باڪسنگ ٽيسٽ سينچورين ۾ سڀاڻي کيڏي ويندي، ٽيمن جي پريڪٽس پاڪستان پهريون ڀيرو باڪسنگ ڊي ٽيسٽ ۾ حصو وٺندو، ڪاميابي لاءِ پرعزم
سينچورين (اسپورٽس ڊيسڪ) پاڪستان ۽ ڏکڻ آفريڪا خلاف ٽيسٽ سيريز جي شروعات سڀاڻي کان ٿيندي. ٽن ٽيسٽ ميچن جي سيريز جي پهرين ٽيسٽ سينچورين ۾ باڪسنگ ڊي کان شروع ٿيندي. پاڪستان پهريون ڀيرو باڪسنگ ڊي ٽيسٽ ۾ حصو وٺندو. پاڪستان بينوني ۾ پريڪٽس ميچ ۾ ڪاميابي کانپوءِ پراعتماد آهي، جڏهن ته محمد عباس ۽ شاداب خان جي زخمي ٿيڻ سبب پاڪستان ڏکيائين جو شڪار ٿي سگهي ٿو، جڏهن ته فخر زمان فٽ ٿي ٽيم ۾ شامل ٿي ويو آهي. پاڪستان پاران ٽي فاسٽ بالرن سان گڏ ياسر شاهه کي ميدان ۾ لاهيندو. ٻي پاسي ڏکڻ آفريڪا طرفان ويرون فلينڊر جي جڳهه تي ڊيني پيٽرسن کي شامل ڪيو ويو آهي. سينچورين جي سپر اسپورٽس پارڪ ۾ پاڪستان پاران گذريل ٻن سيريز ۾ ٻه ٽيسٽ ميچ هارايا هئا، جڏهن ته ڏکڻ آفريڪا جو سپر اسپورٽس پارڪ ۾ رڪارڊ شاندار رهيو آهي، 23 ميچن ۾ 18 ٽيسٽ ميچن ۾ پروٽيز ڪاميابي حاصل ڪئي آهي، کيس صرف ٻن ٽيسٽ ميچن ۾ شڪست ملي آهي.
سوين شهرين ٽائون موڙ تي حددخلين جي آڙ ۾ ٿيندڙ آپريشن خلاف ڌرڻو هنيو ويو مٺي ويندڙ روڊ بلاڪ ٿيڻ سبب گاڏين جي اچ وڃ ڪيتري ئي دير تائين بند رهي
اسلام ڪوٽ (ن پ ا) اسلام ڪوٽ ۾ سوين شهرين پاران حددخلين جي آڙ ۾ جائز ملڪيتون ڊاهڻ خلاف سوين شهرين پاران ٽائون موڙ تي ڌرڻو هنيو ويو،، مٺي ويندڙ روڊ بلاڪ ٽرئفڪ معطل ٿي وئي، ڌرڻي واري هنڌ رينجرز ۽ پوليس پهچي ويئي، ڊي سي ٿرپارڪر خلاف نعريبازي هٽائڻ جي گهر ڪئي وئي، ڌرڻي جي اڳواڻي واپاري صدر ڪلديپ پارواڻي،وڪيل مصطفىٰ هنگورجو،سهراب راهمون،وريام لنجو ۽ ٻيا ڪري رهيا هئا.
وارھ (ن پ ا) واره جي مٺا ڪالوني واسڻ امڙ کي نافرمان پٽ گهران ڪڍي ڇڏيو ان ڏس ۾ مليل ڄاڻ موجب واره جي مٺا ڪالوني واسڻ مسمات عالم خاتون لاشاري دانهيو آھي ته سندس پٽ سوجهرو لاشاري غلط صحبت ۾ اچي موالي بڻجي ويو آھي ۽ گهر جي جڳه کپائڻ لاءِ ماڻھو گهر وٺي آيو ته مون گهر کپائڻ کان انڪار ڪندي آيل ماڻھن کي موٽائي ڇڏيو ته مون کي نافرمان پٽ ڌڪ هڻي گهران ڪڍي ڇڏيو آھي متاثر 75 ورهيه پوڙھي عورت چيو ته مذڪوره جڳه منهنجي نالي ٿيل آھ،جنهن جو رڪارڊ پڻ موجود آھي ڪجه بااثر ماڻهون زوري سستي رقم عيوض گهر خريد ڪرڻ چاهين ٿا هن ايس ايس پي قمبر شهدادڪوٽ کان انصاف جو مطالبو ڪيو ته سندس نافرمان موالي پٽ سوجهرو لاشاري کي گرفتار ڪري سندن اجهو کپائڻ کان بچايو وڃي.
