ته 178 رنسن جي ڪل اسڪور تي بابر اعظم 71 رنسن تي ربادا جو شڪار بڻيو. پاڪستان جي آخري وڪيٽ 181 رنسن تي شاهين آفريدي جي ڪري.
پاڪستان طرفان پهرين اننگ ۾ بابر اعظم 71، اظهر علي 36 ۽ حسن علي 21 رنسن ٺاهي نمايان رهيا. ٻي پاسي ڏکڻ آفريقا طرفان ڊيان اوليور شاندار بالنگ جو مظاهرو ڪندي 6 شڪار ڪيا، جڏهن ته ڪگيسو رابادا 3 ۽ ڊيل اسٽين هڪ وڪيٽ حاصل ڪئي.
پهرين اننگ جي شروعات ۾ ڏکڻ آفريقي اوپنر محتاط راند کيڏي، پر 30 رنسن بعد وڪيٽون ڪرڻ شروع ٿي ويون، اهڙي طرح ڏکڻ آفريقا 5 وڪيٽن جي نقصان تي 127 رنسون ٺاهيون. اوپنر مرڪرام 12 رنسن تي حسن جو شڪار بڻيو، اليگر کي 22 رنسن تي شاهين آفريدي پويلين ڀيڙو ڪيو. جنهن بعد ٽي بي برون 29 رنسن جي اننگز کيڏي آئوٽ ٿيو. هاشم آملا به 8 رنسن تي پويلين موٽيو. ڏکڻ آفريقي ڪپتان فاف دوپليسي بنا ڪنهن رنس ٺاهڻ جي شاهين آفريدي جو شڪار بڻيو. پهرين ٽيسٽ جي پهرين ڏينهن ڏکڻ آفريقا 5 وڪيٽن جي نقصان تي 127 رنسون ٺاهيون. باووما 38 رنسن ۽ ڊيل اسٽين 13 رنسن تان سڀاڻي ٻي ڏينهن جي راند شروع ڪندا.
سنچورين ٽيسٽ جو پهريون ڏينھن بالرن جي نانءُ : ڏکڻ آفريقا جي اڌ ٽيم 127 تي آئوٽ، پاڪستاني ٽيم 181 رنسون ٺاھي سگھي
پهرين اننگ ۾ محمد عامر ۽ شاهين آفريدي 2-2 شڪار ڪيا، حسن علي هڪ وڪيٽ ورتي
روجهاڻ مزاري ۾ حادثو، ڪشمور واسي 2 نوجوان فوت
ڪشمور(ن پ ا) پنجاب جي علائقي روجهاڻ ۾ روڊ حادثي جي نتيجي ۾ ڪشمور واسي 2 نوجوان فوت ٿي ويا، هڪ ٻار ۽ 2 عورتون زخمي ٿي پيون.
روجهاڻ ۾ انڊس هاءِ وي تي ڪار ۽ ٻن موٽرسائيڪل وچ ۾ خوفناڪ ٽڪر ٿيو، جنهن جي نتيجي ۾ ڪشمور واسي نوجوان شهزادو چاچڙ ۽ نور احمد گولاٽو ٿڌي تي فوت ٿي ويا.
حادثي جي نتيجي ۾ هڪ ٻار ۽ 2 عورتون به زخمي ٿي پيون، فوتين جا لاش ۽ زخمين کي روجهاڻ اسپتال پهچايو ويو، جتان ضروري ڪارروائي بعد فوتين جا لاش ڪشمور روانا ڪيا ويا
محرابپور ۾ ٽائون ڪميٽي جو پيرسن ملازم پگهار لاءِ دربدر
ٽائون ڪميٽي جي چيئرمين جي بنگلي آڏو پيرسن جو احتجاج، ملازمن ڌڪا ڏئي موٽائي ڇڏيو
11 سالن کان ڪم پيو ڪريان، عملدارن بنا جواز منهنجي پگهار بند ڪري ڇڏي آهي: پيرسن
محرابپور (ن پ ا) ٽائون ڪاميٽي جو پيرسن ملازم اجرت نه ملڻ ڪري دربدر ٿي ويو، ٽائون ڪميٽي چيئرمين جي بنگلي آڏو احتجاج دوران ملازمن پيرسن کي ڌڪا ڏئي موٽائي ڇڏيو، پيرسن چيو آهي ته ٻن مهينن کان پگهارون بند ڪري جيئڻ جنجال بڻايو ويو آهي.
