آپريشن شروع ڪندي ئي هٿياربندن فائرنگ شروع ڪري ڏني: ايم ڊي اي عملدار
ڪراچي (رپورٽر) ڪراچي ۾ حددخلين خلاف آپريشن تي شهرين جو سخت رد عمل اچڻ شروع ٿي ويو آهي.ا ن حوالي سان آپريشن ڪندڙ سرڪاري ٽيم تي قبضا مافيا حملوڪيو ويو آهي. تيسر ٽائون ۾ پيش آيل واقعي سبب سرڪاري ٽيم زمين آجي نه ڪرائي سگهي. ايم ڊي اي جي اسسٽنٽ ڊائريڪٽر پنهنجي بيان ۾ چيو آهي ته آپريشن شروع ڪندي ئي هٿياربندن فائرنگ شروع ڪري ڏني، جنهن سبب ڇڪتاڻ پيدا ٿي وئي، قبضا مافيا طرفان جاين کي باهه ڏني وئي، جڏهن ته حملي ۾ 3 ڄڻا زخمي ٿيا. ايم ڊي اي اختيارين موجب سپريم ڪورٽ جي حڪم تي آپريشن ڪيو پيو وڃي، سوين ايڪڙ زمين تي مافيا جو قبضو آهي، زمين آجي ڪرائڻ لاءِ ٺوس قدم کڻڻا پوندا.
ڪراچي ۾ حددخلين خلاف آپريشن ڪندڙ ٽيم تي حملو، فائرنگ
تيسر ٽائون ۾ واقعو پيش آيو، سرڪاري زمين آجي نه ٿي سگھي
واريل بيت المقدس ۾ اسرائيلي فوج هٿان 3 فلسطيني شهيد
فلسطينين پاران احتجاج دوران اسرائيلي فوج جي فائرنگ ۾ ڪيترائي زخمي
احتجاج دوران فلسطينين ۽ اسرائيلي فوج وچ ۾ ڇڪتاڻ دوران فائرنگ ڪئي وئي
غزه (ا ڊ) والاريل فلسطين ۾ اسرائيلي فوج جو ظلم جاري آهي ۽ غزه پٽي ۾ اسرائيلي فوج فائرنگ ڪندي 3 فلسطينين کي شهيد ڪري ڇڏيو جڏهن ته ڪيترائي زخمي ٿي پيا. فلسطيني اسرائيلي فوج خلاف احتجاج ڪري رهيا هئا ته ڇڪتاڻ وارو ماحول پيدا ٿي ويو، جنهن دوران اسرائيلي فوج هٿين خالي فلسطينين مٿان فائرنگ شروع ڪري ڏني. فائرنگ دوران هڪ صحافي پڻ زخمي ٿي پيو آهي. گذريل ڇهه مهينن دوران اسرائيلي فوج هٿان مارجي ويلن جو انگ 238 ٿي ويو آهي.
لاهور ۾ ايڊن گارڊن سوسائٽي متاثرن جو وزير اعظم جي گهر ٻاهران مظاهرو
لاهور(م ڊ) ايڊن گارڊن جي ڪيترن ئي متاثرن زمان پاڪ ٻاهران حتجاجي مظاهرو ڪندي مطالبن جي حق ۾ نعريبازي ڪئي، احتجاج سبب زمان پارڪ جي روڊن تي ٽريفڪ جام ٿي وئي. احتجاج جي ڪري ڪينال روڊ تي گاڏين جون ڊگهيون قطارون لڳي ويون ڪنهن به اڻ وڻندڙ صورتحال کي منهن ڏيڻ ۽ مظاهرو ڪندڙن کي وزير اعظم جي گهر زمان پارڪ جي اندر وڃڻ کان روڪڻ جي لاءِ پوليس جي ڳري نفري مقرر ڪئي وئي هئي. جڏهن ته ڀرپاسي وارن روڊن تي ٽريفڪ جو دٻاءُ وڌي ويو جنهن سبب شهرين کي سخت ڏکيائين منهن ڏيڻو پيو ۽ منٽن جو سفر ڪلاڪن ۾ طئي ٿيو.
