ميرپورخاص (بيورورپورٽ) صوبائي وزير وومين ڊيولپمنٽ شهلا رضا چيو آهي ته پيپلزپارٽي هميشه عورتن جي حقن جي تحفظ ۽ برابري واري حقن لاءِ جدوجھد ڪئي آهي پيپلزپارٽي عورتن تي تشدد ۽ سندن حقن جي حق تلفي ڪندڙن خلاف سخت قانوني سازي ڪئي آهي ۽ شهيد راڻي بينظير ڀٽو عورتن جي حقن جي علمبردار رهي آهي شهيد راڻي جي عورت جي حقن جي فلسفي کي اسين اڳتي کڻي هلي رهيا آهيون اهڙن خيالن جو اظهار هن ميرپورخاص ۾ وومين اينڊ چائيلڊ پروٽيڪشن سيل ۽ وومين ٿاڻي جي دوري دوران ڳالهائيندي ڪيو. انهي موقعي تي ڊي آئي جي ميرپورخاص ثاقب اسماعيل ميمڻ، ايس ايس پي عابد بلوچ ۽ ٻيا پوليس عملدار موجود هئا. هن چيو ته عورتن ۽ ٻارن تي تشدد جي واقعن کي ڪنهن به صورت ۾ برداشت ن ڪيو وينديو ۽ ننڍي عمر ۾ شادين جي حوالي سان پاس ٿيل قانون جي ڀڃڪڙي ڪندڙن خلاف قانون مطابق سخت ڪاروائي ڪئي پئي وڃي. انهي موقعي هن ڊي آئي جي ۽ ايس ايس پي ميرپورخاص کي هدايتون ڏيندي چيو ته عورتن ۽ ٻارن تي تشدد، ننڍي عمر ۾ شادين ۽ عورتن کي حراسان ڪرڻ وارن واقعن ۾ ملوث جوابدارن خلاف سخت ڪاروائي ڪئي وڃي. انهي موقعي تي ڊي آئي جي ۽ ايس ايس پي ميرپورخاص صوبائي وزير کي عورتن ۽ ٻارن تي تشدد، عورتن کي جنسي حراسان ڪرڻ وارين شڪايتن، ڪيسن ۽ پوليس پاران ڪيل ڪاروائي جي حوالي سان بريفنگ ڏني.
پيپلزپارٽي هميشه عورتن جي حقن لاءِ جدوجهد ڪئي آهي: شهلا رضا
ننڍي ڄمار جي شادين جي حوالي سان قانون جي عملداري لاءِ ڪارروائي ڪئي پئي وڃي
حيدرآباد ۾ 18 ڏينهن اڳ حادثي ۾ زخمي ٿيل لاوارث نينگر فوت
حيدرآباد (رپورٽر) حيدرآباد جي حسين آباد ٿاڻي جي حد ۾ آٽو ڀان روڊ تي 18 ڏينهن اڳ حادثي ۾ زخمي ٿيل نامعلوم نينگر سول اسپتال حيدرآباد جي آء سي يو ۾ فوت ٿي ويو آھي. راهگيرن کيس سول اسپتال ۾ داخل ڪرايو هو پر سندس وارثن جو پتو پئجي نه سگهيو و. هو 18 ڏينهن آء سي يو ۾ رهيو جتي اڄ فوت ٿي ويو. سندس لاش سول اسپتال جي مرده خاني ۾ رکيو ويو آھي. لاڳاپيل پوليس به اسپتال انتظاميه جي باربار رابطي جي باوجد ان نينگر جي ڪا واهر نه ڪئي.
