ڪوٽڙي: صنعتي زون ۾ مقامي ماڻھن لاء پڻ نوگو ايريا بڻيل آھي، ڪارخانن ۾ ڪم ڪندڙ اڪثريت پورھيتن جي پنجاب جي مختلف شھرن مان گھرايل پورھيتن جي ھجي ٿي جڏھن ته مقامي پورھيت لاء اڪثر ھتان جي ڪارخانن جا گيٽ بند ھجن ٿا. ھوڏانھن پنھنجي حقن جي حاصلات ۽ سالن کان ڪم ڪندڙ پورھيتن کي پڪو ڪرڻ لاء وڏي تعداد ۾ پورھيت ڊي سي ڄامشورو ۽ ليبر آفيسرن وٽ دانھيندا رھن ٿا پر سندن ڪو به داد رسي نه ٿي ٿئي، سائيٽ جي ڪارخانن ۾ ڪم ڪندڙ عورت پورھيت مختيار چهواڻ، آزاد قادر پنهور ، وفا بلوچ، شوڪت خاصخيلي ، ممتاز علي ۽ ٻين ٻڌايو ته گذريل 6 سالن کان ھڪ ڪاٽن جي ڪارخاني ۾ ٺيڪيداري نظام ھيٺ ڪم ڪريون ٿا 8 کان 10 ڪلاڪ روزانو پورھيو ڪرڻ جي موٽ ۾ 500 روپيه ڏھاڙي ادا ڪئي وڃي ٿي. ھنن موجب ٺيڪيداري نظام تحت ٺيڪيدار ھر ھفتي پئسن جي ادائيگي ڪري ٿو جيڪڏھن بيماري سبب ھو موڪل ڪندا آھيون ته ڏھاڙي ڪٽي ويندي آھي ھنن جو چوڻ ھو ته ٺيڪيدار جڏھن به چاھي ڪم کان جواب ڏئي ڇڏي ٿو باقي سالانه بونس پڪو ٿيڻ علاج وغيره ڪرائڻ سميت ڪا به سھولت مھيسر نه آھي جيڪڏھن ڪو به پورھيت بيمار ٿي پوندو آھي ته ھو پنھنجي خرچ تي علاج ڪرائيندو آھي. مل جو ڪارڊ وغيره به نه ڏنو ويندو آھي، 18 سالن کان گھٽ عمر جي پورھيتن فرقان شيخ، علي رضا سومرو، سرمد سولنگي ۽ ٻين ٻڌايو ته غربت سبب ڪارخانن ۾ ڪم ڪريون ٿاڦٽين جي ڪارخاني ۾ رنگ کاتي ۾ ڪم ڪريون ٿا جتي ٺيڪيدار 8 ڪلاڪ ڪم ڪرائي 500 روپيه ڏھاڙي ڏيندو آھي جڏھن ته 12 ڪلاڪ عيوض 750 روپيه ملندا آهن، ڪارخانن ۾ ڪم دوران معذور ٿيل پورھيت خالد پنهور، احسان احمد ۽ ٻين ٻڌايو ته ڦٽين جي ڪارخانن ۾ ڪم ڪندا هئاسين. رات جي شفٽ ۾ ڪم ڪندي ھٿن جون آڳريون ۽ ھٿ اچانڪ مشين ۾ اچي ويا جنھن سبب معذور ٿي وياسون. ھنن جو چوڻ ھو ته مل انتظاميا رڳو نالي ماتر علاج ڪرايو پر ڪو به معاوضو ادا ڪرڻ بنا گھرن ڏانھن روانو ڪري ڇڏيو ۔مهيني ۾ 1500 روپيه ڏنا ويندا آهن، پورھيت اڳواڻن اڪبر ميمڻ، امجد مستوئي، ظهير ميراڻي ۽ ٻين جو چوڻ ھو ته ڪارخانن ۾ ليبر قانون تي عمل نه پيو ڪيو وڃي. اڪثر ڪارخانن ۾ ٺيڪداري راڄ قائم آھي جنھن ڪري پورھيتن کي ڪو به قانوني حق نٿو ملي ھنن چيو ته ڪارخانن ۾ يونين سازي تي پابندي لڳل آھي 2012 جي نئين ليبر آرڊيننس تي به عمل نٿو ڪيو وڃي۔ جيڪڏھن ليبر قانون تي عمل ڪيو وڃي ته پورھيتن کي سمورا حق ملي سگھن ٿا، رابطي ڪرڻ تي وڪيل منصور احمد چنه ٻڌايو ته ڪارخانن ۾ ليبر قانون تي عمل نه ڪرڻ قانون جي سنگين ڀڃڪڙي آھي ننڍي عمر جي ٻارن کان پورھيو وٺڻ پڻ قانوني ۽ اخلاقي ڏوهه آھي، ليبر ڊائريڪٽر ڄامشورو عبدالصمد سومرو جو چوڻ ھو ته جيڪو به پورھيت شڪايت کڻي اچي ٿو ان جي درخواست تي قانوني قدم کڻون ٿا، ٺيڪيداري نظام سميت ليبر قانون تي عمل ڪرائڻ لاء مل انتظاميا کي ليٽر لکيا آھن ۽ انھن کي ليبر قانون تي عمل ڪرڻ لاء سختي سان ھدايتون ڏنيون آھن، ڪوٽڙي ايسوسيئشن آف ٽريڊ اينڊ انڊسٽري جي اڳوڻي چيئرمين خليل بلوچ ٻڌايو ته هي سنڌ جو ٻئي نمبر وڏو صنعتي زون آھي هزارين پورهيت ڪم ڪن ٿا، قانون موجب کين سهولتون فراهم ڪرڻ اسان جو فرض آھي، بجلي، گيس مهانگي هئڻ سبب ڪيترائي مسئلا پيش اچن ٿا، روڊ رستن سميت ٻيون سهولتون نه هئڻ ڪري ٻاهران انويسٽر نه ٿا اچن وفاقي توڙي صوبائي حڪومت کي ڪيترائي ڀيرا لکيو آهي پر ڪو به ڪم نه ٿو ٿئي پورهيتن کي مڪمل تحفظ ۽ حق ڏنا وڃن ٿا، ڊپٽي ڪمشنر ڄامشورو ڪيپٽن (ر) فريد الدين مصطفيٰ رابطي ڪرڻ تي چيو ته ضلعي ڄامشورو ۾ قائم ڪارخانه ليبر قانون تي عمل ڪرڻ جا پابند آھن، جيڪو به ليبر قانون جي ڀڃڪڙي ڪندو ان خلاف ڪاروائي ڪئي ويندي.