گهوٽڪي جي يوسي عمر ڊهو جي چيئرمين جي چونڊ سڀاڻي ٿيندي ،
پ پ جي ڄام دلاور لکڻ ۽ آزاد اميدوار ڄام راشد لکڻ مقابلو
گهوٽڪي (رپورٽر) گهوٽڪي جي يونين ڪائونسل عمر ڊهو جي چيئرمين جي خالي ٿيل سيٽ تي ننڍي چونڊ سڀاڻي آچر ڏينهن ٿي رهي آهي پيپلز پارٽي جي اميدوار ڄام دلاور لکڻ ۽ آزاد اميدوار ڄام راشد لکڻ وچ ۾ زبردست مقابلي جو امڪان آهي ڊسٽرڪٽ اليڪشن ڪمشنر گهوٽڪي امين بشير قريشي موجب ننڍي چونڊ لاء 9 پولنگ اسٽيشنون ۽ 32 پولنگ اسٽيشن بوٿ قائم ڪري 79 ڄڻن کي پولنگ عملي طور مقرر ڪيو ويو آهي جڏهن ته 10 هزار537 ووٽر پنهنجي ووٽ جو حق استعمال ڪندا جنهن ۾ مرد ووٽرن جو تعداد 6205 ۽ عورت ووٽرن جو انگ 4332 آهي هوڏانهن يونين ڪائونسل عمر ڊهو جي چيئرمين جي چونڊ لاء 180 پوليس اهلڪار ۽ 40 رينجرز اهلڪار مقرر ڪيا ويا آهن جڏهن ته ستن ايس ايڇ اوز ۽ هڪ ڊي ايس پي کي چونڊ مرحلي جي نگراني لاء مقرر ڪيو ويو آهي ياد رهي ته يونين ڪائونسل جي چيئرمين ڄام منظور لکڻ ڪجه مهينا اڳ پنهنجي عهدي تان استعيفا ڏني هئي جنهن بعد اليڪشن ڪميشن پاران چونڊ شيڊول جاري ڪيو ويو هو چيئرمين جي سيٽ تي ستن اميدوارن پنهنجا نامزدگي فارم جمع ڪرايا هيا جنهن بعد ٻيا اميدوار اڳ ۾ ئي هٿ کڻي ويا هئا.
ڪوٽ لالو واسي نوجوان دبئي ۾ روڊ حادثي سبب فوت
مڱيا موري جو رهواسي غلام مرتضيٰ شر 12 سالن کان دبئي ۾ هو
اطلاع ملڻ تي فوتي جي وارثن ۾ ڪهرام متل، علائقي ۾ سوڳ ڇانئجي ويو
ڪوٽ لالو(رپورٽ: رياض خاصخيلي) ڪوٽ لالو واسي نوجوان دبئي ۾ روڊ حادثي سبب فوت ٿي ويو آهي. ان سلسلي ۾ ٻڌايو پيو وڃي ته ڪوٽ لالو لڳ منگياموري جو رھواسي 37 ساله غلام مرتضى شر ٻارنھن سالن کان دبئي ۾مزدوري ڪندو ھيو جيڪو ڪالهه دبئي ۾ روڊ حادثي ۾ فوت ٿي ويو فوتي کي ھڪ نياڻي جو اولاد ھو اچانڪ فوت ٿيڻ جو اطلاع ملڻ تي سندس گھر ۾ ڪھرام مچي ويو جڏهن ته پورو علائقو سوڳوار بڻيل آهي.
ڪراچي جي مختلف علائقن ۾ گئس جو پريشر گهٽجي ويو،رڌ پچاءُ ۾ ڏکيائيون
ڪراچي (اسٽاف رپورٽر )ڪراچي جي مختلف علائقن ۾ گھريلو گيس جو پريشر گھٽجي ويو، رڌ پچاءُ ڪندڙ عورتون سخت پريشان، ان حوالي سان ڪالهه شام کان رات دير تائين خاص طور تي گلشن اقبال، سچل ڳوٺ، سفوران واري علائقي ۽ صدر جي ڪجهه علائقن ۾ گھريلو گيس جو پريشر معمول کان گھٽجي وڃڻ سبب رڌ پچاءُ وارين عورتن کي سخت ڏکيائي پيش آئي. ان سلسلي ۾ شهرين جو چوڻ آهي ته گيس جو پريشر معمول موجب آڻي تڪليفن کان بچايو وڃي.
