اسلام آباد (بيورو رپورٽ) اڳوڻي وزيراعظم ميان نواز شريف جي لاهور کان اسلام آباد پهچڻ بابت نون ليگ جي ترجمان ۽ نون ليگ جي اسلام آباد جي قيادت به بي خبر رهي. مسلم ليگ (ن) جي ذريعن اسلام آباد جي صحافين کي ميان نواز شريف جي شهباز شريف سان ملاقات لاءِ روانو ٿيڻ بابت اطلاع ڏنا ته اسلام آباد جي صحافين نواز شريف جي شيڊول بابت آگاھ ڪندڙ اڳوڻي مملڪتي وزير طارق فضل چوڌري سان رابطو ڪيو ته طارق فضل چوڌري چيو ته ميان نواز شريف لاهور ۾ آهي ۽ هو آچر ڏينهن اسلام آباد نه ايندو پر هو سومر ڏينهن اسلام آباد ايندو. ٿوري دير کانپوءِ نون ليگ جي ذريعن صحافين کي اهو ٻڌايو ته ميان نواز شريف اسلام آباد ۾ منسٽر انڪليو اندر شهباز شريف جي رهائشگاھ تي پهچي چڪو آهي جتي سندن ملاقات شروع ٿي وئي آهي. ان بعد نون ليگ جي واٽس ايپ تي ٺهيل بيٽ رپورٽر گروپ ۾ طارق فضل چوڌري کي آگاھ ڪندي ٻڌايو ته ميان صاحب، شهباز شريف وٽ پھچي چڪو آهي ته طارق فضل چوڌري، گروپ ۾ ميسيج ڪيو ته 200 سيڪڙو تصديق سان چوان ٿو ته ميان نواز شريف اسلام آباد نه آهي ۽ هو لاهور ۾ آهي. ٿوري دير کانپوءِ طارق فضل چوڌري ۽ نون ليگ جي ترجمان مريم اورنگزيب پنهنجي بي خبري جو اعتراف ڪندي تصديق ڪئي ته ميان نواز شريف لاهور کان اسلام آباد پهچي چڪو آهي ۽ سندس شهباز شريف سان ملاقات ٿي رهي آهي.
نوازشريف اسلام آباد آهي يا لاهور ۾؟: ليگي قيادت بي خبر
نواز ليگ جي ترجمان مريم اورنگزيب به نوازشريف جي شيڊول کان بي خبر رهي
طارق فضل چوڌري نوازشريف جي اسلام آباد ڪڏهن لاهور ۾ موجودگي ٻڌائيندو رهيو
پينو فقير ڪيس جو نئون رخ، ڪارنهن الزام ھيٺ قتل ٿيڻ جو انڪشاف
غيرت ۾ اچي فقير کي قتل ڪيو(جوابدار) سوکا جي کيسي مان پئسا ڪڍي کيس ماريو ويو: چوٻول
حيدرآباد (بيورو رپورٽ) حيدرآباد مان 5 ڏينهن اڳ قتل ٿيل پيرسن کي ڪارنهن الزام هيٺ قتل ڪرڻ جو انڪشاف ٿيو آهي، جڏهن ته پوليس ماءُ پٽ کي گرفتار ڪري ورتو. ٽنڊو يوسف پوليس موجب، پيرسن بندو عرف سوکا قتل ڪيس ۾ نئون رخ آيو آهي. پوليس جو چوڻ آهي ته گجراتي پاڙي مان عورت نور النساءَ ۽ سندس پٽ فيصل عرف سني کي گرفتار ڪيو ويو آهي. پوليس ٻڌايو ته جوابدار اعتراف ڪيو آهي ته مقتول جا سندس امڙ سان غلط لاڳاپا هئا، جنهن تي دوستن سان گڏجي بندو عرف سوکو کي قتل ڪري سندس لاش ٻوري ۾ بند ڪري ڦٽو ڪيو. ذريعن دعويٰ ڪئي آهي ته پيرسن بندو عرف سوکا پينو فقير هو، جوابدارن کيس قتل ڪرڻ کانپوءِ سندس کيسي مان پئسا ڪڍيا ويا. پوليس ٽئين جوابدار کي به گرفتار ڪري ورتو آهي، پر سندس گرفتاري ظاهر نه ڪري رهي آهي.
