ڪراچي: تحريڪ انصاف  ڪراچي ڊويزن جي صدر ۽ سنڌ اسيمبلي جي ميمبر خرم شير زمان چيو آهي ته عدالتي فيصلي مان ثابت ٿي ويو ته نواز شريف ڪرپشن جو گاڊ فادر آهي. تفصيل موجب تحريڪ انصاف جي اڳواڻ خرم شير زمان چيو آهي ته پي ٽي آءِ جو پهريون مقصد ملڪ مان ڪرپشن جو خاتمو آهي. وزير اعظم عمران خان جي ڪرپشن جي خلاف جنگ تيزي سان جاري آهي. خرم شير زمان چيو آهي ته ملڪ کي نقصان رسائيندڙن هر شخص جو احتساب ٿيندو، احتساب جو آغاز نواز شريف کان ٿي چڪو آهي، ڪرپشن جو گاڊ فادر نواز شريف کان پوءِ هاڻ گاڊ فادر زرداري جو وارو آهي. تحريڪ انصاف جي اڳواڻ چيو ته جلد ئي پيپلز پارٽي جو شريڪ چيئرمين آصف علي زرداري به اڊيالا جيل ۾ هوندو.

ڪراچي(اسٽاف رپورٽر) سينيئر صحافي ۽ تجزيه نگار علي قاضي چيو آهي ته اڳوڻي وزير اعظم نواز شريف جي گرفتاري نئين ڳالهه ناهي، هو اڳ به قيد ڀوڳي چڪو آهي، نواز شريف کي اميد هئي ته سندس گرفتاري تي پنجاب جا ماڻهو روڊن تي نڪري رد عمل ڏيندا پر ايئن نه ٿيو جنهن تي هو مايوس ضرور ٿيو آهي.ميان صاحب کي مليل سزا خلاف پاڪستان جي سياسي ماحول ۾ ٻڙڌڪ متل رهندو، هونئن به ملڪ جي موجوده صورتحال بدتر آهي، ميڊيا جا ادارا بحران ۾ آهن، ملڪي معيشت پٺتي پيل آهي، آءِ ايم ايف هٿ مٿي ڪري ڇڏيا آهن، عمران خان ڳالهيون ته وڏيون ڪيون پر لڳي ٿو ته کانئس معيشت نٿي سنڀالجي. علي قاضي جي تجزيه موجب لنڊن واري ڀائي جي مائنس ٿيڻ کانپوءِ اڳوڻي صدر آصف زرداري ۽ اڳوڻي وزير اعظم نواز شريف کي مائنس ڪرڻ جون ڪوششون ڪيون پيون وڃن، نواز شريف کي مني ٽريل نه ڏيڻ تان سزا ملي آهي، مٿس ڪرپشن جا الزام ثابت ناهن ٿيا. پيپلز پارٽي چئي رهي آهي ته آصف زرداري سوڌو پ پ قيادت تي لڳايل الزام نوان ناهن، اهڙي قسم جا الزام اڳ به لڳندا رهيا، پر سپريم ڪورٽ جي آءِ ٽي کي جاچ لاءِ 2 مهينن جو وقت ڏنو آهي.سنڌ ۾ پيپلز پارٽي جي ليڊر شپ تي ڪرپشن جا ڪيس هلي رهيا آهن، هي قصو هتي بيهي نٿو سگهي، جڏهن ڪا شيءِ هلي ٿي ته ڪنهن نه ڪنهن منطقي انجام تائين پهچي ٿي. آصف زرداري کي سوڙهو ڪيو ويو ته جيڪي اڳ ۾ حڪومت ۾ رهيا آهن، انهن تي به هٿ وجهندا، ماضي ۾ سياسي ڊيلز ٿينديون رهيون آهن، پهريان پ پ خوش هئي ته رڳو نواز شريف خلاف ڪارروائي پئي ٿئي ، پر هاڻي آصف زرداري جي تازن جلسن ۾ ڪيل ڳالهين کانپوءِ پ پ به پريشان آهي، آصف زرداري جلسي ۾ چيو هو ته ”اوهان جي ملازمت جو مدو 3 سال آهي، اوهان دورن بدران التويٰ پيل ڪيس اڪلايو!“ هن ڀيري آصف زرداري “اينٽ سي اينٽ بجا دونگا” واري بيان کان هٿ هلڪو رکيو، ان ڪري لڳي ٿو ته آصف زرداري کي ٿوري عرصي لاءِ رليف ضرور مليو آهي. صنم ڀٽو جي ڏيهه اچڻ جي حوالي سان به سياسي حلقن ۾ مختلف سرٻاٽ ٻڌڻ ۾ اچي رهيا آهن، صنم ڀٽو جنهن خانداني مسئلن سبب سياست کان پري رهڻ پسند ڪيو سا نٿو لڳي ته آصف زرداري مٿان ڏکيا ڏينهن اچڻ تي پارٽي اندر ڪو ڪردار ادا ڪري سگهي ٿي. سينيئر صحافي علي قاضي موجب باخبر حلقن جو چوڻ آهي ته آصف زرداري ۽ سندس ڀيڻ فريال ٽالپر کي ملڪ بدر ٿيڻ لاءِ چيو پيو وڃي، پر آصف زرداري پڇاڻو ڪري رهيو آهي ته ڇو؟