ملازم غوث بخش سومرو قرآن شريف کڻي ٽائون ڪاميٽي جي چيئرمين فاروق احمد لوڌي جي بنگلي آڏو احتجاج ڪيو ۽ نعريبازي ڪئي، جنهن بعد پريس ڪلب ۾ ميڊيا سان ڳالهائيندي پيرسن غوث بخش سومرو دانهيو ته مان گذريل 11 سالن کان ڊيلي ويجز تي بيلدار طور ڪم ڪري رهيو آهيان پر پورهيت دشمن چيئرمين من پسند ماڻهن کي رشوت عيوض پڪو ڪرايو پر منهنجي لاءِ ڪجهه به نه ڪيو.
پيرسن الزام هنيو ته ٽائون ڪميٽي چيئرمين جي حڪم تي ڪلارڪ ٻن مهينن کان منهنجي پگهار بند ڪري ڇڏي آهي، پگهار وٺڻ لاءِ چيئرمين جي بنگلي تي ويس پر سندس واٺن ڌڪا ڏئي موٽائي ڇڏيو،
پيرسن ملازم دانهيو ته ٻن مهينن کان پگهارون نه ملڻ ڪري منهنجا ٻچا بکون ڪاٽي رهيا آهن، اسپتال ۾ داخل بيمار گهرواري جو علاج رڪجي ويو آهي، معاملي جو نوٽيس وٺي فوري طور پڪو ڪرائي رڪيل پگهارون جاري ڪيون وڃن.
باڪسنگ ڊي ٽيسٽ: پاڪستاني بيٽنگ لائين واري جي ڀت ثابت، 76 تي 4 آئوٽ
فخر زمان 12، امام الحق 0، اسد شفيق 7 ۽ شان مسعود 19 ٺاهي سگهيا
سينچورين (اسپورٽس ڊيسڪ) پاڪستان ۽ ڏکڻ آفريڪا وچ ۾ پهرين ٽيسٽ ميچ ۾ پاڪستان ٽاس کٽي پهريان بيٽنگ جو فيصلو ڪرڻ کانپوءِ سندس 4 رانديگر 76 رنسن تي آئوٽ ٿي ويا آهن. سينچورين جي سپر اسپورٽس پارڪ ۾ ٻنهي ملڪن وچ ۾ کيڏي ويندڙ ميچ ۾ ميچ سرفراز احمد ٽاس کٽي بيٽنگ جو فيصلو ڪيو. اوپنر امام الحق ۽ فخر زمان ٻوٽو ٻاري نه سگهيا ۽ صرف 17 جي مجموعي اسڪور تي آئوٽ ٿي ويا. امام الحق ٻڙي اسڪور تي رباڊا جو شڪار ٿيو، جڏهن ته فخر زمان 12 رنسن تي ڊيل اسٽين جو 422 هون شڪار بڻجي ويو. اوليور پاران پڻ ٻه شڪار ڪيا، اسد شفيق 7 ۽ شان مسعود 19 رنسون ٺاهي آئوٽ ٿيا. ڊيل اسٽين ڏکڻ آفريڪا طرفان سڀ کان وڌيڪ ٽيسٽ وڪيٽن جو شان پولاڪ وارو رڪارڊ ٽوڙي ڇڏيو. پاڪستان طرفان محمد عباس، شاداب خان ۽ هارث سهيل زخمي هئڻ ڪري ٽيسٽ ميچ ۾ شرڪت نه ڪري سگهيا.