جي آءِ ٽي جو آصف ۽ فريال کي نااهل قرار ڏيڻ لاءِ سُپريم ڪورٽ کي سفارش جو فيصلو: ذريعا
ڪراچي (رپورٽ: دودو چانڊيو) ميگا مني لانڊرنگ ڪيس بابت جي آءِ ٽي اڳوڻي صدر آصف زرداري ۽ سندس ڀيڻ فريال ٽالپر کي نااهل قرار ڏيڻ سوڌو 23 مختلف ريفرنسز داخل ڪرائڻ لاءِ سُپريم ڪورٽ کي سفارش ڪرڻ جو فيصلو ڪري ورتو آهي. چيف جسٽس ثاقب نثار جي سربراهيءَ ۾ جُڙيل بئنچ سڀاڻي سُپريم ڪورٽ لاهور رجسٽري ۾ ميگا مني لانڊرنگ اسڪينڊل جي ٻڌڻي ڪئي ويندي. ٻڌڻيءَ دوران جي آءِ ٽي طرفان ميگا مني لانڊرنگ اسڪينڊل بابت سُپريم ڪورٽ ۾ جمع ڪرايل رپورٽ جي حوالي سان عدالت کي آگاهه ڪيو ويندو. ذريعن موجب سڀاڻي سُپريم ڪورٽ ۾ ميگا مني لانڊرنگ اسڪيندل جي حوالي سان جاچ ڪندڙ جي آءِ ٽي جي سربراهه طرفان پ پ پ پارليامنٽيرينز جي صدر آصف علي زرداري ۽ سندس ڀيڻ فريال ٽالپر کي نااهل قرار ڏيڻ جي سفارش ڪئي ويندي، جڏهن ته ٻنهي ڀاءُ ڀيڻ تي مختلف ڪرپشن ۽ غيرقانوني طور اثاثا ٺاهڻ جي حوالي سان ثبوتن بابت عدالت کي آگاهه ڪيو ويندو. ذريعن موجب سُپريم ڪورٽ لاهور رجسٽري ۾ ٻڌڻيءَ دوران جي آءِ ٽي طرفان عدالت کي مني لانڊرنگ، غير قانوني بئنڪ اڪائونٽس ذريعي رقمن جي منتقلي، زمينن جي غيرقانوني منتقلي ۽ آمدني کان وڌيڪ اثاثا ٺاهڻ جي حوالي سان اهم ثبوتن بابت آگاهه ڪيو ويندو. ذريعن دعويٰ ڪئي آهي ته جي آءِ ٽي سربراهه طرفان مجموعي طور 23 ريفرنسز داخل ڪرڻ لاءِ سُپريم ڪورٽ کي سفارش ڪرڻ جو فيصلو ڪيو ويو آهي.
فريال ٽالپر 13 گاڏين جي قافلي ۾ سيوهڻ پھچي درگاھھ قلندر تي حاضري ڏني
سيوهڻ(ن پ ا) پ پ اڳواڻ ۽ سنڌ اسيمبلي جي ميمبر فريال ٽالپر وي آءِ پي پروٽوڪول ۾ سڀني کي پوئتي ڇڏي ڏنو. فريال ٽالپر 13 گاڏين جي پروٽوڪول ۾ قلندر جي درگاهه تي پهتي. فريال جي سڪيورٽي ۾ شامل گارڊز صحافين کي ڪووريج کان روڪي ڇڏيو. قلندر جي نگري تي حاضري دوران فريال ٽالپر سان سهيل انور سيال ۽ ضياءَ الحسن لنجار سميت ٻيا اڳواڻ به گڏ هئا.
ٽنڊوڄام ۾ نينگر سان مبينا بدفعلي، جوابدار گرفتار
ڪنڀار پاڙي ۾ جوابدار نينگر کي ورغلائي مبينا بدفعلي جو نشانو بڻايو
ڊاڪٽرن پاران بدفعلي جي تصديق، پوليس جوابدار گرفتار ڪري ورتو
ٽنڊو ڄام(ن پ ا) ٽنڊو ڄام پوليس نينگر سان مبينا بدفعلي جي الزام ۾ جوابدار کي گرفتار ڪري ورتو. ٽنڊو ڄام جي ڪنڀار پاڙي ۾ جوابدار اجمل مسيح نينگر حسنين راجپوت کي ورغلائي مبينا بدفعلي جو نشانو بڻايو. نينگر جي دانهن تي وارثن کيس اسپتال منتقل ڪيو، جتي ڊاڪٽرن بدفعلي جي تصديق ڪئي. پوليس الزام هيٺ آيل جوابدار اجمل کي گرفتار ڪري ورتو.
