ميان صاحب(ن پ ا) ٽانوري محلي ۾ اڄ صبح بجلي جي 220 وولٽ جي تارن کي اوچتو باھ لڳي وئي جنهن سبب صبح دڪانن ۽ هوٽلن تي چانھھ پيئندڙ ماڻهن ۾ ڀاڄ پئجي وئي تارن کي باھ لڳڻ سبب 220 وولٽ جون ٽيئي تارون ٽٽي هيٺ ڪري پيون پر صبح جو سويل ماڻهن جي گهر هجڻ ڪري ڪو بھ نقصان نھ ٿيو جڏهن تھ تارن جي ٽٽي ڪرڻ سبب ٽانوري سيد ۽ راجپوت پاڙن جي بجلي بند ٿي وئي.اطلاع باوجود سيپڪو وارا آخري اطلاع تائين اڃان نھ پھتا ھئا
ميان صاحب: 220 وولٽ جون تارون باھ لڳڻ سبب ٽٽي پيون
ھوٽلن تي ويٺل ماڻھن ۾ ڀاڄ. ٽانوري سيد ۽ راجپوت پاڙي جي بجلي بند ٿي وئي
ڪوٽ لال: پورهيت جي گهر تي حملو ڪندڙن خلاف ڪارروائي، هڪ جوابدار گرفتار
ڪوٽ لالو (ن پ ا) ڪوٽ لالو پوليس پورهيت جي گهر تي حملو ڪندڙن خلاف ڪارروائي ڪري هڪ ڄڻي کي گرفتار ڪري ورتو.
جلالجي چودڳي لڳ پوليس هڪ گهر تي چڙهائي ڪري شر برادري سان واسطو رکندڙ هڪ جوابدار کي گرفتار ڪيو، پوليس جو چوڻ آهي ته پورهيت جي گهر تي حملي ۾ ملوث سمورن جوابدارن کي گرفتار ڪري ڪيس داخل ڪيو ويو.
واضح رهي ته ڪجهه ڏيبهن اڳ جوابدارن پورهيت اعجاز ونگي جي گهر تي حملو ڪري عورتن سميت گهرڀاتين کي زخمي ڪري وڌو هو
پنوعاقل: شهر ۾ هڪ ئي رات ۾ ٻن دڪانن مان لکين رپين جي چوري، پوليس اگھور ننڊ ستل، دڪاندار پريشان
چوري سون ۽ ڪپڙي جي دڪانن مان لکين رپين جي چوري ڪيا ويا: متاثر دڪاندار
فوري طور چورن کي پڪڙي سامان واپس ڪرايو وڃي: متاثر دڪاندارن جي اپيل
پنوعاقل ) ن پ ا ) شهر ۾ هڪ رات ۾ چوري جا 2 واقعا پيش اچڻ تي واپارين ۾ تاءُ پکڙجي ويو، چور سون ۽ ڪپڙي جي دڪانن جا تالا ٽوڙي لکين رپين جي چوري ڪري آساني سان فرار ٿي ويا.
اڻڄاتل چور رات دير سان محمد حنيف سوناري جي دڪان جا تالا ٽوڙي لکين روپين جو سون ۽ روڪ رقم چوري ڪري ويا، ساڳي ئي رات هيري مل جي ڪپڙي جي دڪان جا تالا ٽوڙي 30 هزار روڪ ء ڪپڙن جا 15 ٿان چوري ڪيا ويا.
دڪاندارن چوري جي ٻنهي واقعن تي ڪاوڙ جو اظهار ڪندي چيو ته پوليس جي ڪارڪردگي سبب بدامني وڌي رهي آهي، ڪجهه ڏينهن اڳ به ٻن دڪانن مان چوري ٿي هئي، نه انهن واقعن جا جوابدار گرفتار ٿي سگهيا آهن ۽ نه ئي چوري واپس ڪرائي وئي آهي.