ملير ۾ مهروز ڪرڪيٽ ڪلب پاڪ سنڌ پريميئر ليگ جي ٽرافي کٽي ورتي
مهروز اسٽار ڪرڪيٽ ڪلب پهريان بيٽنگ ڪندي 137 رنسون ٺاهيون
ملير (ن پ ا) ملير جي شيدي ڳوٺ ڪرڪيٽ گرائونڊ تي پاڪ سنڌ پريميئر ليگ 2018 جي ايڊيشن جو ٻيو فائنل مقابلو مهروز اسٽار ڪرڪيٽ ڪلب ۽ الواجد اسپورٽس وچ ۾ ٿي گذريو، پهرين بيٽنگ ڪندي 10 اوورن ۾ 4 وڪيٽن جي نقصان تي مهروز ڪرڪيٽ ڪلب 137 اسڪور ٺاهيو، جنهن ۾ جمشيد 34، آصف وساڻ 23 ۽ رحمان 18 رنسون ٺاهي نمايان رهيا. جواب ۾ بيٽنگ ڪندي الواجد اسپورٽس ڪرڪيٽ ڪلب 6 وڪيٽن جي نقصان تي 107 اسڪور تي ڍير ٿي وئي. رنر اپ ٽيم طرفان منظور 34، اذام 19 رنسون ٺاهيون. فائنل تقريب ۾ مهمان خاص ڄام محمد خان، عبدالهادي جوکيو، حبيب زيب خاصخيلي، رمضان خاصخيلي، جان عالم جوکيو، جاويد جوکيو، عظيم خاصخيلي، لياقت بلوچ، شاهجان بلوچ، يامين خاصخيلي سميت ٻين سياسي ۽ سماجي اڳواڻن ۽ ڪرڪيٽ جي شوقينن شرڪت ڪئي. ان موقعي تي رانديگرن چيو ته ملير جا رانديگر پنهنجي مدد پاڻ راندين جا ميدان سجائي رهيا آهن، ملير اندر هزارين ڪرڪيٽ جا شوقين آهن پر حڪومت توڙي ضلعي انتظاميا ڪوبه سهڪار ڪرڻ لاءِ تيار ناهي. هنن چيو ته ملير ۾ راندين جا گرائونڊ تباهه ٿيل آهن، جيڪي رانديگر پنهنجي مدد پاڻ تحت خرچ ڪري انهن کي ٺهرائين ٿا. هنن سنڌ حڪومت ۽ چونڊيل نمائندن کان مطالبو ڪيو ته ملير ۾ ڪرڪيٽ جي مداحن سان سهڪار ڪيو وڃي ۽ راندين جا ميدان بحال ڪري ڏنا وڃن.
اردو ۽ پنجابي جو نالي واري شاعر منير نيازي کي وڇڙئي ٻارنهن سال گذري ويا
ڪراچي(شوبز نيوز) پاڪستان جي نالي واري شاعر منير نيازي کي وڇڙئي 12 سال ٿي ويا آهن، اڄ سندس 12 هين ورسي ملهائي پئي وڇي. منير نيازي هميشه دير ڪر ديتا هون، ضروري بات ڪهني هو، ڪوئي واعده نڀانا هو، جهڙن احساسن کي لفظن جو روپ ڏيندڙ شاعر هو. منير نيازي اردو سان گڏ پنجابي ۾ به شاعري ڪئي، جيڪا تمام گهڻي مشهور ٿي، هن 9 اپريل 1923ع ۾ ورهاڱي کان واري پنجاب جي شهر هوشيارپور ۾ ڄائو.
