ڪراچي (رپورٽر) ڪراچي جي بينڪنگ ڪورٽ ۾ اومني گروپ جي شگرملز مان کنڊ جي غائب ٿيڻ جي حوالي سان ڪيس جي ٻڌڻي ٿي ، جنهن دوران نيشنل بينڪ جو وڪيل توڙي توڙي اومني گروپ جا ماڻهو پيش ٿيا . ٻڌڻي دوران نيشنل بينڪ جي وڪيل عدالت کي ٻڌايو ته ٻانڌي شگرملز ڏانهن بينڪ جا 41 ڪروڙ روپيا رهيل هئا .تازو 15 ڪروڙ روپيا جمع ڪريا آهن جنهن کانپوءِ سموري رهيل رقم ادا ٿي چڪي آهي .جنهن تي عدالت حڪم ڏنو ته رقم جمع ٿيڻ جي حوالي سان دستاويز عدالت ۾ پيش ڪيا وڃن .شگرملز جي وڪيل جمشيد ملڪ عدالت کي ٻڌايو ته رهيل رقم ادا ڪرڻ کانپوءِ سمورو مامرو حل ٿي چڪو آهي .جنهن کانپوءِ ڪيس ختم ٿيڻ گهرجي .جنهن تي بينڪنگ ڪورٽ چيو ته هي ڪيس سپريم ڪورٽ ۾ به هلندڙ آهي اسان کي اعليٰ عدالت جي فيصلي جو انتظار آهي .ملز مان کنڊ غائب ٿيڻ بابت سپريم ڪورٽ ايف آءِ اي ۽ ٻين لاڳاپيل ادارن کي به ڪارروائي جو حڪم ڏنو آهي .
ٻانڌي شگرملز پاران بينڪن جي سموري رقم ادا ڪرڻ جي دعويٰ
بيڪنگ ڪورٽ ۾ ٻڌڻي،اومني گروپ وڪيل دليل ڏنا
نيشنل بينڪ جا ملز ڏانهن 41 ڪروڙ رهيل هئا جيڪي ادا ڪيا ويا آهن : وڪيل
دپيڪا مگهنا گلزار جي فلم ڇَپڪ ۾ ڪم ڪندي
فلم تيزاب حملي ۾ زخمي ٿيل لڪشمي اگروال جي زندگي تي ٻڌل
دپيڪا پڊوڪون فاڪس اسٽار اسٽوڊيو سان گڏ فلم پروڊيوس ڪندي
ممبئي (شوبز نيوز) بالي ووڊ جي خوبصورت اداڪارا دپيڪا پڊوڪون مگهنا گلزار سان گڏجي نئين فلم ٺاهيندي، جنهن ۾ هوءَ فلم پروڊڪشن جو ڪردار پڻ ادا ڪندي. ميگهنا گلزار تيزاب هاري زخمي ڪيل مشهور سماجي ڪارڪن لڪشمي اگروال تي فلم ٺاهي رهي آهي، فلم جو نالو ڇَپڪ رکيو ويو آهي، جڏهن ته فلم ۾ دپيڪا پڊوڪون سان گڏ وڪرات مئسي پڻ اهم ڪردار ادا ڪندو. فلم جي حوالي سان دپيڪا پڊوڪون انسٽاگرام تي پڻ پوسٽ شيئر ڪئي. فلم ۾ دپيڪا هڪ تيزاب هاري زخمي ڪيل عورت جو ڪردار ادا ڪندي، جيڪا ملڪ ۾ عورتن جي تحفظ جي حوالي سان قانون سازي بابت پڻ جاکوڙ ڪري ٿي. فلم جي هدايتڪاري ميگهنا گلزار جڏهن ته پروڊڪشن اسٽار اسٽوڊيو سان گڏ دپيڪا ڏيندي.
ڪشمير جهڙي خوبصورتي دنيا ۾ ڪٿي به ناهي: ارجن رامپال
ڪشمير خدا جو تحفو آهي، اهڙي جڳهه ڀارت سميت دنيا ۾ ناهي: ارجن
ارجن رامپال ويب سيريز “دي فائنل ڪال” جي شوٽنگ لاءِ ڪشمير پهتل
ممبئي (شوبز نيوز) بالي ووڊ اداڪار ارجن رامپال چيو آهي ته ڪشمير جهڙي خوبصورتي دنيا ۾ ناهي، جڏهن ته ڪشمير جهڙي جڳهه ڀارت سميت دنيا ۾ ناهي. ارجن رامپال هن وقت پنهنجي ايندڙ ويب سيريز جي شوٽنگ لاءِ ڪشمير پهتل آهي، جتي هن شوٽنگ ۾ حصو ورتو. ان موقعي تي رائزنگ ڪشمير نالي ميڊيا اداري سان ڳالهائيندي ارجن رامپال چيو ته هن دنيا ۾ ڪشمير جهڙي خوبصورتي هن ڪٿي به ناهي ڏٺي. سندس چوڻ هو ته ڪشمير خدا جو تحفو آهي، هتي اچي کيس احساس ٿيو آهي ته هيءَ جڳهه قدرتي آهي. ارجن رامپال چيو ته ڀارتي فلمسازن کي ڪشمير اچي فلمن جي شوٽنگ ڪرڻ گهرجي. ارجن رامپال جي ويب سيريز “ دي فائنل ڪال” جي شوٽنگ ڪشمير ۾ جاري آهي، جنهن ۾ هو هڪ ڪشميري شخص سان دوستي ڪندڙ جو ڪردار ادا ڪري رهيو آهي.