، ڇاڪاڻ ته آصف زرداري مائنس ٿيڻ لاءِ تيار ناهي، بلاول ڀلي پارٽي جو چيئرمين هجي، پر آصف زرداري باس آهي ۽ ٿيندو اهو ئي آهي جيڪو باس چوي. هاڻي ڇا آصف زرداري ۽ فريال ٽالپر جي گرفتاري تي سنڌ حڪومت وفاق سان ٽڪراءُ ۾ ايندي؟ اهو ملين ڊالرز جو سوال آهي، سنڌ ۾ فارورڊ بلاڪ جون ڳالهيون ٿي رهيون آهن، جيڪڏهن ٽڪراءُ ٿي پيو ۽ سنڌ حڪومت ٻين ادارن سان ويڙهه ڪئي ته گورنر راڄ لاڳو ٿي سگهي ٿو، ايم پي ايز کي ٽوڙي سگهجي ٿو، پر مونکي نٿو لڳي ته آصف زرداري ان حد تائين ويندو، سنڌ حڪومت ريڊ لائين ڪراس نه ڪندي، ماضي ۾ به رينجرز ڇاپي واري معاملي تي جيڪو ماڻهن چيو پئي اهو نه ٿيو ۽ سنڌ حڪومت ماٺ ۾ رهي. علي قاضي تجزئي ڪيو ته هن وقت ملڪ ۾ جيڪا سياسي غير يقيني واري صورتحال آهي، تنهن ۾ جيڪڏهن حالتون خراب ٿيون ته ڀوڳڻو سنڌ جي ماڻهن کي ئي پوندو، سياسي بحران پنهنجي جاءِ تي، پر سنڌ ڪارڊ ۽ 18هين ترميم جي ڳالهه پئي ٿئي، مرڪزي سطح تي صورتحال ڪهڙي به ٿئي پر ان جو شڪار اصل ۾ سنڌ جي ماڻهن کي ئي ٿيڻو پوندو آهي.

ملير (ن پ ا ) انڊيجنس رائٽس الائنس ملير جون 43 ديهون ۽ ضلعي اولهه جون 16 ديهون ايم ڊي اي ۽ ايل ڊي اي کي ڏيڻ وارو فيصلو واپس وٺڻ جو مطالبو ڪندي چيو آهي ته انهن ديهن ۾ مقامي ماڻهن کي ليز تي ڏنل زمينون کين هميشه لاءِ مالڪاڻه حقن تي ڏنيون وڃن. انڊيجنس رائٽس الائنس جو هڪ اهم اجلاس عثمان بلوچ جي صدارت هيٺ ملير جي جعفر مراد ڳوٺ ۾ ٿي گذريو، جنهن ۾ عبدالخالق جوڻيجو، سيد خدا ڏنو شاهه، محقق ۽ تاريخدان گل حسن ڪلمتي، الاهي بخش بڪڪ، پروفيسر رخمان گل پالاري، ايڊوڪيٽ جمال ناصر، شعيب بڪڪ، حفيظ بلوچ، غلام رسول بلوچ، حنيف دل مراد، زاهد بلوچ، ايوب فقير، نواز بلوچ ۽ ٻين شرڪت ڪئي، هن اهم گڏجاڻي ۾ بحريا ٽائون جي ملير جي زمينن تي ناجائز ۽ غيرقانوني والار، سپريم ڪورٽ جي فيصلن ۽ بحريا ٽائون خلاف انڊيجينس رائٽس الائنس جي جدوجهد جو جائزو ورتو ويو ۽ اهو چيو ويو ته بحريا ٽائون جي ناجائز والار جو هڪڙو وڏو سبب اهو به آهي ته ملير ضلع جي 43 ديهن کي غيرقانوني طريقي سان ايم ڊي اي جي حوالي ڪيو ويو ۽ ان جو ناجائز استعمال ڪندي اٽڪل 45 هزار زمين تي بحريا ٽائون جو قبضو ڪرايو ويو جنهنجي ذميوار سنڌ حڪومت ۽ ايم ڊي اي آهي، هنن ديهن ۾ لکين ايڪڙ زمين جيڪا مقامي ماڻهن کي واهي چاهي باراني ۽ پولٽري ليز تي ڏنل آهي ۽ اهو سڄو علائقو ذرعي علائقو آهي جتي سوين باغ، وڏي ذرعي آبادي، سوين ڳوٺ، قبرستان ۽ تاريخي ماڳ مڪان موجود آهن، انهي زمين تي والار سبب 12 لک مقامي آبادي جو مستقبل داءُ تي لڳل آهي ۽ سپريم ڪورٽ آف پاڪستان بحريا ٽائون کي ڏنل زمين کي پڻ غيرقانوني قرار ڏنو آهي، جنهن کانپوءِ بحريا کي ڏنل زمين رد ڪئي وئي آهي، انهي ڪري انڊيجينس رائٽس الائنس اهڙو مطالبو ٿو ڪري ته ملير جون 43 ديهون ۽ ضلعي اولهه جون 16 ديهون ٻيهر روينيو (سنڌ حڪومت) حوالي ڪيون وڃن ۽ ايم ڊي اي ايڪٽ ۾ ڪيل ترميم رد ڪئي وڃي ، الائنس اعلان ڪيو ته بحريا ٽائون جي ناجائز والار ۽ ٻهراڙين جي زمينن تي ڌارين جي والار خلاف جدوجهد تيز ڪئي ويندي.