متاثر دڪاندارن سنڌ جي وڏي وزير ۽ آءِ جي سنڌ کي اپيل ڪئي ته چوري جي تازن واقعن جو نوٽيس وٺي بدامني کي ٻنجو ڏيڻ لاءِ اثرائتا قدم کنيا وڃن
ڀارت ۾ فنڪار دنيا جو سڀ کان وڏو سانتا ڪلاز ٺاهي ورتو
فنڪار وَاري ۽ 10 هزار پلاسٽڪ جي بوتلن سان سانتا ڪلاز جو مجسمو ٺاهيو
اوڙيسا (م ڊ) ڀارت ۾ فنڪار دنيا جو سڀ کان وڏو سانتا ڪلاز جو مجسمو 10 هزار پلاسٽڪ جي بوتلن ۽ واري جي مدد سان ٺاهي ورتو آهي. اهو دنيا جو سڀ کان وڏو سانتا ڪلاز جو مجسمو آهي، جنهن کي جلد گئنيز بوڪ آف ورلڊ رڪارڊ ۾ شامل ڪيو ويندو. پلاسٽڪ جي بوتلن ۽ وارِي جي 882 ٽن سان 30 فوٽن جو سانتا ڪلاز ماڻهن جي توجهه جو مرڪز بڻيل آهي. پوري بيچ تي 30 فوٽن جو سانتا ڪلاز امن ۽ ماحوليات جي تحفظ نالي ڪيو ويو.
شهيد راڻي جي ورسي،جلسي کي آصف ۽ بلاول خطاب ڪندا
ڳڙهي خدابخش ۾ جلسي لاءِ اسٽيج تيار، سيڪيورٽي جا غيرمعمولي انتظام، قافلن جي آمد جاري
ملڪ جي ڪنڊ ڪڙڇ مان هزارين ماڻهو پهتل، مزارن تي حاضري، نعرن تي ڪارڪن جذباتي ٿي ويا، هر آک آلي
نئون ديرو (رپورٽر) شهيد راڻي محترمه بينظير ڀٽو جي شهادت کي 11 ورهيه وهامي ويا. شهيد راڻيءَ کي ياد ڪري اڄ به هر اک آلي نظر آئي. شهيد بينظير ڀٽو جي يارهين ورسي نئون ديرو هائوس ۽ ڳڙهي خدابخش ڀٽو ۾ نهايت عقيدت ۽ احترام سان ملهائڻ لاءِ تياريون مڪمل ڪيون ويون آهن. ورسي جي موقعي تي مزار سامھون وڏو اسٽيج ۽ جلسي گاھ تيار ڪيو ويو آھي، جڏھن ته سنڌ سميت ملڪ جي ڪنڊ ڪڙڇ کان پارٽي ڪارڪنن، جيالن ۽ وڏي انگ ۾ عام ماڻهن جي ڳڙهي خدابخش آمد جو سلسلو جاري آهي، جن ۾ عورتون، مرد، ٻڍا توڙي ٻارڙا شامل آهن. جڏهن ته پري کان ايندڙ ڪارڪنن جي ترسڻ لاءِ ضلعي وائيز ڪئمپون تيار ڪيون ويون آهن. ورسي تقريبن ۾ شرڪت ڪرڻ لاءِ پ پ چيئرمين بلاول ڀٽو زرداري، پارٽي جو شريڪ چيئرمين آصف علي زرداري، شهيد راڻيءَ جون نياڻيون بختاور ڀٽو زرداري ۽ آصفه ڀٽو زرداريءَ نئون ديرو هائوس ۾ موجود آهن. ورسي تقريبن جي شروعات ڳڙهي خدابخش ڀٽو ۽ نئون ديرو هائوس ۾ قرآن خوانيءَ سان ڪئي وئي، ورسيءَ جي موقعي تي ڳڙهي خدابخش ڀٽو ۾ مزار تي ايندڙ ڪارڪن قرآن خواني ڪري پنهنجي شهيد قائدين کي لڙڪن، سڏڪن، ۽ دانهن سان ڀيٽا پيش ڪندا. قرآن خوانيءَ بعد لنگر تقسيم ڪيو ويندو، جڏهن ته 1 وڳي پيپلز ڪلچرل ونگ پاران مشاعري جي محفل ٿيندي، جنهن ۾ ملڪ جا ناليوارا شاعر پنهنجي شاعريءَ ذريعي شهيد محترمه بينظير ڀٽو کي ڀيٽا پيش ڪندا. بعد شام جو ساڍي ٽين وڳي جلسي عام