سنڌسرڪار ٿرواسين لاءِ ڪجهه ناهي ڪيو : حليم عادل شيخ
پي ٽي آءِ اڳواڻ ٿر پهتو ،رهواسين پاران سهولتن جي کوٽ جون شڪايتون
پ پ وزيرن ٿرواسين جي امداد ۾ به ڪرپشن ڪئي آهي : پي ٽي آءَ اڳواڻ
مٺي(ن پ ا)پي ٽي آءُ سنڌ جي جنرل سيڪريٽري ۽ سنڌ اسيمبلي ميمبر مخالف ڌر جي اڳواڻ حليم عادل شيخ مٺي سول اسپتال پهچي علاج جي سهوليتن جو جائزو ورتو ۽ مريضن سان عيادت ڪئي
حليم عادل شيخ آڏو مٺي سول اسپتال ۾ مريضن علاج جون مناسبت سهوليتون نه هجڻ جون دانهون ڪيون ،ماڻهن جو چوڻ هو ته دوائون سرڪاري نه ملڻ ڪري خانگي اسٽورن تان خريدڻ تي مجبور آهن .حليم عادل شيخ جو چوڻ هو ته سنڌ سرڪار دعوائن کان سواءُ ڪک ڀڃي ٻيڻون ناهي حڪومتي بي حسي سبب ٿر ۾ ٻارن جي موت تي ضابطو اچڻ مشڪل بڻيل آھي.ٿر جا ڏورنهان ڳوٺ علاج،پاڻي، تعليم سميت سموررين سهوليتن کان محروم آھن. پي ٽي آءُ ٿري عوام کي مشڪل وقت اڪيلو نه ڇڏيندي هن چيو ته ٿر ۾ مختلف پروگرام شروع ڪري رهيا آھيون. عمران خان ٿر جي مسئلن کان چڱي ريت واقف آھي. جنهن کي ڏڪار متاثرن جو احساس آھي.ٿر ۾ ڏڪار متاثرن جي مالي تي آيل فنڊن ۽ امداد ۾ سنڌ حڪومت جي وزيرن ۽ چونڊيل نمائندن مها ڪرپشن ڪئي آھي.
انڊونيشيا ۾ تباهي آڻيندڙ هڪ سونامي کانپوءِ ٻئي سونامي جي وارننگ
ٻرندڙ جبل ڦاٽڻ ڪري نئين سونامي اچڻ جو خطرو آهي: موسميات کاتو
جڪارتا (ا ڊ) انڊونيشيا ۾ ڪراڪاٽوا ٻرندڙ جبل ڀرسان سامونڊي علائقي ۾ رهندڙن کي نئين سونامي جي خطري کان آگاهه ڪندي سامونڊي علائقي کان پري رهڻ جي وارننگ جاري ڪئي وئي آهي. ڪراڪاٽوا ٻرندڙ جبل ۾ هڪ ڀيرو ٻيهر تبديلون ڏسڻ جو شاهديون مليون، جنهنڪري سونامي جو خطرو پيدا ٿيڻ جو امڪان ڏيکاريو ويو. انڊونيشيا جي ڊزاسسٽر مينيجمينٽ ايجنسي جي سربراهه اسٽوپو نگورو پريس ڪانفرنس ڪندي چيو ته موسم ۽ حالتن کي نظر ۾ رکندي ماڻهن کي ڪجهه وقت لاءِ سمنڊ کان پري رهڻ جو چيو ويو آهي. ٻي پاسي ڇنڇر ڏينهن آيل سونامي ۾ اجل جو شڪار ٿيندڙن جو انگ 300 تائين پهچي ويو آهي ۽ جڏهن ته هڪ هزار کان وڌيڪ زخمي آهن. سونامي اچڻ کان ٻه ڏينهن پوءِ به امدادي ڪارروايون ڪيون پيون وڃن، روڊ رستا تباهه ٿيڻ ڪري سرڪاري مشينري کي علائقي تائين پهچڻ ۾ اڃان تائين ڏکيائيون پيش آهن. انڊونيشيا ۾ قدرتي حادثن جو انگ وڌي رهيو آهي، هر سال ٻرندڙ جبل ڦاٽڻ سان گڏ سونامي اچڻ ڪري هزارين ماڻهو موت جو کاڄ بڻجي وڃن ٿا.