مقامي ماڻهن لاءِ روزگار جا در بند، پنجاب مان ماڻهو گهرائي ڀرتي ڪيا ويا
پڪو ڪرڻ جون شڪايتون ڊي سي ۽ ليبر آفيسر پڻ نظرانداز ڪرڻ لڳا
ڇهن سالن کان ڪم ڪريون پيا پڪو ناهي ڪيو ويو: پورهيت
”ٺيڪيداري نظام“ ڪوٽڙي سائيٽ جي فيڪٽريز ۾ ڪم ڪندڙ پورهيت بنيادي حقن کان محروم
150 ڪارخانن مان 130 اڃا به هلندڙ، ٺيڪيداري نظام سبب پورهيتن کي ڪي به حق ملي نه سگهيا
مختلف ڪارخانن ۾ ڪم ڪندڙ پورهيتن کي سوشل سيڪيورٽي، اولڊ ايج بينيفٽ سميت ڪي سهولتون نه مليون
ڪوٽڙي )رپورٽ: مجيد پنهور( ڪوٽڙي سائيٽ 1962 ۾ ٻن فيز تي 2175 ايڪڙن تي مشتمل 150 مان ھن وقت 130 جي ننڊا وڏا ڪارخانه هلندڙ آهن ۔ جن ۾ 25 ھزار کان مٿي پورھيت ڪم ڪن ٿا قائم ٿيل انھن ڪارخانن ۾ اڪثريت ڦٽين، جيننگ، سگريٽ، چمڙو، سرف، تارون، بيٽريون، آئل، ڪاغذ، ٽرانسفارمر، هارڊ بورڊ، پکا، چانور، موٽرسائيڪل آئل ۽ اٽي جا ڪارخانا شامل آھن جن ۾ ڊيلي ويجز ۽ ٺيڪيداري نظام رائج ھجڻ سبب ڪيترن ئي سالن کان ڪم ڪندڙ پورھيت به پڪا ٿي نه سگھيا آھن جڏھن ته ليبر قانون موجب جيڪو به پورھيت ٽن مھينن تائين ڪنھن به ڪارخاني ۾ پورھيو ڪري ٿو ان کي پڪو ڪرڻ لازمي ھجي ٿو پر ھتي پڪو ڪرڻ ۽ ٻيا حق گھرڻ تي پورھيتن کي نوڪرين کان برطرف ڪيو ٿو وڃي. ليبر قانون تي عمل نه ٿيڻ ڪري پورھيت پڪو ٿيڻ سان گڏ رٽائرمينٽ، پينشن، گريجوئيٽي، سالانه بونس، موڪلن، علاج، تعليم، نياڻين جي شادي لاء ڏاج فنڊ ۽ ٻين بنيادي حقن کان مرحوم آھن. سنڌ حڪومت پورھيت جي گهٽ ۾ گهٽ پگھار 16 ھزار روپيه مقرر ڪرڻ جو اعلان ڪيو ھو پر ان تي به ڪٿي ڪٿي عمل ٿي نه سگھيو آھي. ڦٽين جي ڪارخانن ۾ ڪم ڪندڙ اڪثريت ننڍن ٻارن ۽ عورتن جي ھجي ٿي جن کان گھٽ معاوضي تي ڪم ورتو پيو وڃي. ھڪ اندازي موجب ڪوٽڙي جي ڪارخانن ۾ ٽي کان چار هزار ننڍا ٻار ۽ ٻن ھزارن جي لڳ ڀڳ عورتون پورھيو ڪن ٿيون جيڪي دز سبب ٽي بي، ساھ ۽ گلي جي ڪينسر ۾ وڪوڙجي وڃن ٿا جن جو علاج نالي ماتر ڪرائي کين نوڪرين کان جواب ڏنو وڃي ٿو. ٻئي پاسي ڪارخانن ۾ يونين سازي تي پابندي ھجڻ سبب پورھيت پنھنجن حقن لاء ڪو به آواز اٿاري نه ٿا سگھن. اڪثر ڪارخانن ۾ انتظاميان پاران پاڪيٽ يونين ٺاھيل ھجن ٿيون جيڪي پورھيتن بجاء مل مالڪن جي ترجماني ڪن ٿيون ۔ جڏهن ته ڦٽين جي ڪارخانن ۾ ڪم ڪندي پورھيتن جا ھٿ ۽ آڳريون ھٿ ۽ ٻانھن مشينن ۾ اچڻ سبب ڪٽجي وڃن ٿا اهڙن پورھيتن کي قانون مطابق مڪمل علاج ڪرائي معاوضو پڻ ادا ڪرڻو ھجي ٿو پر ھتي متاثر ٿيل پورھيتن جو نالي ماتر علاج ڪرائي کين بنا معاوضي گھرن ڏانھن روانو ڪيو وڃي ٿو سنڌ جي ھن ٻئي وڏي صنعتي زون ۾ ليبر ڊاريڪٽر ۔ ليبر آفيسر سميت ليبر عملدار مقرر ھجن ٿا پر اھي پورھيتن جي ڪا به داد رسي ڪرڻ بجاء مل مالڪن سان ملي ڀڳت ڪري پورهيت لاء ڪو به قدم نه ٿا کڻن.