ٿيندو، جنهن کي پ پ چيئرمين بلاول ڀٽو زرداري، شريڪ چيئرمين آصف علي زرداري، اڳوڻو وزير اعظم يوسف رضا گيلاني، راجا پرويز اشرف، اعتزاز احسن، سيد خورشيد شاهه، سنڌ جو وڏو وزير سيد مراد علي شاهه، اڳوڻو وڏو وزير سيد قائم علي شاهه، اسپيڪر سنڌ اسيمبلي آغا سراج دراني، پ پ سنڌ جو صدر نثار احمد کهڙو، وقار مهدي، ايم پي اي خورشيد جوڻيجو سميت پيپلز پارٽيءَ جا مرڪزي توڙي صوبائي اڳواڻ جلسي کي خطاب ڪندا. مزار تي پهچندڙ ڪارڪن جذباتي انداز ۾ “زندھ ھي بيبي زندھ ھي”، “جب تڪ سورج چاند رھي گا ڀٽو تيرا نام رھي گا”، “بيبي ھم شرمنده ھين تيري قاتل زندھ ھين” جا اڀ ڏاريندڙ نعرا هنيا جنهن ڪري مزار ڪارڪنن جي آواز سان گونجي اٿي. ٻاهران ايندڙ ڪارڪن پنهنجي محبوب ليڊرن جي مزارن تي پهچڻ بعد جذباتي ٿي وڃن ٿا، مزار جي کاٻي پاسي طبي ڪئمپ قائم ڪئي وئي آهي، ورسي جي موقعي تي سيڪيورٽيءَ جا انتظام انتهائي سخت ڪيا ويا آهن، نئون ديرو هائوس توڙي ڳڙهي خدابخش ڀٽو جي سيڪيورٽيءَ لاءِ 7 هزار پوليس اهلڪار ۽ آفيسر، ٽريفڪ، رينجرز، سي ٽي ڊي، آر آر ايف ۽ ايس ايس يو ڪمانڊو کي مقرر ڪيو ويو آهي. مزار جي گيٽ نمبر 8، 9 ۽ 10 تي 25 کان وڌيڪ واڪ ٿرو گيٽس لڳايا ويا آهن جڏهن ته مزار اندر پڻ واڪ ٿرو گيٽس لڳايا ويا آهن جتي ايندڙ ماڻهن کان جهڙتي وٺڻ بعد کين مزار طرف ڇڏيو پيو وڃي. ورسيءَ جي موقعي تي ڳڙهي خدابخش ڀٽو کي پارٽي جهنڊن، قائدين جي خوبصورت تصويرن ۽ بينر سان سينگاريو ويو آهي.
ٽرمپ آمريڪي فوجين سان ڪرسمس ملهائڻ لاءِ عراق پهچي ويو
آمريڪي صدر ۽ ميلانيا ٽرمپ ڪرسمس ملهائڻ اوچتو عراق پهتا
بغداد (ا ڊ) آمريڪي صدر ڊونلڊ ٽرمپ پهريون ڀيرو اوچتي دوري تي عراق پهچي ويو، جتي هن ڪرسمس عراق ۾ مقرر آمريڪي فوجين سان ملهائي. آمريڪي صدر ڊونلڊ ٽرمپ ۽ ميلانيا الاسد ايئربيس ڪرسمس ملهائي ۽ آمريڪي فوجين کي مبارڪون ڏنيون. ان موقعي تي فوجين سان خطاب ڪندي آمريڪي صدر چيو ته هو عراق مان فوجون واپس نه پيا گهرائن. اسان نٿا چاهيون ته ٻيا ملڪ آمريڪا کي استعمال ڪري فائدو حاصل ڪن ۽ آمريڪي فوجي انهن جي حفاظت ڪن. آمريڪي صدر چيو ته شام ۾ ڪارروائي پئي ته عراق وارو ايئر بيس استعمال ڪري سگهجي ٿو.
روس جو هائپر سونڪ نيوڪليئر ميزائل جو ڪامياب تجربو
روس وٽ جديد اسٽريٽجڪ دفاعي هٿيار آهن: روسي صدر ولاديمير پيوٽن
ماسڪو (ا ڊ) روس پاران جديد هائپر سونڪ نيوڪليئر ميزائل جو ڪامياب تجربو ڪري ورتو آهي. ايون گرڊ نالي ان ميزائل جو ڪامياب تجربو ڪيو ويو.