شاهه رخ خان جي “زيرو” ٽن ڏينهن ۾ 50 ڪروڙ ڪمائي سگهي
ڀارت جي هزارين سينيمائن ۾ ريليز ڪرڻ باوجود فلم ٻوٽو نه ٻاريو
ممبئي (شوبز نيوز) بالي ووڊ ڪنگ شاهه رخ خان جي تازو ريليز ٿيل فلم ٽن ڏينهن اندر 50 ڪروڙ مس ڪمائي سگهي آهي، ريليز ٿيڻ جي ڏينهن 20 ڪروڙ ڪمائي کانپوءِ فلم ٻي ڏينهن صرف 18 ڪروڙ ڪمايا، جڏهن ته ٽئين ڏينهن به فلم جي ڪارڪردگي خاص نه رهي ۽ صرف 50 ڪروڙ ڀارتي روپيا ڪمائي ڪري سگهي آهي. زيرو ۾ شاهه رخ خان هڪ بندري قد واري شخص جو ڪردار ادا ڪيو آهي، جڏهن ته انوشڪا شرما هڪ معذور جو ڪردار ادا ڪيو آهي. فلم ۾ ذيشان ايوب ۽ ڪترينا ڪيف پڻ اهم ڪردار ادا ڪيا آهن. فلم ٽن ڏينهن تائين سٺو ڪاروبار نه ڪري سگهڻ ڪري فلمسازن کي پريشان ڪري ڇڏيو آهي.
سنڌ سرڪار 5- سالن ۾ جيل سڌاري نه سگھي، ويتر لڳايل جيمرز عوام لاءِ عذاب بڻيل!
سرڪار 2013ع ۾ خطرناڪ قيدين تي نظر رکڻ لاءِ 178 ڪروڙ رپين جا منصوبا شروع ڪيا
4325 رڳو ڪراچي ۽ حيدرآباد جي جيلن ۾ ڪيمرائون لڳيون : باقي جيلن ۾ رٿا تي عمل ئي نه ٿيو
ڪراچي (رپورٽ: دودو چانڊيو) سنڌ سرڪار 5 سال گذرڻ باوجود جيلن اندر سڌارا آڻڻ واري منصوبي کي مڪمل ڪري نه سگهي، خطرناڪ قيدين هٿان جيلن کي ٽوڙڻ ۽ ڏوهاري سرگرمين جا اڏا ٿيڻ کان بچائڻ لاءِ ڪيميرائن ۽ جيمر لڳائڻ وارو منصوبو به مڪمل نه ٿي سگهيو، جيلن جي ڀر ۾ رهندڙ لکين ماڻهن لاءِ ڪيترن سالن تائين مشڪلاتون پيدا ڪرڻ بعد سرڪار رڳو جيمر هٽائڻ لاءِ راضي ٿي آهي. سنڌ سرڪار 2013ع ۾ سنڌ اندر سمورن وڏن سينٽرل جيلن ۾ خطرناڪ قيدين جي سرگرمين کي روڪڻ، جيل ٽٽڻ کان بچائڻ ۽ جيلن مان خطرناڪ قيدين هٿان دهشتگردي جا منصوبا ٿيڻ کان بچائڻ لاءِ 88 ڪروڙ رپين جي لاڳت سان ڪراچي، سکر، حيدرآباد، لاڙڪاڻو ۽ خيرپور جيلن ۾ سي سي ٽي وي ڪيمرائون ۽ 90 ڪروڙ رپين جي لاڳت سان جيمر لڳائڻ جي منصوبي جو اعلان ڪيو هو، ان منصوبي جي اعلان کان هن وقت تائين صرف 25 ڪروڙ رپيا خرچ ڪري ڪراچي ۽ حيدرآباد ۾ سي سي ٽي وي ڪميرائون لڳايون ويون، باقي جيلن ۾ ان منصوبي تي عمل نه ٿي سگهيو. اهڙي ريت ڪراچي ۽ حيدرآباد سينٽرل جيلن ۾ جيڪي جيمر لڳايا ويا، اهي ڏوهاري سرگرمين کي روڪڻ لاءِ ڪي لاڀائتا ته ثابت نه ٿي سگهيا پر ٻنهي جيلن جي ڀر ۾ رهندڙ لکين ماڻهن لاءِ مشڪلاتن جو سبب بڻجي ويا. ڪراچي سينٽرل جيل جي ڀر ۾ جمشيد ڪوارٽر، پي آءِ بي، نيو ٽائون، دهلي ڪالوني، ڪشمير روڊ، پنهور ڳوٺ، نيو ايم اي جناح روڊ جي مختلف علائقن ۾ 10 لک کان وڌيڪ آبادي موبائيل نيٽ ورڪ کان محروم ٿي وئي، جنهن ڪري نه صرف انهن علائقن ۾ ڪاروباري سرگرميون متاثر ٿيون پر وڏي انگ ۾ لڏ پلاڻ ٿي، ويتر انهن علائقن ۾ ماڻهن مسواڙ تي گهر وٺڻ به بند ڪري ڇڏيا، جنهن ڪري ڪراچي سينٽرل جيل جي چئني پاسن کان اڌ ڪلو ميٽر جي علائقن ۾ موبائيل جا دڪان ۽ اسٽيٽ ايجنسيون به بند ٿي ويون. ”پنهنجي اخبار“ پاران علائقي ۾ وڃي ورتل ڄاڻ دوران دهلي ڪالوني جي رهواسين ٻڌايو ته صرف دهلي ڪالوني جي 10 