لاهور( م ڊ ) سپريم ڪورٽ نوازشريف خلاف پاڪ پتن زمين ڪيس جي جاچ لاءِ جوڙيل جي آءِ ٽي جو سربراهه تبديل ڪري ڇڏيو، نئين سربراهه کي 10 ڏينهن اندر ٽي او آرز ڏيڻ جي هدايت ڪئي وئي.
سپريم ڪورٽ لاهور رجسٽري ۾ چيف جسٽس پاڪستان ميان ثاقب نثار جي سربراهي ۾ پاڪ پتن زمين ڪيس جي ٻڌڻي ٿي، جنهن دوران جي آءِ ٽي سربراهه ڊي جي نيڪٽا سربراهي کان معذرت ڪئي، جنهن تي چيف جسٽس چيو ته خالق داد لڪ جي معذرت جا ڪارڻ حقيقتن تي ٻڌل آهن، تنهنڪري مٿس دٻاءُ نه ٿا وجهي سگهون.
ڊي جي نيڪٽا جي معذرت بعد چيف جسٽس ڊي جي اينٽي ڪرپشن پنجاب ڊاڪٽر حسين اصغر کي جي آءِ ٽي جو نئون سربراهه مقرر ڪري ڇڏيو، عدالت جي آءِ ٽي جي نئين سربراهه کي 10 ڏينهن ۾ ٽي او آرز ڏيڻ جي هدايت ڪئي آهي.
نوازشريف خلاف پاڪ پتن زمين ڪيس: جي آءِ ٽي جو سربراهه تبديل
سپريم ڪورٽ ۾ ڊي جي نيڪٽا خالد داد جي آءِ ٽي جي سربراهي کان معذرت ڪئي
باڪسنگ ڊي ٽيسٽ: ڏکڻ آفريڪا 223 رنسن تي ڍير، پاڪستان مٿان 43 رنسن جي برتري
پهرين اننگز ۾ پروٽيز 223 رنسون ٺاهي پاڪستان مٿان 42 رنسن جي برتري حاصل ڪئي
محمد عامر ۽ شاهين شاهه آفريدي جا 4- 4 شڪار، حسن علي جون 2 وڪيٽون
سينچورين (اسپورٽس ڊيسڪ) ڏکڻ آفريڪا ۽ پاڪستان وچ ۾ پهرين باڪسنگ ٽيسٽ جاري آهي، ڏکڻ آفريڪا پهرين اننگز ۾ 223 رنسن تي آل آئوٽ ٿي وئي ۽ پاڪستان مٿان 42 رنسن جي سرسي حاصل ڪري ورتي آهي. پاڪستان طرفان محمد عامر ۽ شاهين آفريدي شاندار بالنگ ڪندي چار چار وڪيٽون حاصل ڪيون، جڏهن ته حسن علي 2 وڪيٽون حاصل ڪيون. ڏکڻ آفريڪا پاران بوما 53 رنسون ٺاهي نمايان رهيو جڏهن ته ڊي ڪاڪ 45 رنسون ٺاهي ڏکڻ آفريڪا کي برتري ڏيارڻ ۾ اهم ڪردار ادا ڪيو.
پاڪستان پهرين اننگز ۾ 181 رنسن تي آل آئوٽ ٿي ويو هو، جنهن کانپوءِ ڏکڻ آفريڪا پهرين ڏينهن پنج وڪيٽن جي نقصان تي 127 رنسون ٺاهيون هيون. ٻي ڏينهن جي شروعات ۾ ڏکڻ آفريڪا شروع ۾ ئي ڏکيائين جو شڪار رهي هئي پر ڊي ڪاڪ 45 ۽ رباڊا 19 رنسون ٺاهي برتري حاصل ڪئي. پاڪستان کي ٻي اننگز ۾ هدف کان پهريان 43 رنسن جو خسارو ختم ڪرڻو پوندو.