روسي صدر ولاديمير پيوٽن پاران ميزائل تجربي بابت روسي عوام سان مخاطب ٿيندي چيو ته روس وٽ جديد اسٽريٽجڪ دفاعي هٿيار اچي ويو آهي، جنهن سان ملڪ جي ڏهاڪن تائين حفاظت ڪري سگهجي ٿي. ايون گرڊ ميزائل تجربي کي روسي صدر پاران روس سان گڏ پوري دنيا لاءِ اهم قرار ڏنو. هن چيو ته روس وٽ نئين قسم جو اسٽريٽجڪ هٿيار آهي، جيڪو روس ۽ روسي عوام جي حفاظت جو ضامن آهي.
برساتن جي مند ۾ نئين گاج جو 30 کان 50 فوٽ وهڪرو
لياقت جتوئي رڳو افتتاح ڪيو، فنڊ ۽ ڪم پ پ حڪومت ڪرايو: پ پ اڳواڻ عرفان لغاري
علائقي واسين ۾ ڊيم جي مخالفت به موجود، گهوٻين جي اطلاعن جو نيب نوٽيس وٺي چڪو
ميهڙ (رپورٽر) نئين گاج اونهاري توڙي سياري ۾ بلوچستان توڙي کير ٿر جبلن ۾ پوندڙ برساتن کان پوء وهندي آھي جنهن ۾ پاڻي 30کان 50 فوٽن تائين وهندو آھي ۽ جنهن هنڌ تي گاج ڊيم ٺاهيو وڃي پيو ان هنڌ کان اولهه توڙي اوڀر کان هزارين فوٽ اوچا جبل آھن جتان پاڻي تيز رفتاري سان لهندوآهي. پاڻي انگريزن جي دور جي ڏنل تير ڀت سان ٽڪرا ئجي جوهي تعلقي جي ڪاڇي جي ميداني علائقي مان گذرندو وڃي يوسي ساڙو ڇني جي بهاول جي گنڍي کان ٿيندوروهل واري علائقي کان منڇر ۾ ڇوڙڪندو آھي جيڪو تير ڀت جتي گاج ڊيم ٺھي پيو ان کان 54 ڪلو ميٽر مفاصلي تي آھي. گاج ڊيم ٺھڻ کان پوء پائيپ وڇائي روز 50 ڪيوسڪ پاڻي منڇر ۾ ڇوڙ ڪيو ويندو. ڊيم مان 34 ڪلو ميٽر ڊگهو 12 فوٽ ويڪرو ڪئنال ڪڍيو ويو آھي. اهو جوهي، خير پور ناٿن شاه ۽ ميهڙتعلقي تائين يوسي منگواڻي قمبر ڇوڙ ماڏي واري علائقي يوسي مٺوٻٻر يوسي ڪڪڙ ڳوٺ مزار ڀرڳڙي قصبو راڃو ديرو ڊگه بالا ڳوٺ پٽ گل محمد ڳوٺ حاجي خان ڳو ٺ ڇڪلڻي ڳوٺ ڪرڪلي يوسي ڇني يوسي ساڙو واهي پانڌي گاجي شاه لنڊن لغارين ۽ ڪلوئي برادري جي ڪيترن وڏن ننڍن ڳوٺن جي لڳ ڀڳ 4لک ايڪڙزمين کي سيراب ڪندو، گاج ڊيم جي منصوبي جي حوالي سان پ پ پ جي ميهڙ ۽ خير پور ناٿن شاه مان چونڊيل ايم اين اي عرفان لغاري، ايم پي اي انجنيئر عبدالعزيز جوڻيجو چيو ته گاج ڊيم جي لاء فنڊ ۽ ڪم اسان جي وفاقي حڪومت ۾ ٿيو جڏهن 2013ع جي چونڊن کان پوء وفاق ۾ مسلم ليگ نون جي حڪومت ٺھي ۽ ميان نواز شريف وزير اعظم ٿيو ته هن گاج ڊيم لاء فنڊ روڪي ڇڏيا. فنڊ جاري نه ڪرڻ ڪري 2018ع ۾ مڪمل ٿيندڙ ڱاج ڊيم هن وقت تائين مڪمل ٿي نه سگهيو آھي.