منير نيازي کي مزاحمتي شاعر به چيو ويندو آهي، سندس اردو جي شاعري جا 13، پنجابي جا 3 ۽ انگريزي جا 2 ڪتاب شايع ٿي چڪا آهن. سندس لکيل گيت ڪيترين ئي فلمن جو حصو پڻ بڻيا، جڏهن ته پاڪستاني حڪومت پاران کيس صدارتي تمغو، حسن ڪارڪردگي، ستاره امتياز ۽ اڪيڊمي اديبيات پاڪستان ”ڪمال فن ايوارڊ“ سان نوازيو ويو. منير نيازي 26 ڊسمبر 2006ع تي لاڏاڻو ڪري ويو.
باڪسنگ ڊي ٽيسٽ: پاڪستان جو ڏکڻ آفريڪا خلاف پهريان بيٽنگ جو فيصلو
پهرين ٽيسٽ ۾ زخمي هارث سهيل جي جڳهه تي شان مسعود کي ٽيم ۾ شامل ڪيو ويو
سينچورين (اسپورٽس ڊيسڪ) پاڪستان ۽ ڏکڻ آفريڪا وچ ۾ پهرين ٽيسٽ ميچ ۾ پاڪستان ٽاس کٽي پهريان بيٽنگ جو فيصلو ڪري ورتو آهي. سينچورين جي سپر اسپورٽس پارڪ ۾ ٻنهي ملڪن وچ ۾ ميچ سرفراز احمد ٽاس کٽي بيٽنگ جو فيصلو ڪيو. پاڪستان طرفان محمد عباس، شاداب خان ۽ هارث سهيل زخمي هئڻ ڪري ٽيسٽ ميچ ۾ شرڪت نه ڪري سگهيا، جڏهن ته فخر زمان فٽ ٿي ٽيم جو حصو هوندو. سينچورين جي پچ بالرن لاءِ سازگار ٻڌائي پئي وڃي، جيڪا تيز ۽ بائونسي آهي، جڏهن ته پچ تي بال سوئنگ ٿيڻ جا امڪان پڻ آهن. پاڪستان جي ٽيم ۾ فخر زمان، امام الحق، اظهر علي، اسد شفيق، شان مسعود، بابر اعظم، سرفراز احمد، حسن علي، ياسر شاهه، محمد عامر ۽ شاهين آفريدي شامل هوندا. ڏکڻ آفريڪا طرفان ڊيل اسٽين کي پنهنجي ملڪ طرفان سڀ کان وڌيڪ وڪيٽون حاصل ڪرڻ لاءِ هڪ وڪيٽ جي ضرورت آهي، جنهن سان ڊيل اسٽين شان پولاڪ جو 422 وڪيٽن جو رڪارڊ ٽوڙيندو.
ڏهرڪي: ايس ايس پي جي نوٽيس بعد شاگرد سان زيادتي جو ڪيس داخل، 2 جوابدار گرفتار
ايس ايس پي گهوٽڪي متاثر ڌر تي راڄوڻي لاءِ دٻاءُ ۽ ڪيس داخل نه ڪرڻ جو نوٽيس ورتو هو
پوليس ڪيس نينگر جي پيءُ جي فرياد تي داخل ڪري ٻنهي جوابدارن کي گرفتار ڪري ورتو
ڏھرڪي (ن پ ا) ڏهرڪي پوليس معصوم شاگرد سان زيادتي واري معاملي جو ايس ايس پي جي نوٽيس بعد ڪيس داخل ڪندي ٻنهي جوابدارن کي گرفتار ڪري ورتو
ڪجهه ڏينهن اڳ جنسي زيادتي جو نشانو بڻايل معصوم شاگرد جي وارثن الزام هنيو هو ته پوليس راڄوڻي لاءِ دٻاءُ وجهي رهي آهي، اهڙي معاملي جو ايس ايس پي گهوٽڪي نوٽيس وٺندي ڏهرڪي پوليس کي جوابدارن خلاف ڪيس داخل ڪرڻ جو حڪم ڏنو.