سنڌ ۾ بصرن جا اگهه ڌڙام سان ڪري پيا، آبادگارن جون ڳيتون
ٻن هفتن ۾ بصر 800 مان گهٽجي 300 رُپيا مڻ ٿي ويو، آبادگارن جا مٿي تي هٿ، اگهه ڪنٽرول ڪرڻ جو مطالبو
بصرن جو اگه گهٽجڻ ڪري ھاڻ خرچ پورو ڪرڻ بھ مشڪل ٿي ويو آھي: آبادگارن جون دانھون
ڪراچي (نمائندن وٽان) سنڌ ۾ بصرن جو اگهه ڌڙام سان ڪري پيا، ٻه هفتا اڳ مارڪيٽ ۾ بصرن جو في مڻ اگهه 800 سئو رُپيا هو، پر حڪومت طرفان بصر ايڪسپورٽ نه ڪرڻ ۽ ڀارت کان سستي اگهه ۾ بصر گهرائڻ سبب سنڌ ۾ بصرن جا اگهه ڌڙام سان ڪري پيا آهن. آبادگار اڳواڻن الله بخس ٽالپر، حاجي نثار پالاري ۽ سنڌ آباگار بورڊ جي صدر عبدالمجيد نظاماڻي جو چوڻ آهي ته سنڌ جي ڪيترن ئي علائقن ۾ پاڻيءَ دير سان پهچڻ ڪري بصرن جي پوکي دير سان ٿي، سيزن جي شروعات ۾ اڌ بصر وڪرو ٿي ويا پر هن وقت بصرن جا اگهه ڪري پيا آهن. آبادگار اڳواڻن جو چوڻ آهي ته 2 هفتا اڳ بصر في مڻ 800 رُپيا وڪرو ٿي رهيو هو، پر هاڻ اگهه گهٽجي 3 کان ساڍا 300 رُپيا في مڻ ٿي ويو آهي. اهڙي صورتحال ۾ آبادگارن جو خرچ به نٿو ٿئي ۽ آبادگارن بصر مارڪيٽ ڏانهن موڪلڻ ڇڏي ڏنو آهي. سنڌ ۾ هن ڀيري مجموعي طور 2 لک ايڪڙن تي بصرن پوکيا ويا هئا، جنهن مان اڌ بصر ته مارڪيٽ ۾ وڪرو ٿي ويا آهن، پر ٿاڻي بولا خان، ٿاڻو احمد خان، گهوٽڪي، دادو ۽ سنڌ جي اُترين علائقن جا بصر گهٽ اگهه ملڻ سبب وڪرو نه ٿي سگهيا آهن. آبادگار اڳواڻن مطالبو ڪيو آهي ته بصرن جي اگهن کي ڪنٽرول ڪرڻ لاءِ مناسب پاليسي جوڙي وڃي ته جيئن بصرن جا آبادگار ڳاٽي ٽوڙ نقصان کان بچي سگهن.
غوثپور: نوجوان جا قاتل گرفتار نه ٿيڻ خلاف بجاراڻي برادري جي ماڻهن جو ڌرڻو، انڊس هاءِ وي تي گاڏيون بيهجي ويون
5 ڏينهن اڳ جهيڙي دوران قتل ٿيل نوجوان دوست علي بجاراڻي جي وارثن ڌرڻو هنيو
ڪيس داخل ٿيڻ باوجود پوليس جوابدارن کي گرفتار نٿي ڪري: مظاهرين
غوثپور (ن پ ا) غوثپور ۾ 5 ڏينهن اڳ بجاراڻي ۽ تيغاڻي برادري جي ٻن ڌرين ۾ جهيڙي دوران مارجي ويل نوجوان دوست علي بجاراڻي جا قاتل گرفتار نه ٿيڻ خلاف متاثر ڌُر طرفان انڊس هاءِ وي تي ڌرڻو هنيو ويو، جنهن جي نتيجي ۾ ڪيتري ئي دير تائين روڊ جي ٻنهي پاسن کان گاڏيون بيٺل رهيون. مظاهرين ٽائرن کي باهيون ڏئي پوليس خلاف نعريبازي ڪئي. مظاهري سبب مختلف شهرن ويندڙ گاڏين سوڌو شهيد بينظير ڀٽو جي ورسيءَ ۾ شرڪت لاءِ ويندڙ پ پ ڪارڪنن جا قافلا به رُڪجي ويا. مظاهرين چيو ته قتل ڪيس داخل ٿيڻ باوجود پوليس جوابدارن کي گرفتار نه پئي ڪري.