سنڌ اين ايف سي لاءِ ميمبر نامزد ڪيو آھي : اسد عمر
اسلام آباد )رپورٽر)آخرڪار سنڌ درڪار اين ايف سي ڪميشن لاءِ ميمبر نامزد ڪري ڇڏيو آھي سنڌ صوبي مان نامزدگي بعد وفاقي ناڻي وزارت اٺين اين ايف سي ايوارڊ ڏيڻ لاءِ ڏھين اين ايف سي ڪميشن قائم ڪرڻ لاءِ سمري صدر ڊاڪٽر عارف علوي کي اماڻي ڇڏي آھي ناڻي وزير اسد عمر صحافين سان ڳالهائيندي چيو آھي ته سنڌ صوبي مان نامزدگي ملي آھي اين ايف سي ڪميشن قائم ڪرڻ لاء سمري صدر کي اماڻي آھي جيئن صدر اين ايف سي ڪميشن قائم ڪري ٿو ،اين ايف سي ڪميشن جو فوري اجلاس طلب ڪيو ويندو هن چيو ته مان ارڙھين ترميم جي حق ۾ آھيان آئين تحت صوبن جو وسيلن ۾ موجود حصو گهٽ نٿا ڪري سگهون پر تمام وڏا خرچ هاڻي به وفاق جي ذمي آھن ارڙھين ترميم تحت جيڪي شعبا صوبن کي مليا آھن انهن تي صوبن کي خرچ ڪرڻ گهرجي ان حوالي سان اين ايف سي ڪميشن ۾ صوبن سان گالھ ٻول ٿيندي ياد رهي ته سنڌ صوبي کان سوا باقي ٽي صوبا اين ايف سي ڪميشن ۾ پهنجا ميمبر نامزد ڪري چڪا ھئا رڳو سنڌ صوبي مان نامزدگي باقي هئي جيڪا ٿي وئي آھي.
مٺي ۾ بک ۽ بدحالي وڌيڪ ٽن ٻارڙن کان حياتي کسي ورتي
مٺي(رپورٽر) سول اسپتال مٺي ۾ خوراڪ جي کوٽ ۽ مختلف بيمارين وگهي وڌيڪ ٽي ٻارڙا موت جو شڪار ٿي ويا آھن. جنهن کان پوءُ هلندڙ مهيني فوتي ٻارڙن جو انگ 50 ٿي ويو ۽ هلندڙ سال ٻارن جي فوتگين جو انگ 620 تي پهچي ويو آهي. تازو فوت ٿيل 3 ٻارڙن ۾ 18 مهينن جو ڀيرجي، 17 مهينن جو مدن ۽ چار سالن جو سلمان ساهڙ شامل آھن. اسپتال ۾ وڌيڪ ٻ 40 ٻارڙن کي ميل نيوٽريشن ۽ نرسري وارڊن ۾ داخل ڪيو ويو آھي . جنهن کان پوءُ اسپتال داخل ٻارن جو انگ 60 ٻڌايو وڃي ٿو.
اومني گروپ ۽ خانگي پاور پلانٽس کي سبسڊي ڪيئن ملي؟: دلچسپ حقيقت پڌري
ڪراچي)رپورٽر)اومني گروپ ۽ ٻين نجي پاور پلانٽس کي سبسڊي ڪيئن ملي،دلچسپ حقيقتون آڏو اچي ويون،پي ٽي آءِ جي سنڌ اسيمبلي جي ميمبر خرم شير زمان نجي پاور پلانٽس کي سبسڊي ڏيڻ جو ٺهراءُ منظور ڪرايو جڏهن ته پيپلز پارٽي جي ڪنهن ميمبر اومني گروپ ۽ ٻين پاور پلانٽس کي سبسڊي ڏيڻ جو ٺهراءُ پيش ڪرڻ کان انڪار ڪيو هو،ڪيپٽو پاور پلانٽس کي سبسڊي ڏيڻ جو ٺهراءُ 16 مئي 2017ع تي سنڌ اسيمبليءَ ۾ پيش ڪيو،ذريعن موجب صوبائي وزير ناصر شاهه سان اڪيلائي ۾ ملاقات کان پوءِ خرم شير زمان اهڙي قرارداد پيش ڪئي هئي، انهيءَ حوالي سان سوال اٿي رهيا آهن ته خرم شير زمان اومني گروپ ۽ پاور پلانٽس کي سبسڊي ڏيارڻ جي جو ٺهراءُ پيش ڪرڻ لاءِ ڇا ڪا ڊيل ڪئي هئي؟سنڌ اسيمبليءَ 3 جولاءِ 2017 ع تي نجي پاور پلانٽس کي سبسڊي ڏيڻ جو ٺهراءُ منظور ڪيو هو،14 جولاءِ تي ان وقت جي گورنر محمد زبير بل جي مخالفت ڪئي جنهن بعد 24 جولاءِ 2017 تي ساڳيو ئي ٺهراءُ ٻيهر منظور ڪيو ويو،پي ٽي آءِ جي ميمبر خرم شير زمان ڪنهن به مرحلي تي بل جي مخلافت نه ڪئي هئي
گئس بحران:ڪراچي جي صنعتڪارن پاران سومر کان صنعتون بند ڪرڻ جو اعلان
سومر تي هڪ به صنعت نه کلندي،اڱاري تي گورنر هائوس آڏو احتجاج ڪبو: صنعتڪار
ڪراچي)رپورٽر)ڪراچي جي صنعتڪارن گئس بحران خلاف سومر تي صنعتون بند ڪرڻ جو اعلان ڪري ڇڏيو آهي،نجي ٽي وي سان ڳالهائيندي ڪراچي سائيٽ ايريا صنعتڪار ايسوسيئيشن جي صدر جو چوڻ هو ته گئس بحران سبب صنعتڪارن کي روزانو ٻن کان پنجن ارب روپين جو نقصان ٿي رهيو آهي،هن چيو ته سومر کان ڪراچيءَ ۾ سموريون صنعتون بند ڪيون وينديون،سومر تي هڪ به صنعت نه کلندي،هن چيو ته اڱاري تي گورنر هائوس ڪراچي آڏو احتجاج ڪيو ويندو،هن جو وڌيڪ چوڻ هو ته گئس جي بحران ڪري صنعتڪارن کي سخت نقصان ٿي رهيو آهي.