ايس ايس پي جي هدايتن تي پوليس نينگر جي پيءُ عبدلجبار جي فرياد تي جوابدارن فضل سومرو ۽ علي خلاف ڪيس داخل ڪرڻ بعد ٻنهي کي گرفتار به ڪري ورتو
پاڪستان ۽ ڏکڻ آفريڪا اڄ پهرين ٽيسٽ ۾ مقابلو ڪندا
پاڪستان 8 سالن کانپوءِ ساڳي گرائونڊ تي ٽيسٽ ميچ کيڏندو
وڪيٽ فاسٽ بالرن لاءِ سازگار هوندي، بيٽنگ ٽيم جي ڪارڪردگي ۾ اهم
سينچورين (اسپورٽس ڊيسڪ) پاڪستان ۽ ڏکڻ آفريڪا وچ ۾ پهرين ٽيسٽ ميچ ۾ مقابلو ڪندا، سينچورين جي سپر اسپورٽس پارڪ ۾ ٻنهي ملڪن وچ ۾ ميچ 1 وڳي شروع ٿيندي. پاڪستان طرفان محمد عباس زخمي هئڻ ڪري ٽيسٽ ميچ ۾ شرڪت نه ڪري سگهندو، جڏهن ته فخر زمان فٽ ٿي ٽيم جو حصو هوندو. سينچورين جي پچ بالرن لاءِ سازگار ٻڌائي پئي وڃي، جيڪا تيز ۽ بائونسي آهي، جڏهن ته پچ تي بال سوئنگ ٿيڻ جا امڪان پڻ آهن. پاڪستان جي ٽيم ۾ فخر زمان، امام الحق، اظهر علي، اسد شفيق، حارث سهيل، بابر اعظم، سرفراز احمد، حسن علي، ياسر شاهه، محمد عامر ۽ شاهين آفريدي شامل هوندا. ڏکڻ آفريڪا طرفان ڊيل اسٽين کي پنهنجي ملڪ طرفان سڀ کان وڌيڪ وڪيٽون حاصل ڪرڻ لاءِ هڪ وڪيٽ جي ضرورت آهي، جنهن سان ڊيل اسٽين شان پولاڪ جو 422 وڪيٽن جو رڪارڊ ٽوڙيندو.
نوشھروفيروز:ڄاڃين سان ڀريل بس ڪلٽي.ڊرائيور فوت
گھوٽ سميت 27 ڄڻا زخمي.7 سخت زخمي نوابشاھ اسپتال منتقل
نوشهروفيروز(ن پ ا) قومي شاهراهه تي ڪنڊيارو ڊگري ڪاليج موڙ وٽ ڄاڃين سان ڀريل بس ڪلٽي ٿي پئي. بس ڊرائيور زاهد اعواڻ موقعي تي ئي فوت ٿي ويو جڏهن ته گهوٽ ارشد اعواڻ سميت 27 ڄڻا زخمي ٿي پيا.زخمين ۾ مرد، عورتون ۽ ٻار شامل آهن جن کي ڪنڊيارو اسپتال منتقل ڪيو ويو آهي، زخمين ۾ اظهر، شهزاد، ثقلين، عاصمه، مصطفي، صغران بيگم، توقير، ڪلثوم، بيگم عقاب، رشيدان بيگم، بي بي مسڪان، نازش، صبح فاطمه، نصرت، پروين، الهه بچايو، شاهد، اختر ۽ محمد صديق شامل آهن جن مان ست زخمين جي حالت ڳڻتي جوڳي هجڻ ڪري کين نوابشاه منتقل ڪيو ويو ويو آهي. ڄاڃين جي بس گهوٽ پرڻائڻ لاء پنجاب جي علائقي راجپور کان مورو اچي رهي هئي ته تيز رفتاري سبب موڙ ڪاٽيندي بس ڊرائيور جي ڪنٽرول مان نڪري وئي ۽ حادثو پيش آيو۔