ڪرمپور۾بجاراڻي-تيغاڻي تڪرار تان قتل ٿيل نوجوان جو لاش رکي ڌرڻو
دوست محمد بجاراڻي جي وارثن انڊس هاءِ وي بلاڪ ڪيو، ٽريفڪ معطل
ضلعي چيئرمين پهچي مظاهرين کي جوابدارن جي گرفتاري جي خاطري بعد روڊ کولرايو
ڪرمپور(ن پ ا) ڪرمپور ۾ 25 انساني جانيون ڳڙڪائيندڙ بجاراڻي ۽ تيغاڻي خوني تڪرار تان قتل ٿيل نوجوان دوست علي بجاراڻي جي جنازي نماز سندس ڳوٺ راوت بجاراڻي ۾ ادا ڪئي وئي. مقتول جي وارثن يوسي چئرمين امتياز علي بجاراڻي، عبدالحفيظ بجاراڻي، دليل بجاراڻي ۽ ٻين انڊس هاءِ وي تي لاش رکي ڌرڻو هنيو، جنهن سبب ٽريفڪ معطل ٿي وئي. ان موقعي تي مظاهرين دانهيو ته مقتول جو جهيڙي سان واسطو نه هو، تيغاڻي برادري جي هٿياربندن کيس بيگناهه قتل ڪيو آهي. ايس ايس پي ڪشمور ڪشمور ضلعي چيئرمين سان فون تي رابطو ڪري جوابدارن جي گرفتاري جي خاطري ڪرائي. محبوب علي بجاراڻي مظاهرين وٽ پهچي ڌرڻو ختم ڪرايو. واضح رهي ته بجاراڻي ۽ تيغاڻي برادري جي ٻن ڌرين ۾ هلندڙ تڪرار تان 25 ڄڻا قتل ۽ سوين زخمي ٿي چڪا آهن.
جوهي ڀرسان ناري مبينا اغوا، ڪيس داخل
جوھي(ن پ ا) جوهي ويجهو مبينا اغوا ٿيل ناري واري واقعي جو ڪيس داخل ڪرايو ويو آهي. ڳوٺ جعفر لنڊ واسي شريف لنڊ جوهي ٿاڻي تي ڪيس داخل ڪرايو. ڪيس ۾ ڄاڻايو ويو آهي ته جوابدار آفاق لنڊ ناري ڪائنات لنڊ کي اغوا ڪري ويو آهي. ٻئي پاسي پوليس ڪيس داخل ٿيڻ باوجود ناري ۽ ڪيس ۾ نامزد جوابدار جو پتو نه لڳائي سگهي آهي. هوڏانهن ذريعن دعويٰ ڪئي آهي ته ناري نوجوان سان شادي لاءِ گهران نڪري وئي آهي.
ڏهرڪي ۾ هيپاٽائيٽس خاندان اجاڙي ڇڏيو،هڪ سال ۾ ساڳئي ڪٽنب جا 11 ڄڻا فوت
ڀرسان ڳوٺ عبدالله راڄڙي ۾ هيپاٽائٽس بي ۽ سي ڪلور ڪري ڇڏيا،فوتين ۾ ٻه سڳا ڀائر اڪبر علي ۽ حقنواز راڄڙي شامل
ساڳئي ڳوٺ ۾ هڪ سال دوران 16 ماڻهو بڇڙي بيماري جي ور چڙهي چڪا،ڪيترائي ڳوٺاڻا بيماري ۾ ورتل آهن:رهواسي
ڏھرڪي(رپورٽ:اعظم سهرياڻي) ڏھرڪي ڀرسان هڪ ئي ڳوٺ ۾ هيپاٽائٽس جا هاڃا،هڪ سال اندر هڪ ئي خاندان جي 11 ماڻهن سميت 16 ماڻهو ڪاري ڪامڻ واري بيماري ڳڙڪائي ڇڏيا،ڪيترا مبتلا آھن، ان ڏس ڏھرڪي ڀرسان ڳوٺ عبدالله راڄڙي ۾ هيپاٽائٽس بي ۽ سي ڪلور ڪري ڇڏيا،هڪ ئي سال ۾ راچڙي برداري جي 11 ماڻهن سميت 16 ماڻهو فوت ٿي چڪا آھن ،جن ۾ ٻه سڳا ڀائر اڪبر علي ۽ حافظ حقنواز راڄڙي، طيب راڄڙي ،عبدالحڪيم،عبدلرشيد راڄڙي،پنجل راڄڙي،مائي روزينه،مائي حوا راڄڙي،جميلا راڄڙي،مائي قائمه،طاهر راڄڙي،سنوج ڪمار،قطب الدين ڏهر فوت ٿي چڪا آھن ۽ ڪيترائي ڳوٺاڻا هن وقت هيپاٽائٽس ۾ مبتلا آھن، جيڪي ويڪسين ڪرائي رهيا آھن. ان سلسلي ۾ ڳوٺاڻن منير راڄڙي ۽ محمد دين راڄڙي ٻڌايو ته اسان جي ڳوٺ ۾ هيپاٽائٽس ڪلور ڪري ڇڏيا آھن. اسان اهڙي بيماري جي بچاءُ لاءِ جاڳرتا مهم به هلائي هئي .پر هن وقت به ڪيترائي ڳوٺاڻا اهڙي موذي مرض ۾ مبتلا آھن.