يوٽرن مٿان يوٽرن، پي ٽي آءِ جو ڏکڻ پنجاب سيڪريٽريٽ بابت اعلان به واپس
ايندڙ سال پهرين جولاءِ کان ڏکڻ پنجاب جي ڌار انتتظامي سيڪرٽريٽ جو اعلان ڪيو ويو هو
لاهور (م ڊ) حڪمران پارٽي تحريڪ انصاف جي آفيشل ٽوئيٽر اڪائونٽ تان ڏکڻ پنجاب سيڪريٽريٽ بابت اعلان هٽائي ڇڏيو. تحريڪ انصاف جي آفيشل ٽوئٽر اڪائونٽ تان ڪيل ٽوئيٽ ۾ ايندڙ سال پهرين جولاءِ کان ڏکڻ پنجاب جي الڳ انتظامي سيڪريٽريٽ جو اعلان ڪيو هو. ٽوئيٽ ۾ اهو به چيو ويو هو ته ڏکڻ پنجاب جو الڳ چيف سيڪريٽري ۽ الڳ آءِ جي پوليس به مقرر ڪيا ويندا جڏهن ته ڏکڻ پنجاب جي ترقياتي بجيٽ به سندس پاڻ وٽ هوندو. ميڊيا تي اهڙي خبر نشر ٿيڻ کانپوءِ پي ٽي آءِ آفيشل ٽوئيٽر اڪائونٽ تان ڄاڻايل ٽوئيٽ ڊليٽ ڪري ڇڏي آهي.
فرانس ۾ برفباري ٻلي کي به رقص ڪرڻ تي مجبور ڪري ڇڏيو
ٻلي جي برفباري مان مزو وٺڻ واري وڊيو سوشل ميڊيا تي وائرل
سيزن ۾ پهريون ڀيرو ٻلي برف باري ڏٺي ته جهومڻ شروع ڪري ڇڏيو
پيرس (دلچسپ) فرانس ۾ ٻلي برف باري ڏسڻ کانپوءِ جهومڻ لڳي جنهن جي وڊيو انٽرنيٽ تي تمام گهڻي وائرل ٿي رهي آهي. سڄي دنيا ۾ برف باري کي جتي ماڻهو لطف اندوز ڪن ٿا، اتي جانور به خوشي جو اظهار ڪرڻ کان رهي نٿا سهگهن، اهڙو ئي اظهار فرانس ۾ هڪ ٻلي ڪيو. فرانس جي ان ٻلي جڏهن پهريون ڀيرو برف ڏٺي ته جهومڻ لڳي، ٻلي کي پڪڙڻ لاءِ مالڪ به ڪوششون ڪرڻ لڳو، جنهن دوران ڏسڻ وارا به خوش ٿيندا رهيا.
فٽبال راند جا 2 وڏا نالا ڪاڪا ۽ لوئيس فيگو جنوري ۾ پاڪستان ايندا
اسلام آباد (اسپورٽس ڊيسڪ) برازيل جو فٽبال اسٽار ڪاڪا ۽ پرتگال جو اڳوڻو ڪپتان لوئيس فيگو ايندڙ مهيني پاڪستان ايندا.
لوئيس فيگو ۽ ڪاڪا کي اپريل ۾ ٿيندڙ دوستاڻي ميچ بابت اعلان لاءِ جنوري پاڪستان اچڻو هو، پر کين ويزا حاصل ڪرڻ ۾ ڏکياين کي منهن ڏسڻو پيو هو.