اسرائيل جي شام مٿان هوائي بمباري، ڪيترائي فوجي زخمي
اسرائيل پاران دمشق ۾ هٿيارن جي گودام تي حملو ڪيو
اسرائيل پاران هوائي حملي جي تصديق ناهي ڪئي وئي
دمشق (ا ڊ) شام جي گادي واري هنڌ دمشق ڀرسان زوردار ڌماڪا ٻڌا ويا، جنهن جي باري ۾ شام جو چوڻ آهي ته اسرائيل پاران هوائي حملا ڪيا ويا آهن، جنهن ۾ اسلحي جي ڊپو کي نشانو بڻايو ويو آهي. شامي فوجي جي ترجمان پاران جاري ڪيل بيان ۾ چيو آهي ته حملي ۾ ڪيترائي فوجي زخمي ٿيا آهن، جڏهن ته ٻي پاسي سرڪاري ميڊيا پاران چيو ويو ته اسلحي جي ڊپو تي حملي سبب 3 فوجي زخمي ٿي پيا آهن. اسرائيل پاران حملي جي تصديق ناهي ڪئي، سندس چوڻ هو ته سندن دفاعي ميزائل سسٽم کي لاڳو ڪيو ويو آهي ته جيئن شام ميزائلن کي روڪي سگهجي سگهجي. دمشق ۾ زوردار ڌماڪا ٻڌا ويا ۽ گولا باري جا آواز پڻ ٻڌا ويا. اسرائيل ان کان اڳ به شام تي ڪيترائي ڀيرا حملا ڪري چڪو آهي،
عادلپور جي ساجد ڪلوڙ ڪيس ۾ اڳڀرائي نه ٿي، وارثن جو پوليس جي آندل منڍي قبولڻ کان انڪار، ڊي اين اي رپورٽ نه ملي
اهلڪارن قبرستان مان ڪنهن اڻ ڄاتل شخص جي منڍي کڻي مقتون نوجوان جي وارثن کي ڏني: ذريعا
اهلڪارن پراڻي منڍي هٿ ڪئي، ڊي اين اي لاءِ جزا اسلام آباد بدران ڄامشوري اماڻڻ تي به سوال
ميرپور ماٿيلو(رپورٽ: مشتاق ميراڻي ۽ برڪت ميراڻي) عادلپور ۾ قتل ٿيل نوجوان جي گم ٿيل منڍي واري معاملي بابت پوليس ذريعن وٽان ڇرڪائيندڙ انڪشاف سامھون آيو آھي. گھوٽڪي پوليس انسانيت جا سمورا ليڪا لتاڙيندي ۽ مقتول جي وارثن جي ڦٽن تي لوڻ ٻرڪيندي قبرستان مان اڻڄاتل شخص جي منڍي کڻي اچي وارثن کي ڏني، مقتول جي وارثن منڍي وٺڻ کان انڪار ڪري ڇڏيو. ان حوالي سان “پنهنجي اخبار” کي مليل معلومات موجب عادلپور شھر ۾ اٽڪل ڏيڍ مھينو اڳ بيدردي سان قتل ڪيل نوجوان ساجد ڪلوڙ جنھن کي نامعلوم جوابدار قتل ڪرڻ کانپوء سندس منڍي وڍي پاڻ سان گڏ کڻي ويا ھئا ان ڪيس جا پوليس جوابدار ته گرفتار ڪري نه سگھي آھي پر سندس گم ٿيل منڍي واري معاملي کي به مذاق بڻائي ڇڏيو آھي. ان حوالي سان پوليس ذريعن انڪشاف ڪيو آھي ته ھفتو اڳ گھوٽڪي جي سي آءِ اي ۽ عادلپور