هنن چيو ته پرويز مشرف جي حڪومت ۾ لياقت جتوئي رڳو تختي لڳائي افتتاح ڪيو هو پاڻي ۽ بجلي جو وزير هوندي به فنڊ نه رکرايا ۽ نه ڪم شروع ٿيو هو. هاڻي وفاق ۾ تحريڪ انصاف جي حڪومت آھي لياقت جتوئي دادو ضلعي جي عوام سان سچو آھي ته فنڊ جاري ڪرائي ڪم شروع ڪرائي پ پ پ جي سنڌ حڪومت تعاون ڪندي، ميهڙ:ڪاڇي جي يوسي ساڙو يوسي ڇني جي رهواسين روهل خان لغاري، محمد نواز، دوست محمد رودناڻي۽ ٻين رابطي ڪرڻ تي نئين گاج تي ڊيم اڏڻ کي منڇر لاء ۽ يوسي ڇني ساڙو جي لاء خطرناڪ قرار ڏيندي ڇيو ته نئين گاج ڊيم ٺھڻ سان قدرتي وهڪرا بند ٿيندا، منڇر۾ پاڻي نه ايندو جنهن سان ماحولياتي مسئلو پيڍا ٿيندوگاج نئين جي قدرتي وهڪرن سان جيڪا سندن هزارين ايڪڙ زمين آباد ٿيندي آھي اها غير آباد ٿي ويندي سندن جرکارو ٿي ويندو جر جي پاڻي جي سطح ھيٺ ٿي ويندي انڪري اسان کي گاج ڊيم جي اڏاوتي منصوبي تي تحفظات آھن ان لاء منڇر۾ پاڻي ۽ ڊيم مان اسان جي علائقي ۾ پاڻي زرعي آبادي لا ء پاڻي ڪيئن ايندو اعتماد ۾ ورتو وڃي، نئين گاج منصوبي جي فنڊن ۾ گهوٻين جي اطلاعن جو نيب نوٽيس ورتو آهي ۽ جاچ شروع ڪئي وئي آهي. جاچ لاءِ حڪومت کان رڪارڊ پڻ طلب ڪيو ويو آهي.
دادو ضلعي جي خوشحالي وارو گاج ڊيم منصوبو 11 سالن کان رولڙي جو شڪار، لاڳت ۾ ڏيڍ سئو سيڪڙو واڌ
ڪاڇي جي 80 هزار ايڪڙ غيرآباد زمين کي آباد ڪرڻ وارو خواب ساڀيان ٿي نه سگهيو، سياسي مخالفتن ۽ مفادن جي ور چڙهي ويو
مشرف دور ۾ لياقت جتوئي 2007ع ۾ افتتاح ڪيو، پيپلزپارٽي ۽ نواز ليگ جي حڪومتن رٿا تي ڪو به ڌيان نه ڏنو
ميهڙ(رپورٽ:پاويل جوڻيجو)دادو ضلعي جي ڪاڇي واري جابلو علائقي ۾ 80 هزار کان وڌيڪ غيرآباد زمين کي آباد ڪرڻ لاءِ نئين گاج تي گاج ڊيم 11 سال گذرڻ باوجود ٺهي نه سگهيو آهي ڊيم نه ٺهڻ ڪري ڪاڇي جون زمينون پاڻي نه هجڻ ڪري آباد نه ٿي رهيون آهن جنهن سبب ڪاڇي ۾ ڏڪار واري صورتحال آهي ڪاڇي ۾ رهندڙ لکين انسان غربت بک بدحالي ۾ مبتلا آهن مليل معلومات موجب گاج ڊيم جو منصوبو پرويز مشرف جي دور ۾ 2007ع ۾ جوڙيو ويو ۽ آگسٽ 2007ع ۾ وفاقي وزير لياقت علي جتوئي افتتاح ڪيو هو. ڊيم جي مڪمل تعمير جي لاءِ 11 ارب رپين جو خرچ جو ڪاٿو لڳائي ٽن سالن ۾ مڪمل ڪرڻ جو چيو ويو. ڊيم 2011ع جي آگسٽ مهيني ۾ مڪمل ٿيڻو هو پر 2008ع ۾ ٿيل عام چونڊن ۾ وفاق ۽ سنڌ ۾ پ پ پ جي حڪومتون ٺهڻ ۽ لياقت علي جتوئي جي چونڊون هارائڻ کان پوءِ اهو گاج ڊيم جو منصوبو پ پ پ جي حڪومت رولڙي ۾ وجهي ڇڏيو ۽ هاڻ منصوبي کي 11 سال گذرڻ باوجود 50 سيڪڙو به ڪم