هوڏانهن خانگي ٽي وي سان ڳالهائيندي سڌ سماءَ جي وفاقي وزير فواد چوڌري چيوته ويزا درخواست رد نه پر واپس ٿي هئي، ٻنهي رانديگرن کي هڪ ٻن ڏينهن ۾ ويزا جاري ڪئي ويندي.
معاشي بحران جي خاتمي لاءِ درآمدي شين تي پابندي لڳائڻ جي تجويز
معيشت زوال جو شڪار آهي، زراعت ۽ صنعتون سخت تڪليف ۾ آهن:قيصر بنگالي
ڊالر جي قيمت ۾ اضافو درآمد گھٽجڻ سبب ٿيو آهي،درآمدي شين تي پابندي لڳائڻي پوندي
ڪراچي (اسٽاف رپورٽر ) مُلڪ ۾ معاشي بحران جو ذميوار پرويز مشرف قرار، معاشي ماهر ڊاڪٽر قيصر بنگالي سرڪار کي تجويز ڏيندي چيو آهي ته معاشي زوال پُڻي مان نڪرڻ لاءِ درآمدي شين تي پابندي لڳائڻ گھرجي. معاشي ماهر ڊاڪٽر قيصر بنگالي چيو آهي ته پاڪستان جي معيشت زوال جو شڪار آهي. جنهن سبب معيشت دوست زراعت ۽ صنعتون سخت تڪليف ۾ آهن. هن چيو ته تجارت ان وقت ئي ممڪن هوندي جڏهن پيداوار ٿئي. پيداواري جا وسيلا گھٽجڻ سبب ايڪسپورٽ به زوال جو شڪار بڻجي ويندي. نيشنل ليبر ڪونسل جي مشاورتي اجلاس ۾ ڳالهائيندي ڊاڪٽر قيصر بنگالي وڌيڪ چيو ته اسان جي آبادي جي اضافي واري شرح 2.5 ۽ ليبر فورس ۾ اضافي جي شرح 3.5 سيڪڙو آهي. ڊاڪٽر قيصر بنگالي وڌيڪ چيو ته ڊالر جي قيمت ۾ اضافو درآمد گھٽجڻ ۽ برآمد وڌڻ سبب ٿيو آهي. جنهن سبب حڪومت کي درآمدي شين تي پابندي لڳائڻي پوندي. هن چيو ته مُلڪ ۾ معيشت جي بحران جا اهم ڪارڻ اڳوڻي صدر پرويز مشرف ۽ شوڪت عزيز جون پاليسيون آهن. ان موقعي تي ڊاڪٽر رياض احمد شيخ چيو ته پاڪستان وجود ۾ اچڻ کان وٺي اڄ تائين سرمائيدار طبقو قابض آهي. هن چيو ته مُلڪي تعليم ۽ صنعتن ۾ سرمائيدار وڏي رڪاوٽ آهن. هن چيو ته پاڪستان جي خارجه پاليسي اڪيلائي جو شڪار آهي. پاڪستان کي گھرجي ته پاڙيسري مُلڪن سان تجارت ڪري. ان موقعي تي پائلر اڳواڻن ڪرامت علي ۽ ٻين پڻ شرڪت ڪئي.
شهباز شريف سميت 13 جوابدارن خلاف ضمني ريفرنس داخل
ريفرنس ۾ بلال قدوائي، شاهد شفيق، منير ضياءَ، ڪامران ڪياني ۽ ٻيا به شامل
شهباز شريف آشيانه اسڪينڊل ۾ قومي ناڻي کي ڪروڙن جو نقصان ڏنو: ريفرنس جو متن
اسلام آباد (م ڊ) قومي احتساب بيورو آشيانه هائوسنگ اسڪينڊل ۾ ضمني ريفرنس داخل ڪري ڇڏيو، ريفرنس ۾ شهباز شريف سميت 13 جوابدارن کي نامزد ڪيو ويو آهي. نيب آشيانه هائوسنگ اسڪينڊل ۾ احتساب عدالت ۾ ضمني ريفرنس داخل ڪيو آهي. ريفرنس ۾ موقف اختيار ڪيو ويو آهي ته شهباز شريف آشيانه هائوسنگ اسڪينڊل م قومي ناڻي کي ڪروڙين رپين جو نقصان پهچايو آهي. ريفرنس ۾ شهباز شريف سميت 13 جوابدارن کي نامزد ڪيو ويو آهي. ٻين جوابدارن ۾ بلال قدوائي، شاهد شفيق، منير ضياءَ، ڪامران ڪياني، احد چيما، چوڌري صادق، شاهد محمود به شامل آهن.