ڪراچي(اسٽاف رپورٽر) ڪراچي جي ايمپريس مارڪيٽ جي دڪاندارن ميئر ڪراچي وسيم اختر خلاف احتجاجي مظاهرو ڪري ڌرڻو هنيو. ڪراچي پريس ڪلب پهتل ايمپريس مارڪيٽ جي دڪاندارن دانهيو ته ميئر ڪراچي اجائي واويلا ڪري رهيو آهي ته ايمپريس مارڪيٽ ۾ ڊاهي پٽ ڪيل دڪانن تي منشيات وڪرو ڪيو ويندو هو. هنن مطالبو ڪيو ته ميئر ڪراچي خلاف ڪارروائي ڪري آپريشن متاثر دڪاندارن جي سهائتا ڪئي وڃي.
اسلام ڪوٽ (ن پ ا)روينيو انتظاميه پاران حد دخلين خلاف آپريشن شروع،انتظاميه اسلام ڪوٽ باءِ پاس تي حددخلين خلاف آپريشن ڪندي بااثرن بجاءِ غريبن جا اجها پٽ ڪري ڇڏيا،انتظاميه روڊ کان سوين فوٽ پري اڏيل جهوپڙا به ڊاهي ڇڏيا،روينيو انتظاميه پاران اسلام ڪوٽ ۾ حددخليون هٽائڻ جي لاءِ آپريشن شروع ڪيو ويو،انهي سلسلي ۾ اسسٽنٽ ڪمشنر شنڪر لال مختيارڪار عبدالغفار لاکير جي اڳواڻي ۾ روينيو ۽ ميونسپل عملي پاران وڏي مشينري ذريعي مٺي اسلام ڪوٽ روڊ کان ڪارروائي شروع ڪرڻ بدران اسلام ڪوٽ ننگرپارڪر روڊ تي اونڌهيو لڪ کان آپريشن شروع ڪري غريبن جا گهر ڊاهڻ شروع ڪيا،صبح سوير کان شروع ڪيل آپريشن سڄو ڏينهن جاري رهيو،روينيو انتظاميه پاران شهر جي باء پاس روڊ جي سينٽر جي ٻنهي پاسن کان هڪ سو ڏھ فوٽ جي ماپ ۾ ايندڙ اڏاتون هٽائڻ بجاءِ ٻه سئو فوٽ پري اڏيل غريبن جي اجهن ۽ جهوپڙين کي به ڊاهي پٽ ڪري ڇڏيو،متاثر دانهون ڪندا رهيا پر انتظاميه ڪنهن جي به نه ٻڌي،متاثر رهواسين پ پ ايم پي اي فقير شير محمد بلالاڻي آڏو به سخت احتجاج ڪندي دانهيندي چيو ته انتظاميه پنهنجي ڪيل فيصلي تان ڦري ويئي آهي،انتظاميه پهرين ٻڌايو ته روڊ جي سينٽر کان 110 فوٽ جي ايريا اندر ايندڙ اڏاوتون هٽايون وينديو.اسان انهي تي عمل ڪرڻ لاء تيار هئاسين،پر انتظاميه طئه ٿيل ماپ کان مٿي 2 کان 3 سئو فوٽ تائين ڪاروائي ڪري اسان جا گهر توڙي جگهيون ڊاهي رهي آهي ،پ پ ايم پي اي فقير شير محمد بلالاڻي چيو ته ڪنهن سان به زيادتي ٿيڻ نه ڏبي،انتظاميا سان ڳالهايون ٿا،جيڪا به ڪاروائي ٿي اهو قانون مطابق ۽ برابري جي بنيادن تي ڪئي وڃي،ٻي پاسي مختلف سياسي سماجي ڌرين پاران اڄ پرامن ڌرڻو هڻڻ جو سڏ ڏنو ويو آهي،انهي سلسلي۾ پ پ پ اڳواڻ سيد ڀورل شاھ رابطي تي ٻڌايو ته اسان هڪ گڏجاڻي ڪئي جنهن ۾ مختلف سياسي سماجي اڳواڻن حاجي عاقيل لنجو،شريف هنگورجو،وڪيل غلام مصطفئ هنگورجو،سهراب راهمون،حاجي ثناءُالله راهمون،گۡل شير وسائيپوٽو،علي نواز مهراڻپوٽو،محسن لنجو ۽ ٻين شرڪت ڪئي، گڏجاڻي ۾ فيصلو ڪيو ويو ته اڄ ڊي سي ٿرپارڪر خلاف اسلام ڪوٽ جي ٽائون موڙ تي پرامن احتجاجي ڌرڻو هنيو ويندو،اڄ پرامن احتجاج رڪارڊ ڪرايو ويندو،انهيءَ لاءِ اسان واپاري ڀائرن کي به عرض ڪيو آهي ته اهي به اسان جو ساٿ ڏين ۽ ضرورت پئي ته شٽر بند هڙتال به ڪئي ويندي،
