فيض گنج (رپورٽ: رياض سولنگي) پڪا چانگ لڳ واپڊا وارن اڳاڙي لاءِ ڪيترن ئي ڳوٺن جا بجلي جا ڪنيڪشن ڪٽي ڇڏيا، جنهن خلاف مختلف ڳوٺن جي رهواسين ڳوٺاڻن ذوالفقار سولنگي، غفور شر، غلام حيدر ،شبير راڄپر ۽ ملوڪ راڄپر احتجاجي مظاهرو ڪندي چيو ته پهرين تاريخ بجلي وارا بجلي ڪٽي ويا هيا ۽ ڳوٺاڻن کان لائين مين عبدالقيوم 20000 هزار روپيا بجلي هلائڻ جا گهريا اسان چندو ڪري هن کي 17000 روپيا ڏنا ته به بجلي چالو نه ٿي هنن چيو ته واپڊا وارن کي بجلي چالو ڪرڻ جي شڪايت ڪئي آهي پر ڪوبه عمل نه ٿيو آهي وري لائين مين اسانکي چيو ته سڀ ڳوٺ ملي ڪري 50 هزار ڏيو ايس ڊي او پوءِ راضي ٿيندو هنن چيو ته بجلي نه هجڻ سبب ڳوٺ ولي محمد سولنگي، الف الدين شر، تاج محمد شر ۽ ٻيا ڳوٺ انڌيري ۾ ٻڏي ويا سردي ۾ زندگي جي ڪارونهنوار هلائڻ ۾ تڪليف ٿئي ٿي هنن مطالبو ڪيو ته ڪرپٽ لائن مين ۽ ايس ڊي او پڊعيدن خلاف ڪاروائي ڪري اسانجي بجلي بحال ڪئي وڃي ٻي صورت ۾ گرڊ اڳيان ڌرڻو ڏينداسين.
رهتون ڏيو! پڪاچانگ جي ڪيترن ئي ڳوٺن جي بجلي ڪاٽا، احتجاج
واپڊا عملدارن بجلي هلائڻ لاءِ 20000 هزار رپيا گھريا هئا: ڳوٺاڻا
اسان 17 هزار رپيا گڏ ڪري ڏنا ته به بجلي نه هلي، اختياريون نوٽيس وٺن
سنڌي ادبي سنگت ڏوڪري جون چونڊون، علي بخش پٺاڻ سيڪريٽري چونڊجي ويو
ڏوڪري رپورٽر: (راجا ٻگھيو) سنڌي ادبي سنگت شاخ ڏوڪريءَ جون ساليانيون چونڊون ضلعي رابطا سيڪريٽري ياسر منگي ۽ اليڪشن ڪميٽيءَ جي ميمبرن ڀيڄو فقير ۽ فلڪ ٻٽ جي نگرانيءَ هيٺ ٿي گذريون. چونڊن ۾ جوائنٽ سيڪريٽري لاءِ ڪامران سومرو، آڊيٽر لاءِ مصطفي زهراڻي ۽ خزانچي لاءِ آزاد جروار بنا مقابلي چونڊجي ويا، جڏهن ته سيڪريٽري جي عهدي تي حاڪم منگي ۽ علي بخش پٺاڻ ۽ ڪائونسلر جي عهدي لاءِ انور ڏنگڙائي ۽ آفتاب جتوئيءَ وچ ۾ مقابلو ٿيو. مقابلي بعد علي بخش پٺاڻ 11 ووٽ کڻي سيڪريٽري جي عهدي تي سوڀ ماڻي ۽ آفتاب جتوئي 8 ووٽ کڻي ڪائونسلر جي عهدي تي ڪامياب ٿيو. چونڊن بعد نئين چونڊيل سيڪريٽري علي بخش پٺاڻ ڳالهائيندي چيو ته هن جي هر ممڪن ڪوشش رهندي ته شاخ ڏوڪري پنهنجي ڪارج موجب سنڌي ادب ۽ سماج جي بهتر اڏاوت لاءِ ڪردار ادا ڪندي رهي. چونڊ ڪميٽي جي چيئرمين ۽ ضلعي رابطا سيڪريٽري ياسر منگي ڳالهائيندي چيو ته سنڌي ادبي سنگت شاخ ڏوڪري سنڌ جي انتهائي متحرڪ شاخن مان هڪ آهي ۽ ان جي بهتر ڪارڪردگي تي کيس فخر آهي.
سي پيڪ ڪاميٽي ۾ سنڌ جون وڌيڪ 2 رٿائون پيش ڪيون اٿم: مراد شاھ
سنڌوءَ جي چينلائيزيشن وڏو منصوبو آهي، جنهن سان پاڻي محفوظ ٿيندو ۽ سم ۽ ڪلر تي ضابطو ايندو
چيني اختيارين سنڌ حڪومت جي ڪاوشن جي واکاڻ ڪندي رٿائن کي جي سي سي ڏانهن موڪليو آھي
ڪراچي (اسٽاف رپورٽر) سنڌ وڏي وزير سيد مراد علي شاهه چيو آهي ته سنڌ لاءِ سي پيڪ ۾ سماجي، معاشي ترقيءَ ۽ زراعت جون وڌيڪ ٻه رٿائون شامل ڪيون وينديون ۽ ان سان صوبي جي گڏيل ترقي تي چڱا اثر پوندا. هن اها ڳالهه شهيد ذوالفقار علي ڀٽو يونيورسٽي آف لا (ايس زيڊ بي ايل يو) ڪورنگي ڪئمپس جي ڪانووڪيشن ۾ شرڪت کانپوءِ ميڊيا سان ڳالهائيندي ڪئي، هڪ سوال جي جواب ۾ وڏي وزير چيو ته جوائنٽ ڪوآرڊينيشن ڪميٽي (جي سي سي) سي پيڪ جو هڪ اعليٰ فورم آهي ۽ ڪجهه ڏينهن پهرين چين ۾ ان جي اجلاس ۾ شرڪت ڪئي هئي. هن چيو ته سي پيڪ اٿارٽيز سندن رٿائن واري فهرست ۾ وڌيڪ ٻن شعبن زراعت ۽ سماجي معاشي ترقي شامل ڪيا آهن. هن چيو ته جي سي سي ۾ ٻن رٿائن کي پيش ڪيو ۽ وڏي اميد آهي ته مارچ ۾ لاڳاپيل جوائنٽ ورڪنگ گروپ واري اجلاس ۾ انهن جي منظوري ڏني ويندي. رٿائن جا تفصيل ٻڌائيندي سنڌ جي وڏي وزير چيو ته سنڌو درياهه جي کاٻي پاسي گڊو بئراج کان سکر بئراج تائين 180 ڪلوميٽرن جي چئنلائيزيشن جو هڪ ميگا پروجيڪٽ ڪيو آهي. هن چيو ته اهو هڪ ميگا پروجيڪٽ آهي ۽ صوبائي حڪومت انهن جون سموريون لاڳاپيل فارملٽيز کي مڪمل ڪرڻ تي ڪم ڪري رهي آهي ۽ جوائنٽ ورڪنگ گروپ ذريعي انهن کي سي پيڪ اٿارٽيز کان حتمي منظوريءَ لاءِ موڪليو ويندو. هن چيو ته سنڌوءَ تي چئنلائيزيشن زراعت واري شعبي جي ترقيءَ لاءِ هڪ وڏي رٿا ثابت ٿيندي. هن چيو ته ان سان نه رڳو پاڻي محفوظ ٿيندو پر درياهه جي ٻنهي پاسن تي آباد ضلعن ۾ سم، ڪلر ۽ کاري پاڻيءَ تي ضابطو آڻڻ ۾ مدد ملندي. چئنلائيزيشن ڪري علائقن کي ٻوڏ کان پڻ تحفظ حاصل ٿيندو ۽ ڪچي وارن علائقن ۾ وڏي پئماني تي زرعي زمينن کي ترقي ڏئي سگهبي، سماجي ۽ معاشي شعبي بابت ڳالهائيندي وڏي وزير چيو ته چائنيز اٿارٽيز کي ٻڌايو آهي ته ٿر فائونڊيشن ٿر ۾ تعليم، صحت، سماجي جنگلات ۽ بائيوسيلن ايگريڪلچر لاءِ ڪم ڪري رهي آهي. هن چيو ته چائنيز اٿارٽيز کي چيو آهي ته اهي ٿر فائونڊيشن لاءِ ان رٿا