عمرڪوٽ ۾ ڀيل برادري جو کوکرا پار پوليس خلاف مظاهرو، ڌرڻو
پوليس بااثرن جي ونگار وهندي اسان خلاف ڪوڙا ڪيس داخل ڪيا آهن: ڳوٺاڻا
ڇور (رپورٽ: جگت ڏان چارڻ) عمرڪوٽ ۾ ڳوٺ سباڻي جي ڀيل برادري پاران ڀيل انٽليڪچوئل فورم سنڌ جي مرڪزي اڳواڻ وڪيل لالا ڀيل، ميرچند سهجاڻي، ڊاڪٽر پارو ڀيل، وڪيل منگهارام ڀيل، ڀومجي ساگر، تيرٿ ڀيل ۽ ٻين جي اڳواڻي ۾ ڀيل برادري جي سوين ماڻهن عمرڪوٽ پريس ڪلب اڳيان روڊ بلاڪ ڪري ٽائرن کي باهيون ڏنيون ويون ۽ ڌرڻو هڻيو ويو مظاهرين جو چوڻ هو ته کوکراپار پوليس وڏيرن جي ڪمداري ڪندي اسان تي چوري جو ڪوڙو ڪيس داخل ڪري 15 مهينا اڳ لڄالٽ جو شڪار ٿيل نصيبان ڀيل جي ڪيس کي دٻائڻ لاءِ پوليس زور ڀري رهي آهي انهن چيو ته پوليس بااثر ونگار بڻيل آهي انهن وڌيڪ دانهيندي چيو ته پوليس چوري جو ڪوڙو ڪيس داخل ڪري ماستر ڏانو ڀيل، جگو ڀيل، ارجڻ ڀيل، ڪرشن ڀيل، گهمن ڀيل، ڏيون ڀيل ۽ سينڌل کي گرفتار ڪيو آهي انهي ڪوڙي fir ۽ گرفتاري جي اسان سخت لفظن ۾ مذمت ڪيون ٿا اسان آءِ جي سنڌ ، چيف جسٽس آف سپريم ڪورٽ کي اپيل ٿا ڪريون ته ايس ايڇ او پوليس اسٽيشن کوکراپار ۽ ماروهر پوليس پڪيٽ جي انچارج نظام سمون کي برطرف ڪري گرفتار ڪيو وڃي.
ڊي سي سان منهن ماري ڪرڻ تي بدين پوليس واپاري کي کنڀي وئي
روڊ خالي نه ڪرڻ تان اهلڪارن شوروم مالڪ جون گاڏيون هٽايون ته منهن ماري ٿي
اهلڪار شعيب ڀرڳڙي کي شوروم جي گاڏين سميت کنڀي کڻي ويا، واپارين جو احتجاج
بدين ( رپورٽ: حميد سومرو) ڊي سي سان منهن ماري ڪرڻ تي بدين پوليس واپاري کي کنڀي وئي. ان سلسلي ۾ ڊپٽي ڪمشنر بدين ڊاڪٽر حفيظ احمد سيال ريلوي فٽ بال گرائونڊ تي گندي پاڻي ۾ بيٺل گاڏي ڪڍرائڻ واري ڪم جو معائنو ڪرڻ کان پوء وڃي رھيو ھو ته اسٽيشن روڊ تي حد دخلين سبب رستو نہ ملڻ تي پوليس اھلڪارن شوروم جي گاڏين کي روڊ تان ھٽائڻ شروع ڪيو ان دوران شوروم مالڪ شعيب ڀرڳڙي مزاحمت شروع ڪئي ان تي ڊي سي ء شوروم وارن م منھن ماري کان پوء پوليس شعيب ڀرڳڙي کي گرفتار ڪري کڻي وئي بعد ۾ پوليس جو 4 موبائیلن سان ميونسپل ۽ روينيو عملدارن اسٽيشن روڊ تي آپريشن ڪري ممتاز انصاري شعيب ڀرگڙي اسماعيل پٺاڻ ء ٻين جي شورومن جون بيٺل گاڏيون کڻي ويا آپريشن کان پوء واپارين دڪان بند ڪري ڇڏيا جڏھن ته گرفتار واپاري خلاف خبر لکڻ تائين ڪيس داخل نہ ٿيو ھو انهي کان اڳ واٽر سپلائي انچارج مرتضى خاصخيلي ۽ مختيارڪار بدين اڪرم ڪنڀار وچ ۾ سخت منهن ماري ٿي پئي جنهن تي تپيدار اسماعيل ميمڻ وچ ۾ پئي جهيڙو ٽاريو.