راجا خان مھر آصف زرداري کي 4 ڀلوڙ اٺ سوکڙي طور ڏنا
خانپور مھر: گھوٽڪي ضلعي جي ياترا تي آيل اڳوڻي صدر آصف زرداري کي پ پ ايم پي اي علي نواز عرف راجا خان مھر 4 ڀلوڙ اٺ تحفي ۾ ڏنا. واضح رھي تھ مھر سردار وٽن ايندڙ مھمانن کي ڀلوڙ نسل جا اٺ، گھوڙا ۽ ڳئون تحفي طور ڏيندا رھندا آھن.
مانجهند ڀرسان ڪار ڊرائيور جي ڪنٽرول مان نڪري وئي،هڪ فوت،3 زخمي
ڄامشورو (رپورٽر) انڊس هاءِ وي مانجهند شهر ۾ ڪار ڊرائيور جي ڪنٽرول مان نڪري کاهي ۾ ڪري پئي، حادثي جي نتيجي ۾ قاسم آباد واسي سلمان مهر فوت ٿي پيو، جڏهن ته ٽي ڄڻا فهيم عمراڻي، شهزاد ۽ سيد طالب شاهه شديد زخمي ٿي پيا،فوتي ۽ زخمين کي تعلقه مانجهند منتقل ڪيو ويو.
جيڪب آباد ڀرسان ٻه موٽرسائيڪلون ٽڪرائجي ويون،پيءُ فوت،ٻه پٽ زخمي
جيڪب آباد)رپورٽر)جيڪب آباد ڀرسان شمبي شاھ لڳ ٻه موٽرسائيڪلون ٽڪرائجي ويون،هڪ ڄڻو فوت ۽ ٻه ڄڻا زخمي ٿي پيا،صدر ٿاڻي جي حد شنبي شاھ لڳ ٻن موٽرسائيڪلن ۾ آمھون سامھون ٽڪر ٿي پيو ٽڪر جي نتيجي ۾ 50 ورهين جو عبداللطيف جکراڻي موقعي تي فوت ٿي ويو، جڏهن ته سيف الدين ۽ قمرالدين جکراڻي شديد زخمي ٿي پيا،علائقي واسين لاش ۽ زخمين کي سول اسپتال پهچايو،جتي زخمين جو علاج ڪيو پيو وڃي اطلاع ملڻ تي فوتي ۽ زخمين جا وارث اسپتال پھتا لاش کڻائي ڪري پنهنجي ڳوٺ روانا ٿي ويا ،صدر پوليس جي اھلڪار رابطي ڪرڻ تي ٻڌايو ته حادثو اسان جي حد ۾ ناھي ٿيو ،بلوچستان جو حد آهي اھا پوليس وڌيڪ ڪاروائي ڪندي ٻي پاسي فوتي ۽ زخمي پاڻ ۾ پيءُ پٽ آھن جن جو تعلق بلوچستان جي ٻڌائي پئي وڃي.
انساني حقن لاءِ جاکوڙيندڙ عورتن جي مسئلن لاءِ ريپڊ ريسپانس نيٽ ورڪ قائم
ڪلثوم ڀٽي فوڪل پرسن مقرير،نيٽ ورڪ ۾ صحافي، وڪيل ۽ پوليس عملدار شامل
معاشري مان تشدد جي خاتمي لاءِ سڀني کي اڳتي اچڻو پوندو: امداد انڙ
حيدرآباد)رپورٽ؛ فقير سليم) حيدرآباد ۾ انساني حقن لاءِ جاکوڙيندڙ عورتن توڙي مردن کي درپيش مسئلن ۾ مدد لاءِ وڪيلن، صحافين ۽ سول سوسائٽي جي نمائندن تي مشتمل ريپڊ ريسپانس نيٽورڪ قائم ڪيو ويو آهي، سماجي تنظيم ڊي سي ايچ ڊي پاران هڪ مقامي هوٽل ۾ ڪوٺايل گڏجاڻي ۾ مختلف ڌرين شرڪت ڪئي، گڏجاڻي ۾ ڳالهائيندي نغمه شيخ چيو ته انساني حقن جي خلاف ورزي جي خلاف هونئن ته سڀئي جاکوڙ ڪريون پيا، پر انهن جاکوڙيندڙ ماڻهن کي درپيش مسئلن ۽ انهن جي قانوني توڙي اخلاقي مدد جي ضرورت آهي، انهي نيٽ ورڪ جي قيام لاءِ اسين چاهيون ٿا ته حيدرآباد جا مختلف با شعور ماڻهو گڏ ٿين
ڊيموڪريٽڪ ڪميشن فار هيومن ڊيولپمينٽ جي ڪوآرڊينيٽر ڪلثوم ڀٽي چيو ته اسان وٽ سڀ کان ڏکيو ڪم ڪنهن متاثر جي مدد ڪرڻ آهي، هتي ناانصافين جا ڪيترائي ڪيس سامهون اچن ٿا، انهن جي خلاف مرد آواز اٿارين ته انهن کي ڪيترائي مسئلا درپيش آهن، پر عورتون انهن کان وڌيڪ پريشاني کي منهن ڏين ٿيون، عورتن کي ته هڪ ٻاهر جا خطرا ته ٻيو وري سندن گهر جا به ڪيترائي مسئلا درپيش آهن، ته هن وقت اهڙي نيٽورڪ جي ضرورت آهي جيڪو انهن ماڻهن جي مدد ڪري،.