فساد چوڌري ڪهڙي منهن سان آصف زرداري خلاف پيو ڳالهائي؟: مرتضيٰ وهاب
ڪراچي (رپورٽر) سنڌ جي وڏي وزير جي صلاحڪار بيريسٽر مرتضيٰ وهاب وفاقي وزير فواد چوڌري کي فساد چوڌري جو لقب ڏيندي چيو آهي ته آصف زرداري جو ترجمان رهندڙ فساد چوڌري ڪهڙي منهن سان بيان بازي ڪري رهيو آهي، اصل بدمعاش ته اهي سياسي ڏيڏر آهن، جيڪي هر دور ۾ حڪومت جو حصو هوندا آهن، سنڌ جي وڏي وزير جي صلاحڪار بيريسٽر مرتضيٰ وهاب وفاقي وزير فواد چوڌري جي بيان جي ردعمل ۾ چيو آهي ته اڳوڻي صدر آصف علي زرداري جو ترجمان رهندڙ شخص اڄ ڪهڙي منهن سان سندس خلاف بيان بازي ڪري رهيو آهي، هن چيو ته ماضي ۾ آصف علي زرداري جا ڳُڻ ڳائيندڙ هاڻي خلاف پيو آهي، اهو جلد ڪپتان کي به پنهنجو اصل روپ ڏيکاريندو، اقتدار جي لالچ ۾ اچي پنهنجي محسنن سان احسان فراموشي ڪرڻ سندس رت ۾ شامل آهي، هي ڪپتان ۽ سندس پارٽي لاءِ ٻانهن جو نانگ ثابت ٿيندو، فساد چوڌري ايندڙ حڪومت جو ترجمان بڻجڻ جي مشق ڪري رهيو آهي.
پاڪستان ۾ 63سيڪڙو مائرون ٻارن کي ٿڃ نٿيون پيارين: ماهر ڊاڪٽر
حيدرآباد(بيورو رپورٽ) ٻارڙن جي بيمارين جي ماهر ڊاڪٽرن انڪشاف ڪيو آهي ته پاڪستان ۾ رڳو 37 سيڪڙو ٻارن کي مائرون پنهنجي ٿڃ پيارين ٿيون، جڏهن ته ٻين ٻارن کي وقت کان اڳ ئي هٿرادو کير ۽ ٻين کاڌن تي هيرايو وڃي ٿو. اهڙو انڪشاف پاڪستان پيڊياٽرڪ ايسوسيئيشن سنڌ جي سهڪار سان ٿيل ورڪشاپ ۾ ٿيو. ورڪشاپ ۾ عورتن جي بيمارين جي ماهر ڊاڪٽرياڻين کانسواءِ اسٽاف نرسن ۽ ايل ايڇ ويز به شرڪت ڪئي. ٻارن جي بيمارين جي ماهر ڊاڪٽرن سلميٰ شيخ، پروفيسر جلال اڪبر، ڊاڪٽر غلام رسول ٻرڙو، ڊاڪٽر چنديرام شاهاڻي، ڊاڪٽر ساجده يوسفاڻي، پروفيسر روشن آرا ۽ ٻين خطاب ڪيو. ڊاڪٽرن چيو ته ماءُ جو کير زندگي آهي پر گهٽ مائرون ان جي اهميت کان واقف آهن. هنن چيو ته ٻارن جي ڄم جي پهرين ڪلاڪ کان 6 مهينن تائين ٻارن کي رڳو ماءُ جي ٿڃ پيارڻ گهرجي، ڇاڪاڻ ته ماءُ جي کير ۾ اهي سڀ وٽامنز موجود هجن ٿا، جن سان ٻار صحتمند رهي سگهي ٿو. هنن چيو ته جيڪي ٻار ماءُ جي ٿڃ کان محروم رهن ٿا، تن ۾ موت جي شرح وڌيڪ هئڻ سان گڏ ڊائريا، نمونيا ۽ ٻين بيمارين جي حملي جو به ڊپ رهي ٿو. ڊاڪٽرن چيو ته جيڪي ٻار پنهنجي گهربل عمر تائين ماءُ جي ٿڃ نٿا پيئن، تن ۾ موت جي شرح 15 سيڪڙو کان وڌيڪ آهي. ماهرن زور ڀريو ته مائرون ٻارڙن کي 6 مهينن جي عمر تائين صرف پنهنجي ٿڃ پيارين، جڏن ته هلڪي خوراڪ سان گڏ به ٿڃ 2 سالن تائين پيارڻ گهرجي.