شيخ اياز عالمي سطح جو شاعر ۽ مفڪر قرار،کيس سنڌ تائين محدود نه ڪرڻ گهرجي:اياز ميلو
هن سنڌ کي پنهجي فڪر ۾ سمايو ،اتي ئي هن عالمي امن ۽ ڀائيچاري جي ڳالھ پڻ ڪئي :عطيه دائود
حيدرآباد(بيورو رپورٽ)ليکڪن، اديبن، شاعرن ۽ مصورن چيو آهي ته شيخ اياز جو فڪر ۽ فلسفو عالمي آھي، سندس فڪر کي رڳو سنڌ تائين محدود نه ڪرڻ گهرجي .شيخ اياز جتي سنڌ کي پنهجي فڪر ۾ سمايو آھي اتي ئي هن عالمي امن ۽ ڀائيچاري جي ڳالھ پڻ ڪئي آھي. سندس نظر ۾ مظلوم طبقو اهم ھو، انڪري ئي سندس گيتن جي گونجار مان مٽي جي مهڪ اچي ٿي.
حيدرآباد جي سرد هوائن ۾ منعقد ٿيل اياز ميلي جي ٻي ڏينهن تي “حلقه ميري زنجير ڪا، اياز ۽ فهميده رياض” جي موضوع تي ٿيل هڪ ويهڪ ۾ ناليواري شاعره ۽ فهيمده رياض جي دوست عطيه دائود ڳالهائيندي چيو ته فهميده ۽ اياز جي اندر ۾ معصوم ٻار هو، انهن جون تخليقون ياگار آهن. هن چيو ته شاعر ۽ اديب قومن جا ترجمان هجن ٿا ۽ هنن ٻنهي شخصيتن پاڻ ملهايو، هن چيو ته آئون ڳوٺاڻي ڇوڪري هوندي به فهميده کان سنڌي ٻولي سکندي هئس، اياز ۽ فهميده پڙهڻ جا ديوانا هئا.
ناليواري اديب مدد علي سنڌي چيو ته اياز پهرين اردو ۾ شاعري ڪندو هو، پهرين سندس اردو مجموعو ئي مارڪيٽ ۾ آيو هو، اياز ورهاڱي وقت پريشان هو، چوندو هو ته سنڌي شاعري ڪنهن جي لاءِ ڪيان، ڪير پڙهندو؟جنهن تي محمد ابراهيم جويي کيس سنڌي شاعري ڪرڻ لاءِ آماده ڪيو ۽ کيس چيو ته هڪ ڏينهن توکي سنڌيءَ وڏو شاعر ڪري مڃيندا.
هن چيو ته اياز جي ترجمي ۾ فهيمده سنڌي لفظ شامل ڪري ڪمال ڪيو آهي، فهيمده عورتن جي جذبن کي سمجهندڙ شاعره آهي، هن بلوچستان وڃي انقلاب لاءِ وڙهندڙ نوجوانن کي ڏسڻ ٿي چاهيو.
انيس هارون اياز ۽ فهيمده جي جدوجهد تي ڳالهائيندي چيو ته آئون ميلو سجائڻ تي منتظمين کي مبارڪ باد ڏيان ٿي، فهيمده رياض جي آئون واحد دوست هئس، جنهن مونسان موڪلاڻي واري ڏينهن به ڳالهايو هو. هن چيو ته فهيمده سنڌ جي ڌرتي جو سرمايو هئي، جنهن کي هتي دفنايو وڃي ها پر ڌيءُ جي خواهش تحت کيس لاهور ۾ دفنايو ويو. اسان هر گهڙي ۾ گڏ هيونسين. هن چيو ته شيخ اياز جذبن جو شاعر هو هن جا قومي گيت گهڻا مشهور ٿيا. فهيمده جي شاعري ۾ به بي باڪي هئي، هن کي دنيا جي پرواهه نه هئي،
. سيشن ۾ حسين مسرت ڳالهائيندي چيو ته هن سيشن جو مقصد فهيمده رياض کي ياد رکڻ آهي، جيڪا اڄ اسان سان گڏ ناهي، هن سيشن جي ماڊريٽر شبنم گل هئي، جنهن چيو ته سماج ۾ دوست وڏو سرمايو هوندا آهن، دوستن جي سوچ ۽ مشن به نسل در نسل منتقل ٿيندا رهن ٿا.