صوبي ۾ گيس کپت گھٽ ۽ پيداوار گھڻي آهي، گئس فراهمي ناهي ٿي: امام الدين شوقين 70 سيڪڙو گئس ڏيندڙ صوبي جي گيس بند، سنڌ واسي سراپا احتجاج آهن:شيري رحمان
اسلام آباد (بيورو رپورٽ) سينيٽ جي پيٽروليم ڪاميٽي جي اجلاس ۾ سنڌ مان چونڊيل ميمبرن 70 سيڪڙو گئس پيداوار ڏيندڙ سنڌ صوبي ۾ گيس لوڊشيڊنگ ٿيڻ تي سخت احتجاج ڪندي ان عمل کي آئين جي خلاف ورزي قرار ڏنو آهي. سنڌ جي ميمبرن پاران سئي سدرن گئس ڪمپني جي بريفنگ تي عدم اطمينان جو اظهار تفصيل موجب سينيٽر محسن عزيز جي سربراهي ۾ پيٽروليم ۽ قدرتي وسيلن بابت سينيٽ جي اسٽينڊنگ ڪاميٽي جو اجلاس ٿيو، اجلاس دوران سنڌ ۾ گئس لوڊشيڊنگ واري مامري تي غور ڪيو ويو. ڪاميٽي اجلاس ۾ احتجاج ڪندي سنڌ مان چونڊيل سينيٽر امام الدين شوقين چيو ته سنڌ ۾ ايڪسپورٽ صنعت کي گئس فراهمي بند ڪئي وئي آهي. سنڌ ۾ گيس جي کپت گھٽ ۽ پيداوار گھڻي آهي پر ان هوندي به سنڌ ۾ اڄ به گئس جي فراهمي نه ٿي آهي. پيپلز پارٽي جي سينيٽر شيري رحمان چيو ته سنڌ 70 سيڪڙو گئس جي پئداوار ڏئي ٿي. سنڌ جي گئس ڪاڏي وڃي رهي آهي. ڪراچي سميت سڄي سنڌ جا ماڻهو سراپا احتجاج آهن. گئس جو مامرو گڏيل مفادن واري ڪائونسل جو ڪيس آهي پر حڪومت آئين جي ڀڃڪڙي ڪري رهي آهي. پيپلز پارٽي جي سسئي پليجو چيو ته آئين چوي ٿو ته قدرتي گئس سميت قدرتي وسيلن جي پئداوار تي پهريون حق پئداوار ڏيندڙ صوبي جو آهي پر ائين نه ٿي رهيو آهي. هن چيو ته پهريان تحريڪ انصاف چوندي هئي ته نواز حڪومت ننڍن صوبن کي نظرانداز ڪري رهي آهي، هن وقت نواز حڪومت نه آهي پر جنهن پاليسي جو تحريڪ انصاف ذڪر ڪندي هئي اها تبديل نه ٿي آهي. سنڌ ۾ گئس لوڊشيڊنگ جي مسئلي کي فوري حل ڪيو وڃي. سئي سدرن گئس ڪمپني جي مينيجنگ ڊاريڪٽر امين راجپوت ڪاميٽيءَ کي ٻڌايو ته 115 ملين مڪعب فٽ روزاني جو شارٽ فال آهي. ڪاميٽي جي ميمبر سينيٽر شيري رحمان چيو ته سنڌ جا چلها وسامي چڪا آهن، اوهان ڪيئن ٿا چئو ته مسئلو حل ٿي ويو آهي. شيري رحمان چيو ته سنڌ حڪومت سئي سدرن جي جواب مان مطمئن نه آهي. سئي سدرن جي ايم ڊي چيو ته 660 ايم ايم سي ايف ڊي گئس گھريلو ۽ ڪمرشل شعبي کي ڏيئي رهيا آهيون. هن چيو ته زيرو ريٽڊ صنعت کي 165 ايم ايم سي ايف ڊي گئس مهيا ڪري رهيا آهيون. سئي سدرن جي مئنيجنگ ڊاريڪٽر چيو ته عام صنعت کي 75 ملين مڪعب فٽ گئس ڏني پئي وڃي. هن چيو ته 65 ايم ايم سي ايف ڊي گئس سي اين جي جي شعبي کي ملي رهي آهي. ايم ڊي چيو ته 100 ايم ايم سي ايف ڊي گئس ڪي اليڪٽرڪ کي مهيا ڪئي پئي وڃي. هن چيو ته اسان کي هڪ هفتي جي مهلت ڏني وڃي. جنهن تي سينيٽر شيري رحمان چيو ته نه، اهڙي طرح ته سيارو ئي گذري ويندو. هن چيو ته ماڻهو چئي رهيا آهن ته وٽن گئس ڪونهي ۽ سئي سدرن تفصيلن پيش