چڪ لڳ ڳوٺ تي پوليس چڙهائي، ڦر جي شڪ ۾ 2 ڄڻا گرفتار
لکي غلام شاھ/چڪ (نمائندن وٽان) ڪچي جي ڳوٺ عبدالمجيد جتوئي تي چڙھائي پوليس چڙهائي، ڦر جي شڪ ۾ 2 ڄڻا گرفتار،گذريل رات چڪ شھر جي مين بازار مان هندو واپاري استاد پريم چند جي دوڪان مان ٿيل لکين روپين جي ڦر واري رقم واپس نٿي سگهي،جڏهن ته پوليس ڳوٺ عبدالمجيد جتوئي تي چڙھائي ڪري شڪ ۾ ٻن ڄڻن کي گرفتارڪري ورتو، جڏهن ته شهري ۽ واپاري تنظيمن جا اڳواڻن ڪيس داخل ڪرائڻ لاءِ چڪ ٿاڻي تي پهتا پر ايس ايڇ او موجود نه هجڻ ڪري واپس روانا ٿي ويا، جنهن کانپوءِ شهري ۽ واپاري تنظيمن جي اڳواڻن متاثر واپاري استاد پريم ڪمار سان ملاقات ڪري کيس مڪمل ساٿ ڏيڻ جي خاطري ڪرائي.
جرڳن تي پابندي نه هئڻ گهرجي،پنچائتي سسٽم آڻيو:منظور پنهور
جرڳا نه پر فيصلا ڪرائيندو آهيان، جهيڙن جا تڪڙا نبيرا نه ٿيڻ سبب ماڻهو ڌاڙيل بڻجن ٿا
هزارين فيصلا ڪرايا اٿم،هر آچر تي 15 کان 30 فيصلا ڪندو آهيان:پنهنجي اخبار سان ڳالهيون
ڪراچي (ڳالهه ٻولهه: شاهد ميراڻي ) سنڌ ۽ بلوچستان ۾ جرڳا ڪندڙ اڳوڻي وزير مير منظور پنهور چيو آهي ته قبيلائي جھيڙن، زمين تي ٿيندڙ تڪرار ۽ ڪاروڪاري وارن معاملن جا تڪڙا نبيرا نه ٿيڻ سبب ماڻهو ڌاڙيل ٿي ٻيلا وسائين ٿا. فيصلن تي پابندي هجڻ بجاءِ سرڪاري سطح تي “پنچائت سسٽم” هجڻ گھرجي جيئن تڪرار جلد ختم ٿي وڃن. “پنهنجي اخبار” سان ڳالهه ٻولهه دوران منظور پنهور چيو ته آئون جرڳا نه پر فيصلا ڪرائيندو آهيان. جنهن کي جرڳي جو نالو ڏئي مون تي مختلف وقتن ۾ 4 ڪيس داخل به ڪيا ويا. صلح ڪرائڻ تي پابندي نه هجڻ گھرجي. هن چيو ته مون پنهنجي زندگي ۾ هزارين فيصلا ڪرايا آهن. هر آچر تي 15 کان 30 فيصلا ڪندو آهيان. جنهن ۾ ڌرين کي تڪڙو انصاف ملي وڃي ٿو.
هن چيو ته گھوٽڪي ضلعي ۾ ڪوش-سولنگي تڪرار ۾ ٻنهي ڌرين جا 170 ماڻهو قتل ٿيل هئا، ان جو به مون فيصلو ڪيو. قمبراڻي-مارفاڻي تڪرار جي 119 ماڻهن جي قتل، جتوئي-مهر جھيڙي ۾ 150 ماڻهن جي خون، قمبراڻي-عيساڻي خوني ويڙھ جي 45 ماڻهن جي مارجڻ، ساوند-سبزوئي تڪرار جي 160 ماڻهن، جکراڻي-ڀيو خوني جھيڙي جي 60 ماڻهن جي قتل جهڙي وڏن تڪرارن جا فيصلا ڪري ڌرين کي وڌيڪ خونريزي کان بچائڻ تي مون کي پاڻ تي فخر آهي.
مير منظور پنهور هڪ سوال جي جواب ۾ چيو ته جرڳو انگريز دور ۾ اسسٽنٽ پولٽيڪل ايجنٽ ڪندا هئا. تڏهوڪي دور ۾ ٻن ڌرين ۾ جڏهن جھيڙو ٿيندو هو ته اڄوڪا صوبيدار تڏهن “دفيدار” هوندا هئا انهن وٽ فرياد ويندي هئي ته دفيدار جھيڙيندڙ ڌرين کي اسسٽنٽ پولٽيڪل ايجنٽ وٽ پيش ڪندا هئا ۽ سرڪاري سطح تي جرڳو ڪري “ليويز فورس” ذريعي فتويٰ تي عمل به ڪرائيندا هئا. هن چيو ته اڄ جهڙي جديد دور ۾ به آمريڪا، يورپ ۽ برطانيا ۾ “جيوري سسٽم” آهي. جنهن ذريعي ڌرين جا مسئلا حل ڪرايا وڃن ٿا.هتي اسان وٽ بدنصيبي سان اخبار وارن کي “جرڳي”، “ٺاھ” ۽ “صلح” لفظ کان چِڙ آهي.