مڪمل نه ٿيو آهي. هاڻ ان جو خرچ جو ڪاٿو 11 ارب رپين کان وڌي 30 ارب ٿي ويو آهي. گاج ڊيم منصوبي جو افتتاح ڪندڙ تحريڪ انصاف جي مرڪزي اڳواڻ لياقت علي جتوئي روزاني پنهنجي اخبارکي ٻڌايو ته 2008ع ۾ اسان جي حڪومت ختم ٿيڻ ۽ وفاق ۽ سنڌ ۾ پ پ پ جي حڪومتون ٺهڻ ڪري ان منصوبي کي مڪمل ڪرڻ تي ڌيان نه ڏنو ويو جنهن ڪري اهو منصوبو پنهنجي مدت ۾ پورو نه ٿي سگهيو نه ئي وري ان منصوبي تي ميان نواز شريف جي وفاقي حڪومت ڌيان ڏنو. هن چيو ته پ پ پ ۽ مسلم ليگ نون وارن گاج ڊيم نه ٺاهي نه رڳو دادو ضلعي جي عوام، خاص طور تي ڪاڇي وارن سان ظلم ڪيو آهي پر سنڌ ۽ پاڪستان کي به نقصان ڏنو آهي. هن چيو ته گاج ڊيم پنهنجي مدي ۾ پورو ٿئي ها ته ڪاڇي ۾ هن وقت ڏڪار نه هجي ها. پر دادو ضلعي ۽ سنڌ ۾ به معاشي ترقي ٿئي ها. تحريڪ انصاف جي اڳواڻن اڳوڻي ايم پي اي احسان علي جتوئي ، ڪاڇي واري علائقي جوهي تعلقي سان واسطو رکندڙ تحريڪ انصاف جي اڳواڻ بنده علي لغاري روزاني پنهنجي اخبار سان ڳالهائيندي چيو ته 2007ع ۾ جڏهن لياقت علي جتوئي ان منصوبي جو افتتاح ڪري رهيو هيو ته ڪاڇي جا رهواسي هاري ،آبادگار ، ڪاروباري ماڻهون ڏاڍا خوش ٿي هيا ته ان گاج ڊيم ٺهڻ سان سندن غربت ، بيروزگاري ختم ٿيندي علائقي ۾ خوشحالي ايندي ۽ سندن تقدير بدلجي ويندي پر اهو ڊيم 11 سالن ۾ نه ٺهڻ ڪري ڪاڇي جي ماڻهن جا خواب اڌورا رهجي ويا آهن. هنن چيو ته هاڻي منصوبي ۾ شامل جوهي تعلقي جي ڪاڇي واري علائقي جون ٽي ديهون ڊرگهه بالا، فيرو ديرو، الهيار ديرو ڪڍيون ويون آهن جڏهن ته 4.5 ميگاواٽ بجلي گهر به خارج ڪيو ويو آهي. جنهن سان ان منصوب عوام لاءِ بي لاڀ ثابت ٿيندو، سپريم ڪورٽ ۾ گاج ڊيم جي اڏاوت بابت داخل پٽيشن ۾ گاج ڊيم تي62 ارب خرچ ٿيڻ جو انڪشاف ٿيو آهي جن مان 16 ارب خرچ ٿي چڪا آهن ۽ باقي 46 ارب رپيا خرچ ٿيڻا آهن. سپريم ڪورٽ جي چيف جسٽس کي ٻڌايو ويو آهي ته ڊيم جو ڪم 51 سيڪڙو مڪمل ٿي ويو آهي باقي 49 سيڪڙو ڪم رهيل آهي جنهن تي سپريم ڪورٽ وفاقي حڪومت، واپڊا ۽ سنڌ حڪومت کي هدايت ڪئي آهي ته خرچ ڪيل 16 ارب ضايع نٿا ڪري سگهجن گاج ڊيم کي جنهن کي به پئسا ڏيڻا آهن ڏئي ۽ منصوبو مڪمل ڪري سپريم ڪورٽ جي چيف جسٽس جي ڏنل حڪم کي 10 ڏينهن کان مٿي جو عرصو گذرڻ باوجود گاج ڊيم جي رهيل ڪم کي ٺاهڻ لاءِ ڊيم ٺاهيندڙ ڪمپني جو ڪو ماڻهو آيو آهي نه وفاقي ۽ سنڌ حڪومت نه ئي واپڊا وارن ڪو تحرڪ ورتو آهي.