جي منظوري ڏني وڃي ته جيئن ٿر جي علائقي ۾ جتي سي پيڪ رٿائن تحت ڪوئلي مان هلندڙ پاور پلانٽس قائم ڪيا پيا وڃن اهي انهن تي عملدرآمد ڪري سگهن. مراد علي شاهه چيو ته چائنيز اٿارٽيز صوبائي حڪومت جي ڪاوشن جي واکاڻ ڪئي ۽ رٿائن کي جوائنٽ ورڪنگ گروپ ڏانهن موڪلي ڇڏيو، جنهن جو مارچ 2019ع ۾ اجلاس منعقد ٿيندو ۽ مونکي پڪ آهي ته اهي اٿائون منظور ڪيون وينديون. هڪ ٻئي سوال جي جواب ۾ چوڻ هو ته سندس حڪومت صوبائي اسيمبليءَ جي گذريل سيشن دوران اسٽنڊنگ ڪميٽيز مقرر ڪرڻ لاءِ تيار آهي، اهي ڪميٽيون اسيمبليءَ متعين ڪندي آهي ۽ اسان ايندڙ اسيمبليءَ جي سيشن ۾ اهڙيون مقرريون ڪرڻ لاءِ تيار آهي. انهيءَ کان پهرين سنڌ جي وڏي وزير سيد مراد علي شاهه شهيد ذوالفقار علي ڀٽو يونيورسٽي آف لاء جي ڪانووڪيشن کي خطاب ڪندي چيو ته ان يونيورسٽيءَ سان منهنجو تمام گهڻو تعلق آهي ڇاڪاڻ ته اهو ادارو منهنجي عظيم قائد شهيد ذوالفقار علي ڀٽو جي نالي سان لاڳاپيل آهي. 23 پاس آئوٽ لاء گريجوئيٽس کي واڌايون ڏيندي هن چيو ته لاء يونيورسٽيءَ جيڪو سفر شروع ڪيو آهي اهو ڪاميابيءَ واري رستي ڏانهن وڌي رهيو آهي. هن چيو ته اها يونيورسٽي ملڪ جي تاريخ جي پهرين لاء يونيورسٽي آهي ۽ اڄ اها يونيورسٽي مالي طور تي پڻ مستحڪم ادارو آهي. مراد علي شاهه چيو ته هتان کان گريجوئيٽ ٿيندڙ شاگرد سڀاڻي وڪيل ۽ جج ٿيندا. هن چيو ته اسانجي انصاف واري شعبي جي ڪاميابيءَ جو دارومدار گريجوئيٽ ٿيندڙ انهن نوجوانن تي منحصر آهي، هن وڌيڪ چيو ته اها يونيورسٽي جوڊيشل سيڪٽر کي بهترين افرادي قوت مهيا ڪري رهي آهي. هن اميد ظاهر ڪئي ته اڄ جا لاء گريجوئيٽس سندن پروفيشن کي ايمانداري، سچائي ۽ لگن سان اڳتي وڌائيندا. وڏي وزير يونيورسٽي جي وائس چانسلر قاضي خالد کي يقين ڏياريو ته کين فنڊ فراهم ڪيا ويندا ته جيئن يونيورسٽيءَ جو ڪورنگي ۾ واقع تعمير هيٺ ڪئمپس جي عمارت مڪمل ٿي سگهي. انهيءَ بعد وڏي وزير سيد مراد علي شاهه کي شهيد ذوالفقار علي ڀٽو يونيورسٽي آف لاء جي وائس چانسلر ڊاڪٽر قاضي خالد سپاس نامو پيش ڪيو. وڏي وزير سيد مراد علي شاهه ايل ايل ايم ۽ ايل ايل بي پاس آئوٽ ڪندڙ شاگردن کي ڊگريون عطا ڪيو، جن ۾ ايل ايل ايم بيچ 2016ع جي مس عظمت کي سوني جو تمغو، ذوالفقار علي کي چانديءَ جو تمغو، نظام الدين کي پتل جو تمغو ۽ ايل ايل بي بيچ 2015ع جي جهانزيب کي سون ۽ ذڪيا طالب کي چانديءَ جو تمغو حاصل ڪيو.
افغاني زمينون نيلام ڪرڻ لڳا، تاريخي ماڳ ڀنڀور 640 مان رڳو 40 ايڪڙ وڃي بچيو
مختلف جاين تي ليز ڄاڻائي چير ڦاڙ جاري، فرضي نالن سان اسڪيمون هلائڻ جو انڪشاف
لينڊ مافيا جي ڪري ڏچي ۾ آهيون، لڏ پلاڻ تي مجبور ڪيو پيو وڃي: ولي داد بلوچ ۽ گل نواز
ڌاٻيجي(رپورٽ پنهون چانگ) ڌاٻيجي ۽ ان جي آس پاس جي مختلف جاين تي لينڊ مافيا جا ڪارڪن گروپن جي صورت ۾ سرگرم ٿي ويا آهن، جنهن سان تاريخي ماڳ ڀنڀور جو وجود به خطري ۾ پئجي ويو هي. ان سلسلي ۾ مدينا اسٽاپ ڀنڀور بيهار ڪالوني شيخ عبدالمجيد سنڌي ڪالوني غريب آباد ماڪيٽ پمپوز ڪالوني ۽ ٻين مختلف جاين تي قبضا مافيا مختلف نالن تي پلاٽنگ اسڪيم هلائڻ شروع ڪري ڏني آھي بئي طرف اشرف پنجابي محمد بخش ڪيلاڻي ڪوڙيون ليزون جاڻائي جبلن جي چير فاڙ ڪري پلاٽنگ ڪرڻ جو سلسلو بهي جاري آهي.جڏهن ت لينڊ مافيا جي قبضن جي ڪري شھري توڙي ڳوٺاڻن کي تمام گهڻي تڪليف آھي ڳوٺاڻن ۾ ولي داد بلوچ گلنواز ٻٻر مختيار جماري ۽ٻين پنهنجي اخبار سان ڳهالائيندي چيو ت اسان غريبن کي مختلف پارٽين جا نالا وٺي ڌمڪيون ڏيندا آھن آيل پٺاڻ آفغاني مري بلوچ جن جو ڪجه سال پهرين نالو نشان ن هو اڄ زمينن تي ڪبضا ڪري مالڪ جي صورت ۾ زمينون نيلام ڪن ٿا ۽ اسان غريبن کي لڏ پلاڻ ڪرڻ تي مجبور ڪيو پيو وڃي، هنن بورڊ آف ريوينيو ۽ اعلي اختيارن کان مطالبو ڪندي چيو ته لينڊ مافيا گروپ ۽ ڌاٻيجي پوليس خلاف ڪاروائي ڪري آيل افغاني پٺاڻن کي ڪانوني سزا ڏني وڃي.
قبضن کي نه حڪومت ٻنجو ڏنو ۽ نه ئي مقامي انتظاميا اک پٽي
تاريخي ماڳ ڀنڀور قبضا مافيا جي ڪري سوڙهو ٿي ويو آهي. ڀنڀور جي اٽڪل 640 ايڪڙ جي لڳ ڀڳ زمين آھي لينڊ مافيا گروپ جي اچڻ کان پوء باقي 40 ايڪڙ ايراضي رهي آھي. ڪافي وقت کان هلندڙ قبضن تي نه حڪومت ڌيانڏئي ٻنجو ڏنو آهي نه ئي وري مقامي انتظاميا اک کولي آهي.
پوليس اهلڪارن بھ پلاٽ خريد ڪري ڇڏيا
ڀنڀور واسين ولي داد بلوچ گلنواز ٻٻر مختيار جماري ۽ٻين پنهنجي اخبار کي وڌيڪ ٻڌايو ته ڌاٻيجي پوليس لينڊ مافيا سان ٻٽ بڻيل آھي. ڪنهن به قسم جي ڪاروائي ڪرڻ لاء تيار ناهي هنن وڌيڪ ٻڌايو ت ڌاٻيجي پوليس اسٽيشن تي گذريل ٻن سال ۾ جيڪي ايس ايڇ او آيا تن پنهنجي نالي پلاٽ خريد ڪيا آھن.