گهٽين مان 50 کان وڌيڪ ماڻهن 5 سالن ۾ جيمرز جي ڪري پنهنجا گهر وڪرو ڪيا، ساڳئي طرح پير الاهي بخش ڪالوني جون جيل جي ڀر واريون 8 گهٽيون ساڳي عذاب ۾ مبتلا آهن. حيدرآباد سينٽرل جيل ۾ به جيمر لڳڻ سبب سرفراز ڪالوني، مبارڪ ڪالوني، صحافي ڪالوني، ڪلهوڙا ڪالوني ۽ ٻين علائقن جا لکين رهواسي پريشان آهن، سرڪار ڪروڙين رپيا خرچ ڪرڻ باوجود جيلن کي محفوظ ته نه بڻائي سگهي پر جيلن جي ڀر ۾ رهندڙ رهواسين لاءِ تڪليفون ئي پيدا ڪري سگهي، آخرڪار هن منصوبي کي مڪمل ٿيڻ کان اڳ ئي سرڪار فيصلو ڪيو آهي ته جيمر هٽايا ويندا. جيلن واري صوبائي وزير سيد ناصر شاهه رابطو ڪرڻ تي ٻڌايو ته سي سي ٽي وي ڪيمرائون سمورن جيلن ۾ هن سال جي پڄاڻي تائين لڳي وينديون باقي جيمر لڳائڻ وارو منصوبو روڪيو اٿئون، صوبائي وزير جيلن جي ڀر ۾ رهندڙ ماڻهن کي مشڪلاتون اچڻ جو اعتراف ڪندي چيو ته ماڻهن جي مشڪلاتن کي نظر ۾ رکندي سنڌ سرڪار جيلن تان جيمر هٽائڻ جو فيصلو ڪيو آهي،هن چيو ته اسان سڄي سنڌ جي جيلن جا خطرناڪ قيدي هڪ جيل ۾ منتقل ڪنداسين، پوءِ ان ئي جيل جي سيڪيورٽي بابت وڏا فيصلا ڪنداسين، انهن قيدين جي منتقلي بعد وڏن جيلن ۾ لڳل جيمر هٽائي ڇڏينداسين. جيلن جي ڀر ۾ لاڳيتو جيمر حڪمران جماعت جي قيدين لاءِ ڏکياين جو ڪارڻ بڻيل آهن. شرجيل ميمڻ سميت پيپيلزپارٽي حامي قيدي پارٽي اڳواڻن آڏو شڪايتون ڪندا رهيا آهن ته جيمرز هجڻ سبب رابطو ڪٽيل رهي ٿو. ذريعن موجب جيمر جڏهن نه هئا ته شرجيل ميمڻ سميت پيپلزپارٽي سميت مختلف پارٽين جا قيدي اڳواڻ جيل اندر موبائل فون ذريعي مختلف ماڻهن سان رابطي ۾ هوندا هئا. جيڪي هاڻي رابطو بند ٿيڻ سبب پريشان آهن.
گهوٽڪي جو ٿر سياري ۾ سياحت جو مرڪز، سرد راتين ۾ دڙن تي ڪچهريون، اوطاقن تي باھ جي چوڌاري ميڙاڪا
پرانهن علائقن مان ماڻهن جي آمد، ماڻهو قدرت جي حسين نظارن جون راحتون روح ۾ سمائڻ لڳا
نور پير، گابر، سائين ڏنو والي، دلھي واري، موسي' واري ۽ ٻين علائقن ۾ مهمانن جي ميزباني
ميرپور ماٿيلو(رپورٽ:مشتاق ميراڻي) گھوٽڪي ضلعي جا بدامني ۽ قبيلائي ڪروڌن کان تنگ ۽ گھٽ ٻوسٽ واري ماحول ۾ رھندڙ ماڻھن سياري جي مند ۾ انڊيا جي سرحد سان لڳندڙ ريگستاني علائقن جو رخ ڪيو آھي، جتي ھو رات جي ٿڌڙي پھر ۾ دنيا جي سڀني مسئلن ۽ گوڙ گمسان کان بي نياز ٿي قدرت جي حسين نظارن کان لطف اندوز ٿين ٿا. ان حوالي سان “پنهنجي اخبار” جي ڪيل سروي موجب ڀارت جي بارڊر سان لڳندڙ گھوٽڪي ضلعي جا ريگستاني علائقا جنهن ۾ نور پير، گابر، سائين ڏنو والي، دلھي واري، موسي’ واري، جت مال فقير، ڪمال پير سميت ٻيا علائقا سياحن جا ڪٽڪ پھچڻ ڪري توجه جا مرڪز بڻجي ويا آھن. ڄاڻايل ھنڌن تي سوين ماڻهو ٽولين جي صورت ۾ اڙانگا رستا ڪاٽي اچي ڪجهه گھڙيونگذاري پنهنجي زندگي کي سڪون بخشين ٿا. ريگستاني علائقن جو رخ ڪندڙ پوڙھا پڪا پاڻ سان گڏ کاڌي پيتي ۽ رڌ پچاء جو سامان به آڻين ٿا ۽ ڪڪنگ به پاڻ ڪن ٿا. کائڻ پيئڻ کان فارغ ٿيڻ بعد محفلون مچن