ڪرڻ لاءِ هڪ هفتو گھري رهي آهي. تنهن تي ايس ايس جي سي جي سربراھ چيو ته مسئلي کي حل ڪرڻ لاءِ ڪم ڪري رهيا آهيون. هن چيو ته هن سال ڪيپٽوَ بجلي گھرن لاءِ گئس جي رسد بند ڪئي آهي. ايم ڊي چيو ته چئن ڏينهن ۾ لوڊ مئنيجمينٽ پلان تي عملدرآمد سان گھريلو گئس جي رسد وارو مسئلو حل ٿي ويندو. سينيٽر امام الدين شوقين چيو ته سنڌ گئس جي پئداوار ڏئي ٿي پر اسان کان ٻاهريان گھرايل گئس واريون قيمتون ورتيون پيون وڃن. هن چيو ته نئين ڪنيڪشنن ۾ قيمتون ڇو ٿيون وڌايون وڃن. سينيٽر امام الدين شوقين چيو ته اها سنڌ سان زيادتي آهي. ڪاميٽي جي چيئرمين سينيٽر محسن عزيز چيو ته قلات، زيارت، مستونگ ۾ گئس پريشر جو مسئلو هو اهو حل ڪيو ويو جيڪو رڳو پندرنهن ڏينهن ٺيڪ رهيو. سئي سدرن جي ايم ڊي ڇيو ته مستونگ ڏانهن ويندڙ پائيپ لائين ۾ مسئلو آهي ان کي ٺيڪ ڪيو ويندو. سئي ناردرن گئس پائيپ لائين جي مئنيجنگ ڊائريڪٽر امجد لطيف چيو ته اسان جو گئس لاسز 2014-15 ۾ 10.9 سيڪڙو هو. هن چيو ته 2016-17 ۾ اسان جو گئس لاسز 39 هزار 268 ملين مڪعب فٽ هو جيڪو 8.8 سيڪڙو ٿئي ٿو. ايم ڊي ناردرن گئس چيو ته 2016-17 ۾ پنجاب ۾ 7.31 سيڪڙو ۽ خيبرپختونخواھ ۾ 21.7 سيڪڙو لائين لاسز هئا. هن چيو ته ڪرڪ ۾ گئس چوري بابت ڪاميٽيءَ خيبرپختونخواھ جي چيف سيڪريٽري کي خط لکڻ جو فيصلو ڪيو. سئي سدرن جي ايم ڊي چيو ته بلوچستان ۾ زيارت، قلات ۾ مسئلو آهي جتي 25 هزار روپين تائين بل اچي ٿو ۽ ماڻهو اهو بل ادا نه ٿا ڪري سگھن. هن چيو ته انهن علائقن لاءِ 2000 فڪس ٽيرف جي تجويز آهي. هن چيو ته بلوچستان ۾ 49 سيڪڙو لائين لاسز آهي. ڪاميٽي جي چيئرمين چيو ته 2000 هزار جو بل سمجھ کان ٻاهر آهي.
تنگواڻي (رپورٽ:لطف سنڌي ) تنگواڻي ۾ فرينڊس ڪلب ۽ سول سوسائٽي طرفان بجاراڻي ۽ تيغاڻي قبائلي تڪرار ختم ڪرائڻ لاءِ احتجاجي ريلي ڪڍي وئي، ماشاالله هوٽل کان قاري ڪفايت الله کوسو، ابراهيم خاڪي، احمد بلوچ ، اختر حسين باجڪاڻي ، رحمدل لاشاري ، غلام حسين ڏاهاڻي ، ربڏنو ملڪ ، اسماعيل بهلڪاڻي پاران نڪتل ريلي رهبر چوڪ ، ملڪ مارڪيٽ ، سنڌڙي چوڪ ، ٺل روڊ ، اسٽيشن روڊ کان ٿيندي وين اسٽاپ وٽ پهتي جتي اڳواڻن خطاب ڪندي چيو تہ گذريل ڪيترن ئي سالن کان ڪشمور اندر نوجوانن کي ماري مائرن جون هنجون خالي ۽ معصومن کي يتيم ڪيو پيو وڃي ، هنن چيو تہ صوبائي ۽ وفاقي حڪومت سميت هتان جي بااثر سردارن کي ڌرين جي ٺاهہ لاءِ ڪوششون وٺڻ گهرجن تہ جيئن ضلعي ۾ امن امان بحال ٿي سگهي، هنن چيو تہ ايس ايس پي ڪشمور حيدر رضا ٻنهين ڌرين کي ٺاهہ ڪرڻ لاءِ راضي ڪري سگهي ٿو ، هنن چيو تہ ضلعي انتظاميہ کي تڪرار جي خاتمي تي ڪردار ادا ڪرڻ گهرجي تہ جيئن ضلعي جو امن بحال ٿي وڃي ۽ قيمتي انساني جانيون ضايع ٿيڻ کان بچي سگهن ٿيون .