مڪاني چونڊ:پ پ 31 سيٽن تي سوڀاري: متحدھ 5 سيٽون کڻڻ ۾ ڪامياب: پي ٽي آءِ آئوٽ
پيپلز پارٽي خيرپور ۾ 6،نوابشاهه ۾ 4،ٽنڊي الهيار ۾ 2،گهوٽڪي ۾ 3بدين ۾ ٻن سيٽن تي ڪاميابي ماڻي
متحده حيدرآباد جي ٻن ۽ ميرپورخاص جي ٽن سيٽن تي ڪاميابي ماڻي،5 آزاد اميدوار به ڪامياب ٿيا
ڪراچي(نمائندن وٽان) سنڌ جي مختلف ضلعن جي 65 خالي بلدياتي سيٽن تي ٿيل ننڍي چونڊ جي غير حتمي ۽ غير سرڪاري نتيجن موجب هن وقت تائين 31 سيٽن تي پيپلز پارٽي ڪاميابي ماڻي ورتي آهي،متحده قومي موومينٽ ۽ آزاد اميدوار پنجن پنجن سيٽن سان ٻئي نمبر تي رهيا
سنڌ جي مختلف ضلعن ۾ ضمني مڪاني چونڊون پوريون ٿيڻ بعد غير سرڪاري ۽ غير حتمي نتيجا اچڻ جو سلسلو جاري آهي. حيدرآباد جي مڪاني ادارن جي ٽن سيٽن تي ٿيل ننڍي چونڊ ۾ ٻن سيٽن تي متحده قومي موومينٽ جا اميدوار ڪامياب ٿيا آهن، جڏهن ته هڪڙي سيٽ تي پ پ اميدوار کٽي ويو. ميرپورخاص جي ٽن سيٽن تي متحده ڪاميابي ماڻي، نواب شاهه جي ضلعي ڪائونسل جي سيٽ تي بيٺل شاگردياڻي فرزانه جمالي هارائي وئي، کيس 90 ووٽ مليا، جڏهن ته پنو عاقل ۾ يوسي نوراجا وارڊ نمبر 4 ۾ ڪائونسلر سيٽ تي آزاد اميدوار آدم مهر 365 ووٽ کڻي ڪامياب ٿي ويو. سانگهڙ جي وارڊ نمبر 2 تي پ پ اميدوار اڪرم قريشي 619 ووٽ کڻي ڪاميابي ماڻي، جي ڊي اي اميدوار آفاق قريشي کي 504 ووٽ مليا.
عمرڪوٽ جي يوسي مردان شاهه ۾ ف ليگ جو عازي سمون 1643 ووٽ کڻي ڪامياب ٿي ويو، هن سيٽ تي پ پ جي روشن راهمون کي 1354 ووٽ مليا. سکر جي يوسي 17 نيو پنڊ وارڊ نمبر 4 تي پ پ اميدوار گل محمد 535 ووٽ کڻي ڪاميابي ماڻي، جڏهن ته پي ٽي آءِ جو محمد نعيم هارائي ويو. گهوٽڪي جي يوسي عمر ڊهو ۾ پ پ اميدوار ڄام دلاور لکڻ 1770 ووٽ کڻي ڪامياب ٿي ويو، آزاد اميدوار ارشد لکڻ 739 ووٽ کڻي ٻئي نمبر تي رهيو. ملير جي يوسي ڪاٺوڙ تي پ پ اميدوار دادا ڪريم بلوچ 2735 ووٽ کڻي کٽي ويو، پي ٽي آءِ جو عطاءُ الله 717 ووٽ کڻي سگهيو.
ماتلي جي وارڊ نمبر 7 ۾ پ پ جي عمران ڪشميري 1173 ووٽ کڻي ڪاميابي ماڻي، آزاد اميدوار منير نظاماڻي کي 926 ووٽ مليا. نوشهروفيروز ۾ يوسي ڪوٽ ستابو ۾ مير محمد عالماڻي 1309ووٽ کڻي ڪامياب ٿي ويو، پ پ جي آصف عالماڻي 500 ووٽ مليا. پيرڳوٺ جي يوسي راهوجا ۾ آزاد اميدوار 926 ووٽ کڻي ڪامياب ٿي ويو پ پ اميدوار ڌڻي بخش جاگيراڻي 852 ووٽ کڻي سگهيو. ٺري ميرواهه جي يوسي مانڊڻ وارڊ 2 ۾ آزاد اميدوار امتياز شر 469 ووٽ کڻي ڪامياب ٿي ويو، پ پ جي منور ملاح کي 355 ووٽ مليا.
ملير جي يوسي ڄام مراد علي تي آزاد اميدوار صدام بلوچ 1947 ووٽ کڻي ڪامياب ٿيو آهي جڏهن ته پ پ جي عرفان جوکيو کي 1835 ووٽ مليا. قاضي احمد جي يوسي گهرام مري جي وارڊ نمبر 3 تي پ پ اميدوار نياز حسين مهر 650 ووٽ کڻي ڪاميابي ماڻي. خيرپور جي يوسي اڀڙي وارڊ نمبر 4 تي پ پ جو غلام علي ڪنڌر 531 ووٽ کڻي ڪامياب ٿيو،سندس مخالف اميدوار حنيف تنيو کي 182 ووٽ مليا،ٺٽي جي يوسي ڇتو چنڊ ۾ پ پ جو حيدر شاهه شيرازي 1632 ووٽ کڻي ڪامياب سندس مخالف پي ٽي آءِ جي عظيم بروهي کي 112 ووٽ مليا.
خيرپورجي احمد پور ٽائون ڪميٽي وارڊ نمبر 4 ۾ پ پ اميدوار محمد بخش ميتلو 232 ووٽ کڻي ڪامياب ٿي ويو،خيرپورميرس جي احمد پور ٽائون ڪميٽي وارڊ نمبر 4 ۾ ف ليگ اميدوار سراج احمد کنڀڙو 34 ووٽ کڻي هارائي ويو،خيرپورجي يوسي مانڊڻ وارڊ نمبر 2 ۾ آزاد اميدوار امتياز شر 457 ووٽ کڻي ڪامياب ٿيو، پ پ جي منور ملاح کي 349 ووٽ مليا،ٽائون ڪميٽي ٺيڙهي 1 وارڊ نمبر 3 ۾ آزاد اميدوار عبدالوحيد شيخ 432 ووٽ کڻي ڪامياب ٿي ويو.ٽائون ڪميٽي ٺيڙهي 1 وارڊ نمبر 3 ۾ پ پ اميدوار شاهد شيخ 317 ووٽ کڻي هارائي ويو.ٽائون ڪميٽي ٺيڙهي 2 وارڊ نمبر 1 ۾ آزاد اميدوار حفيظ ڦلپوٽو 317 ووٽ کڻي ڪامياب ٿيو،ٽائون ڪميٽي ٺيڙهي 2 وارڊ نمبر 1 ۾ پ پ اميدوار عبدالغني ڦلپوٽو 292 ووٽ کڻي هارائي ويو،خيرپور جي يوسي هنڊياري وارڊ 3 ۾ پ پ اميدوار نظر شر 590 ووٽ کڻي ڪامياب ٿي ويو،يوسي هنڊياري وارڊ 3 ۾ ف ليگ اميدوار غلام الدين شر 345 ووٽ کڻي هارائي ويو،يوسي گمبٽ وارڊ 11 ف ليگ جو منور ميمڻ 468 ووٽ کڻي ڪامياب، پ پ جي يوسف ميمڻ کي 298 ووٽ مليا،ٽائون ڪميٽي کهڙا جي وارڊ 7 ۾ پ پ اميدوار اسحاق ناريجو 560 ووٽ کڻي ڪامياب ٿيو جڏهن ته ف ليگ اميدوار غوث محمد لاشاري 118 ووٽ کڻي هارائي ويو.