ٿيون، پوڙھا باھ جا وڏا مچ ٻاري ان جي چوڌار ويھي ڏور بيت ٻڌائين ٿا جڏھن ته نوجوان طبقو وري راڳ رنگ جي محفلن شعرو شاعري ۽ ميوزڪ تي رقص ڪندوآهي. ڪي وري منچلا واري جي وڏن وڏن دڙن تي گاڏيون ڊوڙائيندي نظر اچن ٿا. سڄي رات ڪچهريون ڪرڻ کان پوء صبح جو ھر ڪو پنهنج ماڳموٽي ٿو. ريگستاني علائقن جو روخ ڪندڙ ماڻهن “پنهنجي اخبار” سان ڳالھائيندي چيو ته وڏن وڏن دڙن تي باھ جي مچ تي سرد راتيون گذرڻ دوران ائين محسوس ٿيندو آھي ڄڻ محبوب جي ڀاڪرن ۾ ھجون. ڏھرڪي جي رھواسين خليل سومرو ۽ علي سميجو چيو ته گھوٽڪي ضلعي ۾ ڪا به اھڙو تفريحي پوائنٽ ناھي تنھنڪري اڪثر ماڻھو ريگستان جو رخ ڪن ٿا ۽ ھاڻي اھو سلسلو وڌندو پيو وڃي. ميرپور ماٿيلو واسي عبدالعلي پتافي ۽ سعيد احمد بوزدار چيو ته رات جي سانت ۾ ريگستان ۾ وقت گذرڻ دوران ا ئين محسوس ٿيندو آھي ڄڻ ته جنت جي وادي ۾ ھجون. ٻي پاسي ريگستاني علائقن ۾ رھندڙ ۽ ميزباني ڪندڙ راجو خان مھر، مرتضي’ لنڊ، احسان لنڊ ۽ ٻين چيو ته اڳ تمام گھٽ شھري ماڻھو ريگستاني علائقن ڏانهن ايندا ھئا پر ھاڻي ماڻهن جو تعداد تيزي سان وڌي رھيو آھي، ھو پاڻ مرادو اچي ديرا ھڻي محفلون مچائين ٿا. ريگستاني علائقي جي ڪوھيڙي واري خوبصورت راتين جي حسين لمحن کي روح ۾ لاھڻ لاء ڪي ڪي ماڻھو پـھنجي فيملين کي به گڏ وٺي اچين ٿا. تفريح لاء ايندڙ ماڻهن “پنهنجي اخبار” سان ڳالھائيندي چيو ته اسان خوشنصيب آھيون جو اسان کي ريگستاني علائقو لڳي ٿو ۽ ويجهو به آھي پر سھولتن خاص طور تي روڊن رستن پاڻي ۽ بجلي جي کوٽ سبب مشڪلاتون پيدا ٿين ٿيون، جيڪي مسئلا فوري طور تي حڪومت کي حل ڪرڻ گھرجن جيئن ماڻھو آساني سان پھچي سگهن. ريگستاني علائقن ۾ رات جي سانت ۾ واري جي دڙن تي ٿوري ٿوري مفاصلي تي ماڻهن جي ٽولين جي صورت ۾ ويھڻ ڪري ٿر جي قدرتي حسن ۾ وڌيڪ نکار پيدا ٿي وڃي ٿو. دھل جي ٿاپ تي ھر طرف جھمرين ۽ تاڙين سان گڏ گانن جي گونجار رومانوي لڳي ٿي. تفريحي لاء ايندڙ ماڻھو سج لھڻ کان اڳ پھچي وڃن ٿا ۽ سندن ڪوشش ھوندي آھي ته سج جي روشني دوران جڳهه سلڪيٽ ڪجي. سندن اھا به خواهش ھوندي آھي ته جتي رات گذارجي اھو ھنڌ آبادي کان پري ۽ مڪمل خاموشي ھجي جيئن ھوا جو آواز ڪنن تائين پھچي روح کي راحت بخشي. تفريح لاء ايندڙ ڪي ماڻھو اونداھ کي پسند ڪن ٿا ته ڪي ماڻھو وري رات جي وقت گاڏين جي بيٽرين مان بلب ٻاري ريگستان کي روشن ڏسي تفريح حاصل ڪن ٿا.
پاڪستان کي هڪ ڀيرو ٻيهر پٽڙي تان لاٿو ويو آهي: نوازشريف
ڪيس ۾ ڪجهه به ناهي، وڌيڪ زيادتي ڪري به نه ٿي سگهجي: اڳوڻو وزيراعظم
ڪو غلط ڪم ناهي ڪيو، جو ڪنڌ جهڪائڻو پوي، اميد ته انصاف ملندو
اسلام آباد (م ڊ ) اڳوڻي وزيراعظم نوازشريف چيو آهي ته پاڪستان کي هڪ ڀيرو ٻيهر پٽڙي تان لاٿو ويو آهي، مونکي ڪنهن به قسم جو ڊپ ناهي، ڪيس ۾ ڪجهه به ناهي، تنهنڪري وڌيڪ زيادتي ڪري به نه ٿي سگهجي، اهڙو ڪو به غلط ڪم ناهي ڪيو، جنهن جي ڪري ڪنڌ جهڪائڻو پوي، اميد آهي ته انصاف ملندو.