اعجاز جکراڻي جي صدارت هيٺ اجلاس ۾ شهيد بينظير جي ورسي جي تيارين بابت غور ويچار
شڪارپور(رپورٽ: وحيد بروهي) 27هين ڊسمبر تي شهيد محترمه بينظير ڀٽو جي يارهين ورسي جي تيارين جي مناسبت سان توانائي جي صوبائي وزير امتياز شيخ جي ميزباني هيٺ سندس رھائش گاھ “شڪارپور هائوس” تي ڊويزنل صدر اعجاز خان جکراڻي جي صدارت هيٺ اجلاس ٿي گذريو، شڪارپور ۾ ٿيل اهم ڊويزنل اجلاس ۾ لاڙڪاڻي ڊويزن جي اهم سياسي اڳواڻن آغا سراج دراني، نثارکهڙو، سهيل انور سيال، برهان چانڊيو، نادر مگسي، جهوني سياستدان آفتاب شعبان ميراڻي سميت اهم اڳواڻن اجلاس مان غائب رهيا، جڏهن ته اجلاس ۾ ايم اين اي مير عابد خان ڀيو، پ پ پ ايم پي اي مير سهراب خان سرڪي، ايم پي اي خورشيد جوڻيجو، ايم پي اي گهنور خان اسراڻ، ڊويزنل جنرل سيڪريٽري اعجاز احمد بروهي، پ پ پ لاڙڪاڻه صدر عبدالفتاح ڀٽو، پ پ پ لاڙڪاڻه جنرل سيڪريٽري خير محمد شيخ، جنرل سيڪريٽري شڪارپور ذوالفقار علي خان ڪماريو سميت ٻين پ پ اڳواڻن شرڪت ڪئي، اجلاس ۾ شهيد بينظير ڀٽو جي ورسي جي حوالي سان ڳڙهي خدابخش ۾ 27هين ڊسمبر تي انتظامن بابت غور ويچار ڪيو ويو، جنهن بعد ڊويزنل صدر اعجاز جکراڻي پريس ڪانفرنس ڪندي چيو ته پ پ 27هين ڊسمبر تي ڳڙهي خدابخش ۾ لکين ماڻهو گڏ ڪري پنهنجو پاور شو ڪندي هن چيو ته ذوالفقار علي ڀٽو کان وٺي آصف زرداري تائين پ پ خلاف سازشون ڪندڙ ناڪام ٿيندا رھيا آھن ضياءَ، مشرف ملڪي اهم عهدن تي رهندڙن سميت پ پ مخالف قوتون ڪوششن باوجود پ پ کي ٽوڙي نہ سگھيون آھن. هڪ سوال جي جواب ۾ هن چيو ته صنم ڀٽو کي پ پ ۾ اچڻ لاء محترمه بينظير ڀٽو به چيو ھو، پر ھن سياست ۾ اچڻ کان انڪار ڪيو هو، مان نه ٿو سمجهان ته صنم ڀٽو سياست ۾ ايندي.
پنگريو(رپورٽ: علي گل کوسو) پنگريي ڀرسان ڪاري ڪامڻ ڪلور ڪري ڇڏيا، سئو ڄڻا فوت ٿي چڪا آهن جڏهن ته هڪ هزار کان وڌيڪ ماڻهو بيماري ۾ ورتل آهن. ان سلسلي ۾ پنگريو جي يونين ڪائونسل سمن سرڪار جي 8000 آبادي رکندڙ ڳوٺ بخشو خان لنڊ ۾ گندو ۽ کارو پاڻي واپرائڻ سبب ڪاري سائي جي مرض ۾ 1000 کان وڌيڪ عورتون ٻار ۽ مرد مبتلا ٿيل آهن هڪ ئي خاندان جا ٽي ڀائر درياء خان لنڊ ، خميسو لنڊ، دلاور لنڊ جڏهن تہ ٻئي خاندان جا لکاڏنو سندس پٽ ، سليمان ۽ ننهن ۽ سندس زال ،خيري ۽ سندس پٽ علي محمد ،آصمہ ، قابل ، سليمان ، روبينہ ، ،پير بخش ، شامل آهن جڏهن تہ گذريل 6 مهينن دوران لکاڏنو ،احمد .