ٿاڻي جي پوليس جيڪا منڍي ھٿ ڪري وارثن وٽ کڻي آئي ھئي، اھا ساجد ڪلوڙ جي نه پر ڪنهن اڻ ڃاتل شخص جي آھي ذريعن موجب ضلعي گھوٽڪي جي مختلف شھرن ۾ قاتلن جي گرفتاري ۽ مقتول جي منڍي ھٿ ڪرڻ جي حوالي سان جيڪي احتجاج ٿي رھيا ھئا انھن جو زور ٽوڙڻ لاء پوليس ھڪ حڪمت عملي تحت قبرستان مان ڪنهن قبر کي کوٽي منڍي ڪڍي وارثن وٺ کڻي آئي ھئي۽ انهن تي زور ڀريو ته هو اھا منڊي ساجد ڪلوڙ جي سمجهي قبول ڪنپر مقتول ساجد جي وارثن اھا منڊي وٺڻ کان کتو جواب ڏيندي ان جي مالڪي کان ئي انڪار ڪري ڇڏيو ھو. ھاڻي اھا منڊي ڪٿي آھي ان بابت ڪا به ڄاڻ نه آھي. جڏھن ته پوليس چئي رھي آھي ته اھا منڍي ڊي اين اي ٽيسٽ لاء ڄامشورو موڪلي وئي آهي. هاڻ ان معاملي تي ڪيترا سوال پيدا ٿي پيا آھن پوليس کي مليل منڊي ساجد ڪلوڙ جي ناھي ته پوء ڪنھن جي آھي ـ منڍي 35 ڏينھن کان پوء کليل ميدان ۾ ڪير اڇلائي ويو ـ منڍي ڪنھن ٻئي عام ماڻھو کي نظر ڇو نه آئي ۽ پوليس کي ئي منڍي ڇو ملي ـ منڊي 35 ڏينھن بعد شھر ٻاھريان ڪير اڇلائي ويو ـ پوليس وارثن تي زور ڇو ڀريو ته منڊي ساجد جي آھي وڃي دفنايو ـ ڊي اين اي لاء جزا اسلام آباد موڪلڻ بجاء ڄامشورو ڇو موڪليا ويا. ۽ اڃا تائين رپورٽ به نه آئي آهي.
ليبيا جي پرڏيهي کاتي آفيس تي آپگهاتي حملو، 2 مارجي ويا
طرابلس (انٽرنيشنل ڊيسڪ) ليبيا جي پرڏيهي کاتي جي عمارت جي آپگهاتي حملي ۾ 2 ڄڻا مارجي ويا ۽ 9 زخمي ٿي پيا.
پرڏيهي ميڊيا موجب ليبيا جي راڄڌاني طرابلس ۾ پرڏيهي کاتي جي عمارت ۾ ٻن حملو ڪندڙن داخل ٿيڻ جي ڪوشش ڪئي، ناڪامي تي هڪ حملو ڪندڙ پاڻ کي مک دروازي تي ڌماڪيدار مادي سان اڏائي ڇڏيو، جڏهن ته ٻيو حملو ڪندڙ مشين گن سان فائرنگ ڪندي اندر داخل ٿيو.
آپگهاتي حملي ۾ پرڏيهي کاتي جي عمارت جي سيڪيورٽي ڊيوٽي ڏيندڙ هڪ اهلڪار ۽ هڪ ڪلراڪ مارجڻ جي تصديق ڪئي وئي، جڏهن ته 9 ملازم به زخمي ٿيا. عمارت ۾ داخل ٿيل حملو ڪندڙ کي سڪيورٽي اهلڪارن ماريو.
هوڏانهن سڪيورٽي اختيارين جو چوڻ هو ته حملي ۾ داعش جي ملوث هجڻ واري امڪان کي رد نٿو ڪري سگهجي.
جڏهن ته داعش سميت ڪنهن ويڙهاڪ ڌڙي حملي جي ذميواري قبول ناهي ڪئي.