العزيزيه ۽ فليگ شپ ريفرنسز جي فيصلي کان اڳ پارٽي اڳواڻن سان ڳالهائيندي نوازشريف چيو ته موجوده سرڪار عوامي ترقي جي سفر تي راتاهو هنيو آهي ۽ هڪ ڀيرو ٻيهر پاڪستان کي پٽڙي تان لاٿو ويو آهي.
نوازشريف چيو ته سندس خلاف ڪيس ۾ ڪجهه به ناهي، تنهنڪري ساڻس وڌيڪ زيادتي ڪري به نه ٿي سگهجي، اڳوڻي وزيراعظم چيو ته هن ايمانداري سان ملڪ ۽ عوام جي خدمت ڪئي، ڪرپشن ۽ اختيارن جو ناجائز استعمال به ناهي ڪيو،
نوازشريف چيو ته مونکي ڪنهن به قسم جو ڊپ ناهي، ضمير مطمئن آهي، ڪو به غلط ڪم ناهي ڪيو، جنهن جي ڪري ڪنڌ جهڪائڻو پوي
اهم ماڳن ۽ مقبرن کي اهميت نه ملڻ ڪري نئون نسل انهن کان اڻواقف
ارڙهين ترميم کان اڳ قديم آثارن جي بجيٽ رڳو 2 لک رپيا هئي
ڪراچي: سنڌ حڪومت سرڪاري درجو نه هجڻ واري آڳاٽي آثارن تي قانوني طور تي خرچ ڪرڻ جي به پابند ناهي! ڄاڻايل آڳاٽا آثار قديم آثارن واري کاتي ۾ شامل نه ٿيڻ جي صورت ۾ ايندڙ نسلون مزاحمت، محبت، بادشاهي، مذهبي ڪردارن ۽ پيار، امن، حقن لاءِ جاکوڙ ڪرڻ سميت انسانيت ذريعي پاڻ مڃرائيندڙ شخصيتن کي سُڃاڻي ئي نه سگھنديون. جيتوڻيڪ شاھ عبدالڪريم بلڙي وارو، مورڙو ميربحر سميت ٻين ڪيترن ئي ڪردارن کي نصاب تان مٽايو ويو آهي. پر سياحت، ثقافت ۽ قديمي آثارن واري کاتي جي بي ڌياني سبب ڄاڻايل ڪردار تاريخ تان به مٽجي وڃڻ جو خدشو آهي. آڳاٽا آثار ارڙهين ترميم کان اڳ وفاق حوالي هجڻ سبب صوبي جي آثارن جي سار سنڀال لاءِ رڳو 2 لک رپيا ڏنا ويندا هئا. آرڪائيو کاتي جي ذريعن موجب ته ارڙهين ترميم کان اڳ سنڌ جي سموري قديم آثارن لاءِ وفاقي سرڪار کِل جوڳي رقم ڏيندي رهي. 2 لک روپيا بجيٽ رکي ويندي هئي. جنهن سان آڳاٽي آثارن جي ذري برابر به سنڀال نه ٿي سگھندي هئي. ارڙهين ترميم بعد قديم آثار سنڌ سرڪار حوالي ٿيڻ باوجود 72 کان مٿي تاريخي ڪردارن جون قبرون، مزارون ۽ يادگار سنڌ سرڪار پنهنجي ليکي ۾ ئي ناهن آندا.
سنڌ جي 72 کان وڌيڪ پراڻن ماڳن کي قديم آثارن جو درجو نه مليو
قلندر شهباز جي مزار، صوفي شاھ عنايت شهيد، مورڙو ميربحر جي قبر، اروڙ مسجد سياحت کاتي جي نظر کان اوجھل
شاھ عبدالڪريم بلڙي وارو، سچل سرمست، دودو سومرو، چنيسر آريسر، هوشو شيدي نصاب ۾ شامل پر حڪمرانن جي نظر تي نه چڙهيا
ڪراچي (رپورٽ: شاهد ميراڻي) سنڌ جي 72 کان وڌيڪ قديم ماڳن کي سرڪاري سطح تي قديم آثارن جو درجو نه مليو، نصاب ۾ شامل ڪيئي تاريخي ماڳن کي سنڌ حڪومت سرڪاري طور قبولڻ لاءِ تيار ئي ناهي! قلندر شهباز جي مزار، شاھ عبدالڪريم بلڙي وارو، مورڙو ميربحر، اروڙ مسجد، جوهن جيڪب هائوس، هالا حويلي سميت ٻيا آڳاٽا آثار سياحت کي هٿيءَ وٺرائيندڙ کاتي کي نظر ئي نه آيا. ان حوالي سان گڏ ڪيل ڄاڻ موجب سنڌ جي سياحتي ماڳن کي هٿيءَ وٺرائڻ واري اداري سياحت پاران لڳ ڀڳ سنڌ جي ان سمورن آڳاٽن ۽ تاريخي ماڳن کي سرڪاري طرح قبول ڪرڻ ۽ قديم آثارن ۾ شامل نه ڪيو ويو آهي. جنهن سبب آڳاٽن ماڳن