عثمان ،جمون ،اللهڏتو. گلشيرسندس زال سالار . پير بخش ۽سندس زال ، اسماعيل ، ۽ بکو، سميت 50 ڄڻا ڪاري سائي جي بيماري وگهي فوت ٿي چڪا آهن ۽ 5 سالن جي عرسي ۾ فوتين جو تعداد 100 کان مٿي ويو آهي جڏهن ته ڳوٺاڻن مشتاق احمد لنڊ حافذ محمد رمضان لنڊ ، هادي. عابد لنڊ رئيس درياءَ خان لنڊ بخش لنڊ ، حبيب . حاجي اعجاز لنڊ خدا بخش لنڊ ،جي اڳواڻي ۾ پنهنجي اخبار سان ڳالهائندي چيو تہ ڳوٺ ۾ لڳل هينڊ پمپ کارا ٿي ويا آهن جنهن سبب هتي ڪيترائي ڳوٺ واسي ڪاري ڪامڻ ۾ مبتلا آهن جڏهن انتظاميه طرفان صرف هڪ ڀيرو سڄي ڳوٺ جو وزٽ ڪري ٽيسٽون پڻ ڪيون پر علاج لاءَ ڪابه ميڊيسن نه ڏني ۽ نه ئي پي سي آر ڳوٺ واسين کي ڏني ويئي آهي جو هو پنهنجو علاج ڪرائي سگهن ڳوٺاڻن چيو تہ ڳوٺ واسي مسڪين آهن جنهن کي علاج ڪرائڻ جي سگھ ناهي هنن وزير صحت عزرہ پيچو سڪريٽري صحت سنڌ کان مطالبو ڪندي گهر ڪئي آهي تہ ڳوٺ بخشو خان لنڊ ۾ ڪاري سائي جي علاج لاءَ خصوصي ٽيم موڪلي وڃي ، ته جئين مسڪين ڳوٺ واسي هن موضي مرض مان پنهنجي جان بچائي سگهن .
ڪيس ۾ اڳوڻو پرنسپال عبدالرحيم، ايس ايم سول، ايس اوز ڪشور ڪمار ۽ ناز پروين نامزد
ڪنڌڪوٽ (رپورٽر) اسپيشل ايجوڪيش ڪنڌڪوٽ ۾ 115 جعلي ڀرتين جو انڪشاف، ذميوارن خلاف ڪيس داخل، اسپيشل ايجوڪيشن ڊپارٽمينٽ ۾ پئسن عيوض وڏي پيماني تي جعلي ڀرتيون ٿيڻ جو انڪشاف ٿيو آهي، اسپيشل ايجوڪيشن ۾ جعلي ڀرتيون 2012 ۾ ٿيون، جن ۾ چوڪيدار، پٽيوالا ۽ ٻيا شامل آهن، ڊپٽي ڊائريڪٽر اينٽي ڪرپشن جاويد احمد هاليپوٽو جي حڪم تي جعلي ڀرتين جي معاملي جو اڳوڻي پرنسپل اسپيشل ايجوڪيشن ڪشمور ڪنڌڪوٽ عبدالرحيم بهلڪاڻي،سيڪشن آفيسر ڪراچي ڊاڪٽر ڪشور ڪمار،سيڪشن آفيسر ڪراچي ناز پروين، اڳوڻي ميڊيڪل آفيسر ڪنڌڪوٽ هيرالدين گجراڻي ۽ ايم ايس ڪنڌڪوٽ سول اسپتال نظير احمد اعواڻ خلاف ڪرائيم نمبر 4، 2018 تحت ڪيس داخل ڪيو ويو آهي. ان حوالي سان سرڪل آفيسر اينٽي ڪرپشن ڪنڌڪوٽ شاهد بشير کوسو ٻڌايو ته اسپيشل ايجوڪيشن کاتي ۾ 12 کان 15 لک رپيا في آرڊر تي وٺي 115 ماڻهن کي جعلي نوڪريون ڏنيون ويون، جعلي طور ڀرتي ٿيل ملازم 2012 کان 2015 تائين پگهارون به کڻندا رهيا، جنهن ڪري سرڪاري خزاني کي ڪرڙين روپين جو نقصان ٿيو، سرڪل آفيسر جو چوڻ هو ته جعالي ڀرتيون ڪندڙ آفيسرن روپوش ٿي ويا آهن سندن جي گرفتاري لاءِ ڇاپا هنيا پيا وڃن،جلد گرفتار ڪري لوٽيل سرڪاري پئسي جو حساب ورتو ويندو.