صوماليه ۾ ڪار بم ڌماڪو، 23 ڄڻا اجل جو شڪار، 25 زخمي
موغاديشو (انٽرنيشنل ڊيسڪ) صوماليه ۾ ڪار بم ڌماڪي سبب 17 ڄڻا فوت ٿي ويا. پرڏيهي ميڊيا موجب صومالي راڄڌاني موغا ديشو ۾ صدارتي محل ڀرسان ڪار بم ڌماڪو ڪيو ويو، جنهن جي نتيجي ۾ 23 ڄڻا مارجي ويا ۽ 25 زخمي ٿي پيا.
فوتي ماڻهن ۾ 7 پوليس اهلڪار، هڪ ناليوارو صومالي صحافي ۽ ٻيا شهري شامل آهن. ڌماڪي سبب ويجهي عمارت کي به نقصان پهتو.
هوڏانهن اتنهاپسند ڌڙي الشباب ان بم ڌماڪي جي ذميواري قبولي.
شام ۾ آمريڪي فوج جي موجودگي هڪ غلطي هئي: ايران
تهران (انٽرنيشنل ڊيسڪ) شام مان آمريڪي فوجن جي واپسي تي ردعمل ڏيندي تهران حڪومت چيو آهي ته شام ۾ آمريڪي فوج جي موجودگي هڪ غلطي ۽ نظرياتي ڇڪتاڻ جو سبب به هئي. ايران جي پرڏيهي کاتي جي ترجمان جو چوڻ هو ته پهرين ڏينهن کان شام ۾ آمريڪي فوج جي موجودگي کي ڪنهن به ريت جائز قرار نٿو ڏئي سگهجي ۽ ان سبب سڄو علائقو عدم استحڪام جو شڪار رهيو.
هوڏانهن آمريڪي صدر ڊونالڊ ٽرمپ فوجن جي واپسي واري فيصلي بعد چيو هو ته شام مان آمريڪي فوج جي واپسي تي روس، ايران، شام ۽ ٻين ڪيترن ئي ملڪن ڪنهن به خوشي جو اظهار نه ڪيو هو.
سعودي شهزادو طلال بن عبدالعزيز لاڏاڻو ڪري ويو
رياض (انٽرنيشنل ڊيسڪ) سعودي شهزادو طلال بن عبدالعزيز 88 ورهين جي ڄمار ۾ لاڏاڻو ڪري ويو. سعودي ميڊيا رپورٽن موجب شهزادو طلال سعودي عرب جي باني شاهه عبدالعزيز جو 18هون پٽ هو ۽ مرحوم شاهه سلمان جو ڀاءُ ۽ ارب پتي شهزادي الوليد بن طلال جو پيءُ هو.
شهزادي طلال کي سعودي شاهي خاندان جي نهايت پڙهيل لکيل ماڻهن ۾ ڳڻپ ڪئي وڃي ٿي. شهزادو طلال مختلف وزارتن کانسواءِ فرانس ۾ سعودي عرب جو سفير به رهي چڪو. ان سان گڏ هو يونيسيف ۽ يونيسڪو جي خاص ايلچيءَ جو عهدو به سنڀاليو.