جو وجود ئي خطري ۾ پئجي ويو آهي. ڪراچي ۾ منگھر مڇ کان ڀائرن کي بچائيندڙ معذور مزاحمتي ڪردار موڙو ميربحر، مائي ڪلاچي جي قبر، ٺٽي ضلعي ۾ درگاھ درسواريو ۽ قبرستان، پير پٺو قبرستان، گجو قبرستان، شاھ حسين درگاھ، پليجاڻي قبرستان، حيدر شاھ جو قبرستان، جاتي مندر، اڏيرو لال، حضرت شيخ ترابي قبرستان ۽ درگاھ، حضرت شيخ حالي (مندر ۽ قبرستان)، جوکيا قبرستان (اُٺن جي کوڙي)، محمد هاشم ٺٽويءَ، ضلعي بدين ۾ شاھ عبدالمجيد جي درگاھ، درگاھ حضرت محمد اسماعيل، شاھ محمد جي درگاھ، دودي سومري جو مقبرو، چنيسر جي قبر، ٽنڊوالهيار ضلعي ۾ جامع مسجد، نامعلوم قديم قبرون، هالا حويلي، اسماعيل شاھ بخاري جو مقبرو، ابراهيم شاھ جو مقبرو ضلعي سانگھڙ ۾ سانگھڙ قبرستان، جامع مسجد سوئي ڪنڊر ضلعي ڄامشوري ۾ برفت قبرستان جي مسجد، عزت خان برفت جو مقبرو، بخاريا مسجد، جنرل هوش محمد شيدي، لڪي شاھ صدر جي مزار، ضلعي خيرپور ميرس ۾ بارا دڙي، جھانگوخان شير جو مقبرو، سچل سرمست جي مزار، داد شهيد بادشاھ جي درگاھ ضلعي جيڪب آباد ۾ جوهن جيڪب قبرستان ۾ نامعلوم مقبرو، جوهن جيڪب جو قبرستان، وڪٽوريا ڪلاڪ ٽاور ضلعي مٽياري ۾ مير تاج محمد جو مقبرو، بجار خان ٽالپر (وڏو) جو مقبرو، مير صوبيدار ۽ مير بهرام علي خان جو مقبرو، مائي خيري جو مقبرو ضلعي سکر ۾ اروڙ مسجد، ايوب برج، حُرن جي جيل ضلعي دادو ۾ قلندر شهباز جي مزار، جوهي مندر، اروڙا مقام، راوت فقير جو مقبرو ضلعي ٽنڊو محمد خان ۾ صوفي شاھ عنايت شهيد، شاھ عبدالڪريم بلڙي وارو سميت مختلف ضلعن ۾ 72 کان مٿي آڳاٽا ماڳ آهن جيڪي سرڪاري طور سياحت واري کاتي ۾ شامل نه هجڻ ۽ بي ڌياني سبب خطري هيٺ آهن. جڏهن ته ڄاڻايل آڳاٽن ماڳن مان شاھ عبدالڪريم بلڙي وارو، سچل سرمست، دودو سومرو، چنيسر آريسر، جنرل هوش محمد سنڌي نصاب ۾ به شامل رهيا آهن. جن مان ڪيئي نالا نصاب مان نڪري وڃڻ ۽ سرڪاري سطح تي قبول نه ٿيڻ سبب ايندڙ نسلن جي ڄاڻ کان رهجي ويندا. ان سلسلي ۾ رابطو ڪرڻ تي ڊائريڪٽر جنرل (ڊي جي ) آرڪائيو منظور ڪناسرو “پنهنجي اخبار سان ڳالهائيندي چيو آهي ته آڳاٽي آثارن کي قومي ورثي ۾ شامل ڪرڻ لاءِ ٽيڪنيڪل ٽيم پاران سروي جو ڪم هلندڙ آهي. مورڙو ميربحر، مائي ڪلاچي، جنرل هوش محمد سنڌي سميت ٻين آڳاٽيءَ آثارن کي قومي ورثي ۾ شامل ڪيو ويندو. هن چيو ته قومي ورثي ۾ جيڪي آثار قومي ورثي ۾ شامل ناهن انهن تي سرڪاري خرچ نه ٿا ڪري سگھون. ڪراچي جون 3 هزار قديم عمارتون به قومي ورثي ۾ شامل ناهن، ان حوالي سان ناليواري تحقيقدان گُل حسن ڪلمتي “پنهنجي اخبار” سان ڳالهائيندي چيو آهي ته صرف ڪراچي جي ضلعي ملير ۽ اولهه ٻهراڙيءَ ۾ 105 قديم قبرون، مزارون ۽ يادگار آهن. جڏهن ته 3 هزار کان 3500 تائين قديم عمارتون آهن. جيڪي قومي ورثيءَ ۾ شامل ٿيڻ گھرجن. پر معاملو عدالت ۾ هجڻ سبب قديم عمارتن کي قومي ورثي ۾ شامل ڪرڻ وارو ثقافت ۽ سياحت کاتي جو ڪم رولڙي ۾ پيل آهي.