پيرڳوٺ لڳ يوسي راهوجا جي چيئرمين لاءِ ضمني چونڊون ٿي گذريون جنهن ۾ غير سرڪاري ۽ غير حتمي نتيجن موجب آزاد اميدوار مير غلام عباس ٽالپر 926 ووٽ کڻي ڪاميابي ماڻي جڏهن ته پ پ اميدوار ڌڻي بخش جاگيراڻي 852 ووٽ کنيان، ف ليگ جي ڪريم الدين ملڪ ڪل 550 ووٽ کنيان، جڏهن ته ٽائون ڪاميٽي احمدپور جي وارڊ نمبر 4 تي پڻ ضمني چونڊون ٿيون جنهن ۾ پ پ جي محمد بخش ميتلو ۽ 230۽ ف ليگ اميدوار سراج الدين کنڀڙو ڪل 36 ووٽ کڻي سگھيو
حيدرآباد جي مڪاني ادارن جي ٽن سيٽن تي ٿيل ننڍي چونڊ ۾ ٻن سيٽن تي متحده قومي موومينٽ جا اميدوار ڪامياب ٿيا آهن، جڏهن ته هڪڙي سيٽ تي پ پ اميدوار کٽي ويو، اليڪشن ڪميشن جي جاري ڪيل غير حتمي ۽ غيرسرڪاري نتيجن موجب يونين ڪاميٽي نمبر 21 حيدرآباد سٽي جي چيئرمين جي سيٽ تي متحده قومي موومينٽ جو پرويز وسيم 1005 ووٽ کڻي ڪامياب ٿيو آهي، آزاد اميدوار محمد امتياز عالم 441 ووٽ کڻي ٻئي نمبر تي رهيو، هن سيٽ تي پ پ جي محمد بلاول سهتو صرف 21 ووٽ حاصل ڪيا، يونين ڪامٽي 53 تي چيئرمين جي سيٽ تي ٿيل ننڍي چونڊ ۾ پ پ جي اميدوار سيد سجاد علي شاه 1340 ووٽ کڻي، ڪامياب ٿيو آهي، هن سيٽ تي ايم ڪيو ايم جي جهانگير ڪاڪا کي 705 ووٽ مليا، آزاد اميدوار عبدالرحيم 270 ووٽ کڻي ٽيئن نمبر تي، پي ٽي آءِ جو ولي محمد 213 ووٽ کڻي چوٿين نمبر تي رهيو، يونين ڪاميٽي 87 جي وارڊ هڪ تي جنرل ڪائونسلر جي سيٽ تي ايم ڪيو ايم جو شعيب الحسن 230 ووٽ کڻي ڪامياب ٿيو آهي، هن سيٽ تي پ پ جي عنايت علي خان کي 106 ووٽ مليا، جڏهن ته آزاد اميدوار نور علي هڪ ووٽ به حاصل نه ڪري سگهيو. ننڍي چونڊ جي لاءِ مجموعي طور 10 پولنگ اسٽيشنون قائم ڪري، سيڪيورٽي جا انتظام انتهائي سخت ڪيا ويا.
اليڪشن ڪميشن طرفان خيرپور جي ڊسٽرڪٽ ڪائونسل ۽ مختلف وارڊن جي بنا مقابلي پيپلزپارٽي جي ڇهه اميدوارن کي ڪامياب قرار ڏنو ويو. جيڪي اميدوار بنا مقابلي ڪامياب قرار ڏنا ويا آهن انهن ۾ تعلقه ٺري ميرواهه جي يونين ڪائونسل تلي تان ڊسٽرڪٽ ڪائونسل جي خالي ٿيل ميمبر واري سيٽ تي پيپلزپارٽي جو فرزند علي شر بنا مقابلي ڪامياب قرار ڏنل آهي. جڏهن ته يونين ڪائونسل مانڊڻ تان پڻ پيپلزپارٽي جو اميدوار فدا حسين دستي پڻ بنا مقابلي ڪامياب قرار ڏنل آهي. تعلقه ڪوٽڏيجي جي يونين ڪائونسل جسڪاڻي تان پيپلزپارٽي جو اميدوار نعيم رضا وساڻ ڊسٽرڪٽ ڪائونسل جي خالي ٿيل سيٽ تان بنا مقابلي ڪامياب قرار ڏنل آهي. ان کان علاوه يوسي ڪنب جي وارڊ نمبر 01 تان خالي ٿيل جنرل ڪائونسلر جي سيٽ تي پيپلزپارٽي جو اميدوار احمد نواز سولنگي جڏهن ته يوسي پير حيات شاهه جي وارڊ نمبر چار جي خالي ٿيل سيٽ تي سليم علي بهليم جيڪو پڻ پپيلزپارٽي جو اميدوار هو پڻ بنا مقابلي ڪامياب قرار ڏنل آهي. ان کان علاوه يوسي ٻيلهاڙو ۾ ضلعي ڪائونسل جي خالي ٿيل سيٽ تي پيپلزپارٽي جو وليداد کهڙو جيڪو پڻ پيپلزپارٽي جو نامزد اميدوار هو پڻ اليڪشن ڪميشن طرفان بنا مقابلي ڪامياب قرار ڏنل آهي.
هوڏانهن غير سرڪاري ۽ غير حتمي نتيجن موجب احمدپور جي ٽائون ڪميٽي وارڊ 04 جي خالي ٿيل سيٽ تي پيپلزپارٽي جو اميدوار محمد بخش ميتلو 232 ووٽ کڻي ڪامياب ٿي ويو جڏهن ته سندس مقابلي ۾ مسلم ليگ فنڪشنل جو اميدوار سراج احمد کنڀڙو 34 ووٽ کڻي سگهيو. يوسي مانڊڻ وارڊ 02 لاءِ جنرل ڪائونسلر جي سيٽ تي آزاد اميدوار امتياز شر 457 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار منور علي ملاح صرف 349 ووٽ کڻي سگهيو. ٽائون ڪميٽي ٺيڙهي ون جي وارڊ 03 لاءِ جنرل ڪائونسلر جي سيٽ تي آزاد اميدوار عبدالوحيد شيخ 432 ووٽ کڻي ڪاميابي حاصل ڪئي جڏهن ته سندس مقابلي ۾ پ پ اميدوار شاهد شيخ فقط 363 ووٽ کڻي سگهيو. ٽائون ڪميٽي ٺيڙهي 02 جي وارڊ 01 لاءِ جنرل ڪائونسلر جي سيٽ تي آزاد اميدوار عبدالحفيظ ڦلپوٽو 317 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار عبدالغني ڦلپوٽو 292 ووٽ کڻي سگهيو. يوسي هنڊياري جي وارڊ 03 لاءِ جنرل ڪائونسلر جي سيٽ تي پ پ اميدوار نظر شر 590 ووٽ کڻي ڪامياب ٿي ويو جڏهن ته مسلم ليگ فنڪشنل اميدوار غلام الدين شر فقط 345 ووٽ کڻي سگهيو. يوسي گمبٽ جي وارڊ نمبر 11 لاءِ جنرل ڪائونسلر جي سيٽ تي مسلم ليگ فنڪشنل اميدوار منور ميمڻ 468 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار يوسف ميمڻ فقط 298 ووٽ کڻي سگهيو. يوسي اڀڙي جي وارڊ 04 لاءِ جنرل ڪائونسلر جي سيٽ تي پ پ اميدوار غلام علي ڪنڌر 528 ووٽ کڻي ڪامياب ٿي ويو جڏهن ته آزاد اميدوار محمد حنيف تنيو فقط 182 ووٽ کڻي سگهيو. ٽائون ڪميٽي کهڙا جي وارڊ 07 لاءِ جنرل ڪائونسلر جي سيٽ تي پ پ اميدوار اسحاق ناريجو 560 ووٽ کڻي ڪامياب ٿي ويو جڏهن ته مسلم ليگ فنڪشل اميدوار غوث محمد لاشاري فقط 118 ووٽ کڻي سگهيو.
يوسي راهوجا جي چيئرمين واري سيٽ تي آزاد اميدوار مير غلام عباس ٽالپور 926 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار 849 ووٽ کنيا جڏهن ته ف ليگ اميدوار ڪريم ملڪ 530 ووٽ کڻي سگهيو. ياد رهي ته ضلع ڪائونسل جي چار سيٽن، چار ٽائون ڪميٽين جي سيٽن، پنجن يونين ڪائونسلن جي سيٽن، ڇهه ميونسپل ڪميٽي، هڪ يوسي چيئرمين سميت ٽوٽل سورنهن خالي ٿيل سيٽن تي ضمني چونڊ ٿي جنهن ۾ 6 اميدوارن کي اليڪشن ڪميشن طرفان بنا مقابلي ڪامياب قرار ڏنو ويو آهي جڏهن ته رهيل 10 سيٽن تي فنڪشنل مسلم ليگ، پيپلزپارٽي ۽ آزاد اميدوارن وچ ۾ مقابلا ٿيا.
ميرپور خاص جي ميرپور خاص جي ٽن سيٽن تي متحده اميدوار ڪامياب ٿيا،وارڊ نمبر 6 تي متحده اميدوار رئيس الدين 451 ووٽ کڻي ڪامياب، پ پ جي اشتياق بيگ کي 331 ووٽ مليا،وارڊ 39 ۾ متحده اميدوار جنيد قريشي 690 ووٽ کڻي ڪامياب، پ پ جي جاويد پنهور کي 68 ووٽ مليا،وارڊ 23 تي متحده اميدوار محمد عمران 496 ووٽ کڻي ڪامياب، پ پ اميدوار نعيم بابا کي 291 ووٽ مليا.