پنجاب جو اڳوڻو وڏو وزير دوست محمد کوسه پيپلز پارٽي ۾ شامل
ڪراچي(اسٽاف رپورٽر)پنجاب جي اڳواڻي وڏي وزير دوست محمد کوسه اڳوڻي صدر آصف علي زرداري سان ملاقات ڪري پيپلز پارٽي۾ شموليت اختيار ڪري ورتي،بلاول هائوس ڪراچي ۾ پنجاب جي اڳوڻي وڏي وزير سردار دوست محمد کوسه پپيلز پارٽي جي شريڪ چيئرمين ۽ اڳوڻي صدر آصف علي زرداري سان ملاقات ڪندي پيپلز پارٽي ۾ شموليت جو اعلان ڪيو،آصف رزداري دوست محمد کوسه جي شموليت جي آجيان ڪندي چيو آهي ته دوست محمد کوسه جي پيپلز پارٽي ۾ شموليت سان پارٽي ڏکڻ پنجاب ۾ مضبوط ٿيندي،اڳوڻي صدر جو چوڻ هو ته ڏکڻ پنجاب عوام جي امنگن مطابق صوبو ضرور بڻجندو،ڏکڻ پنجاب کي صوبو بڻائڻ لاءِ پيپلز پارٽي جي جدوجهد جاري رهندي.ان موقعي تي دوست محمد کوسه آصف زرداري ۽ بلاول ڀٽو زرداري جي قيادت تي اعتماد جو اظهار ڪندي چيو ته پيپلز پارٽي ئي ڏکڻ پنجاب جي عوام کي پنهنجو حق ڏياري سگهي ٿي،انهيءَ موقعي تي قمر الزمان ڪائره ۽ ٻيا پارٽي اڳواڻ پڻ موجود هئا.
چين آمريڪا، جاپان ۽ يورپي يونين جو مستقبل چورائڻ چاهي ٿو: آمريڪي صدارتي صلاحڪار
واشنگٽن (انٽرنيشنل ڊيسڪ) آمريڪي صدر ڊونالڊ ٽرمپ جي اقتصادي صلاحڪار پيٽر نو وارو چيو آهي ته بيجنگ حڪومت “ميڊ ان چائنا 2025” نالي حڪمت عملي تحت آمريڪا، جاپان ۽ يورپي يونين جو مستقبل چورائڻ چاهي ٿي.
جاپاني اخبار کي انٽرويو ڏيندي نو وارو چيو ته چيني حڪومت عالمي واپار ۾ جيڪي طريقا استعمال ڪري رهي آهي، انهن سان آمريڪا ۽ چين جو واپاري تڪرار حل ٿيڻ جو امڪام گهٽ نظر اچي رهيو آهي.
هن چيو ته هن وقت چين هر قسم جي ٽيڪنالوجي حاصل ڪرڻ جي ڪوشش ۾ آهي.
سنڌيونيورسٽي آفيسرز يونين جي چونڊ جون سرگرميون تيز
24 ڊسمبر تي رٿيل چونڊ ۾ ابراهيم ميرجت ۽ سجاد شاهه پينل ۾ مقابلو
گرلس جمنازيم هال ۾ پولنگ ٿيندي ،160 ووٽرز ووٽ جو حق استعمال ڪندا
ڄامشورو (رپورٽر) سنڌ يونيورسٽيءَ جي آفيسرز ايسو سيئيشن جي چونڊن سومر 24 ڊسمبر تي ٿي رهي آهي جنهن لاءِ سرگرميون تيز ٿي ويون آهن . چونڊن ۾ ابراهيم ميرجت ۽ سجاد شاه جا پينل آمهون سامهون آهن .چونڊ جي سلسلي ۾ سمورا انتظام مڪمل ڪيا ويا آهن. آفيسرز اتحاد پينل جي ايگزيڪيوٽو ڪميٽيءَ جو اميدوار ساجد قيوم ميمڻ اڳ ۾ ئي بنا مقابلي ڪامياب ٿي چڪو آهي جڏھن ته آفيسرز اتحاد پينل جا باقي اميدوار صدارتي اميدوار محمد ابراهيم ميرجت، نائب صدارت لاء غلام قادر سهارڻ، سيڪريٽري جنرل تي الهوڌاريو سهتو، جوائنٽ سيڪريٽري تي مير علي احمد ٽالپر، فنانس سيڪريٽري تي محمد بخش بلوچ ۽ پريس سيڪريٽري جي عهدي تي تسليم حسين مرزا بيٺل آهن .جڏهن ته ايگزيڪيوٽو ڪاميٽي جي سيٽن تي ساجد قيوم ميمڻ جي بنا مقابلي ڪامياب ٿيڻ کان پوءِ محمد انور چنا، ضياء الدين پٺاڻ، ممتاز علي پنهور، عبدالغفار صبحپوٽو ۽ عتيق احمد اميدوار آهن.هوڏانهن آفيسرز فرينڊز پينل جي اميدوارن ۾ صدارتي عهدي لاء سيد سجاد حسين شاهه، نائب صدارت لاء فيصل زمان مغل، سيڪريٽري جنرل تي منظور علي پنهور، جوائنٽ سيڪريٽري لاءِ ڪاشف علي ناريجو، فنانس سيڪريٽري لاء پير بخش بجير ۽ پريس سيڪريٽري لاء مھتاب احمد قبوليو اميدوار آهن، جڏهن ته ايگزيڪيوٽو ڪميٽي جي جي سيٽن تي غلام نبي ڪاڪا رفيق احمد بروهي، غلام شبير عباسي، نادر علي مغيري، اعجاز احمد قريشي، نديم ٻٽ، نعيم احمد ۽ دائود احمد چنڙاليڪشن وڙهي رهيا آهن.