پاڪستان ۽ برطانيه وچ ۾ قيدين جي مٽاسٽا جو معاهدو ٿي ويو
پاڪستان ۽ برطانيه وچ ۾ قيدين جي مٽاسٽا جو معاهدو ٿي ويو
ٻنهي ملڪن ۾ قيد شهري رهيل سزا پنهنجي ملڪ ۾ ڪاٽيندا: پڌرنامو
اسلام آباد ( ن پ ا) پاڪستان ۽ برطانيه وچ ۾ قيدين جي مٽا سٽا جو معاهدو ٿي ويو، ٻنهي ملڪن ۾ قيد شهري پنهنجي رهيل سزا پنهنجي ملڪ ۾ ڪاٽيندا.
گهرو وزارت طرفان جاري ڪيل پڌرنامي موجب پاڪستان ۽ برطانيه وچ ۾ قيدين جي مٽا سٽا وارو معاهدو مڪمل ٿي ويو، جنهن تي برطانيه جي هاءِ ڪمشنر ٿامس ڊريو ۽ پاڪستان جي گهرو سيڪريٽري اعظم سليمان صحيحيون ڪيون.
معاهدي جي پڌرنامي موجب معاهدي جي منظوري برطانوي گهرو وزير جي سيپٽمبر واري دوري دوران ڏني وئي هئي، جنهن تحت ٻنهي ملڪن جي قيدين کي هڪٻئي حوالي ڪيو ويندو ۽ ٻنهي ملڪن ۾ قيد شهري پنهنجي رهيل سزا پنهنجي ملڪ ۾ ڪاٽيندا.
برطانوي هاءِ ڪمشنر جو چوڻ آهي ته پاڪستان سان قيدين جي مٽاسٽا جو وارو معاهدو ٻنهي ملڪن ۾ سهڪار کي وڌيڪ مضبوط بڻائيندو.
ٺل: نينگر کي گاڏيءَ جو ٽڪر هڻي فرار ٿيندڙ ايڪسيئين سوگهو، ايم پي اي سهراب سرڪي جي ڀاءُ ايڪسيئن کي ڇڏائي ورتو
گاڏي روڪڻ تي ايڪسيئن جي گارڊز ۽ پوليس اهلڪار شهرين کي داٻا ڏيندا رهيا
ٿاڻي تي شهرين ۽ ايڪسيئن ۾ ڳالهيون، آبپاشي انجنيئر لياقت سرڪي ايڪسيئن کي ڇڏايو
ٺل (ن پ ا) ڊيرا مراد جمالي جو ايڪسيئن نذير لاکٽي ٺل ۾ نوجوان کي گاڏيءُ جو ٽڪر هڻڻ بعد فرار ٿيڻ جي ڪوشش ڪري رهيو هو ته شهرين کيس سوگهو ڪري ورتو. شهرين طرفان گاڏي روڪڻ کانپوءِ ايڪسيئن جا گارڊز توڙي سندس سيڪيورٽي اسڪواڊ ۾ شامل پوليس اهلڪار شهرين سان وڙهي پيا. ايڪسيئن جي گارڊز، پوليس اهلڪارن ۽ شهرين وچ ۾ ڪيتري ئي دير تائين جهيڙو هلندو رهيو، جنهن بعد ڌُريون ٺل ٿاڻي تي پهتيون. ايڪسيئن ۽ سندس گارڊز موقف هو ته گاڏيءَ غلطي مان لڳي آهي، پر اسان فرار نه ٿي رهيا هئاسين. جڏهن ته شهرين جو چوڻ هو ته ايڪسيئن ڄاڻي واڻي وچ شهر ۾ تيز رفتاري سان گاڏي هلائي ۽ نينگر کي ٽڪر لڳڻ بعد کيس اسپتال منتقل ڪرڻ بدران پاڻ فرار ٿيڻ جي ڪوشش ڪري رهيو هو. اُن دوران ايم پي اي سهراب سرڪي جو ڀاءُ ۽ آبپاشي انجنيئر لياقت سرڪي پهچي نينگر کي ٽڪر هڻندڙ ايڪسيئن جي جان ڇڏائي. جڏهن ته شهرين کي خالي دلاسا ڏئي خاموش ڪرايو ويو.