نواب شاهه جي يوسي گهرام مري وارڊ 3 ۾ پ پ جو نياز مهر 615 ووٽ کڻي ڪامياب، ايس يو پي جي موسيٰ جوڻو کي 272 ووٽ مليا،يوسي نصير ڍانڍو وارڊ 107 تي پ پ جو واحد بخش ۽ يوسي کنڀڙا وارڊ 37 تي پ پ جو نور احمد ڀارو بنا مقابلي ڪامياب ٿيو،يوسي پٽڻي 15 ۾ پ پ جو امتياز ڇڄڻ 2499 ووٽ کڻي ڪامياب ٿيو، جي ڊي اي اميدوار اصغر ڇڄڻ کي 1667 ووٽ مليا
عمرڪوٽ ضلعي جي يونين ڪائونسل شاھ مردان شاھ ۾ چيئرمين جي سيٽ تي چونڊ ۾ غير سرڪاري ۽ غير حتمي نتيجن ۾ فنڪشنل ليگ اميدوار غازي خان سمون 1667 ووٽ کڻي ڪامياب ٿي ويو آھي، جڏھن تہ مخالف پ پ اميدوار روشن الدين راھمون 1303 ووٽ حاصل ڪيائين جڏھن ته ف ليگ اميدوار جي ڪاميابي کي پ پ اميدوار نتيجن کي ڌانڌلي قرار ڏيندي رد ڪري ڇڏيو آھي ۽ پريس ڪلب عمرڪوٽ تي ھنگامي ڪانفرنس ڪندي شاه مردان شاه يوسي چئيرمين پ پ اميدوار روشن راهمون, وڪيل شوڪت راهمون, پ پ يوٿ ونگ سنڌ جي جنرل سڪريٽري اعظم نوحاڻي, غلام حسين آريسر, نورجهان ڳيلهڙو, گلزاره سمون ۽ ٻين چيو ته پولنگ اسٽيشن مٺو راڄڙ ۽ پولنگ اسٽيشن ترڪو منڱريو تي اسان جي پولنگ ايجنٽ عورتن سان گار گند ڪئي وئي انهن کي ڌڪا ڏئي ووٽن جي ڳڻپ وقت پولنگ کان ٻاهر ڪڍيو سرعام ڌانڌلي ڪئي وئي ، هنن مطالبو ڪندي چيو ته ٻيهر آر او آفيس ۾ صاف شفاف ڳڻپ ڪرائي وڃي ٻئي صورت ۾ اسان عدالت ۾ درخواست داخل ڪنداسين ،ووٽنگ دوران ڳوٺ مٺو ٺاراڻي ۾ پ پ جا ووٽر روڪڻ تي جھيڙو پڻ ٿيو پوليس پاران 3 ڄڻا گرفتار ڪيا ويا.
لوئي يوسي جي چيئرمن واري سيٽ تي ننڊي چونڊ ۾ ارباب لطف الله حامي پ پ پ اميدوار غلام نبي لنڊ غير حتمي ۽ غير سرڪاري نتيجن موجب 2790 ووٽ کڻي ڪامياب ٿي ويو،سندس مقابلي ۾ ارباب گروپ ۽ پ پ پ اڳواڻ محمد خان لنڊ جو گڏيل حمايت يافته آزاد اميدوار الهجهڙيو لنڊ 2350 ووٽ کڻي هارائي ويو. ڪامياب ٿيل پ پ پ اميدوار ايم پي اي ارباب لطف الله جو حامي ۽ هارايل اميدوار کي ارباب گروپ ۽ پ پ پ جي ناراض اڳواڻ محمد خان لنڊ جي حمايت حاصل هئي.
بدين جي ٻن تعلقن ۾ به يو سي چيئرمين ۽ جنرل ڪائونسلر جي هڪ هڪ سيٽ لاء غير سرڪاي نتيجن موجب ٻنهي سيٽن تي پ پ پ جي اميدوارن ڪاميابي ماڻي ورتي ماتلي جي وارڊ ست تي جنرل ڪائونسلر جي سيٽ لاء پ پ پ عمران ڪشميري 1173 ووٽ کڻي ڪاميابي ماڻي جڏهن ته سندس مقابلو ڪندڙ آزاد اميدوار منيراحمد نظاماڻي 926 ۽ پي ٽي آئي اميدوار محمد ڪمبوه 150 ووٽ کنيا ،ٽنڊي باگي جي يوسي خان بهادر مير غلام محمد ٽالپر جي سيٽ تي پ پ پ جي اميدوار علي احمد نظاماڻي 3100 ووٽ کڻي ڪاميابي ماڻي سندس مقابلي ۾ بيٺل جي ڊي اي اميدوار قاري موسى زنگيجو 776 ووٽ حاصل ڪري هارائي ويو.
ٽنڊ الهيارضلعي بلدياتي اليڪشن ۾ خالي ٿيل ٽن سيٽن نصرپور ٽائون ڪميٽي جي وارڊ 6 يوسي راوت لغاري ۽ ڊاسوڙي جي وارڊ 4 تي ضمني اليڪشن ٿي جنهن ۾ ٽنهي سيٽن تي پ پ جا اميدوار سوڀارا ٿيا.نصرپور جي وارڊ 6 جي جنرل ڪائونسلر جي سيٽ تي پ پ جي سيد سجاد شاه ۽ آزاد اميدوار وحيد پليجو وچ ۾ مقابلو ٿيو ، پ پ جي سيد سجاد شاه 717 ووٽ کڻي ڪامياب ٿيو ۽ آزاد اميدوار بيٺل وحيد پليجو 55 ووٽ کڻي سگهيو،يوسي راوت لغاري ۾ ضلعي ڪائونسل جي سيٽ تي پ پ جي هاشم نونداڻي ۽ آزاد اميدوار محمد خان جلباڻي جو وچ ۾ مقابلو ٿيو،پ پ جو اميدوار 3831 ووٽ کڻي ڪامياب ٿي ويو ۽ آزاد اميدوار 1661 ووٽ کڻي سگهيو ، ڊاسوڙي جي وارڊ 4 تان پ پ جو اميدوار خليل بلوچ بنا مقابلي ڪامياب ٿي ويو پ پ جي ڪاميابي بعد نصرپور ۾ سيد سجاد شاه حامين پاران ريلي ڪڍي مٺايون ورهايون ويون.
سکر ۾ بلدياتي ضمني چونڊ ۾ ٻن سيٽن تي پ پ اميدوار ڪامياب۔هڪ سيٽ تي پ پ اميدوار کي آزاد اميدوار هٿان شڪست۔ ان ڏس ۾ مليل ڄاڻ موجب سکر جي يونين ڪاميٽي 17 نيوپنڊ جي وارڊ نمبر 4 جنرل ڪائونسلر جي سيٽ تي پيپلز پارٽي جو اميدوار گل محمد خان 535 ووٽ کڻي ڪامياب ٿي ويو ، تحريڪ انصاف جو اميدوار محمد نعيم خان 401 ووٽ کنيا ، يونين ڪائونسل پٽڻي جي سيٽ تي پ پ اميدوار اعجاز ڇڃڻ غيرحتمي غيرسرڪاري نتيجن موجب 2513 ووٽ کڻي ڪامياب ٿي ويو آهي جڏهن ته آزاد اميدوار اصغر علي 2099 ووٽ کنيا، يوسي نوراجا جي ڪائونسلر جي سيٽ تي سنڌ ۾ حڪومت ڪندڙ پ پ جي اميدوار عبدالحق مهر 221 ووٽ کڻي سگهيو جڏهن ته آزاد اميدوار آزاد خان 393 ووٽ کڻي ڪامياب ٿيو آهي، لوڪل گورنمينٽ ڊپارٽمينٽ سکر جي ڊپٽي ڊائريڪٽر ۽ رٽرننگ آفيسر يار محمد جوڻيجو پاران هڪ نوٽيفڪيشن جاري ڪندي ڊسٽرڪٽ ڪائونسل جي ميمبر جي لاءِ خالي ٿيل يوسي گهمرا جي سيٽ تي برهان ولد الهوسايو گهمرو بنا مقابلي ڪامياب قرار ڏنو هو، جڏهن ته سکر ميونسپل ڪارپوريشن جي ٻن يونين ڪاميٽين جي وارڊن يوسي پير الاهي بخش جي وارڊ نمبر هڪ تي الطاف حسين ۽ يوسي غريب آباد جي وارڊ نمبر 3 محمد عثمان جنرل ڪائونسلر طور بنامقابلي ڪامياب ٿي چڪا آهن۔
گهوٽڪي جي ٽن سيٽن تي چونڊ ۾ ٽيئي سيٽون پيپلز پارٽي کٽي ورتيون،نوشهرو فيروز جي يوسي ستابو جي جنرل ڪائونسلر جي سيٽ تي آزاد اميدوار ۽ ٽائون ڪميٽي هالاڻي جي سيٽ تي پ پ اميدوار شاهد گاڏهي ڪاميابي ماڻي
سام سنگ 5 جِي سمارٽ فون جون تصويرون ۽ فيچرز ليڪ ٿي ويا
واشنگٽن (ٽيڪ نيوز) سام سنگ جي پهرين فائيو جِي سمارٽ فون بيونڊ ايڪس جو تصويرون ليڪ ٿي ويون . آمريڪي رسالي فوربس موجب مختلف سمارٽ فونز ڪمپنين جي ڄاڻ ليڪ ڪندڙ ٽوئيٽر صارف آئس يونيورس سام سنگ جي فليگ شپ گليڪسي ايس 1 بيونڊ ايڪس جي موجودگي جي تصديق سان گڏ تصويرون، فيچرز ۽ دستيابي بابت به ٻڌايو.