حڪومت اچڻ وقت سعودي سان لاڳاپا سٺا نه هئا: شاهه محمود
شڪيل آفريدي جي بدلي عافيه جي آزادي جو ڳالهيون غلط آهن: پرڏيهي وزير
حڪومت سعودي عرب ۽ يو اي اِي سان لاڳاپا بهتر ڪري ورتا آهن
ملتان( م ڊ) پرڏيهي وزير شاهه محمود قريشي انڪشاف ڪيو آهي ته اسان جي حڪومت اچڻ وقت سعودي سان لاڳاپا سٺا نه هئا، جڏهن ته شڪيل آفريدي جي بدلي عافيه صديقي جي آزادي واريون خبرون بي بنياد ۽ ڪوڙيون آهن. ملتان ۾ ميڊيا سان ڳالهائيندي پرڏيهي وزير شاهه محمود قريشي جو چوڻ هو ته آءِ ايم ايف کي اسان شرطن ۾ لچڪ ڏيکارڻي پوندي، اسان کي گهڻيون ڏکيون حالتون مليون آهن، جڏهن اسان آياسين ته سعودي عرب سان تلخيون هلي رهيون هيون پر هاڻ سعودي حڪومت 3 ارب ڊالر پاڪستان کي ڏيڻ جو فيصلو ڪيو آهي. هن چيو ته متحده عرب امارات سان به گرم جوشي نه پئي وٺي وڃي پر عمران خان يو اي اِي جو دورو ڪيو ۽ انهن جو وفد هتي آيو، ڪم جي لاءِ جاءِ ڏٺي ۽ رپورٽ پيش ڪئي، ايندڙ هڪ کان 2 مهينن ۾ يو اي اِي جو سربراهه پاڪستان جو دورو ڪرڻ جي خواهش رکي ٿو، اِهو بهترين پرڏيهي پاليسي جو ثبوت آهي. پرڏيهي معاملن جي حوالي سان آئون اِهو چئي سگهان ٿو ته تبديلي اچي ناهي رهي پر اچي وئي آهي. پرڏيهي وزير جو چوڻ هو ته پاڪستان افغانستان ۾ امن جي لاءِ ڪوششون ڪندو رهندو، افغانستان گڏجي ويهڻ جو فيصلو ڪيو آهي پر اصل فيصلو اُتي جي عوام جو آهي ته ڇا هو گڏجي ويهڻ چاهي ٿي؟ آمريڪا به پنهنجي پاليسي تي نظرثاني ڪئي آهي ۽ شرطن کان سواءِ ڳالهين جو آغاز ڪيو آهي، طالبان جي ڪجهه ماڻهن کي ماحول سازگار بڻائڻ جي لاءِ آزاد ڪيو ويو آهي. هن چيو ته والاريل ڪشمير ۾ مسلسل ڀارتي جارحيت جاري آهي، پاڪستان ان مسئلي کي هر فورم تي کنيو، عمران خان يو اين جي سيڪريٽري جنرل سان به ڳالهيون ڪيون آهن هو ڪشميرين جي حق خود اراديت جي لاءِ پنهنجو ڪردار ادا ڪري ۽ وادي ۾ انساني جي سنگين ڀڃڪڙين کي روڪيو وڃي.