ڪراچي ۾ اينڪرپرسن مهڪ مهر مڙس سوڌو چوريءَ جي الزام ۾ گرفتار، جوڙي طرفان آئيس واپرائڻ لاءِ چوري ڪرڻ جو انڪشاف
مهڪ مهر ۽ سندس مڙس آئيس جو نشو ڪرڻ لاءِ گاڏيون چوري ڪندا هئا: ايس ايس پي سهائي
جوڙي جي قبضي مان چوري جي ڪار، پسٽل ۽ ٻيو سامان هٿ آيو: سهائي عزيز ٽالپر
ڪراچي) ن پ ا) ڊفنيس پوليس چوري جي الزام ۾ عورت اينڪر پرسن کي مڙس سوڌو گرفتار ڪري ورتو، ايس ايس پي سهائي عزيز ٽالپر دعويٰ ڪئي آهي ته جوڙو آئيس نشي جو عادي آهي، نشي لاءِ گاڏيون چوري ڪندو آهي.
ڪراچي ۾ پريس ڪانفرنس ڪندي ايس ايس پي سهائي عزيز ٽالپر چيو ته ڊفينس پوليس هڪ بنگلي تي ڇاپو هڻي عورت اينڪر پرسن مهڪ مهر کي مڙس سوڌو گرفتار ڪري ورتو، هن چيو ته ڇاپي دوران ٻنهي جي قبضي مان چوري ڪيل ڪار، پسٽل ۽ ٻيو چوري جو سامان هٿ آيو آهي.
سهائي عزيز ٽالپر چيو ته اينڪرپرسن مهڪ مهر ۽ سندس مڙس شعيب احمد پسند جي شادي ڪئي هئي، جوڙو آئيس نشي جو عادي آهي، جيڪو نشي جي لت پوري ڪرڻ لاءِ گاڏيون ۽ گاڏين جو سامان چوري ڪندو آهي، گرفتار خيرپور واسڻ مهڪ مهر ٽن مختلف چنئلز تي اينڪر پرسن طور ڪم ڪري چڪي آهي، جوڙو پڙهيل لکيل ۽ چالاڪ آهي.
شهيد بينظير ڀٽو جي ورسي: سنڌ جي 23 ايس ايس پيز ۽ 57 ڊي ايس پيز کي ڊيوٽي تي مقرر ڪيو ويو
حيدرآباد ( ن پ ا) شهيد بينطير ڀٽو جي ورسي جي سڪيورٽي لاءِ سنڌ جا 23 ايس ايس پيز، 57 ڊي ايس پيز ۽ 8 اي ايس پيز مقرر
شهيد بينظير ڀٽو جي 11 هين ورسي جي موقعي تي هزارين پوليس اهلڪارن کي سڪيورٽي لاءِ مقرر ڪيو ويو آهي، ان کانسواءِ سنڌ جا 23 ايس ايس پيز، 57 ڊي ايس پيز ۽ 7 اي ايس پيز به ورسي جي سڪيورٽي لاءِ ڊيوٽي ڏئي رهي رهيا آهن.
ڊيوٽي چارٽ موجب ايس ايس پي دادو پرويز احمد عمراڻي، ايس پي عمرڪوٽ، اعجاز احمد شيخ، ايس پي قمبر شهدادڪوٽ ذوالفقار علي مهر، ايس ايس پي شڪارپور ساجد حسين سبدزوئي، نوشهروفيروز جو ايس ايس پي طارق ولايت، ايس پي سجاول امير سعود مگسي، ايس ايس پي سانگهڙ ذيشان شفيق صديقي، اڪيلي عورت ايس پي نسيم آرا پنهور، ايس پي ڪشمور ڪنڌڪوٽ حيدر رضا، ايس پي حيدرآباد سرفراز نواز شيخ، ايس پي جيڪب آباد عبدالقيوم پتافي، ايس پي مٽياري عمران رياض، ايس پي بدين حسن سردار نيازي، ايس پي خيرپور عمر طفيل، ايس ايس پي شهيدبينظير آباد تنوير حسين تنيو، ايس پي جامشورو توقير محمد نعيم، ايس پي گهوٽڪي ڊاڪٽر اسد اعجاز ملهي، ايس پي ميرپورخاص عابد بلوچ، ايس پي ٽنڊو محمد خان ذوالفقار ٽالپر، مسعود بنگش، ڪامران نواز پنجوٺا، امداد شاه ۽ شاهجهان خان کي ڳڙهي خدابخش ۽ نئون ديرو هائوس سميت مختلف هنڌن تي ڊيوٽي لاءِ مقرر آهن.