ليڪ ٿيل تصويرن ۽ ڄاڻ موجب سام سنگ جي سمارٽ فون فائيو جِي ماڊل 6.7 انچ جي اسڪرين ۽ 4 بيڪ ڪميرائن سان گڏ هوندو. ان سان هي پهريون فائيو جِي سام سنگ فون هوندو، جيڪو امڪاني طور واحد گليڪسي ايس 10 ماڊل هوندو، جنهن ۾ نيڪسٽ جنريشن ٽيڪنالاجي ڏني ويندي.
ڏيپلي ۾ رليف راشن نه ملڻ خلاف ڳوٺاڻن جو مظاهرو
صحت ۽ روينيو کاتي جا آفيسر من پسندن کي نوازي رهيا آهن: آنٻو ڀيل ۽ ٻيا
اسان جا نالا ئي لسٽن ۾ شامل نٿا ڪيا وڃن، پنهنجا نوازي خلاف ڪارروائي ڪئي وڃي
ڏيپلو( رپورٽ: نريش موراڻي) تعلقه ڏيپلو شھر سميت ٻھراڙي جي علائقن ۾ ڳورھارين عورتن لاء سنڌ سرڪار پاران ڏنل رليف راشن بيگ نه ملڻ خلاف ڳوٺ سومڻھار جي آنٻو ڀيل ـ ماوو جي ڪولھي ـ گورڌن ولاسائي ـ سڀاش چندر ۽ ٻين پريس ڪلب ڏيپلو اڳيان احتجاج ڪندي چيو ته صحت کاتو ۽ روينيو جا آفيسر ملي ڀڳت ڪري من پسند ماڻهن جا نالا لکي لسٽون ٺاھي سامان ڏئي رھيا آھن جڏهن ته ڏيپلو شھر سميت ٻھراڙي ۾ اھڙين عورتن جا نالا لکيا ويا آهن جنهن ۾ ڪافي عورتن ٻار بند جو آپريشن ڪرائي ڇڏيو آهي ڪافي عورتن جا 6 کان 8 سال جا ٻار آهن انھي کان علاوه لسٽن ۾ ڪارڊ نمبر به غلط لکيا ويا آهن جنهن جا نالا ملن ٿا ته ڪارڊ نمبر نٿا ملن اسان اسسٽنٽ مختيارڪار شنڪر لال ـ تعلقه ڏيپلو جو فوڪل پرسن ڊاڪٽر فضل الرحمان سان ملي شڪايت ڪئي ليڪن انهن جواب ڏنو ته اسان کي خبر نه آهي جيڪي نالا آهن انهن کي سامان ملي پيو ـ اھڙي من پسند رليف راشن بيگ جي ورھاست ۾ من پسندن کي نوازڻ ۽ غريبن کي نظر انداز ڪري رليف نه ڏيڻ سراسر ظلم آهي اسان اعلي اختيارن کي اپيل ٿا ڪريون ته سموري ٿر ۾ اسان کي نظر انداز ڪرڻ بدران اسان حقدارن کي حق ڏنو وڃي.
ڏهرڪي جي پوليس اهلڪار پاران پورهيت سان مبينا تذليل، احتجاج
اي ايس رحيم منگي ٿاڻي تي گھرائي اهلڪار کان تذليل ڪرائي: فيض منگي
منهنجو معذور پٽ زاهد منگي صدمي ۾ فوت ٿيو آهي، انصاف ڪيو وڃي
ڏھرڪي (رپورٽ: اعظم سهرياڻي) ڏهرڪي ڀرسان ڳوٺ نورحسن شاهه ۾ پراسرار بيماري ۾ فوت ٿيل نينگر زاهد منگي جي وارثن احتجاج ڪندي نينگر جي والد فيض منگي الزام هڻندي چيو آھي ته ڳوٺ جو بااثر پوليس جي اي ايس آء رحيم منگي چار ڏينهن اڳ منهنجي زمين تي قبضي ڪرڻ لاء منهنجي گهر تي بلاجواز پوليس جي چڙهائي ڪرائي ۽ رحيم منگي مون کي ٿاڻي ۾ پوليس اهلڪار کان منهن ۾ پيشاب ڪرايو هن چيو ته مون کي پوليس اهلڪار جو نالو ناهي ايندو پر اهو رهڙڪي جو رهواسي آھي جنهن منهنجي تذليل ڪئي، هن چيو ته منهنجو معذور پٽ صدمي ۾ فوت ٿيو آھي جنهن جو ڪيس اي ايس آء رحيم منگي مٿان داخل ڪيو وڃي,هوڏانهن الزام هيٺ آيل اي ايس آء رحيم منگي چيو ته فيض منگي جي ڀائرن تي ڪيس داخل آھي اسان جو ڪارنهن تڪرار تان معاملو هلندڙ آھي الزام بي بنياد آھن .
ٽنڊو محمد خان پوليس پاران چرس سميت ڏوهاري گرفتار ڪرڻ جي دعويٰ
بلڙي شاھ ڪريم (رپورٽ: محمد ظھير) ايس ايس پي ٽنڊو محمد خان ذوالفقار علي ٽالپر جي حڪم تي منشيات خلاف ڪاروايون جاري بلڙي شاھ ڪريم پوليس جي ايس ايڇ او شوڪت مڱريو ھڪ خفيا اطلاع تي ڪاروائي ڪندي بشير احمد گھٽڪو کي 1050 گرام چرس سميت گرفتار ڪرڻ جي دعوا ڪئي آهي جڏھن ته ٻي پاسي شيخ ڀرڪيو پوليس ڪاروائي دوران علي محمد خشڪ ۽ عبدالجبار ملاح کي گرفتار ڪري وٽان مين پڙيون گٽڪا ۽ ڪچو شراب برآمد ڪرڻ جي دعوا ڪئي آهي ھوڏانھن ڏندو ٿاڻي جي پوليس به منشيات خلاف ڪاروائي ڪندي گل محمد دل کي گرفتار ڪري سندس قبضي مان 450 مين پڙيون ھٿ ڪري ورتيون آهن جڏھن ته پوليس جون منشيات خلاف ڪاروائي کان پوء منشيات فروشن ۾ خوف ۽ حراس پکڙجي ويو آهي جڏھن ته منشيات سميت گرفتار منشيات فروشن خلاف منشيات ايڪٽ تحت الڳ الڳ ڪيس داخل ڪري جيل موڪليو ويو آهي . هوڏانهن ايس ايس پي ٽنڊو محمد خان ذولفقار علي ٽالپر پاران ضلعي ٽنڊي محمد خان جي سمورن ٿاڻن جي ايس ايڇ اوز کي سٺي ڪارگردگي ڏيکارڻ تي انعام جو اعلان ڪيو ويو هي.