ڊسٽرڪٽ بار حيدرآباد جي صدر امداد انڙ چيو ته ڪنهن به سماجي خدمت دوران متاثر ٿيندڙ هيومن رائٽس ۽ وومين رائٽس ڊفينڊر کي مفت ۾ قانوني مدد فراهم ڪرڻ لاءِ ڊسٽرڪٽ بار تيار آهي، اسان وٽ جيڪو به صدر هوندو اهو انهي نيٽورڪ جو رضاڪاراڻا ميمبر هوندو، هن چيو ته هن نيٽورڪ ۾ ميڊيا، پوليس ۽ عورتن جي حقن لاءِ جاکوڙيندڙ گڏجي جدوجهد ڪندا ته معاشري مان تشدد جو خاتمو اچي سگهي ٿو،
وومين ڊيولپمينٽ جي ڪمپلينٽ سيل جي انچارج قرت العين شاه چيو ته اسان وٽ جيڪي ادارا اڳي سرڪاري طور عورتن جي مدد لاءِ ميدان ۾ آهن، انهي جو اسٽاف به غير محفوظ آهي، کين عدالتن جا چڪر ڪاٽڻا ٿا پون، ضلعي ڪائونسل جي ميمبر زيب النساءِ ملاح چيو ته اسان وٽ اسان جي ڳوٺ ۾ عورتن تي تشدد کي روڪڻ لاءِ لڙاڪو نيٽورڪ موجود آهي، جنهن ۾ شامل مرد ۽ عورتون پنهنجي ڳوٺ ۾ عورتن تي تشدد خلاف آواز اٿاريندا آهن ۽ انهن جي مدد ڪندا آهن، ته جيڪڏهن ماڻهو ڪنهن به مسئلي جي حل لاءِ عملي طور ميدان ۾ ايندو ته ڪاميابي پري ناهي،
ايڇ آر سي پي جي انچارج غفرانا آرائين چيو ته عورتن تي تشدد ته وڏو مسئلو آهي پر جيڪي ماڻهو کنڀجي وڃن ٿا،انهي جي مالڪي جي به ضرورت آهي، انهي نيٽورڪ سان انهن ماڻهن جي مدد ٿي سگهي ٿي جيڪي جبري گمشدگين خلاف آواز اٿارين ٿا، رافيعه بنگش چيو ته اسان وٽ عورتن جي لاءِ شيلٽر هوم آهي، اتي ايندڙ عورتن جا وارث عدالتن ۾ وڃي اسان جي خلاف ڪيس داخل ڪرائين ٿا. گڏجاڻي ۾فرزانه پنهور، پرڀو ستياني، دارلامان جي شبنم عزيز، ايڊووڪيٽ صبا عروج، فضل چانڊيو، سيد صدر حسين، سوشل ويلفئير کاتي جو منير احمد ڀٽي، ظفر احمد برني، منصور ڏاهري، وومين پروٽيڪشن سيل ماروي اعواڻ، ابرار اعواڻ، شاهده پنهور، رقيه بنگش، منير آصف. سنيئر صحافي جئه پرڪاش موراڻي ۽ ٻيا به موجود هئا
بالي ووڊ جو ليجنڊ قادر خان بيماري وگھي وينٽيليٽر تي منتقل
ممبئي (شوبز ڊيسڪ) بالي ووڊ جو ليجنڊ اداڪار قادر خان کي سخت بيماري ۽ ساهه کڻڻ جي ڏکيائي سبب وينٽيليٽر تي منتقل ڪيو ويو آهي.
ورسٽائل اداڪار قادر خان ڊگهي عرصي کان بيمار رهڻ بعد هاڻي سندس طبيعت ويتر خراب ٿي وئي، کيس ڳڻتي جوڳي حالت ۾ اسپتال منتقل ڪيو ويو آهي.
ڀارتي ميڊيا موجب قادر خان بيماري سبب ڳالهائڻ ٻولائڻ بند ڪري ڇڏيو آهي، جڏهن ته کيس نمونيا بيماري به ظاهر ٿي رهي آهي.
هوڏانهن ميڊيا سان ڳالهائيندي قادر خان جي پٽ سرفراز ٻڌايو ته سندس پيءُ کي هلڻ ڦرڻ ۾ ڏکيائي ٿئي ٿي، هو هلڻ وقت هيٺ ڪرڻ کان ڊڄندو هو. هن چيو ته گذريل سال بابا جي گوڏن جو آپريشن به ٿيو هو، پر هن هلڻ ڦرڻ کان انڪار ڪري ڇڏيو هو، جنهن بعد سندس طبيعت ويتر خراب ٿيڻ لڳي.
سرفراز احمد اميد ظاهر ڪئي ته سندس والد جلد صحتياب ٿي ويندو.