ساڳي ريت 8 اي ايس پيز به ڳڙهي خدابخش سميت مختلف هنڌن تي ورسي جي موقعي تي سڪيورٽي تي مقرر آهن، جن ۾ شڪارپور جو فاروق احمد، گمبٽ جو عمران خان نيازي، ٺٽي جو سرفرازورڪ، سانگهڙ جو اظهر خان، سکر جو محمد سميع ملڪ، حيدرآباد جو عبدالله لڪ، خيرپور جو مظهراقبال ۽ ميرپورخاص جو اي ايس پي عمران مرزا شامل آهن، سنڌ جي مختلف ضلعن جي 57 ڊي ايس پيز کي پڻ ٽن ڏينهن لاءِ ورسي جي ڊيوٽي تي مقرر ڪيو ويو آهي، ڄاڻايل پوليس آفيسر 26 ڊسمبر کان 28 ڊسمبر تائين ورسي جي سڪيورٽي لاءِ ڊيوٽي ادا ڪرڻ بعد واپس پنهنجن ضلعن ڏانهن ويندا.
“هزارين شاگرد پريشان” لطيف يونيورسٽي جو سپلا سان ڳالهين بعد نئون امتحاني شيڊول جاري ڪرڻ جو فيصلو
انتظام پورا ڪري ورتا هئا، سپلا جي احتجاج سبب امتحان ملتوي ڪرڻا پيا: يونيورسٽي ترجمان
آن لائين فارم گم ڪرڻ کانپوءِ ڪاليج ڏانهن خالي فارم ڪاليجز ڏانهن موڪليا ويا آهن: سپلا
سکر (رپورٽر) شاهه عبداللطيف يونيورسٽي جي اختيارين ڪاليج سائيڊ جي ملتوي ٿيل امتحاني پيپر جو نئون شيڊول سپلا سان ڳالهين بعد جاري ڪرڻ جو فيصلو ڪري ورتو. سنڌ پروفيسرس اينڊ ليڪچررز ائسوسيئيشن طرفان ڪاليج سائيڊ جي امتحانن لاءِ انتظام اڻپورا هجڻ ڪري ڪاليج سائيڊ جي امتحانن جي بائيڪاٽ جو اعلان ڪيو ويو هو. يونيورسٽي انتظاميا ۽ سپلاءِ وچ ۾ تڪرار شدت اختيار ڪرڻ بعد يونيورسٽي انتظاميا سکر ۽ لاڙڪاڻي ڊويزن ۾ 28 ڊسمبر تي رٿيل ڪاليج سائيڊ جا امتحان ملتوي ڪيا ويا. ذريعن موجب يونيورسٽي انتظاميا چيو آهي ته سپلا اڳواڻن سان ڳالهيون ڪامياب ٿيڻ بعد ڪاليج سائيڊ جي امتحانن نئون شيڊول جاري ڪيو ويندو. شاهه عبداللطيف يونيورسٽي جي ترجمان جو چوڻ آهي ته ڪاليج سائيڊ جي امتحانن لاءِ سمورا انتظام مڪمل آهن، پر سپلا جي احتجاج سبب امتحان ملتوي ڪرڻا پيا. سپلا سکر ۽ لاڙڪاڻو ڊويزن جي صدر اصغر علي شاهه ۽ سيڪريٽري مشتاق ڦلپوٽو جو چون آهي ته جن شاگردن آن لائين فارم ڀريا هئا، يونيورسٽي انتظاميا انهن شاگردن جا فارم گُم ڪري ڇڏيا ۽ هاڻ ڪاليجن ڏانهن خالي فارم موڪلي هدايتون جاري ڪيون ويون آهن ته شاگردن کان جلد فارم ڀرايا وڃن. واضح رهي ته شاهه عبداللطيف يونيورسٽي ۽ سپلا وچ ۾ تڪرار سبب سکر ۽ لاڙڪاڻي ڊويزن جي 85 کان وڌيڪ ڪاليجن جا 60 هزار شاگرد رُلي ويا آهن. شاگردن ٻُڏتر ۾ آهن ته کين امتحانن لاءِ سلپون ڪڏهن ملنديون ۽ نئون شيڊول ڪڏهن جاري ٿيندو.