نواز-زرداري لاءِ اڄ ڳرو ڏينهن: سموريون نظرون عدالتن تي کتل
ميان نوازشريف فيصلو ٻڌڻ لاءِ احتساب ڪورٽ ويندو، سپريم ڪورٽ ۾ آصف زرداري پيش نه ٿيندو: وڪيل
اسلام آباد (بيورو رپورٽ) نوازشريف ۽ زرداري لاءِ اڄ ڳرو ڏينهن، فيصلا ڪهڙا ايندا؟ سموريون نظرون عدالتن تي کُتل، اڳوڻو وزير اعظم ميان نواز شريف آزاد هوندو يا ٻيهر جيل حوالي ٿيندو بابت فيصلو سڀاڻي ٿيندو. اڳوڻي وزيراعظم ميان نواز شريف خلاف العزيزيه ۽ فليگ شپ ريفرنس جو محفوظ فيصلو احتساب عدالت سڀاڻي ٻڌائيندي. نواز شريف پاران فيصلو ٻڌڻ لاءِ احتساب عدالت وڃڻ جو فيصلو. سيڪيورٽي جا انتظام سخت. تفصيل موجب اڳوڻي وزيراعظم ميان نواز شريف خلاف العزيزيه ۽ فليگ شپ ريفرنس جو محفوظ ٿيل فيصلو احتساب عدالت جو جج ارشد ملڪ سڀاڻي ٻڌائيندو. اڳوڻي وزير اعظم ميان نواز شريف احتساب عدالت طرفان محفوظ ڪيل فيصلو ٻڌڻ لاءِ احتساب عدالت وڃڻ جو فيصلو ڪيو آهي. ميان نواز شريف سڀاڻي پنهنجي ڪوھ مري ۾ قائم رهائشگاھ کان فيصلو ٻڌڻ لاءِ عدالت پهچندو. العزيزيه ريفرنس ۾ 22 ۽ فليگ شپ ريفرنس ۾ 16 شاهدن جون شاهديون قلمبند ڪيون ويون. احتساب عدالت ۾ نواز شريف خلاف ريفرنسز ۾ مجموعي طور تي 183 ٻڌڻيون ٿيون. ميان نواز شريف جن مان 130 ٻڌڻين دوران احتساب عدالت ۾ پيش ٿيو، جن ۾ 70 ڀيرا احتساب عدالت جي جج محمد بشير ۽ 60 ڀيرا احتساب عدالت جي جج ارشد ملڪ اڳيان پيش ٿيو. احتساب عدالت جي سيڪيورٽي سخت ڪئي وئي آهي. هڪ هزار کان وڌيڪ اهلڪار مقرر ڪيا ويا آهن، جڏهن ته اڳوڻي وزيراعظم وڪيلن سوڌو مسلم ليگ (ن) جي ڪل پندرنهن اڳواڻن کي فيصلو ٻڌڻ لاءِ عدالت ۾ وڃڻ جي اجازت ملندي، ذريعن موجب هنگامي حالتن کي منهن ڏيڻ لاءِ رينجرس کي مقرر ڪرڻ جو فيصلو ڪيو ويو آهي، سپريم ڪورٽ ۾ مني لانڊرنگ ڪيس جي ٻڌڻي سڀاڻي ٿيندي، جي آءِ ٽي رپورٽ پڌري ٿيڻ جو امڪان آهي، چيف جسٽس پاڪستان جسٽس ثاقب نثار جي سربراهي ۾ سپريم ڪورٽ جي ٽي رڪني بينچ مني لانڊرنگ ڪيس جي لاهور رجسٽري ۾ سڀاڻي ٻڌڻي ڪندي، اڳوڻو صدر آصف علي زرداري سڀاڻي عدالت ۾ پيش نه ٿيندو، سندس قانوني ٽيم پيش ٿيندي، جنهن ۾ فاروق ايڇ نائيڪ، سردار لطيف کوسا ۽ ٻيا شامل آهن، ڪيس جي جاچ ڪندڙ جي آءِ ٽي پنهنجي رپورٽ سپريم ڪورٽ ۾ جمع ڪرائي چڪي آهي، جيڪا امڪان ظاهر ڪيو پيو وڃي ته عدالت ڌرين حوالي ڪندي، لطيف کوسا جو چوڻ آهي ته رپورٽ جو جائزو وٺڻ کانپوءِ پنهنجي قانون حڪمت عملي جوڙينداسين، سپريم ڪورٽ ۾ سڀاڻي ڇا ٿيندو، ان بابت ڪجهه نٿو چئي سگهجي، ٿيندو ته ايئن آهي ته رپورٽ ڌرين کي ڏئي نئين تاريخ ڏني ويندي آهي.
پي ٽي آئي بدين ۽ ٺٽي پاران ڪرپشن خلاف مهم جي ڀرپور حمايت
احتساب سان ملڪ مان ڪرپٽ مافيه جو خاتمو ضرور ايندو: بشير سوڍل ۽ ٻيا
عمران خان جي صلاحيتن سبب ملڪ تيزي سان ترقي ڪري رهيو آهي
بدين( ڊ ر) پاڪستان تحرڪ انصاف ضلع بدين ۽ ٺٽه ضلع جي ورڪرز ڪنوينشن ميمڻ ڪميونٽي هال ۾ ٿيو جنهن کي خطاب ڪندي پي ٽي آئي سنڌ جي جوائنٽ سيڪريٽري بشير احمد سوڍل عمران اسماعيل علوي يوٿ ونگ جي اڳوڻي صوبائي صدر سڪندر علي لاشاري بدين ضلع جي صدر سردار زبير فضلي جنرل سيڪريٽري ڊاڪٽر محمود شيخ ليڊز ونگ بدين جي اڳواڻ نسرين انصاري سعيده پروين چيو ته ماضي جي حڪمرانن پنهنجي ڪرپشن ذريعي ملڪي ادارن کي تباه ڪري ڇڏيو آهي پارٽي چيئرمين وزير اعظم عمران خان طرفان ملڪ ۾ ڪرپشن خلاف کينل قدمن ۽ شروع ڪيل احتساب سان ملڪ مان ڪرپٽ مافيه جو خاتمو ضرور ايندو . ملڪ مان لٽيل ناڻو واپس آندو ويندو هنن چيو ته وزير اعظم عمران خان جي قائدانه صلاحيتن جي ڪري ملڪ تيزي سان ترقي ڪري رهيو آهي موجوده حڪومت جي 100 ڏينهن جي ڪارڪردگي شاندار رهي آهي هنن دعويٰ ڪئي ته ملڪ ۾ ڊالر جي قيمت ۽ عام واهپي جي شين ۾ اضافو عارضي آهي. ان موقعي تي يوٿ ونگ ضلع بدين جي صدر سيد شيرل شاه ليبر ونگ بدين جي صدر احمد خان ملاح اصغر علي مغل ۽ ٻين پڻ خطاب ڪيو
شيخ اياز جي شاعري سنڌ جي دردن ۽ داستانن سان ڀريل آهي: ڏات ڌڻي
حيدرآباد ۾ شيخ اياز ميلي جو ٽيون ڏينهن، مختلف سيشن، لوڪ فنڪارن پاران سرن جي ورکا
حيدرآباد(بيورو روپورٽ) ناميارن اديبن، شاعرن، ليکڪن ۽ سڄاڻ ڌرين چيو آهي ته شيخ اياز وڏو تخليقڪار هو، سندس شاعري ۾ جتي سنڌ جي سونهن ۽ سونڀيا جا رنگ ملن ٿا، اتي ئي سندس شاعري ۾ ڌرتي جو درد ۽ تڪليفون به نمايان نظر اچن ٿيون. اهڙو اظهار هنن خانا بدوش رائيٽرس ڪيفي ۽ شيخ اياز ميلا ڪاميٽي پاران شيخ اياز جي چوٿين ميلي جي ٽي ڏينهن تي ٿيل فڪري ويهڪن ۾ ڪيو. جڏهن ته ميلي ۾ شيخ اياز جي شاعري ۾عورت جي تصور جي موضوع هيٺ سيشن ٿيا، جنهن ۾ عورتن جي وڏي انگ شرڪت ڪئي. لوڪ گيتن بابت سيشن ۾ ڳالهائيندي نامياري شاعر جمن دربدر خطاب ڪندي چيو ته ٿر جي لوڪ ادب ۽ شاعري ۾ رڳو وڇوڙو ۽ درد سمايل آهي، پر شيخ اياز ٿر جي حوالي سان پنهنجي شاعري کي نوان رخ ڏنا. نامياري شاعر سرمد چانڊيو چيو ته سنڌي ادب ۾ انتهائي ذميواري سان ڪم ڪري ادب جي وڏي خدمت ڪري سگهجي ٿي، شيخ اياز اسان وٽ جيڪو سرمايو ڇڏيو آهي، اسان ان کي سمجهي نه سگهيا آهيون، هو آفاقي شاعر آهي، هن جي معيار ۽ قد ڪاٺ ماپڻ جو اسان وٽ اڃا تائين ڪو معيار ناهي. هن چيو ته لطيف تي به اڃا اهو ڪم ناهي ٿيو، جيڪو ٿيڻ گهرجي، براڊ ڪاسٽر اينڊ شاعر مختيار ملڪ چيو ته اياز جي لوڪ گيتن ۾ ڀرپور رواني رکيل آهي، لوڪ گيت اندر جو آواز ٿين ٿا، انهن ۾ خوشين ۽ دردن جو پيغام لڪيل هجي ٿو. ڀارو مل امراڻي چيو ته شيخ اياز پنهنجي تخليقي ڏات سان ٿر کي سرسبز ۽ شاداب بنائي ويو آهي. هن چيو ته ٿر جي ماڻهن ۾ لوڪ ادب سمايل آهي ۽ کين لوڪ گيت برزبان ياد رهن ٿا. ماڊيٽر ذڪيا اعجاز چيو ته اياز جي شاعري ۾ باغي عورت جو خوبصورت تصور سمايل آهي، اياز جي ماروي مضبوط لڳي ٿي، سندس مومل ۽ ليلي وٽ پڇتاءُ ناهي. امر پيرزادي چيو ته اسان وٽ شوقين فيمنسٽ هوندا آهن، پر اياز ماڊرن ۽ پورهيت عورتن تي به لکيو، شيخ اياز، عطيه دائود جي شاعري تي تبصرو ڪندي چيو هو ته ان کي برصغير جي سڄي فيمسزم کان مٿانهن شاعري قرار ڏنو هو، نامياري شاعره رخسانا پريت چنڙ چيو ته اياز انقلابي شاعر هو ۽ هن هڪ بهادر شاعر طور عورت جو ذڪر پنهنجي شاعري ۾ ڪيو آهي. تنوير انجم چيو ته اڳ فمينسٽ طور شاعرن کي پرکيو ويندو هو، جڏهن ته شيخ اياز جي شاعري ۾ آفاقيت آهي، فاطمه حسين چيو ته اياز خوبصورت تخليقڪار آهي.