شاهد مسعود کي ضمانت نه ملي، هاءِ ڪورٽ درخواست رد ڪري ڇڏي
اسلام آباد(بيورو رپورٽ) اسلام آباد هاءِ ڪورٽ پي ٽي وي ڪرپشن ڪيس ۾ گرفتار ڊاڪٽر شاهد مسعود جي ضمانت واري درخوسات رد ڪري ڇڏي. تفصيل موجب اسلام آباد هاءِ ڪورٽ ۾ ڊاڪٽر شاهد مسعود جي ضمانت واري درخواست جي ٻڌڻي ٿي. جسٽس محسن اختر پي ٽي وي ڪرپشڻ جو فيصلو ٻڌائيندي شاهد مسعود جي ضمانت واري درخواست خارج ڪري ڇڏي. اسلام آباد هاءِ ڪورٽ 20 ڊسمبر تي پي ٽي وي ڪرپشن ڪيس ۾ ڊاڪٽر شاهد مسعود جي ضمانت واري درخواست تي فيصلو محفوظ ڪيو هو. ڊاڪٽر شاهد مسعود کي گذريل مهيني 23 نومبر تي ضمانت واري درخواست خارج ڪرڻ بعد اسلام آباد هاءِ ڪورٽ جي اڱڻ مان گرفتار ڪيو ويو هو. وفاقي جاچ اداري ايف آءِ اي جي موجب ڊاڪٽر شاهد مسعود تي مبينا طور تي 3 ڪروڙ 80 لک جي بدعنواني جو الزام آهي.
ڀڄي ناهيان ويو، نياڻين سان ملڻ آمريڪا ۾ آهيان: خواجه آصف
اسلام آباد (م ڊ) اڳوڻي وفاقي وزير ۽ مسلم ليگ ن اڳواڻ خواجه آصف پرڏيهه ڀڄي وڃڻ جي افواهن کي بي بنياد قرار ڏيندي چيو آهي ته مان پنهنجي نياڻين سان ملاقات لاءِ آمريڪا ۾ آهيان ۽ جلد ئي وطن واپس اچي ويندس. هڪ خانگي ٽي وي چئنل سان ڳالهائيندي خواجه آصف چيو ته مان هن وقت آمريڪا ۾ موجود آهيان جتي پنهنجي نياڻين سان ملڻ لاءِ آيو آهيان. هن چيو ته ميڊيا تي هلندڙ خبرون بي بنياد آهن ۽ جلد ڏيهه واپس اچي رهيو آهيان. افواهه آهن ته نيب جي گرفتاري کان بچڻ لاءِ خواجه آصف ٻن هفتن کان پرڏيهه ۾ ترسيل آهي.
سياست جنگ جي ميدان جو ڏيکاءُ ڏئي رهي آهي: چوڌري نثار
اسلام آباد (بيورو رپورٽ) اڳوڻي گهرو وزير چوڌري نثار چيو آهي ته ملڪ ۾ سياست جنگ جي ميدان جو نظارو ڏيکاري رهي آهي، حڪومت ۽ اپوزيشن هڪٻئي سان سهڪار ڪن. اسلام آباد ۾ صحافين سان ڳالهائيندي چوڌري نثار چيو ته موجوده سياسي حالتون ملڪ جي ترقي، استحڪام ۽ مستقبل لاءِ خطرو آهن، هن چيو ته آمريڪا ۽ طالبان ۾ ڳالهيون هاڪاري اڳڀرائي آهي پر ڳالهين کي حڪومت کي بنا جواز ڪريڊٽ کڻڻ کان پاسو ڪرڻ گهرجي، ڇو ته سڀاڻي جيڪڏهن معاملا اڳتي نه وڌيا ته سڄو الزام پاڪستان تي مڙهيو ويندو. هن چيو ته اپوزيشن کي گهرجي ته حڪومت کي ڪارڪردگي ڏيکارڻ جو موقعو ڏئي ۽ حڪومت جو به اهو فرض آهي ته اپوزيشن کي ساهه کڻڻ ڏئي، نالي ماتر احتساب ذريعي سياسي جماعتن کي ختم نٿو ڪري سگهجي، احتساب جي اهميت ۽ ساک تڏهن بحال ٿي سگهندي جڏهن اهو بنا فرق ۽ بنا امتياز هجي.