نيپرا بجلي جي اگهن ۾ 31 پيسا لاٿ ڪري ڇڏي
بجلي اگهن ۾ لاٿ نومبر جي ماهوار فيول ايڊجسٽمينٽ جي مد ۾ ڪئي وئي: نيپرا
بجلي اگهن ۾ لاٿ سان واهپيدارن کي 2 ارب رپين جو رليف ملندو: نيپرا
اسلام آباد ( ن پ ا ) بجلي جي اگهن ۾ 31 پيسا لاٿ ڪئي وئي، نيپرا موجب بجلي اگهن ۾ لاٿ سان واهپيدارن کي 2 ارب رپين جو رليف ملندو.
بجلي اگهن بابت ٻڌڻي نيپرا جي ٻڌڻي رحمت الله بلوچ جي صدارت ۾ ٿي، جنهن دوران بجلي جي اگهه ۾ 31 پيسا في يونٽ لاٿ جي منظوري ڏني وئي، نيپرا موجب بجلي اگهن ۾ لاٿ نومبر جي ماهوار فيول ايڊجسٽمينٽ جي مد ۾ ڪئي وئي.
نيپرا جو چوڻ آهي ته سينٽرل پاور پرچيزنگ ايجنسي بجلي جي اگهن ۾ لاٿ جي درخواست ڏني هئي ۽ اگهن ۾ لاٿ سان واهپيدارن کي 2 ارب رپين جو رليف ملندو.
ميهڙ پوليس اغوا ٿيل واپاري کي بازياب ڪرائڻ ۾ ناڪام، مغوي جي وارثن جو پوليس خلاف انڊس هاءِ وي تي ڌرڻو
ڌرڻي سبب انڊس هاءِ وي تي ٽريفڪ معطل، گاڏين جون قطارون لڳي ويون
ضمير ڏيرو کي بازياب ڪرائي کيس اغوا ڪندڙ جوابدارن کي گرفتار ڪيو وڃي: متاثر ڌُر جو مطالبو
ميهڙ ( ن پ ا ) ميهڙ ۾ واپاري ضمير ڏيرو جي اغوا خلاف وارثن انڊس هاءِ وي تي ڌرڻو هنيو آهي، ڌرڻي سبب انڊس هاءِ وي تي گاڏين جو قطارون لڳي ويون.
ڪجهه ڏينهن اڳ اغوا ڪيل واپاري ضمير ڏيرو کي پوليس بازياب ڪرائي نه سگهي، وارثن سندس بازيابي لاءِ انڊس هاءِ وي ڌرڻو هنيو، جنهن سبب ٽريفڪ معطل ٿي وئي ۽ گاڏين جون قطارون لڳي ويون.
مظاهرين چتاءُ ڏنو ته مغوي واپاري ضمير ڏيرو جي بازيابي تائين احتجاج جاري رکيو ويندو.
واضح رهي ته واپاري ضمير ڏيرو جي اغوا واري واقعي بعد هڪ ٻئي واپاري سندس خلاف ٺڳي جو ڪيس داخل ڪرايو هو، جنهن ۾ هن ڄاڻايو ته ضمير ڏيرو کانئنس لکين رپين جو زرعي سامان خريد ڪيو پر پيسا نه ڏنا.