هن چيوته مون ڪڏهن به پنهنجي ڪيل فيصلن ۾ ڏنل فتويٰ تي پڇتاءُ ناهي ڪيو. الله جو شُڪر آهي ته انتهائي سخت مزاج ماڻهو به منهنجي فتويٰ کي قبول ڪندا آهن. ان ڪري ئي نه رڳو سنڌ پر بلوچستان ۽ پنجاب ۾ به فيصلن جي سرپئنچ طور مون کي گھرايو ويندو آهي. هن چيو ته ڌرين جي انا کي ختم ڪرڻ ۽ فتويٰ تي عمل ڪرائڻ لاءِ ٻنهي ڌرين کان معتبر ماڻهن جي ضمانت وٺندا آهيون. هن چيو ته سنڌ ۾ مون تي ٺاھ ڪرائڻ جي ڏوھ ۾ نه صرف 4 ڪيس داخل ٿيا پر قانون اهڙو حرڪت ۾ آيو ته مون سنڌ ۾ فيصلا ڪرڻ ڇڏي ڏنا. سنڌ ۾ مون تي اڻ اعلانيل پابندي لڳائي وئي، جنهن بعد مون بلوچستان جي علائقي صحبتپور وڃي فيصلا ڪيا. سنڌ جي ماڻهن کي به اتي گھرائي فيصلا ڪندو رهيس.
ماڻهو سوچيندا آهن ته پئسن لاءِ فيصلا ڪندو آهيان پر اهو غلط آهي. پنهنجو پئٽرول ۽ خرچ ڀري فيصلا ڪرڻ ويندو آهيان. مير منظور پنهور کان جرڳن ۾ ايندڙ خرچ بابت سوال ڪيو ويو ته هُن جواب ڏيندي چيو ته اسلام آباد ۾ مون کان هڪ صحافي عورت به ساڳيو سوال ڪيو هو ته “توهان جي فيس ڪيتري آهي”؟ ان سوال بعد سوچڻ تي مجبور ٿيو هئس ته اهو تاثر ڪيئن ختم ڪيان! مير منظور پنهور چيو ته گھڻي ڀاڱي ماڻهو اهو سمجھندا آهن ته شايد مان فيصلا ڪرڻ جا پئسا وٺندو آهيان پر حقيقت بلڪل ان جي ابتڙ آهي. هن چيو ته بلوچستان، پنجاب ۽ سنڌ جي مختلف شهرن ۾ جتي به فيصلا ڪرڻ ويندو آهيان ته اهو خرچ پاڻ ڀري ويندو آهيان. ڪنهن کان روپيو به ناهيان وٺندو. پر اڄ اوهان سوال ڪري ٻيهر سوچڻ تي مجبور ڪيو آهي.
سنڌ ۾ ننڍي چونڊ جا نتيجا پڌرا،پ پ کي سرسي،پي ٽي آءِ کي شڪست
حيدرآباد جي يونين ڪميٽي 87 ۽ 21 تي ايم ڪيو ايم اميدوار ڪامياب ،ميرپورخاص ۾ به متحده اميدوار سوڀارو
خيرپور جي يوسي مانڊڻ ۾ آزاد اميدوار امتياز شر ڪامياب،يوسي گمبٽ ۾ فنڪشل ليگ اميدوار ڪاميابي ماڻي
ڪراچي(نمائندن وٽان) سنڌ جي مختلف ضلعن ۾ ضمني مڪاني چونڊون پوريون ٿيڻ بعد غير سرڪاري ۽ غير حتمي نتيجا اچڻ جو سلسلو جاري آهي. ان سلسلي ۾ حيدرآباد جي يونين ڪميٽي 87 تي متحده پاڪستان جو شعيب الحسن 230 ووٽ کڻي ڪامياب ٿي ويو، پ پ اميدوار پ پ جي عنايت علي هارائي ويو، کيس 106 ووٽ مليا. نواب شاهه جي ضلعي ڪائونسل جي سيٽ تي بيٺل شاگردياڻي فرزانه جمالي هارائي وئي، کيس 90 ووٽ مليا، جڏهن ته پنو عاقل ۾ يوسي نوراجا وارڊ نمبر 4 ۾ ڪائونسلر سيٽ تي آزاد اميدوار آدم مهر 365 ووٽ کڻي ڪامياب ٿي ويو. . سانگهڙ جي وارڊ نمبر 2 تي پ پ اميدوار اڪرم قريشي 619 ووٽ کڻي ڪاميابي ماڻي، جي ڊي اي اميدوار آفاق قريشي کي 504 ووٽ مليا. عمرڪوٽ جي يوسي مردان شاهه ۾ ف ليگ جو عازي سمون 1643 ووٽ کڻي ڪامياب ٿي ويو، هن سيٽ تي پ پ جي روشن راهمون