اي سي ايل ۾ شامل ڪيل 172 نالن ۽ عھدن جي مڪمل فهرست
اسلام آباد (رپورٽ: ايم بي سومرو) مني لانڊرنگ بابت جاچ جندڙ جي آءِ ٽي جي رپورٽ تحت وفاقي سرڪار جن 72 اهم شخصيتن جي نالا اي سي ايل ۾ شامل ڪيا آهن. اُهي هيٺين ريت ترتيبوار ڏنا ويا آهن.
عبدالغني انصاري، اومني گروپ جي عبدالغني مجيد، پنڪ ريزيڊنسي جي عبدالجبار، سنڌ واسي عبدالمومن ڏاهري، چاچڙ اينڊ سنسز جي عبدالقدوس چاچڙ، ابوبڪر، عديل شاهه راشدي، آفتاب حسين پٺاڻ، توانائي جي سيڪريٽري آغا واصف، احسن احسن، سمٽ بينڪ جي صدر احسن رضا دراني، سنڌ بينڪ جي صدر احسن طارق، ايڪسيئن سنڌ ڪول اٿارٽي علي اڪبر ابڙو، ايس اِي سي پي جي ايگزيڪيوٽو ڊائريڪٽر علي عظيم اڪرام، اومني گروپ جي علي ڪمال مجيد، ايم پي اي علي نواز مهر، عامر پٽ محمد الياس، ڪمرشل اينڊ ريٽيل جي سربراهه عامر صديقي، امجد آفتاب ۽ اومني گروپ جي سربراهه انور مجيد خواجا جا نالا اي سي ايل ۾ شامل ڪيا ويا.
اشفاق احمد لغاري، ٿڌاڻي انٽرپرائيزز جي اشوڪ چتر ٿڌاڻي، اشرف ڊي بلوچ ڪنسٽرڪشن جي شهزاد جتوئي، اڳوڻي صدر ۽ ايم اين اي آصف علي زرداري، حوالا ڊيلر بشارت محمود، سنڌ بينڪ جي صدر بلال شيخ، پ پ چيئرمين ۽ ايم اين اي بلاول ڀٽو زرداري، دائود خان، دائود مورڪس، احسان علي چوڌري، احسن الاهي، سيد عامر شهزاد، فهد حسين، فهد سلطان احمد، فرمان علي، ايم پي اي فريال ٽالپر، غلام حسين، غلام مصطفيٰ ميمڻ، سيڪريٽري لينڊ يوٽلائيزيشن غلام مصطفيٰ ڦل، غلام قادر، غلام النبي، حافظ ربنواز اينڊ ڪمپني جي حافظ ربنواز، حاجي مريد اڪبر، حاجي سراج دين سومرو، حماد شاهد، حارس اينڊ ڪمپني جي حارس ۽ سي اي او ايس ٽي ڊي سي حسن رضا عباسي جا نالا اي سي ايل ۾ وڌا ويا.
چيئرمين پي ڊي ايس آءِ ڊي حسن ميمڻ، سمٽ بينڪ جي سربراهه حسين لوائي، عمران حيدر، عمران خان پٽ ظهير خان، عمران منصور علي جيواڻي، سنڌ جي توانائي جي وزير امتياز شيخ، مدني ٽي وي جي اقبال احمد خان، عرفان سليمان، جگديش جڳديش، نياز محمد خان اينڊ برادرس جي جهانزيب خان، جسوت ڪمار، ڪامران علي، ڪنول ڪمار، ڊپٽي ڪمشنر ملير قاضي جان محمد، خالد حسين، خالد مسعود چنا، اومني گروپ جي چيف آفيسر خواجا ايم سلمان يونس، خدا بخش ڪرٽيو، خرم نياز، سي اي سو ايم اي ڪنسلسٽنٽ خورشيد جمالي، پنڪ ريزيڊنسي جي اسلم قريشي، ايم عمير، گئليڪسي ڪسنٽرڪشن جي ڊاڪٽر دنشا، مجين فاطمه، بحريه ٽائون جي سربراهه ملڪ رياض، ڊي جي ايس بي سي اَي منظور قادر ڪاڪا، مسعود نقوي، مسعود الحسن، نيشنل بينڪ جي هيڊ ڪارپوريٽيڊ مسعود ڪريم شيخ، مئراج، محمد منعاف، سنڌ بينڪ جي مينيجر ثروت عظيم، محمد افضل، محمد احسن، محمد اعجاز هارون، محمد اڪمل، ايم اي سي انجنيئرنگ محمد علي چنا جا نالا اي سي ايل جي فهرست ۾ شامل آهن.
اومني گروپ جو محمد عارف خان، محمد اسد علي، نور محمد مغل جو پُٽ محمد اشرف مغل، محمد آصف، محمد فيصل پُٽ عبدالحبيب، محمد حنيف پُٽ شڪور، اومني جو ملازم محمد حسن بروهي، محمد عمران، محمد اقبال، ودود انجنيئرنگ جو محمد طيب اقبال، اوسز ڊرلنگ ڪارپوريشن جو محمد جهانگير يوسف، محمد جلال، محمد جاويد علوي، سنڌ بئنڪ جو مئنيجر محمد اختر احمد، محمد مشتاق پُٽ عبدالعزيز، محمد نعيم، سمٽ بئنڪ جو آپريشن مئنيجر محمد ناصر شيخ، محمد قدير، محمد رديف قريشي، محمد رفيق قريشي، محمد رشيد، محمد ساجد، محمد شبير، محمد شهزاد عالم، محمد سهيل، محمد طاهر محمود، محمد يوسف، وسيم بلڊرز جو محمد وسيم، محمد ياسين، پارڪ لين پرائيويٽ لميٽيڊ جو محمد يونس ڪدوائي، محمد يوسف، محمد يوسف عباسي پُٽ فجو خان عباسي، پنڪ ريزيڊنسي جو محمد يوسف ايڌي، ايم پي اي مڪيش چاولا، اومني گروپ مصطفيٰ ذوالقرنين ماجد، پيرامائونٽ بلڊرز جو نديم احمد خان، سنڌ بئنڪ جو گروپ هيڊ ڪريڊٽ نعيم الطاف ۽ نيشنل بئنڪ آف پاڪستان جو سربراهه نديم انور الياس جا نالا شامل ڪيا ويا آهن.