”سائل رُلي ويا“ ملير ۾ قانون جا محافظ ۽ قانوندان آمهون سامهون، ايس ايس پي ملير جي نگراني ۾ ڌُرين وچ ۾ اڄ ڳالھيون ڪرائڻ جو فيصلو
ملير بار طرفان ايس ايڇ او کي نه هٽائڻ جي صورت ۾عدالتي ڪارروائين جي بائيڪاٽ جو چتاءُ
شاهه لطيف ٽائون ٿاڻي جي ايس ايڇ او زيادتي ڪئي آهي: وڪيل سڪندر شر
ملير (ن پ ا) ملير جي شاهه لطيف ٽائون ٿاڻي جي ايس ايڇ او طرفان ملير بار جي نائب صدر خلاف ڪيس داخل ڪرڻ ۽ کيس گرفتار ڪرڻ کانپوءِ پوليس ۽ وڪيلن ۾ پيدا ٿيل تڪرار شدت اختيار ڪري ويو. ملير بار ڪائونسل ايس ايڇ او معطل نه ٿيڻ جي صورت ۾ اڄ به عدالتي ڪارروائين جي بائيڪاٽ جو چتاءُ ڏئي ڇڏيو آهي. گذريل ڏينهن شاهه لطيف ٽائون ٿاڻي جي ايس ايڇ او نيڪ محمد کوسو ملير بار جي نائب صدر ۽ سينيئر وڪيل سڪندر شر خلاف شراب نوشي جو ڪيس داخل ڪري کيس گرفتار ڪري ورتو. ملير بعد ۾ جڊيشل مئجسٽريٽ ڇاپو هڻي پوليس طرفان باندي بڻايل وڪيل کي ڇڏائي ورتو. روزاني ”پنهنجي اخبار“ سان ڳالهائيندي وڪيل سڪندر شر چيو آهي ته ايس ايڇ او شاهه لطيف ٽائون کيس انتقامي ڪارروائين جو نشانو بڻائي رهيو آهي. هن چيو ته ڪجهه ڏينهن اڳ عمر ماروي ڳوٺ ۽ گرين سٽي سوڌو ملير جي مختلف علائقن مان ڦر ٿيل گاڏين جي حوالي سان ڊي ايس پي کي اطلاع ڏيڻ تي ايس ايڇ او نيڪ محمد کوسو مڇرجي پيو، جنهن بعد مون تي شراب نوشي جو ڪيس داخل ڪري گرفتار ڪري ڇڏيو آهي. ذريعن موجب ايس ايس پي پوليس توڙي وڪيلن کي معاملي تي ڳالهائڻ کان روڪيندي چيو آهي ته اڄ ڌُرين وچ ۾ ڳالهيون ڪري معاملو نبيريو ويندو. وڪيل سڪندر شر چيو آهي ته ايس ايڇ او شاهه لطيف ٽائون کي عهدي تان هٽائڻ تائين هڙتال ۽ عدالتي ڪارروائين جو بائيڪاٽ ختم نه ڪيو ويندو. واضح رهي ته گذريل ڏينهن به وڪيلن طرفان پوليس جي زيادتين خلاف احتجاجي مظاهرو ڪيو ويو هو. گذريل ڏينهن وڪيلن طرفان عدالتي ڪارروائين جو بائيڪاٽ ڪرڻ سبب ڪيترن ئي ڪيسن جي ٻڌڻي نه ٿي سگهي ۽ سائل ٻڌڻين جي انتظار ۾ رُلي ويا. ذريعن چيو آهي ته اڄ به جيڪڏهن عدالتي ڪارروائين جو بائيڪاٽ جاري رهيو ته ملير ڊسٽرڪٽ ڪورٽ سوڌو ضلعي جي ٻين عدالتن ۾ به ڪيترائي ڪيس التوا جو شڪار ٿي ويندا.