کي 1354 ووٽ مليا. سکر جي يوسي 17 نيو پنڊ وارڊ نمبر 4 تي پ پ اميدوار گل محمد 535 ووٽ کڻي ڪاميابي ماڻي، جڏهن ته پي ٽي آءِ جو محمد نعيم هارائي ويو. حيدرآباد جي يونين ڪميٽي 21 تي متحده جي پرويز وسيم 1045 ووٽ کڻي ڪاميابي ماڻي، آزاد اميدوار امتياز عالم کي 331 ووٽ مليا. گهوٽڪي جي يوسي عمر ڊهو ۾ پ پ اميدوار ڄام دلاور لکڻ 1770 ووٽ کڻي ڪامياب ٿي ويو، آزاد اميدوار ارشد لکڻ 739 ووٽ کڻي ٻئي نمبر تي رهيو. ملير جي يوسي ڪاٺوڙ تي پ پ اميدوار دادا ڪريم بلوچ 2735 ووٽ کڻي کٽي ويو، پي ٽي آءِ جو عطاءُ الله 717 ووٽ کڻي سگهيو. ماتلي جي وارڊ نمبر 7 ۾ پ پ جي عمران ڪشميري 1173 ووٽ کڻي ڪاميابي ماڻي، آزاد اميدوار منير نظاماڻي کي 926 ووٽ مليا. نوشهروفيروز ۾ يوسي ڪوٽ ستابو ۾ مير محمد عالماڻي 1309ووٽ کڻي ڪامياب ٿي وي، پ پ جي آصف عالماڻي 500 ووٽ مليا. پيرڳوٺ جي يوسي راهوجا ۾ آزاد اميدوار 926 ووٽ کڻي ڪامياب ٿي ويو پ پ اميدوار ڌڻي بخش جاگيراڻي 852 ووٽ کڻي سگهيو. ٺري ميرواهه جي يوسي مانڊڻ وارڊ 2 ۾ آزاد اميدوار امتياز شر 469 ووٽ کڻي ڪامياب ٿي ويو، پ پ جي منور ملاح کي 355 ووٽ مليا. حيدرآباد جي يو سي 53 تي پ پ اميدوار ساجد شاهه 1393 ووٽ کڻي ڪامياب سوڀ ماڻي، متحده جي جهانگير ڪاڪا کي 687 وٽ مليا. ملير جي يوسي ڄام مراد علي تي آزاد اميدوار صدام بلوچ 1947 ووٽ کڻي ڪامياب ٿيو آهي جڏهن ته پ پ جي عرفان جوکيو کي 1835 ووٽ مليا. قاضي احمد جي يوسي گهرام مري جي وارڊ نمبر 3 تي پ پ اميدوار نياز حسين مهر 650 ووٽ کڻي ڪاميابي ماڻي. خيرپور جي يوسي اڀڙي وارڊ نمبر 4 تي پ پ جو غلام علي ڪنڌر 531 ووٽ کڻي ڪامياب ٿيو،سندس مخالف اميدوار حنيف تنيو کي 182 ووٽ مليا،ٺٽي جي يوسي ڇتو چنڊ ۾ پ پ جو حيدر شاهه شيرازي 1632 ووٽ کڻي ڪامياب سندس مخالف پي ٽي آءِ جي عظيم بروهي کي 112 ووٽ مليا،خيرپورجي احمد پور ٽائون ڪميٽي وارڊ نمبر 4 ۾ پ پ اميدوار محمد بخش ميتلو 232 ووٽ کڻي ڪامياب ٿي ويو،خيرپورميرس جي احمد پور ٽائون ڪميٽي وارڊ نمبر 4 ۾ ف ليگ اميدوار سراج احمد کنڀڙو 34 ووٽ کڻي هارائي ويو،خيرپورجي يوسي مانڊڻ وارڊ نمبر 2 ۾ آزاد اميدوار امتياز شر 457 ووٽ کڻي ڪامياب ٿيو، پ پ جي منور ملاح کي 349 ووٽ مليا،ٽائون ڪميٽي ٺيڙهي 1 وارڊ نمبر 3 ۾ آزاد اميدوار عبدالوحيد شيخ 432 ووٽ کڻي ڪامياب ٿي ويو.ٽائون ڪميٽي ٺيڙهي 1 وارڊ نمبر 3 ۾ پ پ اميدوار شاهد شيخ 317 ووٽ کڻي هارائي ويو.