ملير (رپورٽر) ملير جي علائقي عيدو ڳوٺ جي گورنمنٽ بوائز پرائمري اسڪول جي پٺئين پاسي ۾ رهندڙ بااثر پوليس سب انسپيڪٽر زين سولنگي پاران اسڪول طرف ويندڙ گهٽي ۾ ڀت اڏي لنگهه بند ڪري ڇڏيو آهي جنهن سبب اسڪول جا ٻارڙا توڙي رهواسي لنگهه بند هجڻ سبب پريشاني جو شڪار ٿي ويا آهن، ان حوالي سان گورنمنٽ اسڪول جي هيڊ ماستر سليمان راڄپر، ڳوٺاڻن علي محمد، وهاب، غلام علي ۽ ٻين صحافين آڏو دانهيندي چيو ته بااثر پوليس آفيسر زين سولنگي زبردستي اسڪول جي طرف ايندڙ گهٽي ۾ ڀت اڏي اچ وڃ جو رستو بند ڪري ڇڏيو آهي، جنهن سبب شاگرد ۽ شاگردياڻين کي اسڪول اچڻ ۾ سخت ڏکائين کي منهن ڏيڻو پئجي رهيو آهي، هيڊ ماستر چيو ته بااثر پوليس آفيسر 3 مهينا اڳ گهٽي بند ڪرڻ جي ڪوشش ڪئي هئي جنهن خلاف تعليم کاتي جي آفيسرن ۽ ڊسٽرڪٽ سيشن جج ملير کي درخواست ڏني وئي جنهن بعد هن وقتي طور ڪم بند ڪري ڇڏيو هو ۽ اهو يقين ڏياريو هو ته اسڪول جي گهٽي بند نه ڪئي ويندي جنهن بعد هينئر هڪ ڀيرو ٻيهر پوليس آفيسر اسڪول جي موڪل جو فائدو وٺندي رات جي پيٽ ۾ گهٽي اندر ڀت اڏي اسڪول طرف ايندڙ ويندڙ رستو بند ڪري ڇڏيو آهي، ڳوٺاڻن چيو ته ڀت اڏڻ کان منع ڪرڻ تي پوليس آفيسر اسانکي ڌمڪيون ڏئي ٿو. هنن پوليس اختيارين ۽ ڊسٽرڪٽ سيشن جج ملير کي اپيل ڪئي ته گهٽي بند ڪندڙ بااثر پوليس آفيسر خلاف ڪاروائي ڪري گهٽي ۾ اڏيل ڀت ڊاهي رستو کولرايو وڃي.
ادا تون ڪير آھين؟ اسان کي توهان سيوهڻ مان ڇو گهرايو؟ الله الله 52 ڪروڙ .32 لک ڪيڏانهن ويا ڪٿي خرچ ٿيا
VIDEO
ڪوٽڙي: اجلاس ۾ آراضي سان تعلق رکندڙ عورت ميمبر سلطان گنڀير ڪم نه ٿيڻ تي گيت ڳائيندي پنهنجي شڪايت رڪارڊ ڪرائي ته ادا تون ڪير آھين اسان کي توهان سيوهڻ مان ڇو گهرايو الله الله ، هو هو اسان کي اجلاس ۾ ڇو گهرايو ويو ،ڇو گهرايو ويو، اسان جا مسئلا حل ناهن ٿيندا ته اجلاس ۾ ڇو گهرايو ويو،اجلاس ۾ عورت ميمبر چيو ته 52 ڪروڙ .32 لک ڪيڏانهن ويا ڪٿي خرچ ٿيا اسان کي اجلاس ۾ ڇو گهرايو ويو،عورت ميمبر چيو ته اسان کي اجلاس ۾ پاڻي جي بوتل ملي ٿي پر چانھ جو ڪوپ ملي ناهي سگهيو، جنهن تي ٽاڪڙو مچي ويو.
ڪوٽڙي(ن پ ا)ڪوٽڙي سائيٽ واري علائقي چانور گودام ڀرسان نون ٺهندڙ ليبر کاتي جي فليٽن جي چوڪيداري ڪندڙ گل نواز پٽاڻ جو 12سالن جو پٽ فليٽ جي ٻئين ماڙ تي راند ڪندي کليل دري مان ڪري پيو جيڪو موقعي تي ئي فوت ٿي ويو,نينگر کي فليٽ مان ڪرئڻ بعد فوري طور وارث ڪوٽڙي جي بلاول ميڊيڪل اسپتال منتقل ڪيو جتي ڊاڪٽرن نينگر جي فوت ٿيڻ جي تصديق ڪئي ,نينگر جي فوت ٿيڻ تي وارثن ۾ ڪهرام مچي ويو ,نينگر جي والد گل نواز پٽاڻ ٻڌايو ته 2001 کان ڪوٽڙي جي نيو ليبر اسڪوائر جي فليٽن تي چوڪيدار ڪندو آھيان پٽ ٻئين ماڙ تي راند ڪري رهيو اوچتو راند ڪندي دري تان هيٺ ڪري پيو ۽ هو فوت ٿي ويو هن چيو ته پٽ جي حادثي موت سبب گهر ويران ٿي ويو ,نينگر جو والد زاروقطار دانهون ڪندو رهيو،واقعي بعد ضروري ڪاروائي کان پوء نينگر جي مائٽن لاش وصول ڪري گهر کڻائي ويا .