ڏڪار سٽيل ٿر ۾ ٻارن جي فوت ٿيڻ جو سلسلو جاري، وڌيڪ 3 ٻارڙا فوت
سول اسپتال مٺي ۾ ڪلثوم ۽ علي احمد سوڌو 3 ٻارڙا فوت ٿي ويا
هلندڙ مهيني فوتي ٻارن جو انگ 47 ٿي ويو، 46 ٻارن جو علاج جاري
مٺي (ن پ ا) ڏڪار سٽيل ٿر ۾ بک ۽ بيمارين وگهي ٻارن جي فوت ٿيڻ جو سلسلو رُڪجي نه سگهيو. سول اسپتال مٺي ۾ ٻارڙي ڪلثوم ۽ علي احمد سوڌو 3 ٻارڙا فوت ٿي ويا. جنهن بعد هلندڙ مهيني ٻارن جي فوت ٿيڻ جو انگ وڌي 47 ٿي ويو آهي. اسپتال اختيارين جو چوڻ آهي ته ٻارن جي وارڊ ۾ 46 ٻارڙا داخل آهن، جن جو علاج ڪيو پيو وڃي. ٻارن جي والدين جو چوڻ آهي ته هو ٿر جي پري وارن علائقن کان اچن ٿا، ويجهاڻي ۾ اسپتال نه هجڻ ڪري سول اسپتال مٺي پهچڻ تائين ٻار جي حالت وڌيڪ خراب ٿي ويندي آهي.
ريلوي جي زمين تي هائوسنگ سوسائٽيز ٺاهڻ تي پابندي لاڳو
سپريم ڪورٽ رائل پام ڪلب لاهور جي انتظاميا کي ٽوڙي ڇڏيو
رائل پام وارا ايترا بااثر آهن جو اڌ ملڪ انهن جي ڳالهه مڃندو آهي: چيف جسٽس
لاهور( م ڊ ) سپريم ڪورٽ ريلوي جي زمين تي هائوسنگ سوسائٽيز ٺاهڻ تي پابندي لڳائي ڇڏي، لاهور جي رائل پام ڪلب جي انتظاميه کي ٽوڙي سمورو رڪارڊ تحويل ۾ وٺڻ جو به حڪم ڏئي ڇڏيو.
سپريم ڪورٽ لاهور رجسٽري ۾ چيف جسٽس پاڪستان جي سربراهي ۾ 3 رڪني بينچ ريلوي جي زمين ليز تي ڏيڻ خلاف پاڻمرادو نوٽيس جي ٻڌڻي ڪئي، عدالت رائل پام بابت لاهور هاءِ ڪورٽ جي سمورن حڪمن کي غير اثرائتو ڪندي حڪم ڏنو ته ريلوي بابت ڪو به رڪارڊ پام ڪلب مان ٻاهر نه ويندو.
سپريم ڪورٽ رائل پام لاهور جي انتظاميه کي ٽوڙي فرگوسن چارٽرڊ ڪمپني کي ڪلب جي نئين انتظاميه قرار ڏئي ڇڏيو ۽ ان کي سمورو ريڪارڊ فوري طور پنهنجي قبضي ۾ وٺڻ جو حڪم ڏنو.
علي رضا عابدي جي قتل جي جاچ لاءِ پوليس جي 7 رڪني ٽيم قائم
ڪراچي( م ڊ ) اڳوڻي ايم اين اي علي رضا عابدي جي قتل جي جاچ لاءِ پوليس جي 7 رڪني ٽيم جوڙي وئي، سربراهي پير محمد شاهه ڪندو.
2 ڏينهن اڳ ڊفينس فيز 5 ۾ هٿياربندن جي فائرنگ ۾ مارجي ويل اڳوڻي ايم اين اي علي رضا عابدي جي قتل ڪيس جي جاچ جاري آهي.
ڊي آءِ جي ڏکڻ جاويد عالم اوڍو قتل ڪيس جي جاچ لاءِ 7 رڪني ٽيم جوڙي ڇڏي، ايس ايس پي ڏکڻ پير محمد شاهه کي ٽيم جو سربراهه بڻايو ويو، ايس ايس پي سھائي عزيز ٽالپر، طارق ڌاريجو، مختيار خاصخيلي، راجا اظهر محمود به ٽيم جو حصو هوندا.
پوليس ذريعن موجب علي رضا عابدي جي قتل جي مختلف رخن کان جاچ ڪئي پئي وڃي، جنهن ۾ هيل تائين ڪافي اڳڀرائي ٿي آهي.