نديم حاڪم الدين مانڊوي والا، رياض لالجي، نويد اقبال، اومني گروپ جي نازلي مجيد، اومني گروپ جو نمر مجيد خواجه، ايڊيشنل سيڪريٽري فنانس نثار احمد شيخ، اڳوڻو وڏو وزير قائم علي شاهه، رائو محمد خالد، صاحبزاده ذيشان رحمان، سيف الدين، ٽيڪنومين ڪائنيٽڪس پرائيويٽ لميٽڊ جو سيد آصف محمود، سجاول خان، ساجد حسين، ساجد عباسي، سلمان سلمان، سيڪريٽري لينڊ يوٽيلائيزيشن ثاقب سومرو، سردار احمد، سعد سُمير، شبير وزير خان، شاهد علي، شاهد علي پُٽ محمد سلطان، شهزاده ڪامران انصاري، شيخ فيض الرحمان پُٽ شيخ منصور الحق، سراج شاهد پُٽ محمد شاهد، ايم پي اي سهيل انور سيال، سيڪريٽري فنانس سهيل راجپوت، نيشنل بئنڪ جو صدر سيد علي رضا، ٽيڪنومين ڪائنيٽڪس پرائيويٽ لميٽيڊ سيد عارف علي، سيد اسد عباس زيدي پُٽ توقير حسين زيدي، سيد ڪاشف رضا پُٽ سيد علي نقي اعجاز، وڏو وزير مراد علي شاهه، سيد نصرت علي پُٽ سيد ثروت علي، علي حسن زرداري پُٽ مير خان زرداري، ايس ٽي ڊي سي ڊائريڪٽر سيد شاهنواز نادر، سيڪريٽري انڊسٽريز سيد ضمير حيدر، ٽيڪنومين ڪائنيٽڪس اومني جو سيد زيشان علي وارسي، طٰحه رضا پُٽ نقي رضا، ايس اي سي پي جو وقت چيئرمين طاهر محمود، ايم بي سي اينڊ سنز جو طارق عزيز چنا، طارق بيگ پُٽ مرزا رب بخش، اي ون انٽرنيشنل جو طارق سلطان، ووڊ انجنيئرنگ جو سي اي او عذير تحسين، سمٽ بئنڪ جو ظهير اسماعيل، ذيشان احمد پُٽ محمد اقبال ۽ ميمبر آر اينڊ ايس (بي او آر) ۽ ايگزيڪيوٽو ڊائريڪٽر ايس اي سي پي عابد حسين جا نالا شامل ڪيا ويا آهن.
سنڌ ۾ فارورڊ بلاڪ ٺهي پيو، مراد علي شاهه استعيفا ڏئي: وفاقي وزير
سنڌ مان مني لانڊرنگ ۾ وڏو گند نڪتو، مراد علي شاهه کي استعيفا ڏيڻ گهرجي:شيخ رشيد
پ پ ۾ فارورڊ بلاڪ ٺهي پيو، (فيصل واوڊا) اي سي ايل ۾ نالا وجهڻ ايگزيڪيوٽو جو فيصلو آهي عدليا جو نه:فواد چوڌري
لاهور/ ڪراچي (م ڊ) وفاقي وزير وڏي وزير مراد علي شاهه کان استعيفيٰ جو مطالبو ڪري ڇڏيو، سنڌ ۾ جلد فارورڊ بلاڪ ٺهڻ جي دعويٰ، لاهور ۾ ريلوي واري وفاقي وزير شيخ رشيد فيصل واوڊا سان گڏ پريس ڪانفرنس دوران اهم مطالبو ڪيو، شيخ رشيد چيو آهي ته ڪو شرم هوندو آهي، ڪو حيا هوندو آهي، مراد علي شاهه کي هاڻي استعيفيٰ ڏيڻ گهرجي، ايترو وڏو گند نڪتو آهي، ايترو بدبودار مواد نڪتو آهي جو شهيد ذوالفقار علي ڀٽو جي مزار به اڄ ڳوڙها ڳاڙي رهي آهي، هن چيو ته هنن چورن کي 7 سال سزا ملي، اسانجي ڪرپشن ثابت ٿئي ته 14 سال سزا ملڻ گهرجي، اسان چاهيون ته هر ان شخص جي جاچ ٿيڻ گهرجن جا احتساب عدالت ۾ ڪيس آهن، هن چيو ته بلاول جي تقرير تي گهڻو پريشان آهيان، منهنجو خيال هو ته هو وڏو ٿي ويو آهي پيءُ جي پچ تي نه کيڏندو، پيءُ جي سياست جي واٽ نه وٺندو پر آصف زرداري پٽ کي استعمال ڪري رهيو آهي، هن چيو ته آصف زرداري جو ته جيل ٻيو گهر آهي، هن جي ڏوهن ۾ پي ايڇ ڊي ٿيل آهي، زرداري جا پوري دنيا جي ڏوهارين سان رابطا آهن، اها ڳالهه آئون ذميواري سان چوان ٿو پر آصف زرداري بلاول کي استعمال پيو ڪري، جنهن تي افسوس آهي، شيخ رشيد چيو ته هنن ملڪ لٽيو آهي، هر طرف بک ۽ بدحالي آهي، ان موقعي