انسان جا ڳوڙها لوڻياٺا جسماني ڪيفيت سبب ٿين ٿا
ڪراچي (دلچسپ نيوز) انسان جا ڳوڙها عام طور لوڻياٺا هوندا آهن، پر مختلف موقعن تي اکين ۾ ايندڙ ڳوڙها لوڻياٺا ناهن هوندا. ڳوڙهن جو لوڻياٺو ٿيڻ جو دارومدار انسان جي جسماني ڪيفيت تي آهي. جڏهن ماڻهو ڏک يا تڪليف ۾ روئيندو آهي ته ان وقت انسان جي ٿاءِ رائيڊ گلينڊ گهڻو متحرڪ هوندا آهن ۽ دل جو ڌڌڪو به تيز هوندو آهي، اهڙي حالت ۾ ماڻهو جا ڳوڙها لوڻياٺا هوندا آهن.
. ان جي ابتڙ جڏهن انسان خوشي وچان روئيندو آهي ته ان جا ڳوڙها لوڻياٺا ناهن هوندا. انهن ڳوڙهن کي جيڪڏهن مائيڪرو اسڪوپ ۾ ڏسجي ته اهي تڪليف يا ڏک ۾ وهندڙ ڳوڙهن کان مختلف هوندا آهن.
ارجينٽينا ۾ ماڻهو برفاني ڇپ پاڻي ۾ ترندي ڏسي حيران ٿي ويا
بيونس ايريز (دلچسپ نيوز) ارجنٽينا ۾ سرد موسم مان مزو ماڻيندڙ ماڻهن هڪ اچرج ۾ وجهندڙ نظارو ڏٺو، جڏهن ديومالائي برف جو ٽڪرو ترندي تيزي سان اڳتي وڌي رهيو هو ته ماڻهن ڏسي دنگ رهجي ويا. لاس گليشيئرز نيشنل پارڪ ۾ اهو انوکو نظارو ڪيمرا جي اک ۾ پڻ محفوظ ڪيو ويو، جنهن ۾ ڏسي سگهجي ٿو ته برف جو وڏو ٽڪرو برفاني پاڻي جي لهرن تي هيٺ مٿي ٿي رهيو هو، جڏهن ته ماڻهو ان نظاري کي ڏسي اچرج ۾ پئجي ويا. دنيا ۾ ماحولياتي تبديلي سبب برفاني ڇپن جي ٽوڙ ڦوڙ ۾ واڌ اچي وئي آهي.
چين 10 قسمن جي ميزائلن سان ليس جديد ڊرون تيار ڪري ورتو
بيجنگ (ٽيڪ نيوز) چين لڳاتار 35 ڪلاڪ اڏامندڙ جديد بمبار ڊرون تيار ڪري ورتو آهي، جيڪو 23 هزار فٽن جي اونچائي تي دشمن تي نطر رکڻ ۽ هدف کي نشانو بڻائڻ جي صلاحيت رکي ٿو. پرڏيهي ميڊيا موجب چين جديد ڊرون جي پهرين اڏام واري وڊيو جاري ڪري ڇڏي آهي، بمبار ڊرون جو نالو اڃا تائين ظاهر نه ڪيو ويو آهي، پر ان جي کوٽن ۽ صلاحيتن جا تفصيل سامهون اچي ويا آهن. ونگ لونگ آءِ ڊي ساک جو هي نئون ڊرون 10 مختلف قسمن جا هٿيار کڻڻ جي صلاحيت رکي ٿو ۽ ري-فيولنگ بنا 35 ڪلاڪ لڳاتار اڏام ڪري سگهي ٿو. نئين ڊرون جهاز پنهنجي اونچي اڏام سبب به ٻين کان وڌيڪ اهميت حاصل ڪئي آهي، جديد ڊرون 7 هزار ميٽر اونچي يعني 23 هزار فٽ جي اونچائي تائين اڏام ڪري سگهي ٿو.