اليڪشن يونيورسٽي جي گرلس جمنازيم هال ۾ ٿيندي جنهن ۾ ووٽن جو ڪل تعداد 160 آهي جڏهن ته لاءِ اليڪشن جو ٽائيم صبح 9 کان شام جو 3.30 رکيو ويو آهي جنهن کان پوءِ اليڪشن ڪميٽيءَ جو چيئرمين معشوق صديقي کٽي آيل عهديدارن جي حتمي لسٽ جاري ڪندو..
”جميل سومرو سان تکو ڇو ڳالهايو“ : جيالي کي نوٽيس
جيالن جي جميل سومري سان بحث واري ويڊيو سوشل ميڊياتي وائرل ٿي
اسلام آباد(رپورٽر) اسلام آباد ۾ پيپيلزپارٽي چيئرمين بلاول ڀٽو زرداري سان ملاقات نه ڪرائڻ تي پ پ اڳواڻ جميل سومري سان تلخ ڪلامي ڪندڙ جيالن کي نوٽيس جاري ڪيو ويو آهي ،جڏهن ته يوٿ انفارميشن سيڪريٽري فدا عباسي جي جي ميمبرشپ ئي معطل ڪئي وئي آهي . واضع رهي ته ڪجهه ڏينهن پهريان جيالن بلاول ڀٽو زرداري سان ملاقات نه ڪرائڻ تي جميل سومري آڏو احتجاج جي ويڊيو سوشل ميڊيا تي وائرل ٿي هئي جنهن ۾ جيالا جميل سومري کي چئي رهيا هئا ته اوهان بلاول کي يرغمال بڻائي ورتو آهي ، عام ڪارڪنن کي ساڻس ملڻ نٿو ڏنو وڃي . جميل سومرو جي روڪڻ تي جيالن سخت احتجاج ڪندي چيو ته سند قائد ذوالفقار علي ڀٽو کين اها جرت ڏني آهي ته هو پنهنجي حق لاءِ آواز بلند ڪن .
سکر بار جي چونڊ، پروگريسو پينل اڪثريت سان ڪامياب
علي حيدر ادا صدر چونڊجي ويو، سڪندر جوڻيجو 157 ۽ عمران شمسي 61 ووٽ کنيا
محفوظ اعواڻ جنرل سيڪريٽري ٿي ويو، مخالف اميدوار عجيب الله جوڻيجو 336 ووٽ کنيا
سکر(رپورٽ: فاروق سومرو) سکر بار جي چونڊن جا مڪمل نتيجا پڌرا ٿي ويا. سينيئر وڪيل قربان ملاڻي جي پروگريسو پينل وڏي اڪثريت سان ڪاميابي حاصل ڪري ورتي. چونڊ نتيجن موجب پروگريسو پينل جو علي حيدر ادا 716 ووٽ کڻي صدر چونڊجي ويو، جڏهن ته همدرد پينل جا صداتي اميدوار سڪندر جوڻيجو 157 ۽ محمد عمران شمسي 61 ووٽ کڻي سگهيا. نائب صدر جي عهدي تي پروگريسو پينل جو الاهي بخش ميتلو 588 ووٽ کڻي ڪامياب ٿي ويو، مخالف اميدوار ظهير بابر 334 ووٽ کڻي ٻئي نمبر تي رهيو. بار جي چونڊ نتيجن موجب جنرل سيڪريٽري جي عهدي تي پروگريسو پينل جو محفوظ احمد اعواڻ 617 ووٽ کڻي ڪامياب ٿيو، جڏهن ته همدرد پينل جو عجيب الله جوڻيجو 336 ووٽ کڻي سگهيو. اهڙي ريت جوائنٽ سيڪريٽري جي چونڊ ۾ به پروگريسو پينل سوڀارو رهيو، جنهن جي اميدوار ذوالفقار ملاڻي 585 ووٽ کڻي ڪاميابي ماڻي، مخالف اميدوار ميڊم فرزانه کوسو رڳو 275 ووٽ کڻي سگهي. لائبريري سيڪريٽري جي عهدي تي به پروگريسو پينل جو سيد ظفر شاهه 550ووٽ کڻي سوڀارو ٿيو، جڏهن ته همدرد پينل جي ميڊيا رضوانه ميمڻ 366 ووٽ ٻئي نمبر تي رهي.