تي فيصل واوڊ ڳالهائيندي چيو ته پيپلزپارٽي ۾ فارورڊ بلاڪ ٺهي سگهي ٿو، ماڻهو رابطي ۾ آهن، هن چيو ته نوازشريف عدليا ۽ فوج کي بدنام ڪيو، نواز مودي جو وڏو دوست آهي، ايل او سي تي فائرنگ ۾ به نوازشريف ملوث هو، ڊان ليڪس ياد آهي، هن ڪراچي ۾ امن امان جي صورتحال تي ڳالهائيندي چيو ته علي رضا عابدي جي واقعي تي افسوس آهي، ڪراچي ۾ امن امن کي هر صورت ۾ يقيني بڻايو ويندو، دهشتگرن کي انجام تائين پهچائينداسين. هن چيو ته ڪراچي ۾ ڪجهه ماڻهن کي واڇ ڪري ٻيهر اٿارڻ جي ڪوشش ڪئي وئي پر اها ناڪام ٿي، شهر جو امن خراب ٿيڻ نه ڏنو ويندو، هوڏانهن سڌ سماءَ واري وفاقي وزير فواد چوڌري چيو آهي ته نواز ۽ زرداري جي ڪرپشن جو ڪاٿو تمام وڏو آهي، هنن حڪومتي اختيارن کي غلط استعمال ڪري پئسا ٺاهيا ويا، وفاقي وزير فواد چوڌري هڪ نجي ٽي وي چينل سان ڳالهه ٻولهه ڪندي چيو ته ي سي ايل ۾ نالو شامل ڪرڻ ايگزيڪٽو جو فيصلو آهي، عدليا جو نه، نالا اي سي ايل ۾ شامل ڪرڻ جي سفارش رڳو ايف آءِ اي نه پر جي آءِ ٽي جي آهي، گهرو وزارت جي ذريعي ايجنسي نالا اي سي ايل ۾ شامل ڪرڻ جي سفارش ڪئي، هن چيو ته انويسٽيگيشن ايجنسيون فيصلو ڪنديون آهن ته نالو اي سي ايل ۾ شامل ڪرڻو آهي يا نه، هن چيو ته پي ٽي آءِ اڳواڻن خلاف نيب جا وڏا ڪيس ناهن، ٻن وزيرن الزام تي استعيفيٰ ڏئي ڇڏي.
فيض گنج ڀرسان ڳوٺاڻن پاران انڌي ٻلهڻ کي بلا سمجهي مارڻ جي ڪوشش
فيض گنج )رپورٽر) فيض گنج لڳ پنڌرهو واهه جي آرڊي نمبر 40کان 45 آرڊي جي وچ ۾ ڳوٺاڻن پاران واهه ۾ انڌي ٻهلڻ ڏٺي وئي آهي ڳوٺاڻن موجب لاڳتو ٽن ڏينهن کان انڌي ٻهلڻ واهه ۾ موجود آهي جنهن کي ڳوٺاڻن بلا سمجهي مارڻ جي پڻ ڪوشش ڪئي پر هو واهه ۾ هجڻ ڪري بچي وئي آهي،علائقي جي سڄاڻ ڌرين پاران انڌي ٻهلڻ جي موجود هجڻ بعد وائلڊ وائف کاتي سکر کي اطلاع ڪيو، اطلاع تي جهنگلي جيت کاتي جا عملدار ڄاڻا يل هنڌ پهچي ويا جن آرڊي 40 کان 45آرڊي تائين ٻهلڻ کي تلاش ڪيو، پر هو هٿ اچي نه سگجهي آهي جنهن بعد وائلڊ لائف کاتي جا عملدار واپس ٿي ويا آهن واضح رهي ته ڪجه ڏينهن اڳ ۾ ڳوٺاڻن ٻه انڌي ٻهلڻ ساڳي هنڌ ڏسي وائلڊ وائف وارن کي اطلاع ڪيو هو جن ٻئي ٻهلڻ هٿ ڪري سکر کان سنڌو درياه حوالي ڪيون هنيون جڏهن ته واهه ۾ انڌي ٻهلڻ جي موجودڳي واري افواهن بعد علائقي جا ڪيترائي ماڻهو ڄاڻايل هنڌ تي پهچي ويا
اوگرا پاران پيٽرول ساڍا 9 ۽ ڊيزل 15 رپيا لٽر سستو ڪرڻ جي سفارش
لائيٽ اسپيڊ ڊيزل 2 رپيا ۽ گاسليٽ 25 پئسا سستو ڪرڻ جي تجويز
اوگرا پاران سمري وفاقي سرڪار حوالي، فائنل منظوري ناڻي وزارت ڏيندي
اسلام آباد (رپورٽر) اوگر پيٽرول ساڍا 9 رپيا في ليٽر سستو ڪرڻ جي سفارش ڪري ڇڏي، اوگرا جنوري کان پيٽروليم شين جي اگهن ۾ ۾ 15 رپين تائين لاٿ جي سفارش ڪري ڇڏي آهي، اها سمري وفاقي سرڪار کي اماڻي وئي آهي، اوگرا طرفان اماڻيل سمري ۾ هاءِ اسپيڊ ڊيزل جي قيمت ۾ 15 رپين گهٽائي جي سفارش ڪئي وئي آهي، جڏهن ته لائيٽ اسپيڊ ڊيزل جي قيمت ۾ 2 رپيا، گاسليٽ جي قيمت ۾ 25 پئسا گهٽتائي جي سفارش ڪئي وئي، ناڻي واري وزارت 31 ڊسمبر تائين پيٽروليم قيمتن بابت فيصلو ڪندي.