ڄامشورو (رپورٽر)سنڌ يونيورسٽي جي آفيسرز ويلفيئر ايسوسيئيشن جي اليڪشن ۾ فرينڊس پينل ڪامياب. سترهين گريڊ کان 20 ھين گريڊ جي آفيسرن جي ٺھيل يونين آفيسر ايسو سيشن جي چونڊ چيئرمين اليڪشن پروفيسر معشوق صديقي جي نگراني ۾ شروع ٿي، جنھن ۾ 160 آفيسرن پنھنجي ووٽ جو حق ادا ڪيو. اليڪشن ۾ 2 پينل آفيسر اتحاد ۽ آفيسر فرينڊس پينل آمھون سامهون هئا.نتيجي ۾ فرينڊس پينل جي ھڪ عهديدار خزانچي کانسوء باقي پينل ڪامياب ٿيو، جن ۾ صدر تي سيد سجاد شاھ 94 ووٽ کڻي ڪامياب ٿيو جڏهن ته اتحاد پينل جي ابراھيم ميرجت 53 ووٽ کڻي سگهيو، انکان علاوه فرينڊس پينل جي نائب صدر فيصل زمان مغل 77 ووٽ جڏهن ته اتحاد پينل جي غلام قادر سھارڻ 66 ووٽ حاصل ڪيا، جنرل سيڪريٽري فرينڊس پينل جي منظور پنھور 76 ووٽ کنيا جڏهن ته اتحاد پينل جي الھوڌايو سھتو 67 ووٽ کڻي سگهيو، جوائينٽ سيڪريٽري فرينڊس پينل جي ڪاشف ناريجو 74 ووٽ کنيا ۽ اتحاد پينل جي علي حمد ٽالپر 71 ووٽ کنيا، انکان علاوه خزانچي جي عهدي تي اتحاد پينل جي تسليم مرزا 72 ۽ فرينڊس پينل جي آفتاب قبوليو 67 ووٽ حاصل ڪيا.فرينڊس پينل جي ڪامياب ٿيل صدر سيد سجاد شاهه پنهنجي اخبار سان ڳالهائيندي ٻڌايو آهي ته اسان اڳ به آفيسرز ايسوسيئيشن ۾ رهي آفيسرز جي مسئلن کي حل ڪيو آهي، هن ڀري به جن دوستن اسان تي اعتماد ڪري اسان کي کٽرايون آهي انهن کي ڪڏهن به مايوس نه ڪنداسين.
جيڪب آباد(رپورٽ: عبدالغني کوسو) جيڪب آباد آل پاڪستان ڪلارڪس ايسوسيئيشن جي مرڪزي سڏ تي ڊي اي او سيڪنڊري آفيس کان تالا ھڻي ڪري مطالبن جي مڃتا لاءِ ملازمن نصر الله ڊومڪي، محمد مراد سومرو، مجيد سرڪي، سجاد سومرو، دولت جکراڻي، ممتاز ڪناسرو، الطاف پنھور، شبير کوسو، محمد علي لاشاري، سعيد ڀٽو ۽ ٻين جي اڳواڻي ريلي ڪڍي جيڪا ڊي سي چوڪ پھتي ملازمن چارٽر آف ڊيمانڊ جي منظوري لاءِ نعريبازي ڪئي ملازمن مطالبو ڪندي چيو ته ڪلارڪس ڪيڊر کي ٽائيم اسڪيل ڏنو وڃي تمام ڪلارڪس ڪيڊر جي رھيل اپ گريڊيشن ڪئي وڃي ھنن وڌيڪ چيو ته سرڪاري ملازمن جا اسڪيل روائيز ڪري %100 پگھار وڌائي وڃي ڪلارڪن جي اولاد لاءِ %50 ڪوٽا مقرر ڪئي وڃي تمام لوڪل گورنمينٽ ملازمن جون پگھارون ٽريزري معرفت ڏنيون وڃن ھنن چيو ته سرڪاري ملازمن جو ڪٽوتي ڪيل گروپ انشورنس جا پئسا رٽائرمينٽ وقت ادا ڪيا وڃن سرڪاري ملازمن جا بينئول فنڊ جا پئسا ادا ڪيا وڃن سڀني سرڪاري ملازمن جون بند ڪيل پگھارون کوليون وڃن ته انھن جي گھر ۾ فاقا ڪشي ختم ٿئي سرڪاري ملازمن ۾ وڌندڙ بي چيني ختم ڪئي وڃي مطالبا نه مڃيا ويا سڄي سنڌ ۾ تحريڪ ھلائي ويندي.