ٻڌايو وڃي سنڌ جي اربين روپيه بجيٽ ڪيڏانهن پئي وڃي:حليم عادل
ڪراچي(اسٽاف رپورٽر ) ڪراچي ۾ 2 سالن اڳ ڊمپر جي ٽڪر ۾ معذور بڻيل نينگر زاهد شاھ جي سنڌ سرڪار سار نه لَڌي، سندس گھر جو گاڏو هلڻ مشڪل ٿي ويو، معذور شاگرد جو علاج ڪرائڻ لاءِ گھر وارا سخت پريشان آهن. پي ٽي آءِ ايم پي اي حليم عادل شيخ سرجاني ٽائون پهچي شاگرد ۽ سندس وارثن سان ملاقات ڪري کين هڪ لک 20 هزار روپين جوامدادي چيڪ ڏنو. ان موقعي تي حليم عادل شيخ چيو ته سنڌ ۾ صحت جون سهولتون نه هجڻ ڪري ٻارڙا مري رهيا آهن اربين روپيا بجيٽ آهي،ٻڌايو وڃي ته اها ڪيڏانهن پئي وڃي؟ هن چيو ته زاهد شاهه وانگر سنڌ ۾ ڪيترائي ٻارڙا علاج نه ٿيڻ جي ڪري زندگي ۽ موت جي ڪشمڪش ۾ مبتلا آهن سنڌ حڪومت صحت جي شعبي ۾ رڳو بجيٽ ۾ هر سال اضافو آندو آهي، پر عوام کي ڪي به سهولتون نه پيون ملن.
جاپان ۾ فوت ٿي ويلن جا پتلا ٺاهيندڙ عجب رسم
جاپاني ڳوٺ فوتين توڙي ڳوٺ ڇڏيندڙ جا پتلا ٺاهي رکن ٿا
شخص جو پتلو اتي رکيو ويندو آهي، جتي هو وڌيڪ ڏٺو ويندو هو
ٽوڪيو (دلچسپ) جاپان ۾ هڪ اهڙو ڳوٺ به آهي، جتي جيڪو ماڻهو مري ويندو آهي يا ڳوٺ مان لڏي ويندو آهي، ان جا پتلا ٺاهي رکيا ويندا آهن. جاپان جي ان قديم ڳوٺ ۾ اها رسم صدين کان هلندي اچي ٿي. فوتي يا لڏي ويل شخص جو پتلو ان جڳهه تي رکيو ويندو آهي، جتي هو وڌيڪ ڏٺو ويندو هو. ڏکڻ جاپان ۾ ناگورو نالي ڳوٺ آهي، اهي پتلا گڏن جهڙا آهن. هڪ سياح جڏهن ان ڳوٺ ۾ ويو ته هن ان سوين پتلن جو تصويرون ٺاهيون، جيڪي تمام گهڻيون مشهور ٿي ويون آهن. ڳوٺ ۾ صرف 40 ماڻهو رهن ٿا جڏهن ته پتلن جو انگ 150 کان وڌيڪ آهي. برطانوي سياح ۽ فوٽو گرافر ٽريور موگ اهي تصويرون ٺاهيون آهن.