ٽائون ڪميٽي ٺيڙهي 2 وارڊ نمبر 1 ۾ آزاد اميدوار حفيظ ڦلپوٽو 317 ووٽ کڻي ڪامياب ٿيو،ٽائون ڪميٽي ٺيڙهي 2 وارڊ نمبر 1 ۾ پ پ اميدوار عبدالغني ڦلپوٽو 292 ووٽ کڻي هارائي ويو،خيرپور جي يوسي هنڊياري وارڊ 3 ۾ پ پ اميدوار نظر شر 590 ووٽ کڻي ڪامياب ٿي ويو،يوسي هنڊياري وارڊ 3 ۾ ف ليگ اميدوار غلام الدين شر 345 ووٽ کڻي هارائي ويو،يوسي گمبٽ وارڊ 11 ف ليگ جو منور ميمڻ 468 ووٽ کڻي ڪامياب، پ پ جي يوسف ميمڻ کي 298 ووٽ مليا،ٽائون ڪميٽي کهڙا جي وارڊ 7 ۾ پ پ اميدوار اسحاق ناريجو 560 ووٽ کڻي ڪامياب ٿيو جڏهن ته ف ليگ اميدوار غوث محمد لاشاري 118 ووٽ کڻي هارائي ويو. پيرڳوٺ لڳ يوسي راهوجا جي چيئرمين لاءِ ضمني چونڊون ٿي گذريون جنهن ۾ غير سرڪاري ۽ غير حتمي نتيجن موجب آزاد اميدوار مير غلام عباس ٽالپر 926 ووٽ کڻي ڪاميابي ماڻي جڏهن ته پ پ اميدوار ڌڻي بخش جاگيراڻي 852 ووٽ کنيان، ف ليگ جي ڪريم الدين ملڪ ڪل 550 ووٽ کنيان، جڏهن ته ٽائون ڪاميٽي احمدپور جي وارڊ نمبر 4 تي پڻ ضمني چونڊون ٿيون جنهن ۾ پ پ جي محمد بخش ميتلو ۽ 230۽ ف ليگ اميدوار سراج الدين کنڀڙو ڪل 36 ووٽ کڻي سگھيو
قبو سعيد خان ۾ نينگر واٽر ۾ ٻڏي فوت
قبو سعيد خان (ن پ ا) قبو سعيد خان ويجهو نينگر واٽر ڪورس ۾ ڪري ٻڏي فوت، ڳوٺ الاهي بخش کوسو ۾ 4 سالن جو سلطان کوسو گهر آڏو راند ڪندي واٽر ڪورس ۾ ڪري پيو. مقامي ماڻهن نينگر کي واٽر ڪورس مان بيهوشي واري حالت ۾ ڪڍي اسپتال منتقل پئي ڪيو ته هن رستي ۾ ئي دم ڏئي ڇڏيو.اسپتال انتظاميا ضروري ڪارروائي کانپوءِ لاش وارثن حوالي ڪري ڇڏيو، نينگر جو لاش گهر پهچڻ تي ڪهرام مچي ويو، جڏهن ته سندس امڙ کي بيهوشي جا دورا پئجي رهيا هئا.
خاموش ڇو آهيو؟ بلاول ڀٽو ميڊيا ترجمانن تي ناراض ٿي ويو، سرگرم ٿيڻ جي ھدايت
بلاول پارٽي جي سمورن ترجمان جو اجلاس سڏائي سخت ڪاوڙ جو اظهار ڪيو
پارٽي خلاف ميڊيا مهم هلي پئي، پر ترجمان خاموش آهن؟
ڪراچي(رپورٽ: دودو چانڊيو)پاڪستان پيپلز پارٽي جي چيئرمين بلاول ڀٽو زرداري پارٽي جي قيادت خلاف ميڊيا مهم ۽ پارٽي ترجمانن جي ماٺ تي سخت ڪاوڙ جو اظهار ڪندي گذريل ڏينهن بلاول هائوس ۾ پارٽي جي سمورن ترجمانن ۽ ميڊيا مئنيجرن جو اجلاس سڏايو. اجلاس ۾ مصطفيٰ نواز کوکر سميت مرڪزي اطلاعات سيڪريٽري مولا بخش چانڊيو، اطلاعات واري صلاحڪار مرتضيٰ وهاب، پارليامينٽرين جي سيڪريٽري عاجز ڌامراهه، بلاول هائوس ميڊيا سيل جي انچارج فدا ڍڪڻ، بلاول ڀٽو جي ترجمان عثمان غازي، اڳوڻي صوبائي وزير ناصر شاهه، بلاول هائوس جي ترجمان جميل سومرو، سرندر وراسائي ۽ ٻين شرڪت ڪئي. ذريعن موجب اجلاس ۾ بلاول ڀٽو پارٽي جي سمورن ترجمانن، ميڊيا مئنيجرن تي سخت ڪاوڙ جو اظهار ڪندي چيو ته پارٽي خلاف وڏي پئماني تي ميڊيا مهم هلي رهي آهي، پر انفارميشن سيڪريٽري ۽ ترجمان ڇو خاموش آهن؟. ذريعن بلاول ڀٽو پارٽي ترجمانن کي هدايت ڪئي ته ميڊيا سان رابطن ۾ رهندي پارٽي جو موقف پهچائڻ ۾ وسان نه گهٽائين.