چين جو ٽيڪنالاجي ۾ اڳتي قدم، انٽرنيٽ سان ليس جديد نظام سان روڊ ٺاهڻ جو تياريون
خودڪار طريقي سان ٽريفڪ تي ضابطو آڻڻ لاءِ جديد ٽيڪنالاجي ذريعي ٺهندڙ روڊ منصوبو 2022 ۾ مڪمل ٿيندو
لائن جي تبديلي لاءِ هاءِ وي تي ڊرائيونگ سنيسرز لڳايا ويندا. روڊن تي حادثن کان بچڻ لاءِ به نظام ٺاهيو ويندو
بيجنگ (ٽيڪ نيوز) چين ۾ جديد ٽيڪنالاجي جو استعمال روڊ تي به ٿيڻ لڳو، انٽرنيٽ سان ليس جديد نظام خودڪار طرقي سان ٽريفڪ تي ضابطو آڻڻ سميت ٻيون خاصيتون رکندڙ وارو منصوبو 2022 تائين مڪمل ڪيو ويندو. چين ۾ جديد ٽيڪنالاجي سان ليس روڊ ٺاهڻ جي تياري ڪئي پئي وڃي، لين تبديلي لاءِ هاءِ وي تي ڊرائيونگ سنيسرز لڳايا ويندا. روڊن تي حادثن کان بچڻ لاءِ به نظام ٺاهيو ويندو. انٽرنيٽ سان ليس نظام ۾ ٽريفڪ تي ضابطو آڻڻ جي صلاحيت هوندي، انٽيليجنٽ ايڪسپريس وي منصوبو 2022 تائين مڪمل ٿيندو.
شڪاگو ۾ بن مانس جي سالگرهه ملهائي وئي
شڪاگو (دلچسپ نيوز) شڪاگو جي چڙيا گهر ۾ موجود هيڊي نالي ننڍڙي بن مانس جي ٻين سالگره ملهائي وئي. بن مانس جي سالگرهه تي چڙيا گهر جي اتنظاميه هيڊي لاءِ خاص طور مختلف ڦلن تي ٻڌل فروٽي ٽريٽ جو انتظام ڪيو. سالگرهه جي موقعي تي هيڊي جي پسنديده شيون کيس کائڻ ۽ کيڏڻ لاءِ ڏنيون ويون.
. ننڍڙي بن مانس لاءِ مزيدار دعوت جو پڻ اهتمام ڪيو ويو.
ٿائيلينڊ ۾ چور ڪاري جادو لاءِ 10 تازه ڄاول ٻارڙن جا لاش چورائي ويا
ضلعي بان ڇانگ جي قبرستان مان ٻارڙن جو قبرون کوٽي لاش گم ڪيا ويا: امدادي ڪارڪن
تازه ڄاول ٻارڙن جي لاشن کي ڪاري جادو جي رسمن ۾ استعمال ڪيو ويندو آهي: مقامي ماڻهو
رايونگ (دلچسپ نيوز) ٿاءِ لينڊ ۾ چورن ڪاري جادو جي رسمن لاءِ 10 تازن ڄاول ٻارڙن جا لاش چورايا. ضلعي بان ڇانگ جي قبرستان مان پيدائش بعد ترت فوت ٿيل 10 ٻارڙن جا لاش چورايا ويا. ٿائي ميڊيا جي رپورٽ موجب هڪ ريسڪيو ايسوسي ايشن جي اهلڪارن ڏٺو ته قبرستان ۾ قبرن جو سيمينٽ ۽ بلاڪ ٽٽل هئا ۽ ٻارڙن جا لاش گم هئا. اهلڪارن جو چوڻ هو ته جيڪي قبرون کليل مليون آهن، اهي سڀ تازا ڄاول ٻارڙن جون آهن. ان قبرستان مان هن مهيني 5 کان 6 تازه ڄاول فوتي ٻارڙن کي دفنايو ويو هو. مقامي ماڻهن جو چوڻ آهي ته هنن قبرستان مان سيمينٽ ٽٽڻ ۽ دعائن جا آواز ٻڌا. مقامي ماڻهن کي يقين آهي ته ٻارڙن جي لاشن کي ڪاري جادو جي رسمن ۾ استعمال ڪيا ويندو، مقامي رهواسين جو چوڻ آهي ته ڪاري جادو جو شڪار ماڻهو ٻارن جي لاشن بدلي ڳري قيمت به ڏيڻ لاءِ تيار هوندا آهن.