مٽياري: ڦر ڪندڙ بين الصوبائي ٽولي جا 3 جوابدار گرفتار
ٽن جوابدارن کي هٿيارن سميت گرفتار ڪيو ويو آهي: سي آءِ اي پوليس مٽياري
مٽياري ( ن پ ا ) سي آءِ اي پوليس ڦر لٽ ڪندڙ بين الصوبائي ٽولي جي ٽن جوابدارن کي گرفتار ڪرڻ جي دعويٰ ڪئي آهي.
مٽياري جي سي آءِ اي پوليس جي انچارج ذيشان علي لاشاري ميڊيا کي ٻڌايو ته ڳجهي اطلاع تي هالا ڀرسان قومي شاهراهه تي ڪارروائي ڪئي وئي، جنهن دوران ٽن جوابدارن کي گرفتار ڪيو ويو.
سي آءِ اي انچارج چيو ته گرفتار جوابدارن ۾ اسلم جت، عبدالرزاق ۽ غلام مصطفا ملاح شامل آهن، جن وٽان 2 ٽي ٽي پسٽل، هڪ ريوالور ۽ گوليون هٿ ڪيون ويون، جوابدارن مٽياري کانسواءِ نوشهروفيروز، حيدرآباد ۽ ڄامشورو ضلعن جي حد ۾ مسافر وينن، ٽرڪن ۽ ٽرالرز مان ڦر لٽ ڪندا.
هن دعويٰ ڪئي ته گرفتار جوابدارن جو واسطو گاڏين مان ڦرلٽ ڪندڙ بين الصوبائي ٽولي سان اهي، سندن خلاف ڪيس داخل ڪيو ويو آهي، جلد وڌيڪ گرفتاريون ڪيون وينديون
اتر قطب ۾ پهريون ڌاڙو هڻندڙ برف جي دوزخ ۾ قيد
اتر قطب ۾ پهرين بينڪ ڌاڙي جو جوابدار گرفتار ڪيو ويو
اوسلو (دلچسپ) سويڊن ۽ اتر قطب جي وچ واري علائقي ۽ ڌرتي جي اتر قطب ۾ پهريون ڀيرو بينڪ ڌاڙي جو جوابدار گرفتار ڪيو ويو آهي. علائقي کي برف جو دوزخ چيو ويندو آهي، جيڪو علائقو گليشيئر ۽ پولار رڇن جي ڪري مشهور آهي. علائقي ۾ ماڻهن کان وڌيڪ رڇن جي آبادي آهي. سوالبورڊ علائقي ۾ واحد بينڪ آهي، جتي هڪ پرڏيهي گهمڻ لاءِ آيو ۽ بينڪ ۾ ڌاڙو هنيائين، جنهن کي علائقي جي پوليس گرفتار ڪري ٿڌي علائقي ۾ قيد ڪري ڇڏيو آهي، جتي گرمي پد ڪاٽو کان هميشا گهٽ يعني 20 کان ڪاٽو 40 جي دوران رهندو آهي. علائقي ۾ صرف 2 هزار ماڻهن جي آبادي آهي، جڏهن ته علائقي کي برف جو دوزخ پڻ ڪوٺيو ويندو آهي. پوليس موجب جوابدار ڌاڙي کانپوءِ فرار ٿيڻ جي ڪوشش ڪئي، پر کيس جلد گرفتار ڪري قيد ڪيو ويو آهي.
گرھوڙشريف:ڪار ۽ موٽرسائيڪل وچ ۾ ٽڪر جي نتيجي ۾2ڄڻا زخمي
گرهوڙ شريف(ن.پ.ا)ڦلهڏيون ڀرسان تيز رفتارڪار جي موٽر سائيڪل سان ٽڪر ٿي وئي.حادثي جي نتيجي ۾ موٽر سائيڪل سوار راڻو ڪڇي ۽ پارو مل زخمي ٿي پيا.زخمين کي مقامي اسپتال منتقل ڪيو ويو
ڀارت ۾ نينگري پاران وڏا وار رکڻ جو عالمي رڪارڊ
نلانشي 5 فوٽ 7 انچ وار رکڻ تي نالو عالمي رڪارڊ ۾ شامل
16 سالن جي نينگري 10 سالن کان وارن کي ڪٽرائڻ کان نابري واري
گجرات (دلچسپ) ڀارت ۾ 16 ورهين جي نينگري دنيا ۾ سڀ کان ڊگها وار رکندڙ نينگري جو رڪارڊ جوڙي ورتو آهي، جنهن کانپوءِ سندس نالو گئنيز بوڪ آف ورلڊ رڪارڊ ۾ شامل ڪيو ويو آهي. نلانشي پٽيل 2 گذريل 10 سالن کان پنهنجي وارن کي ناهي ڪٽرايو، جنهنڪري سندس وار هن جي قد کان به ڊگها ٿي ويا آهن. نينگري ميڊيا کي ٻڌايو ته هوءَ 6 ورهين جي هئي ته وار ڪٽرائڻ دوران سندس خراب تجربو ٿيو، جنهن کانپوءِ هن ڪڏهن به وار نه ڪٽرائڻ جو فيصلو ڪيو. نينگري جو چوڻ آهي ته شروع ۾ سندس والدين مخالفت ڪئي پر بعد ۾ هو به کيس ڪجهه نه چوندا هئا.