باڊهه پوليس پاران ٻه اشتهاري ڏوهاري گرتار ڪرڻ جي دعويٰ
سنيپ چيڪنگ دوراان اشتهاري ڏوهاري لالو گاڏهي ۽ علي احمد ککراڻي گرفتار ڪيو: پوليس
گرفتار جوابدار نصير آبد، وڳڻ ۽ ڏيرا سميت مختلف ٿاڻن تي 10 کان وڌيڪ قتل ۽ ٻين ڪيسن ۾ گھربل هئا
باڊهه ( رپورٽ: وحيد ڳاهو ) باڊھ پوليس پاران باڊھ، نصيرآباد روڊ تي سنيپ چيڪنگ دوران ٻن اشتهاري ڏوهارين لال بخش عرف لالو گاڏھي ۽ علي احمد ککراڻي کي هٿيارن سميت گرفتار ڪرڻ جي دعوىٰ ڪئي آھي ان حوالي سان باڊھ ٿاڻي تي مقرر ايس ايڇ او عبدالغور ڇٽو ٻڌايو ته گرفتار جوابدار نصيرآباد، وڳڻ، ڏيرا سميت مختلف ٿاڻن تي ڏھن کان مٿي قتل ،ڦرن، پوليس مقابلن سميت مختلف داخل ڪيسن ۾ گهربل آھن.
مني لانڊرنگ خلاف قدم کڻون پيا، لٽيل دولت ڏيهه آڻبي: نيب چيئرمين جسٽس (ر) جاويد اقبال
خود احتسابي ضروري آهي، ان سان ئي ڪرپشن کان پاڪ پاڪستان جو خواب ساڀيان ٿيندو
نيب عدالتن ۾ 900 ارب جي ڪرپشن جا 1210 ڪيس آهن، جن کي انجام تي پهچائبو
اسلام (بيورو رپورٽ) قومي احتساب بيورو جي چيئرمين جسٽس جاويد اقبال ڪرپشن خلاف عزم جو اظهار ڪندي چيو آهي ته ملڪ ۾ بدعنواني اڏوهي کان وڌي ناسور بڻجي چڪي آهي جنهن جي پاڙ پٽڻ انتهائي ضروري آهي. هن چيو ته گيلپ ۽ گيلاني سروي موجب 59 سيڪڙو ماڻهو نيب تي اعتماد ڪن ٿا، جڏهن ته عالمي اقتصادي فورم جي پرسيپشن انڊيڪس جي موجوده رپورٽ موجب پاڪستان 107 نمبر تي آيو آهي. هن چيو ته اسان مان هر هڪ بدعنواني جو خاتمو چاهي ٿو پر بدعنواني جو واحد حل خود احتسابي آهي. جيڪڏهن اسان خود احتسابي تي عمل ڪندي بدعنواني، اقرباپروري ۽ رشوت وٺڻ کان پاسو ڪنداسين ته ان سان نه رڳو بدعنواني ختم ٿيندي پر ڪرپشن کان پاڪ پاڪستان واري خواب جي به ساڀيا ٿيندي. نيب چيئرمين چيو ته مني لانڊرنگ روڪڻ لاءِ اپاءُ ورتا پيا وڃن. هن چيو ته ملڪ مان لٽيل ۽ مني لانڊرنگ ذريعي ٻاهرين ملڪن ڏانهن منتقل ڪيل رقم قانون موجب دنيا جي ڪنڊ ڪڙڇ مان پاڪستان واپس آندي ويندي. هن چيو ته نيب قانون ۽ ضابطن مطابق پنهنجي ڪم ڪار ۾ طريقي کي اينٽي ڪرپشن بابت اثرائتي حڪمت عملي تحت بهتري آندي آهي. جنهن ۾ شڪايتن جي تصديق کان انڪوائري ۽ انڪوائري کان جانچ ۽ احتساب عدالت ۾ قانون مطابق ريفرنس داخل ڪرڻ لاءِ ڏهن مهينن جو وقت مقرر ڪيو آهي. سمورين ميگا ڪرپشنز جي جاچ پڙتال، انڪوائرين، شهادتن ۽ قانونن جي مطابق انجام تائين پهچايو ويندو. نيب چيئرمين چيو ته ميگا ڪرپشن جي ڪيسن کي منتقي انجام تائين پهچائڻ نيب جي پهرين ترجيح آهن. نيب 179 ميگا ڪرپشن جي ڪيسن مان 105 ڪيسن کي منتقي انجام تائين پهچائيندي بدعنواني جا ڪيس احتساب عدالتن ۾ جمع ڪرائي ڇڏيا آهن. هن چيو ته نيب سفيد پوش ميگا ڪرپشن جي ڪيسن جي تحقيقات مڪمل شاهدين، دستاويزي ثبوتن ۽ قانون جي مطابق سائنسي بنيادن تي ڪرڻ ۾ يقين رکي ٿي. نيب جي احتساب عدالتن ۾ هن وقت بدعنواني جي 1210 ريفرنسن جون ٻڌڻيون ٿي رهيون آهن جن جي ماليت اٽڪل 900 ارب روپيا آهي. نيب چيئرمين چيو ته مفتي احسان مضاربه ڪيس اسلام آباد جي نيب عدالت ۾ داخل ڪرايو هو. عدالت سڳوري مفتي احسان کي مضاربه ڪيس ۾ 10 سال قيد ۽ 9 ارب روپيا ڏنڊ جي سزا ٻڌائي هئي جيڪو نيب طرفان ڪيس جي بهترين طريقي سان پيروي سبب نيب اهو ڪيس کٽيو. نيب مضاربه ۽ مشارڪي اسڪينڊلن ۾ ملوث 34 جوابدارن جي گرفتاري کان علاوه ٻاهرين ملڪ ڀڄي ويل مضاربه ۽ مشارڪه اسڪينڊلن ۾ گھربل وڌيڪ جوابدارن کي انٽرپول وسيلي واپس آڻڻ جي ڀرپور ڪوشش ڪري رهيا آهيون.
احتساب قبول آهي، انتقام ڪارروائي تي مزاحمت ڪنداسين: نفيسه شاهه
اسان کي خبر آهي ته حڪومت کي ميثاق جمهوريت کان تڪليف ڇو آهي
عمران احتساب لاءِ عليمه خان، عليم خان ۽ جهانگير ترين کي پيش ڪري
اسلام آباد (بيورو رپورٽ) پاڪستان پيپلز پارٽي جي اطلاعات واري سيڪريٽري ڊاڪٽر نفيسه شاھ مطالبو ڪندي چيو آهي ته عمران خان احتساب لاءِ عليمه خان، عليم خان ۽ جهانگير ترين کي پيش ڪري. هن چيوته سڀني جواحتساب قبول آهي. انتقامي ڪارروائي تي مزاحمت ڪنداسين. نفيسه شاھ چيو ته اسان کي خبر آهي ته حڪومت کي ميثاق جمهوريت کان تڪليف ڇو آهي. هن چيو ته عمران خان جنرل حميد گل سان گڏجي محترمه بينظير ڀٽو خلاف سازشون ڪندو رهيو. سازشي ۽ ليڊر ۾ فرق آهي. نفيسه شاھ چيو ته چندو چوري ڪرڻ واري کي عوام ليڊر نه ٿي مڃي. هن چيو ته عمران خان جعلسازي ڪري اقتدار ۾ آيو آهي.