حيدرآباد بار جا چونڊ نتيجا چيلنج ، ڪامياب اميدوارن کي نوٽيس جاري
نثار دراني گروپ جي سوڀ کي مخالفن اميدوارن چيلنج ڪيو، نثار دراني 5 جنوري تي طلب
چونڊون شفاف نه ٿيون، 21 سو وڪيلن مان رڳو 900 کي اهل قرار ڏيڻ ڌانڌلي آهي: درخواستگذار
حيدرآباد(رپورٽ: فقير سليم) حيدرآباد بار جون چونڊون تڪراري بڻجي ويون آهن. هارايل گروپ جي اميدوارن چونڊ نتيجن کي رد ڪندي نثار دراني خلاف سنڌ بار ڪائونسل ۾ درخواست داخل ڪرائي ڇڏي آهي. سنڌ بار ڪائونسل نثار دراني کي نوٽيس جاري ڪندي 5 جنوري تي طلب ڪري ورتو آهي. سنڌ هاءِ ڪورٽ بار جي اليڪشن 22 ڊسمبر تي اليڪشن ڪميٽي جي چيئرمين ايڊووڪيث ارشد پٺاڻ جي نگراني ۾ ٿي، جنهن ۾ نثار دراني گروپ اڪثريت سان ڪاميابي ماڻي، جڏهن ته صدارتي اميدوار جگديش آر مولاڻي سميت سندس حمايتي اميدوار پڻ هارائي ويا. هارايل اميدوار جگديش مولاڻي چونڊ نتيجن کي رد ڪندي چيو ته اليڪشن ڪميٽي شفاف اليڪشن ڪرائڻ ۾ ناڪام وئي آهي، اليڪشن ڪميٽي جي چيئرمين نثار دراني جي حمايت ڪئي، اهو ئي سبب آهي جو اليڪشن واري ڏينهن پولنگ ٿيڻ کان پنج ڪلاڪ اڳ اسانکي ووٽر لسٽ ڏني وئي، جيڪا ڌانڌلي جي شروعات هئي، جڏهن ته 21 سو وڪيلن مان رڳو 900 وڪيلن کي ووٽ ڏيڻ لاءِ اهل قرار ڏنو ويو، اسان جا حمايتي جن هاءِ ڪورٽ بار ۽ سنڌ بار ڪائونسل جا چالان جمع ڪرائي ڇڏيا هئا، انهن جا نالا شامل نه ڪيا ويا هئا. هنن الزام مڙهيو ته اليڪشن ڪميٽي هڪ سرڪاري ملازم کي اليڪشن وڙهڻ لاءِ اهل قرار ڏئي ڌر هجڻ جو ثبوت ڏنو، جنهن جي فيصلي خلاف سنڌ بار ڪائونسل کي درخواست ڏني آهي. هوڏانهن سنڌ بار ڪائونسل جگديش آر مولاڻي جي درخواست تي نثار دراني کي نوٽيس جاري ڪندي 5 جنوري تي طلب ڪري ورتو آهي.
آسڪر ايوارڊ ماڻيندڙ آمريڪي اداڪار ڪيون اسپيسي تي فرد جرد لاڳو
بوسٽن (شوبز ڊيسڪ) آمريڪي رياست ميسا چوسٽس ۾ آسڪر ايوارڊ ماڻيندڙ اداڪار ڪيون اسپيسي تي 18 ورهين جي نوجوان سان بدفعلي الزام ۾ فرد لاڳو ڪيو ويو آهي.
نانٽڪيٽ جي مقامي عدالت ۾ ان ڪيس جي وڌيڪ ٻڌڻي 7 جنوري تي ڪئي ويندي، جڏهن ته اسپيسي جي وڪيل اڃا تائين عدالت کي ڪو به جواب ناهي ڏنو.
پرڏيهي ميڊيا موجب ڪيون اسپيسي تي الزام آهي ته هن 2 سال اڳ 18 ورهين جي نوجوان کي جنسي زيادتي جو نشانو بڻايو هو.
گذريل سال نومبر مهيني ۾ هڪ ٽي وي چينل جي صحافي هيدر الزام هنيو ته سندس 18 ورهين جي پٽ کي اسپيسي 2016 جي جولاءِ مهيني ۾ بدفعلي جو نشانو بڻايو.